| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২১৭. তিচীৰরানুজাননা
217. Ticīvarānujānanā
৩৪৬. অথ খো ভগৰা রাজগহে যথাভিরন্তং ৰিহরিত্ৰা যেন ৰেসালী তেন চারিকং পক্কামি। অদ্দস খো ভগৰা অন্তরা চ রাজগহং অন্তরা চ ৰেসালিং অদ্ধানমগ্গপ্পটিপন্নো সম্বহুলে ভিক্খূ চীৰরেহি উব্ভণ্ডিতে 1 সীসেপি চীৰরভিসিং করিত্ৰা খন্ধেপি চীৰরভিসিং করিত্ৰা কটিযাপি চীৰরভিসিং করিত্ৰা আগচ্ছন্তে, দিস্ৰান ভগৰতো এতদহোসি – ‘‘অতিলহুং খো ইমে মোঘপুরিসা চীৰরে বাহুল্লায আৰত্তা । যংনূনাহং ভিক্খূনং চীৰরে সীমং বন্ধেয্যং, মরিযাদং ঠপেয্য’’ন্তি। অথ খো ভগৰা অনুপুব্বেন চারিকং চরমানো যেন ৰেসালী তদৰসরি। তত্র সুদং ভগৰা ৰেসালিযং ৰিহরতি গোতমকে চেতিযে। তেন খো পন সমযেন ভগৰা সীতাসু হেমন্তিকাসু রত্তীসু অন্তরট্ঠকাসু হিমপাতসমযে রত্তিং অজ্ঝোকাসে একচীৰরো নিসীদি। ন ভগৰন্তং সীতং অহোসি। নিক্খন্তে পঠমে যামে সীতং ভগৰন্তং অহোসি। দুতিযং ভগৰা চীৰরং পারুপি। ন ভগৰন্তং সীতং অহোসি। নিক্খন্তে মজ্ঝিমে যামে সীতং ভগৰন্তং অহোসি। ততিযং ভগৰা চীৰরং পারুপি। ন ভগৰন্তং সীতং অহোসি। নিক্খন্তে পচ্ছিমে যামে উদ্ধস্তে অরুণে নন্দিমুখিযা রত্তিযা সীতং ভগৰন্তং অহোসি। চতুত্থং ভগৰা চীৰরং পারুপি। ন ভগৰন্তং সীতং অহোসি। অথ খো ভগৰতো এতদহোসি – ‘‘যেপি খো তে কুলপুত্তা ইমস্মিং ধম্মৰিনযে সীতালুকা সীতভীরুকা তেপি সক্কোন্তি তিচীৰরেন যাপেতুং। যংনূনাহং ভিক্খূনং চীৰরে সীমং বন্ধেয্যং, মরিযাদং ঠপেয্যং, তিচীৰরং অনুজানেয্য’’ন্তি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘ইধাহং, ভিক্খৰে, অন্তরা চ রাজগহং অন্তরা চ ৰেসালিং অদ্ধানমগ্গপ্পটিপন্নো অদ্দসং সম্বহুলে ভিক্খূ চীৰরেহি উব্ভণ্ডিতে সীসেপি চীৰরভিসিং করিত্ৰা খন্ধেপি চীৰরভিসিং করিত্ৰা কটিযাপি চীৰরভিসিং করিত্ৰা আগচ্ছন্তে, দিস্ৰান মে এতদহোসি – ‘অতিলহুং খো ইমে মোঘপুরিসা চীৰরে বাহুল্লায আৰত্তা। যংনূনাহং ভিক্খূনং চীৰরে সীমং বন্ধেয্যং, মরিযাদং ঠপেয্য’ন্তি। ইধাহং, ভিক্খৰে, সীতাসু হেমন্তিকাসু রত্তীসু অন্তরট্ঠকাসু হিমপাতসমযে রত্তিং অজ্ঝোকাসে একচীৰরো নিসীদিং। ন মং সীতং অহোসি। নিক্খন্তে পঠমে যামে সীতং মং অহোসি। দুতিযাহং চীৰরং পারুপিং। ন মং সীতং অহোসি। নিক্খন্তে মজ্ঝিমে যামে সীতং মং অহোসি। ততিযাহং চীৰরং পারুপিং। ন মং সীতং অহোসি। নিক্খন্তে পচ্ছিমে যামে উদ্ধস্তে অরুণে নন্দিমুখিযা রত্তিযা সীতং মং অহোসি। চতুত্থাহং চীৰরং পারুপিং। ন মং সীতং অহোসি। তস্স ময্হং, ভিক্খৰে, এতদহোসি – ‘‘যেপি খো তে কুলপুত্তা ইমস্মিং ধম্মৰিনযে সীতালুকা সীতভীরুকা তেপি সক্কোন্তি তিচীৰরেন যাপেতুং। যংনূনাহং ভিক্খূনং চীৰরে সীমং বন্ধেয্যং, মরিযাদং ঠপেয্যং , তিচীৰরং অনুজানেয্য’ন্তি। অনুজানামি, ভিক্খৰে, তিচীৰরং – দিগুণং সঙ্ঘাটিং, একচ্চিযং উত্তরাসঙ্গং, একচ্চিযং অন্তরৰাসক’’ন্তি।
346. Atha kho bhagavā rājagahe yathābhirantaṃ viharitvā yena vesālī tena cārikaṃ pakkāmi. Addasa kho bhagavā antarā ca rājagahaṃ antarā ca vesāliṃ addhānamaggappaṭipanno sambahule bhikkhū cīvarehi ubbhaṇḍite 2 sīsepi cīvarabhisiṃ karitvā khandhepi cīvarabhisiṃ karitvā kaṭiyāpi cīvarabhisiṃ karitvā āgacchante, disvāna bhagavato etadahosi – ‘‘atilahuṃ kho ime moghapurisā cīvare bāhullāya āvattā . Yaṃnūnāhaṃ bhikkhūnaṃ cīvare sīmaṃ bandheyyaṃ, mariyādaṃ ṭhapeyya’’nti. Atha kho bhagavā anupubbena cārikaṃ caramāno yena vesālī tadavasari. Tatra sudaṃ bhagavā vesāliyaṃ viharati gotamake cetiye. Tena kho pana samayena bhagavā sītāsu hemantikāsu rattīsu antaraṭṭhakāsu himapātasamaye rattiṃ ajjhokāse ekacīvaro nisīdi. Na bhagavantaṃ sītaṃ ahosi. Nikkhante paṭhame yāme sītaṃ bhagavantaṃ ahosi. Dutiyaṃ bhagavā cīvaraṃ pārupi. Na bhagavantaṃ sītaṃ ahosi. Nikkhante majjhime yāme sītaṃ bhagavantaṃ ahosi. Tatiyaṃ bhagavā cīvaraṃ pārupi. Na bhagavantaṃ sītaṃ ahosi. Nikkhante pacchime yāme uddhaste aruṇe nandimukhiyā rattiyā sītaṃ bhagavantaṃ ahosi. Catutthaṃ bhagavā cīvaraṃ pārupi. Na bhagavantaṃ sītaṃ ahosi. Atha kho bhagavato etadahosi – ‘‘yepi kho te kulaputtā imasmiṃ dhammavinaye sītālukā sītabhīrukā tepi sakkonti ticīvarena yāpetuṃ. Yaṃnūnāhaṃ bhikkhūnaṃ cīvare sīmaṃ bandheyyaṃ, mariyādaṃ ṭhapeyyaṃ, ticīvaraṃ anujāneyya’’nti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘idhāhaṃ, bhikkhave, antarā ca rājagahaṃ antarā ca vesāliṃ addhānamaggappaṭipanno addasaṃ sambahule bhikkhū cīvarehi ubbhaṇḍite sīsepi cīvarabhisiṃ karitvā khandhepi cīvarabhisiṃ karitvā kaṭiyāpi cīvarabhisiṃ karitvā āgacchante, disvāna me etadahosi – ‘atilahuṃ kho ime moghapurisā cīvare bāhullāya āvattā. Yaṃnūnāhaṃ bhikkhūnaṃ cīvare sīmaṃ bandheyyaṃ, mariyādaṃ ṭhapeyya’nti. Idhāhaṃ, bhikkhave, sītāsu hemantikāsu rattīsu antaraṭṭhakāsu himapātasamaye rattiṃ ajjhokāse ekacīvaro nisīdiṃ. Na maṃ sītaṃ ahosi. Nikkhante paṭhame yāme sītaṃ maṃ ahosi. Dutiyāhaṃ cīvaraṃ pārupiṃ. Na maṃ sītaṃ ahosi. Nikkhante majjhime yāme sītaṃ maṃ ahosi. Tatiyāhaṃ cīvaraṃ pārupiṃ. Na maṃ sītaṃ ahosi. Nikkhante pacchime yāme uddhaste aruṇe nandimukhiyā rattiyā sītaṃ maṃ ahosi. Catutthāhaṃ cīvaraṃ pārupiṃ. Na maṃ sītaṃ ahosi. Tassa mayhaṃ, bhikkhave, etadahosi – ‘‘yepi kho te kulaputtā imasmiṃ dhammavinaye sītālukā sītabhīrukā tepi sakkonti ticīvarena yāpetuṃ. Yaṃnūnāhaṃ bhikkhūnaṃ cīvare sīmaṃ bandheyyaṃ, mariyādaṃ ṭhapeyyaṃ , ticīvaraṃ anujāneyya’nti. Anujānāmi, bhikkhave, ticīvaraṃ – diguṇaṃ saṅghāṭiṃ, ekacciyaṃ uttarāsaṅgaṃ, ekacciyaṃ antaravāsaka’’nti.
তিচীৰরানুজাননা নিট্ঠিতা।
Ticīvarānujānanā niṭṭhitā.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / তিচীৰরানুজাননকথা • Ticīvarānujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / তিচীৰরানুজাননকথাৰণ্ণনা • Ticīvarānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / চীৰররজনকথাদিৰণ্ণনা • Cīvararajanakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২১৭. তিচীৰরানুজাননকথা • 217. Ticīvarānujānanakathā
