| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
திசீவரானுஜானநகதா²
Ticīvarānujānanakathā
346. சீவரேஹி உப்³ப⁴ண்டி³கேதி சீவரேஹி உப்³ப⁴ண்டே³ கதே; யதா² உக்கி²த்தப⁴ண்டா³ ஹொந்தி ஏவங் கதே; உக்கி²த்தப⁴ண்டி³கபா⁴வங் ஆபாதி³தேதி அத்தோ². சீவரபி⁴ஸிந்தி எத்த² பி⁴ஸீதி த்³வே தீணி ஏகதோ கத்வா பி⁴ஸிஸங்கே²பேன ஸங்ஹரிதசீவரானி வுத்தானி. தே கிர பி⁴க்கூ² ‘‘த³க்கி²ணாகி³ரிதோ ப⁴க³வா லஹுங் படினிவத்திஸ்ஸதீ’’தி தத்த² க³ச்ச²ந்தா ஜீவகவத்து²ஸ்மிங் லத்³த⁴சீவரானி ட²பெத்வா அக³மங்ஸு. இதா³னி பன சிரேன ஆக³மிஸ்ஸதீதி மஞ்ஞமானா ஆதா³ய பக்கமிங்ஸு. அந்தரட்ட²காஸூதி மாக⁴ஸ்ஸ ச ப²க்³கு³ணஸ்ஸ ச அந்தரா அட்ட²ஸு. ந ப⁴க³வந்தங் ஸீதங் அஹோஸீதி ப⁴க³வதோ ஸீதங் நாஹோஸி. ஏதத³ஹோஸி யேபி கோ² தே குலபுத்தாதி ந ப⁴க³வா அஜ்ஜோ²காஸே அனிஸீதி³த்வா ஏதமத்த²ங் ந ஜானாதி, மஹாஜனஸஞ்ஞாபனத்த²ங் பன ஏவமகாஸி. ஸீதாலுகாதி ஸீதபகதிகா; யே பகதியாவ ஸீதேன கிலமந்தி. தி³கு³ணங் ஸங்கா⁴டிந்தி து³பட்டங் ஸங்கா⁴டிங். ஏகச்சியந்தி ஏகபட்டங். இதி ‘‘ப⁴க³வா அத்தனா சதூஹி சீவரேஹி யாபேதி, அம்ஹாகங் பன திசீவரங் அனுஜானாதீ’’தி வசனஸ்ஸ ஓகாஸங் உபச்சி²ந்தி³துங் தி³கு³ணங் ஸங்கா⁴டிங் அனுஜானாதி, ஏகச்சிகே இதரே. ஏவஞ்ஹி நேஸங் சத்தாரி ப⁴விஸ்ஸந்தீதி.
346.Cīvarehiubbhaṇḍiketi cīvarehi ubbhaṇḍe kate; yathā ukkhittabhaṇḍā honti evaṃ kate; ukkhittabhaṇḍikabhāvaṃ āpāditeti attho. Cīvarabhisinti ettha bhisīti dve tīṇi ekato katvā bhisisaṅkhepena saṃharitacīvarāni vuttāni. Te kira bhikkhū ‘‘dakkhiṇāgirito bhagavā lahuṃ paṭinivattissatī’’ti tattha gacchantā jīvakavatthusmiṃ laddhacīvarāni ṭhapetvā agamaṃsu. Idāni pana cirena āgamissatīti maññamānā ādāya pakkamiṃsu. Antaraṭṭhakāsūti māghassa ca phagguṇassa ca antarā aṭṭhasu. Na bhagavantaṃ sītaṃ ahosīti bhagavato sītaṃ nāhosi. Etadahosi yepi kho te kulaputtāti na bhagavā ajjhokāse anisīditvā etamatthaṃ na jānāti, mahājanasaññāpanatthaṃ pana evamakāsi. Sītālukāti sītapakatikā; ye pakatiyāva sītena kilamanti. Diguṇaṃ saṅghāṭinti dupaṭṭaṃ saṅghāṭiṃ. Ekacciyanti ekapaṭṭaṃ. Iti ‘‘bhagavā attanā catūhi cīvarehi yāpeti, amhākaṃ pana ticīvaraṃ anujānātī’’ti vacanassa okāsaṃ upacchindituṃ diguṇaṃ saṅghāṭiṃ anujānāti, ekaccike itare. Evañhi nesaṃ cattāri bhavissantīti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 217. திசீவரானுஜானநா • 217. Ticīvarānujānanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / திசீவரானுஜானநகதா²வண்ணனா • Ticīvarānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சீவரரஜனகதா²தி³வண்ணனா • Cīvararajanakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 217. திசீவரானுஜானநகதா² • 217. Ticīvarānujānanakathā
