| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
217. திசீவரானுஜானநகதா²
217. Ticīvarānujānanakathā
346. ‘‘உக்கி²த்தப⁴ண்டி³கபா⁴வங் ஆபாதி³தே’’தி இமினா உப்³ப⁴ண்டி³தேதி எத்த² உக்கி²த்தங் ப⁴ண்ட³ங் உப்³ப⁴ண்ட³ங், உப்³ப⁴ண்ட³பா⁴வங் இதா ஆபாதி³தாதி உப்³ப⁴ண்டி³தாதி வசனத்த²ங் த³ஸ்ஸேதி. தே உப்³ப⁴ண்டி³தே பி⁴க்கூ² அத்³த³ஸாதி யோஜனா. பி⁴ஸிஸங்கே²பேனாதி பி⁴ஸியங் பக்கே²பேன, பவேஸேனாதி அத்தோ², பி⁴ஸிஆகாரேனாதி வுத்தங் ஹோதி. தத்தா²தி த³க்கி²ணாகி³ரிங். க³ச்ச²ந்தா தே பி⁴க்கூ²தி யோஜனா. ‘‘அட்ட²பமாணாஸூ’’தி இமினா அந்தரட்ட²காஸூதி எத்த² கபச்சயோ பமாணத்தே² ஹோதீதி த³ஸ்ஸேதி, கேஸுசி பொத்த²கேஸு பமாணஸத்³தோ³ ந தி³ஸ்ஸதி, க³ளிதோதி த³ட்ட²ப்³போ³. ரத்தீஸூதி ஸம்ப³ந்தோ⁴. ப⁴க³வந்தந்தி எத்த² ஸம்பதா³னத்தே² உபயோக³வசனந்தி ஆஹ ‘‘ப⁴க³வதோ’’தி. ஸீதாலுகாதி எத்த² ஸீதங் பகதி ஏதேஸந்தி ஸீதாலுனோ , தேயேவ ஸீதாலுகாதி வசனத்த²ங் த³ஸ்ஸெந்தோ ஆஹ ‘‘ஸீதபகதிகா’’தி . யே குலபுத்தா பகதியாவ ஸீதேன கிலமந்தி, தே ஸீதாலுகா நாமாதி யோஜனா. ஏகச்சியந்தி எத்த² ஏகச்சஸத்³தோ³ ஏகபரியாயோதி ஆஹ ‘‘ஏகங் பட்ட’’ந்தி. இமினா ஏகோயேவ ஏகச்சோதி கத்வா ஸகத்தே² அச்சபச்சயோதி த³ஸ்ஸேதி. ‘‘பட்ட’’ந்தி இமினா ஏகச்சேன நியுத்தங் ஏகச்சியந்தி வசனத்த²ங் கத்வா நியுத்தத்தே² பவத்தஸ்ஸ இயபச்சயஸ்ஸ ஸரூபங் த³ஸ்ஸேதி. இதீதி ஏவங். ப⁴க³வா அனுஜானாதீதி ஸம்ப³ந்தோ⁴. இதரேதி ஸங்கா⁴டிதோ இதரே உத்தராஸங்க³அந்தரவாஸகே.
346. ‘‘Ukkhittabhaṇḍikabhāvaṃ āpādite’’ti iminā ubbhaṇḍiteti ettha ukkhittaṃ bhaṇḍaṃ ubbhaṇḍaṃ, ubbhaṇḍabhāvaṃ itā āpāditāti ubbhaṇḍitāti vacanatthaṃ dasseti. Te ubbhaṇḍite bhikkhū addasāti yojanā. Bhisisaṅkhepenāti bhisiyaṃ pakkhepena, pavesenāti attho, bhisiākārenāti vuttaṃ hoti. Tatthāti dakkhiṇāgiriṃ. Gacchantā te bhikkhūti yojanā. ‘‘Aṭṭhapamāṇāsū’’ti iminā antaraṭṭhakāsūti ettha kapaccayo pamāṇatthe hotīti dasseti, kesuci potthakesu pamāṇasaddo na dissati, gaḷitoti daṭṭhabbo. Rattīsūti sambandho. Bhagavantanti ettha sampadānatthe upayogavacananti āha ‘‘bhagavato’’ti. Sītālukāti ettha sītaṃ pakati etesanti sītāluno , teyeva sītālukāti vacanatthaṃ dassento āha ‘‘sītapakatikā’’ti . Ye kulaputtā pakatiyāva sītena kilamanti, te sītālukā nāmāti yojanā. Ekacciyanti ettha ekaccasaddo ekapariyāyoti āha ‘‘ekaṃ paṭṭa’’nti. Iminā ekoyeva ekaccoti katvā sakatthe accapaccayoti dasseti. ‘‘Paṭṭa’’nti iminā ekaccena niyuttaṃ ekacciyanti vacanatthaṃ katvā niyuttatthe pavattassa iyapaccayassa sarūpaṃ dasseti. Itīti evaṃ. Bhagavā anujānātīti sambandho. Itareti saṅghāṭito itare uttarāsaṅgaantaravāsake.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 217. திசீவரானுஜானநா • 217. Ticīvarānujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / திசீவரானுஜானநகதா² • Ticīvarānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / திசீவரானுஜானநகதா²வண்ணனா • Ticīvarānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / சீவரரஜனகதா²தி³வண்ணனா • Cīvararajanakathādivaṇṇanā
