| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২১৭. তিচীৰরানুজাননকথা
217. Ticīvarānujānanakathā
৩৪৬. ‘‘উক্খিত্তভণ্ডিকভাৰং আপাদিতে’’তি ইমিনা উব্ভণ্ডিতেতি এত্থ উক্খিত্তং ভণ্ডং উব্ভণ্ডং, উব্ভণ্ডভাৰং ইতা আপাদিতাতি উব্ভণ্ডিতাতি ৰচনত্থং দস্সেতি। তে উব্ভণ্ডিতে ভিক্খূ অদ্দসাতি যোজনা। ভিসিসঙ্খেপেনাতি ভিসিযং পক্খেপেন, পৰেসেনাতি অত্থো, ভিসিআকারেনাতি ৰুত্তং হোতি। তত্থাতি দক্খিণাগিরিং। গচ্ছন্তা তে ভিক্খূতি যোজনা। ‘‘অট্ঠপমাণাসূ’’তি ইমিনা অন্তরট্ঠকাসূতি এত্থ কপচ্চযো পমাণত্থে হোতীতি দস্সেতি, কেসুচি পোত্থকেসু পমাণসদ্দো ন দিস্সতি, গল়িতোতি দট্ঠব্বো। রত্তীসূতি সম্বন্ধো। ভগৰন্তন্তি এত্থ সম্পদানত্থে উপযোগৰচনন্তি আহ ‘‘ভগৰতো’’তি। সীতালুকাতি এত্থ সীতং পকতি এতেসন্তি সীতালুনো , তেযেৰ সীতালুকাতি ৰচনত্থং দস্সেন্তো আহ ‘‘সীতপকতিকা’’তি । যে কুলপুত্তা পকতিযাৰ সীতেন কিলমন্তি, তে সীতালুকা নামাতি যোজনা। একচ্চিযন্তি এত্থ একচ্চসদ্দো একপরিযাযোতি আহ ‘‘একং পট্ট’’ন্তি। ইমিনা একোযেৰ একচ্চোতি কত্ৰা সকত্থে অচ্চপচ্চযোতি দস্সেতি। ‘‘পট্ট’’ন্তি ইমিনা একচ্চেন নিযুত্তং একচ্চিযন্তি ৰচনত্থং কত্ৰা নিযুত্তত্থে পৰত্তস্স ইযপচ্চযস্স সরূপং দস্সেতি। ইতীতি এৰং। ভগৰা অনুজানাতীতি সম্বন্ধো। ইতরেতি সঙ্ঘাটিতো ইতরে উত্তরাসঙ্গঅন্তরৰাসকে।
346. ‘‘Ukkhittabhaṇḍikabhāvaṃ āpādite’’ti iminā ubbhaṇḍiteti ettha ukkhittaṃ bhaṇḍaṃ ubbhaṇḍaṃ, ubbhaṇḍabhāvaṃ itā āpāditāti ubbhaṇḍitāti vacanatthaṃ dasseti. Te ubbhaṇḍite bhikkhū addasāti yojanā. Bhisisaṅkhepenāti bhisiyaṃ pakkhepena, pavesenāti attho, bhisiākārenāti vuttaṃ hoti. Tatthāti dakkhiṇāgiriṃ. Gacchantā te bhikkhūti yojanā. ‘‘Aṭṭhapamāṇāsū’’ti iminā antaraṭṭhakāsūti ettha kapaccayo pamāṇatthe hotīti dasseti, kesuci potthakesu pamāṇasaddo na dissati, gaḷitoti daṭṭhabbo. Rattīsūti sambandho. Bhagavantanti ettha sampadānatthe upayogavacananti āha ‘‘bhagavato’’ti. Sītālukāti ettha sītaṃ pakati etesanti sītāluno , teyeva sītālukāti vacanatthaṃ dassento āha ‘‘sītapakatikā’’ti . Ye kulaputtā pakatiyāva sītena kilamanti, te sītālukā nāmāti yojanā. Ekacciyanti ettha ekaccasaddo ekapariyāyoti āha ‘‘ekaṃ paṭṭa’’nti. Iminā ekoyeva ekaccoti katvā sakatthe accapaccayoti dasseti. ‘‘Paṭṭa’’nti iminā ekaccena niyuttaṃ ekacciyanti vacanatthaṃ katvā niyuttatthe pavattassa iyapaccayassa sarūpaṃ dasseti. Itīti evaṃ. Bhagavā anujānātīti sambandho. Itareti saṅghāṭito itare uttarāsaṅgaantaravāsake.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২১৭. তিচীৰরানুজাননা • 217. Ticīvarānujānanā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / তিচীৰরানুজাননকথা • Ticīvarānujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / তিচীৰরানুজাননকথাৰণ্ণনা • Ticīvarānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / চীৰররজনকথাদিৰণ্ণনা • Cīvararajanakathādivaṇṇanā
