| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
4. அட்ட²கதா²கண்டோ³
4. Aṭṭhakathākaṇḍo
திகஅத்து²த்³தா⁴ரவண்ணனா
Tikaatthuddhāravaṇṇanā
1384. இதா³னி நிக்கே²பகண்டா³னந்தரங் ட²பிதஸ்ஸ அட்ட²கதா²கண்ட³ஸ்ஸ வண்ணனாக்கமோ அனுப்பத்தோ. கஸ்மா பனேதங் அட்ட²கதா²கண்ட³ங் நாம ஜாதந்தி? தேபிடகஸ்ஸ பு³த்³த⁴வசனஸ்ஸ அத்த²ங் உத்³த⁴ரித்வா ட²பிதத்தா. தீஸுபி ஹி பிடகேஸு த⁴ம்மந்தரங் ஆக³தங் அட்ட²கதா²கண்டே³னேவ பரிச்சி²ந்தி³த்வா வினிச்சி²தங் ஸுவினிச்சி²தங் நாம ஹோதி. ஸகலே அபி⁴த⁴ம்மபிடகே நயமக்³க³ங் மஹாபகரணே பஞ்ஹுத்³தா⁴ரங் க³ணனசாரங் அஸல்லக்கெ²ந்தேனாபி அட்ட²கதா²கண்ட³தோயேவ ஸமானேதுங் வட்டதி.
1384. Idāni nikkhepakaṇḍānantaraṃ ṭhapitassa aṭṭhakathākaṇḍassa vaṇṇanākkamo anuppatto. Kasmā panetaṃ aṭṭhakathākaṇḍaṃ nāma jātanti? Tepiṭakassa buddhavacanassa atthaṃ uddharitvā ṭhapitattā. Tīsupi hi piṭakesu dhammantaraṃ āgataṃ aṭṭhakathākaṇḍeneva paricchinditvā vinicchitaṃ suvinicchitaṃ nāma hoti. Sakale abhidhammapiṭake nayamaggaṃ mahāpakaraṇe pañhuddhāraṃ gaṇanacāraṃ asallakkhentenāpi aṭṭhakathākaṇḍatoyeva samānetuṃ vaṭṭati.
குதோ பப⁴வங் பன ஏதந்தி? ஸாரிபுத்தத்தே²ரப்பப⁴வங். ஸாரிபுத்தத்தே²ரோ ஹி ஏகஸ்ஸ அத்தனோ ஸத்³தி⁴விஹாரிகஸ்ஸ நிக்கே²பகண்டே³ அத்து²த்³தா⁴ரங் ஸல்லக்கே²துங் அஸக்கொந்தஸ்ஸ அட்ட²கதா²கண்ட³ங் கதெ²த்வா அதா³ஸி. இத³ங் பன மஹாஅட்ட²கதா²யங் படிக்கி²பித்வா இத³ங் வுத்தங் – அபி⁴த⁴ம்மோ நாம ந ஸாவகவிஸயோ, ந ஸாவககோ³சரோ; பு³த்³த⁴விஸயோ ஏஸ, பு³த்³த⁴கோ³சரோ. த⁴ம்மஸேனாபதி பன ஸத்³தி⁴விஹாரிகேன புச்சி²தோ தங் ஆதா³ய ஸத்து² ஸந்திகங் க³ந்த்வா ஸம்மாஸம்பு³த்³த⁴ஸ்ஸ கதே²ஸி. ஸம்மாஸம்பு³த்³தோ⁴ தஸ்ஸ பி⁴க்கு²னோ அட்ட²கதா²கண்ட³ங் கதெ²த்வா அதா³ஸி. கத²ங்? ப⁴க³வா ஹி ‘கதமே த⁴ம்மா குஸலா’தி புச்சி². ‘குஸலா த⁴ம்மா நாம கதமே’தி ஸல்லக்கே²ஸீதி அத்தோ². அத²ஸ்ஸ துண்ஹீபூ⁴தஸ்ஸ ‘நனு யங் மயா கதமே த⁴ம்மா குஸலா? யஸ்மிங் ஸமயே காமாவசரங் குஸலங் சித்தங் உப்பன்னங் ஹோதீதிஆதி³னா நயேன பூ⁴மிபே⁴த³தோ குஸலங் த³ஸ்ஸிதங், ஸப்³ப³ம்பி தங் சதூஸு பூ⁴மீஸு குஸலங், இமே த⁴ம்மா குஸலா’தி இமினா நயேன கண்ணிகங் கண்ணிகங் க⁴டங் க⁴டங் கொ³ச்ச²கங் கொ³ச்ச²கங் கத்வா அத்து²த்³தா⁴ரவஸேன குஸலாதி³த⁴ம்மே த³ஸ்ஸெந்தோ கதெ²த்வா அதா³ஸி.
Kuto pabhavaṃ pana etanti? Sāriputtattherappabhavaṃ. Sāriputtatthero hi ekassa attano saddhivihārikassa nikkhepakaṇḍe atthuddhāraṃ sallakkhetuṃ asakkontassa aṭṭhakathākaṇḍaṃ kathetvā adāsi. Idaṃ pana mahāaṭṭhakathāyaṃ paṭikkhipitvā idaṃ vuttaṃ – abhidhammo nāma na sāvakavisayo, na sāvakagocaro; buddhavisayo esa, buddhagocaro. Dhammasenāpati pana saddhivihārikena pucchito taṃ ādāya satthu santikaṃ gantvā sammāsambuddhassa kathesi. Sammāsambuddho tassa bhikkhuno aṭṭhakathākaṇḍaṃ kathetvā adāsi. Kathaṃ? Bhagavā hi ‘katame dhammā kusalā’ti pucchi. ‘Kusalā dhammā nāma katame’ti sallakkhesīti attho. Athassa tuṇhībhūtassa ‘nanu yaṃ mayā katame dhammā kusalā? Yasmiṃ samaye kāmāvacaraṃ kusalaṃ cittaṃ uppannaṃ hotītiādinā nayena bhūmibhedato kusalaṃ dassitaṃ, sabbampi taṃ catūsu bhūmīsu kusalaṃ, ime dhammā kusalā’ti iminā nayena kaṇṇikaṃ kaṇṇikaṃ ghaṭaṃ ghaṭaṃ gocchakaṃ gocchakaṃ katvā atthuddhāravasena kusalādidhamme dassento kathetvā adāsi.
தத்த² சதூஸூதி காமாவசரரூபாவசராரூபாவசரஅபரியாபன்னாஸு. குஸலந்தி ப²ஸ்ஸாதி³பே⁴த³ங் குஸலங். இமே த⁴ம்மா குஸலாதி இமே ஸப்³பே³பி தாஸு தாஸு பூ⁴மீஸு வுத்தா ப²ஸ்ஸாத³யோ த⁴ம்மா குஸலா நாம.
Tattha catūsūti kāmāvacararūpāvacarārūpāvacaraapariyāpannāsu. Kusalanti phassādibhedaṃ kusalaṃ. Ime dhammā kusalāti ime sabbepi tāsu tāsu bhūmīsu vuttā phassādayo dhammā kusalā nāma.
1385. அகுஸலானங் பன பூ⁴மிவஸேன பே⁴தா³பா⁴வதோ த்³வாத³ஸ அகுஸலசித்துப்பாதா³தி ஆஹ. தத்த² உப்பஜ்ஜதீதி உப்பாதோ³. சித்தமேவ உப்பாதோ³ சித்துப்பாதோ³. தே³ஸனாஸீஸமேவ சேதங். யதா² பன ‘ராஜா ஆக³தோ’தி வுத்தே அமச்சாதீ³னம்பி ஆக³மனங் வுத்தமேவ ஹோதி, ஏவங் ‘சித்துப்பாதா³’தி வுத்தே தேஹி ஸம்பயுத்தத⁴ம்மாபி வுத்தாவ ஹொந்தீதி. ஸப்³ப³த்த² சித்துப்பாத³க்³க³ஹணேன ஸஸம்பயுத்தத⁴ம்மங் சித்தங் க³ஹிதந்தி வேதி³தப்³ப³ங். இதோ பரங் சதூஸு பூ⁴மீஸு விபாகோதிஆதீ³னங் ஸப்³பே³ஸம்பி திகது³கபா⁴ஜனீயபதா³னங் அத்தோ², வேத³னாத்திகாதீ³ஸு ச ஸுகா²தீ³னங் நவத்தப்³ப³தா ஹெட்டா² வுத்தனயேனேவ பாளியத்த²ங் வீமங்ஸித்வா வேதி³தப்³பா³. விஸேஸமத்தமேவ பன வக்கா²ம.
1385. Akusalānaṃ pana bhūmivasena bhedābhāvato dvādasa akusalacittuppādāti āha. Tattha uppajjatīti uppādo. Cittameva uppādo cittuppādo. Desanāsīsameva cetaṃ. Yathā pana ‘rājā āgato’ti vutte amaccādīnampi āgamanaṃ vuttameva hoti, evaṃ ‘cittuppādā’ti vutte tehi sampayuttadhammāpi vuttāva hontīti. Sabbattha cittuppādaggahaṇena sasampayuttadhammaṃ cittaṃ gahitanti veditabbaṃ. Ito paraṃ catūsu bhūmīsu vipākotiādīnaṃ sabbesampi tikadukabhājanīyapadānaṃ attho, vedanāttikādīsu ca sukhādīnaṃ navattabbatā heṭṭhā vuttanayeneva pāḷiyatthaṃ vīmaṃsitvā veditabbā. Visesamattameva pana vakkhāma.
1420. தத்த² பரித்தாரம்மணத்திகே தாவ ஸப்³போ³ காமாவசரஸ்ஸ விபாகோதி எத்த² த்³விபஞ்சவிஞ்ஞாணானி சக்கு²பஸாதா³த³யோ நிஸ்ஸாய நியமேனேவ இட்டா²னிட்டா²தி³பே⁴தே³ ரூபஸத்³த³க³ந்த⁴ரஸபொ²ட்ட²ப்³ப³த⁴ம்மே ஆரப்³ப⁴ பவத்தந்தீதி பரித்தாரம்மணானி. குஸலாகுஸலவிபாகா பன த்³வே மனோதா⁴துயோ ஹத³யவத்து²ங் நிஸ்ஸாய சக்கு²விஞ்ஞாணாதீ³னங் அனந்தரா நியமதோ ரூபாதீ³னேவ ஆரப்³ப⁴ பவத்தந்தீதி பரித்தாரம்மணா. குஸலவிபாகாஹேதுகமனோவிஞ்ஞாணதா⁴து ஸோமனஸ்ஸஸஹக³தா பஞ்சத்³வாரே ஸந்தீரணவஸேன ச²ஸு த்³வாரேஸு ததா³ரம்மணவஸேனாதி நியமதோ ரூபாதீ³னி ச² பரித்தாரம்மணானேவ ஆரப்³ப⁴ பவத்ததீதி பரித்தாரம்மணா. குஸலாகுஸலவிபாகாஹேதுகமனோவிஞ்ஞாணதா⁴துத்³வயங் பஞ்சத்³வாரே ஸந்தீரணவஸேன ச²ஸு த்³வாரேஸு ததா³ரம்மணவஸேன நியமதோ ரூபாதீ³னி ச² பரித்தாரம்மணானேவ ஆரப்³ப⁴ பவத்ததி. படிஸந்தி⁴வஸேன பவத்தமானம்பி பரித்தங் கம்மங் கம்மனிமித்தங் க³தினிமித்தங் வா ஆரம்மணங் கரோதி, பவத்தியங் ப⁴வங்க³வஸேன, பரியோஸானே சுதிவஸேன பவத்தமானம்பி ததே³வ ஆரம்மணங் கரோதீதி பரித்தாரம்மணங். அட்ட² பன ஸஹேதுகவிபாகசித்துப்பாதா³ எத்த² வுத்தனயேனேவ ததா³ரம்மணவஸேன படிஸந்தி⁴ப⁴வங்க³சுதிவஸேன ச பரித்தத⁴ம்மேயேவ ஆரப்³ப⁴ பவத்தந்தி. கிரியமனோதா⁴து பஞ்சத்³வாரே ரூபாதீ³னி ஆரப்³ப⁴ பவத்ததி. ஸோமனஸ்ஸஸஹக³தாஹேதுககிரியமனோவிஞ்ஞாணதா⁴து ச²ஸு த்³வாரேஸு பச்சுப்பன்னே மனொத்³வாரே அதீதானாக³தேபி பரித்தே ரூபாதி³த⁴ம்மேயேவ ஆரப்³ப⁴ கீ²ணாஸவானங் பஹட்டா²காரங் குருமானா பவத்ததீதி பரித்தாரம்மணா. ஏவமிமே பஞ்சவீஸதி சித்துப்பாதா³ ஏகந்தேனேவ பரித்தாரம்மணாதி வேதி³தப்³பா³.
1420. Tattha parittārammaṇattike tāva sabbo kāmāvacarassa vipākoti ettha dvipañcaviññāṇāni cakkhupasādādayo nissāya niyameneva iṭṭhāniṭṭhādibhede rūpasaddagandharasaphoṭṭhabbadhamme ārabbha pavattantīti parittārammaṇāni. Kusalākusalavipākā pana dve manodhātuyo hadayavatthuṃ nissāya cakkhuviññāṇādīnaṃ anantarā niyamato rūpādīneva ārabbha pavattantīti parittārammaṇā. Kusalavipākāhetukamanoviññāṇadhātu somanassasahagatā pañcadvāre santīraṇavasena chasu dvāresu tadārammaṇavasenāti niyamato rūpādīni cha parittārammaṇāneva ārabbha pavattatīti parittārammaṇā. Kusalākusalavipākāhetukamanoviññāṇadhātudvayaṃ pañcadvāre santīraṇavasena chasu dvāresu tadārammaṇavasena niyamato rūpādīni cha parittārammaṇāneva ārabbha pavattati. Paṭisandhivasena pavattamānampi parittaṃ kammaṃ kammanimittaṃ gatinimittaṃ vā ārammaṇaṃ karoti, pavattiyaṃ bhavaṅgavasena, pariyosāne cutivasena pavattamānampi tadeva ārammaṇaṃ karotīti parittārammaṇaṃ. Aṭṭha pana sahetukavipākacittuppādā ettha vuttanayeneva tadārammaṇavasena paṭisandhibhavaṅgacutivasena ca parittadhammeyeva ārabbha pavattanti. Kiriyamanodhātu pañcadvāre rūpādīni ārabbha pavattati. Somanassasahagatāhetukakiriyamanoviññāṇadhātu chasu dvāresu paccuppanne manodvāre atītānāgatepi paritte rūpādidhammeyeva ārabbha khīṇāsavānaṃ pahaṭṭhākāraṃ kurumānā pavattatīti parittārammaṇā. Evamime pañcavīsati cittuppādā ekanteneva parittārammaṇāti veditabbā.
1421. விஞ்ஞாணஞ்சாயதனநேவஸஞ்ஞானாஸஞ்ஞாயதனத⁴ம்மா அத்தனோ அத்தனோ ஹெட்டி²மங் ஸமாபத்திங் ஆரப்³ப⁴ பவத்தனதோ மஹக்³க³தாரம்மணா. ஏவ மக்³க³ப²லத⁴ம்மா நிப்³பா³னாரம்மணத்தா அப்பமாணாரம்மணா.
1421. Viññāṇañcāyatananevasaññānāsaññāyatanadhammā attano attano heṭṭhimaṃ samāpattiṃ ārabbha pavattanato mahaggatārammaṇā. Eva maggaphaladhammā nibbānārammaṇattā appamāṇārammaṇā.
குஸலதோ சத்தாரோ கிரியதோ சத்தாரோதி அட்ட² ஞாணவிப்பயுத்தசித்துப்பாதா³ ஸெக்க²புது²ஜ்ஜனகீ²ணாஸவானங் அஸக்கச்சதா³னபச்சவெக்க²ணத⁴ம்மஸவனாதீ³ஸு காமாவசரத⁴ம்மே ஆரப்³ப⁴ பவத்திகாலே பரித்தாரம்மணா. அதிபகு³ணானங் பட²மஜ்ஜா²னாதீ³னங் பச்சவெக்க²ணகாலே மஹக்³க³தாரம்மணா. கஸிணனிமித்தாதி³பஞ்ஞத்திபச்சவெக்க²ணகாலே நவத்தப்³பா³ரம்மணா. அகுஸலதோ சத்தாரோ தி³ட்டி²க³தஸம்பயுத்தசித்துப்பாதா³ பஞ்சபண்ணாஸாய காமாவசரத⁴ம்மானங் ‘ஸத்தோ ஸத்தோ’தி பராமஸனஅஸ்ஸாத³னாபி⁴னந்த³னகாலே பரித்தாரம்மணா. தேனேவாகாரேன ஸத்தவீஸதி மஹக்³க³தத⁴ம்மே ஆரப்³ப⁴ பவத்திகாலே மஹக்³க³தாரம்மணா. பண்ணத்தித⁴ம்மே ஆரப்³ப⁴ பவத்தனகாலே ஸியா நவத்தப்³பா³ரம்மணா. தி³ட்டி²விப்பயுத்தானங் தேயேவ த⁴ம்மே ஆரப்³ப⁴ கேவலங் அஸ்ஸாத³னாபி⁴னந்த³னவஸேன, பவத்தியங் படிக⁴ஸம்பயுத்தானங் தோ³மனஸ்ஸவஸேன, விசிகிச்சா²ஸம்பயுத்தசித்துப்பாத³ஸ்ஸ அனிட்ட²ங்க³தவஸேன, உத்³த⁴ச்சஸஹக³தஸ்ஸ விக்கே²பவஸேன அவூபஸமவஸேன ச பவத்தியங் பரித்தமஹக்³க³தனவத்தப்³பா³ரம்மணதா வேதி³தப்³பா³. ஏதேஸு பன ஏகத⁴ம்மோபி அப்பமாணே ஆரப்³ப⁴ பவத்திதுங் ந ஸக்கோதி, தஸ்மா ந அப்பமாணாரம்மணா.
Kusalato cattāro kiriyato cattāroti aṭṭha ñāṇavippayuttacittuppādā sekkhaputhujjanakhīṇāsavānaṃ asakkaccadānapaccavekkhaṇadhammasavanādīsu kāmāvacaradhamme ārabbha pavattikāle parittārammaṇā. Atipaguṇānaṃ paṭhamajjhānādīnaṃ paccavekkhaṇakāle mahaggatārammaṇā. Kasiṇanimittādipaññattipaccavekkhaṇakāle navattabbārammaṇā. Akusalato cattāro diṭṭhigatasampayuttacittuppādā pañcapaṇṇāsāya kāmāvacaradhammānaṃ ‘satto satto’ti parāmasanaassādanābhinandanakāle parittārammaṇā. Tenevākārena sattavīsati mahaggatadhamme ārabbha pavattikāle mahaggatārammaṇā. Paṇṇattidhamme ārabbha pavattanakāle siyā navattabbārammaṇā. Diṭṭhivippayuttānaṃ teyeva dhamme ārabbha kevalaṃ assādanābhinandanavasena, pavattiyaṃ paṭighasampayuttānaṃ domanassavasena, vicikicchāsampayuttacittuppādassa aniṭṭhaṅgatavasena, uddhaccasahagatassa vikkhepavasena avūpasamavasena ca pavattiyaṃ parittamahaggatanavattabbārammaṇatā veditabbā. Etesu pana ekadhammopi appamāṇe ārabbha pavattituṃ na sakkoti, tasmā na appamāṇārammaṇā.
குஸலதோ சத்தாரோ கிரியதோ சத்தாரோதி அட்ட² ஞாணஸம்பயுத்தசித்துப்பாதா³ ஸெக்க²புது²ஜ்ஜனகீ²ணாஸவானங் ஸக்கச்சதா³னபச்சவெக்க²ணத⁴ம்மஸவனாதீ³ஸு யதா²வுத்தப்பகாரே த⁴ம்மே ஆரப்³ப⁴ பவத்திகாலே பரித்தமஹக்³க³தனவத்தப்³பா³ரம்மணா ஹொந்தி. கொ³த்ரபு⁴காலே லோகுத்தரத⁴ம்மே பச்சவெக்க²ணகாலே ச நேஸங் அப்பமாணாரம்மணதா வேதி³தப்³பா³.
Kusalato cattāro kiriyato cattāroti aṭṭha ñāṇasampayuttacittuppādā sekkhaputhujjanakhīṇāsavānaṃ sakkaccadānapaccavekkhaṇadhammasavanādīsu yathāvuttappakāre dhamme ārabbha pavattikāle parittamahaggatanavattabbārammaṇā honti. Gotrabhukāle lokuttaradhamme paccavekkhaṇakāle ca nesaṃ appamāṇārammaṇatā veditabbā.
யங் பனேதங் ரூபாவசரசதுத்த²ஜ்ஜா²னங் தங் ஸப்³ப³த்த²பாத³கசதுத்த²ங் ஆகாஸகஸிணசதுத்த²ங் ஆலோககஸிணசதுத்த²ங் ப்³ரஹ்மவிஹாரசதுத்த²ங் ஆனாபானசதுத்த²ங் இத்³தி⁴வித⁴சதுத்த²ங் தி³ப்³ப³ஸோதசதுத்த²ங் சேதோபரியஞாணசதுத்த²ங் யதா²கம்முபக³ஞாணசதுத்த²ங் தி³ப்³ப³சக்கு²ஞாணசதுத்த²ங் புப்³பே³னிவாஸஞாணசதுத்த²ங் அனாக³தங்ஸஞாணசதுத்த²ந்தி குஸலதோபி கிரியதோபி த்³வாத³ஸவித⁴ங் ஹோதி.
Yaṃ panetaṃ rūpāvacaracatutthajjhānaṃ taṃ sabbatthapādakacatutthaṃ ākāsakasiṇacatutthaṃ ālokakasiṇacatutthaṃ brahmavihāracatutthaṃ ānāpānacatutthaṃ iddhividhacatutthaṃ dibbasotacatutthaṃ cetopariyañāṇacatutthaṃ yathākammupagañāṇacatutthaṃ dibbacakkhuñāṇacatutthaṃ pubbenivāsañāṇacatutthaṃ anāgataṃsañāṇacatutthanti kusalatopi kiriyatopi dvādasavidhaṃ hoti.
தத்த² ‘ஸப்³ப³த்த²பாத³கசதுத்த²ங்’ நாம அட்ட²ஸு கஸிணேஸு சதுத்த²ஜ்ஜா²னங். தஞ்ஹி விபஸ்ஸனாயபி பாத³கங் ஹோதி, அபி⁴ஞ்ஞானம்பி, நிரோத⁴ஸ்ஸாபி, வட்டஸ்ஸாபி பாத³கங் ஹோதியேவாதி ஸப்³ப³த்த²பாத³கந்தி வுத்தங். ‘ஆகாஸகஸிணஆலோககஸிணசதுத்தா²னி’ பன விபஸ்ஸனாயபி அபி⁴ஞ்ஞானம்பி வட்டஸ்ஸாபி பாத³கானி ஹொந்தி, நிரோத⁴பாத³கானேவ ந ஹொந்தி. ‘ப்³ரஹ்மவிஹாரஆனாபானசதுத்தா²னி’ விபஸ்ஸனாய சேவ வட்டஸ்ஸ ச பாத³கானி ஹொந்தி, அபி⁴ஞ்ஞானங் பன நிரோத⁴ஸ்ஸ ச பாத³கானி ந ஹொந்தி. தத்த² த³ஸவித⁴ம்பி கஸிணஜ்ஜா²னங் கஸிணபண்ணத்திங் ஆரப்³ப⁴ பவத்தத்தா, ப்³ரஹ்மவிஹாரசதுத்த²ங் ஸத்தபண்ணத்திங் ஆரப்³ப⁴ பவத்தத்தா, ஆனாபானசதுத்த²ங் நிமித்தங் ஆரப்³ப⁴ பவத்தத்தா பரித்தாதி³வஸேன நவத்தப்³ப³த⁴ம்மாரம்மணதோ நவத்தப்³பா³ரம்மணங் நாம ஹோதி.
Tattha ‘sabbatthapādakacatutthaṃ’ nāma aṭṭhasu kasiṇesu catutthajjhānaṃ. Tañhi vipassanāyapi pādakaṃ hoti, abhiññānampi, nirodhassāpi, vaṭṭassāpi pādakaṃ hotiyevāti sabbatthapādakanti vuttaṃ. ‘Ākāsakasiṇaālokakasiṇacatutthāni’ pana vipassanāyapi abhiññānampi vaṭṭassāpi pādakāni honti, nirodhapādakāneva na honti. ‘Brahmavihāraānāpānacatutthāni’ vipassanāya ceva vaṭṭassa ca pādakāni honti, abhiññānaṃ pana nirodhassa ca pādakāni na honti. Tattha dasavidhampi kasiṇajjhānaṃ kasiṇapaṇṇattiṃ ārabbha pavattattā, brahmavihāracatutthaṃ sattapaṇṇattiṃ ārabbha pavattattā, ānāpānacatutthaṃ nimittaṃ ārabbha pavattattā parittādivasena navattabbadhammārammaṇato navattabbārammaṇaṃ nāma hoti.
‘இத்³தி⁴வித⁴சதுத்த²ங்’ பரித்தமஹக்³க³தாரம்மணங் ஹோதி. கத²ங்? தஞ்ஹி யதா³ காயங் சித்தஸன்னிஸ்ஸிதங் கத்வா அதி³ஸ்ஸமானேன காயேன க³ந்துகாமோ சித்தவஸேன காயங் பரிணாமேதி, மஹக்³க³தசித்தே ஸமோத³ஹதி, ஸமாரோபேதி, ததா³ உபயோக³லத்³த⁴ங் ஆரம்மணங் ஹோதீதி கத்வா ரூபகாயாரம்மணதோ பரித்தாரம்மணங் ஹோதி. யதா³ சித்தங் காயஸன்னிஸ்ஸிதங் கத்வா தி³ஸ்ஸமானேன காயேன க³ந்துகாமோ காயவஸேன சித்தங் பரிணாமேதி, பாத³கஜ்ஜா²னசித்தங் ரூபகாயே ஸமோத³ஹதி, ஸமாரோபேதி, ததா³ உபயோக³லத்³த⁴ங் ஆரம்மணங் ஹோதீதி கத்வா மஹக்³க³தசித்தாரம்மணதோ மஹக்³க³தாரம்மணங் ஹோதி.
‘Iddhividhacatutthaṃ’ parittamahaggatārammaṇaṃ hoti. Kathaṃ? Tañhi yadā kāyaṃ cittasannissitaṃ katvā adissamānena kāyena gantukāmo cittavasena kāyaṃ pariṇāmeti, mahaggatacitte samodahati, samāropeti, tadā upayogaladdhaṃ ārammaṇaṃ hotīti katvā rūpakāyārammaṇato parittārammaṇaṃ hoti. Yadā cittaṃ kāyasannissitaṃ katvā dissamānena kāyena gantukāmo kāyavasena cittaṃ pariṇāmeti, pādakajjhānacittaṃ rūpakāye samodahati, samāropeti, tadā upayogaladdhaṃ ārammaṇaṃ hotīti katvā mahaggatacittārammaṇato mahaggatārammaṇaṃ hoti.
‘தி³ப்³ப³ஸோதசதுத்த²ங்’ ஸத்³த³ங் ஆரப்³ப⁴ பவத்தத்தா ஏகந்தபரித்தாரம்மணமேவ. ‘சேதோபரியஞாணசதுத்த²ங்’ பரித்தமஹக்³க³தஅப்பமாணாரம்மணங் ஹோதி. கத²ங்? தஞ்ஹி பரேஸங் காமாவசரசித்தஜானநகாலே பரித்தாரம்மணங் ஹோதி, ரூபாவசராரூபாவசரசித்தஜானநகாலே மஹக்³க³தாரம்மணங், மக்³க³ப²லஜானநகாலே அப்பமாணாரம்மணங் ஹோதி. எத்த² ச புது²ஜ்ஜனோ ஸோதாபன்னஸ்ஸ சித்தங் ந ஜானாதி, ஸோதாபன்னோ வா ஸகதா³கா³மிஸ்ஸாதி ஏவங் யாவ அரஹதோ நேதப்³ப³ங். அரஹா பன ஸப்³பே³ஸங் சித்தங் ஜானாதி. அஞ்ஞோபி ச உபரிமோ ஹெட்டி²மஸ்ஸாதி அயங் விஸேஸோ வேதி³தப்³போ³. ‘யதா²கம்முபக³ஞாணசதுத்த²ங்’ காமாவசரகம்மஜானநகாலே பரித்தாரம்மணங் ஹோதி, ரூபாவசராரூபாவசரகம்மஜானநகாலே மஹக்³க³தாரம்மணங்.
‘Dibbasotacatutthaṃ’ saddaṃ ārabbha pavattattā ekantaparittārammaṇameva. ‘Cetopariyañāṇacatutthaṃ’ parittamahaggataappamāṇārammaṇaṃ hoti. Kathaṃ? Tañhi paresaṃ kāmāvacaracittajānanakāle parittārammaṇaṃ hoti, rūpāvacarārūpāvacaracittajānanakāle mahaggatārammaṇaṃ, maggaphalajānanakāle appamāṇārammaṇaṃ hoti. Ettha ca puthujjano sotāpannassa cittaṃ na jānāti, sotāpanno vā sakadāgāmissāti evaṃ yāva arahato netabbaṃ. Arahā pana sabbesaṃ cittaṃ jānāti. Aññopi ca uparimo heṭṭhimassāti ayaṃ viseso veditabbo. ‘Yathākammupagañāṇacatutthaṃ’ kāmāvacarakammajānanakāle parittārammaṇaṃ hoti, rūpāvacarārūpāvacarakammajānanakāle mahaggatārammaṇaṃ.
‘தி³ப்³ப³சக்கு²ஞாணசதுத்த²ங்’ ரூபாரம்மணத்தா ஏகந்தபரித்தாரம்மணமேவ. ‘புப்³பே³னிவாஸஞாணசதுத்த²ங்’ பரித்தமஹக்³க³தஅப்பமாணனவத்தப்³பா³ரம்மணங் ஹோதி. கத²ங்? தஞ்ஹி காமாவசரக்க²ந்தா⁴னுஸ்ஸரணகாலே பரித்தாரம்மணங் ஹோதி. ரூபாவசராரூபாவசரக்க²ந்தா⁴னுஸ்ஸரணகாலே மஹக்³க³தாரம்மணங். அதீதே அத்தனா வா பரேஹி வா பா⁴விதமக்³க³ங் ஸச்சி²கதப²லஞ்ச அனுஸ்ஸரணகாலே அப்பமாணாரம்மணங். அதீதே பு³த்³தா⁴ மக்³க³ங் பா⁴வயிங்ஸு, ப²லங் ஸச்சா²கங்ஸு, நிப்³பா³னதா⁴துயா பரினிப்³பா³யிங்ஸூதி சி²ன்னவடுமகானுஸ்ஸரணவஸேன மக்³க³ப²லனிப்³பா³னபச்சவெக்க²ணதோபி அப்பமாணாரம்மணங். அதீதே ‘விபஸ்ஸீ நாம ப⁴க³வா’ அஹோஸி . தஸ்ஸ ‘ப³ந்து⁴மதீ நாம நக³ரங் அஹோஸி, ப³ந்து⁴மா நாம ராஜா பிதா, ப³ந்து⁴மதீ நாம மாதா’திஆதி³னா நயேன நாமகொ³த்தபத²வீனிமித்தாதி³அனுஸ்ஸரணகாலே நவத்தப்³பா³ரம்மணங் ஹோதி.
‘Dibbacakkhuñāṇacatutthaṃ’ rūpārammaṇattā ekantaparittārammaṇameva. ‘Pubbenivāsañāṇacatutthaṃ’ parittamahaggataappamāṇanavattabbārammaṇaṃ hoti. Kathaṃ? Tañhi kāmāvacarakkhandhānussaraṇakāle parittārammaṇaṃ hoti. Rūpāvacarārūpāvacarakkhandhānussaraṇakāle mahaggatārammaṇaṃ. Atīte attanā vā parehi vā bhāvitamaggaṃ sacchikataphalañca anussaraṇakāle appamāṇārammaṇaṃ. Atīte buddhā maggaṃ bhāvayiṃsu, phalaṃ sacchākaṃsu, nibbānadhātuyā parinibbāyiṃsūti chinnavaṭumakānussaraṇavasena maggaphalanibbānapaccavekkhaṇatopi appamāṇārammaṇaṃ. Atīte ‘vipassī nāma bhagavā’ ahosi . Tassa ‘bandhumatī nāma nagaraṃ ahosi, bandhumā nāma rājā pitā, bandhumatī nāma mātā’tiādinā nayena nāmagottapathavīnimittādianussaraṇakāle navattabbārammaṇaṃ hoti.
‘அனாக³தங்ஸஞாணசதுத்தே²’பி ஏஸேவ நயோ. தம்பி அயங் அனாக³தே ‘காமாவசரே நிப்³ப³த்திஸ்ஸதீ’தி ஜானநகாலே பரித்தாரம்மணங் ஹோதி. ‘ரூபாவசரே வா அரூபாவசரே வா நிப்³ப³த்திஸ்ஸதீ’தி ஜானநகாலே மஹக்³க³தாரம்மணங். ‘மக்³க³ங் பா⁴வெஸ்ஸதி ப²லங் ஸச்சி²கரிஸ்ஸதி’ ‘நிப்³பா³னதா⁴துயா பரினிப்³பா³யிஸ்ஸதீ’தி ஜானநகாலே அப்பமாணாரம்மணங். அனாக³தே ‘‘மெத்தெய்யோ நாம ப⁴க³வா உப்பஜ்ஜிஸ்ஸதி, ஸுப்³ரஹ்மா நாமஸ்ஸ ப்³ராஹ்மணோ பிதா ப⁴விஸ்ஸதி, ப்³ரஹ்மவதீ நாம ப்³ராஹ்மணீ மாதா ப⁴விஸ்ஸதீ’’திஆதி³னா நயேன நாமகொ³த்தஜானநகாலே நவத்தப்³பா³ரம்மணங் ஹோதி.
‘Anāgataṃsañāṇacatutthe’pi eseva nayo. Tampi ayaṃ anāgate ‘kāmāvacare nibbattissatī’ti jānanakāle parittārammaṇaṃ hoti. ‘Rūpāvacare vā arūpāvacare vā nibbattissatī’ti jānanakāle mahaggatārammaṇaṃ. ‘Maggaṃ bhāvessati phalaṃ sacchikarissati’ ‘nibbānadhātuyā parinibbāyissatī’ti jānanakāle appamāṇārammaṇaṃ. Anāgate ‘‘metteyyo nāma bhagavā uppajjissati, subrahmā nāmassa brāhmaṇo pitā bhavissati, brahmavatī nāma brāhmaṇī mātā bhavissatī’’tiādinā nayena nāmagottajānanakāle navattabbārammaṇaṃ hoti.
அரூபாவசரசதுத்த²ங் பன ஆஸவானங் க²யசதுத்த²ஞ்ச பாளியங் ஆக³தட்டா²னேயேவ கதெ²ஸ்ஸாமி. கிரியாஹேதுகமனோவிஞ்ஞாணதா⁴து உபெக்கா²ஸஹக³தா ஸப்³பே³ஸம்பி ஏதேஸங் குஸலாகுஸலகிரியசித்தானங் புரேசாரிகா. தஸ்ஸா தேஸு வுத்தனயேனேவ ஆரம்மணபே⁴தோ³ வேதி³தப்³போ³. பஞ்சத்³வாரே பன வொட்ட²ப்³ப³னவஸேன பவத்தியங் ஏகந்தபரித்தாரம்மணாவ ஹோதி. ரூபாவசரதிகசதுக்கஜ்ஜா²னாதீ³னி பரித்தாதி³பா⁴வேன நவத்தப்³ப³த⁴ம்மங் ஆரப்³ப⁴ பவத்திதோ நவத்தப்³பா³ரம்மணானி. எத்த² ஹி ரூபாவசரானி பத²வீகஸிணாதீ³ஸு பவத்தந்தி, ஆகாஸானஞ்சாயதனங் உக்³கா⁴டிமாகாஸே, ஆகிஞ்சஞ்ஞாயதனங் விஞ்ஞாணாபக³மேதி.
Arūpāvacaracatutthaṃ pana āsavānaṃ khayacatutthañca pāḷiyaṃ āgataṭṭhāneyeva kathessāmi. Kiriyāhetukamanoviññāṇadhātu upekkhāsahagatā sabbesampi etesaṃ kusalākusalakiriyacittānaṃ purecārikā. Tassā tesu vuttanayeneva ārammaṇabhedo veditabbo. Pañcadvāre pana voṭṭhabbanavasena pavattiyaṃ ekantaparittārammaṇāva hoti. Rūpāvacaratikacatukkajjhānādīni parittādibhāvena navattabbadhammaṃ ārabbha pavattito navattabbārammaṇāni. Ettha hi rūpāvacarāni pathavīkasiṇādīsu pavattanti, ākāsānañcāyatanaṃ ugghāṭimākāse, ākiñcaññāyatanaṃ viññāṇāpagameti.
1429. மக்³கா³ரம்மணத்திகே ஆதி³ம்ஹி வுத்தா அட்ட² ஞாணஸம்பயுத்தசித்துப்பாதா³ ஸெக்கா²ஸெக்கா²னங் அத்தனா படிவித்³த⁴மக்³கா³னங் பச்சவெக்க²ணகாலே மக்³கா³ரம்மணா, மக்³கே³ன பன அஸஹஜாதத்தா ந மக்³க³ஹேதுகா, அத்தனா படிவித்³த⁴மக்³க³ங் க³ருங் கத்வா பச்சவெக்க²ணகாலே ஆரம்மணாதி⁴பதிவஸேன மக்³கா³தி⁴பதினோ, அஞ்ஞத⁴ம்மாரம்மணகாலே ந வத்தப்³பா³ மக்³கா³ரம்மணாதிபி மக்³கா³தி⁴பதினோதிபி. சத்தாரோ அரியமக்³கா³ மக்³க³ஸங்கா²தஸ்ஸ மக்³க³ஸம்பயுத்தஸ்ஸ வா ஹேதுனோ அத்தி²தாய ஏகந்ததோ மக்³க³ஹேதுகாவ. வீரியங் பன வீமங்ஸங் வா ஜெட்ட²கங் கத்வா மக்³க³பா⁴வனாகாலே ஸஹஜாதாதி⁴பதினா ஸியா மக்³கா³தி⁴பதினோ, ச²ந்த³சித்தானங் அஞ்ஞதரஜெட்ட²ககாலே ஸியா ந வத்தப்³பா³ மக்³கா³தி⁴பதினோதி.
1429. Maggārammaṇattike ādimhi vuttā aṭṭha ñāṇasampayuttacittuppādā sekkhāsekkhānaṃ attanā paṭividdhamaggānaṃ paccavekkhaṇakāle maggārammaṇā, maggena pana asahajātattā na maggahetukā, attanā paṭividdhamaggaṃ garuṃ katvā paccavekkhaṇakāle ārammaṇādhipativasena maggādhipatino, aññadhammārammaṇakāle na vattabbā maggārammaṇātipi maggādhipatinotipi. Cattāro ariyamaggā maggasaṅkhātassa maggasampayuttassa vā hetuno atthitāya ekantato maggahetukāva. Vīriyaṃ pana vīmaṃsaṃ vā jeṭṭhakaṃ katvā maggabhāvanākāle sahajātādhipatinā siyā maggādhipatino, chandacittānaṃ aññatarajeṭṭhakakāle siyā na vattabbā maggādhipatinoti.
த்³வாத³ஸவிதே⁴ ரூபாவசரசதுத்த²ஜ்ஜா²னே ஸப்³ப³த்த²பாத³கசதுத்தா²தீ³னி நவ ஜா²னானி நேவ மக்³கா³ரம்மணானி ந மக்³க³ஹேதுகானி ந மக்³கா³தி⁴பதீனி. சேதோபரியஞாணபுப்³பே³னிவாஸஞாணஅனாக³தங்ஸஞாணசதுத்தா²னி பன அரியானங் மக்³க³சித்தஜானநகாலே மக்³கா³ரம்மணானி ஹொந்தி, மக்³கே³ன பன அஸஹஜாதத்தா ந மக்³க³ஹேதுகானி, மக்³க³ங் க³ருங் கத்வா அப்பவத்திதோ ந மக்³கா³தி⁴பதீனி. கஸ்மா பனேதானி ந மக்³க³ங் க³ருங் கரொந்தீதி? அத்தனோ மஹக்³க³ததாய. யதா² ஹி ராஜானங் ஸப்³போ³ லோகோ க³ருங் கரோதி, மாதாபிதரோ பன ந கரொந்தி. ந ஹி தே ராஜானங் தி³ஸ்வா ஆஸனா வுட்ட²ஹந்தி, ந அஞ்ஜலிகம்மாதீ³னி கரொந்தி, த³ஹரகாலே வோஹரிதனயேனேவ வோஹரந்தி. ஏவமேதானிபி அத்தனோ மஹக்³க³ததாய ந மக்³க³ங் க³ருங் கரொந்தி.
Dvādasavidhe rūpāvacaracatutthajjhāne sabbatthapādakacatutthādīni nava jhānāni neva maggārammaṇāni na maggahetukāni na maggādhipatīni. Cetopariyañāṇapubbenivāsañāṇaanāgataṃsañāṇacatutthāni pana ariyānaṃ maggacittajānanakāle maggārammaṇāni honti, maggena pana asahajātattā na maggahetukāni, maggaṃ garuṃ katvā appavattito na maggādhipatīni. Kasmā panetāni na maggaṃ garuṃ karontīti? Attano mahaggatatāya. Yathā hi rājānaṃ sabbo loko garuṃ karoti, mātāpitaro pana na karonti. Na hi te rājānaṃ disvā āsanā vuṭṭhahanti, na añjalikammādīni karonti, daharakāle voharitanayeneva voharanti. Evametānipi attano mahaggatatāya na maggaṃ garuṃ karonti.
கிரியாஹேதுகமனோவிஞ்ஞாணதா⁴துபி அரியானங் மக்³க³பச்சவெக்க²ணகாலே பச்சவெக்க²ணபுரேசாரிகத்தா மக்³கா³ரம்மணா ஹோதி, மக்³கே³ன அஸஹஜாதத்தா பன ந மக்³க³ஹேதுகா, மக்³க³ங் க³ருங் கத்வா அப்பவத்திதோ ந மக்³கா³தி⁴பதி. கஸ்மா க³ருங் ந கரோதீதி? அத்தனோ அஹேதுகதாய ஹீனதாய ஜளதாய. யதா² ஹி ராஜானங் ஸப்³போ³ லோகோ க³ருங் கரோதி, அத்தனோ பரிஜனா பன கு²ஜ்ஜவாமனகசேடகாத³யோ அத்தனோ அஞ்ஞாணதாய பண்டி³தமனுஸ்ஸா விய நாதிக³ருங் கரொந்தி, ஏவமேவ இத³ம்பி சித்தங் அத்தனோ அஹேதுகதாய ஹீனதாய ஜளதாய மக்³க³ங் க³ருங் ந கரோதி.
Kiriyāhetukamanoviññāṇadhātupi ariyānaṃ maggapaccavekkhaṇakāle paccavekkhaṇapurecārikattā maggārammaṇā hoti, maggena asahajātattā pana na maggahetukā, maggaṃ garuṃ katvā appavattito na maggādhipati. Kasmā garuṃ na karotīti? Attano ahetukatāya hīnatāya jaḷatāya. Yathā hi rājānaṃ sabbo loko garuṃ karoti, attano parijanā pana khujjavāmanakaceṭakādayo attano aññāṇatāya paṇḍitamanussā viya nātigaruṃ karonti, evameva idampi cittaṃ attano ahetukatāya hīnatāya jaḷatāya maggaṃ garuṃ na karoti.
ஞாணவிப்பயுத்தகுஸலாதீ³னி ஞாணாபா⁴வேன சேவ லோகியத⁴ம்மாரம்மணதாய ச மக்³கா³ரம்மணாதி³பா⁴வங் ந லப⁴ந்தி, நவத்தப்³பா³ரம்மணானேவ ஹொந்தீதி வேதி³தப்³பா³னீதி.
Ñāṇavippayuttakusalādīni ñāṇābhāvena ceva lokiyadhammārammaṇatāya ca maggārammaṇādibhāvaṃ na labhanti, navattabbārammaṇāneva hontīti veditabbānīti.
1432. அதீதாரம்மணத்திகே விஞ்ஞாணஞ்சாயதனநேவஸஞ்ஞானாஸஞ்ஞாயதனத⁴ம்மா ஹெட்டா² அதீதஸமாபத்திங் ஆரப்³ப⁴ பவத்திதா ஏகந்தேன அதீதாரம்மணாவ.
1432. Atītārammaṇattike viññāṇañcāyatananevasaññānāsaññāyatanadhammā heṭṭhā atītasamāpattiṃ ārabbha pavattitā ekantena atītārammaṇāva.
1433. நியோகா³ அனாக³தாரம்மணா நத்தீ²தி நியமேன பாடியேக்கங் சித்தங் அனாக³தாரம்மணங் நாம நத்தி². நனு ச அனாக³தங்ஸஞாணங் ஏகந்தேன அனாக³தாரம்மணங், சேதோபரியஞாணம்பி அனாக³தங் ஆரப்³ப⁴ பவத்ததீதி? நோ ந பவத்ததி. பாடியேக்கங் பன ஏதங் ஏகங் சித்தங் நாம நத்தி². ரூபாவசரசதுத்த²ஜ்ஜா²னேன ஸங்க³ஹிதத்தா அஞ்ஞேஹி மஹக்³க³தசித்தேஹி மிஸ்ஸகங் ஹோதி. தேன வுத்தங் ‘நியோகா³ அனாக³தாரம்மணா நத்தீ²’தி.
1433. Niyogā anāgatārammaṇā natthīti niyamena pāṭiyekkaṃ cittaṃ anāgatārammaṇaṃ nāma natthi. Nanu ca anāgataṃsañāṇaṃ ekantena anāgatārammaṇaṃ, cetopariyañāṇampi anāgataṃ ārabbha pavattatīti? No na pavattati. Pāṭiyekkaṃ pana etaṃ ekaṃ cittaṃ nāma natthi. Rūpāvacaracatutthajjhānena saṅgahitattā aññehi mahaggatacittehi missakaṃ hoti. Tena vuttaṃ ‘niyogā anāgatārammaṇā natthī’ti.
1434. த்³விபஞ்சவிஞ்ஞாணானி , திஸ்ஸோ மனோதா⁴துயோ ச பச்சுப்பன்னேஸு ரூபாதீ³ஸு பவத்திதோ பச்சுப்பன்னாரம்மணா நாம. த³ஸ சித்துப்பாதா³தி எத்த² அட்ட² தாவ ஸஹேதுகா தே³வமனுஸ்ஸானங் படிஸந்தி⁴க்³க³ஹணகாலே கம்மங் வா கம்மனிமித்தங் வா ஆரப்³ப⁴ பவத்தியங் அதீதாரம்மணா. ப⁴வங்க³சுதிகாலேஸுபி ஏஸேவ நயோ. க³தினிமித்தங் பன ஆரப்³ப⁴ படிஸந்தி⁴க்³க³ஹணகாலே ததோ பரங் ப⁴வங்க³காலே ச பச்சுப்பன்னாரம்மணா. ததா² பஞ்சத்³வாரே ததா³ரம்மணவஸேன பவத்தியங். மனொத்³வாரே பன அதீதானாக³தபச்சுப்பன்னாரம்மணானங் ஜவனானங் ஆரம்மணங் க³ஹெத்வா பவத்திதோ அதீதானாக³தபச்சுப்பன்னாரம்மணா. ‘குஸலவிபாகாஹேதுகஉபெக்கா²ஸஹக³தமனோவிஞ்ஞாணதா⁴துய’ம்பி ஏஸேவ நயோ. கேவலஞ்ஹி ஸா மனுஸ்ஸேஸு ஜச்சந்தா⁴தீ³னங் படிஸந்தி⁴ ஹோதி. பஞ்சத்³வாரே ச ஸந்தீரணவஸேனாபி பச்சுப்பன்னாரம்மணா ஹோதீதி அயமெத்த² விஸேஸோ. ‘ஸோமனஸ்ஸஸஹக³தா’ பன பஞ்சத்³வாரே ஸந்தீரணவஸேன ததா³ரம்மணவஸேன ச பச்சுப்பன்னாரம்மணா ஹோதி. மனொத்³வாரே ததா³ரம்மணவஸேன ஸஹேதுகவிபாகா விய அதீதானாக³தபச்சுப்பன்னாரம்மணாதி வேதி³தப்³பா³.
1434. Dvipañcaviññāṇāni , tisso manodhātuyo ca paccuppannesu rūpādīsu pavattito paccuppannārammaṇā nāma. Dasa cittuppādāti ettha aṭṭha tāva sahetukā devamanussānaṃ paṭisandhiggahaṇakāle kammaṃ vā kammanimittaṃ vā ārabbha pavattiyaṃ atītārammaṇā. Bhavaṅgacutikālesupi eseva nayo. Gatinimittaṃ pana ārabbha paṭisandhiggahaṇakāle tato paraṃ bhavaṅgakāle ca paccuppannārammaṇā. Tathā pañcadvāre tadārammaṇavasena pavattiyaṃ. Manodvāre pana atītānāgatapaccuppannārammaṇānaṃ javanānaṃ ārammaṇaṃ gahetvā pavattito atītānāgatapaccuppannārammaṇā. ‘Kusalavipākāhetukaupekkhāsahagatamanoviññāṇadhātuya’mpi eseva nayo. Kevalañhi sā manussesu jaccandhādīnaṃ paṭisandhi hoti. Pañcadvāre ca santīraṇavasenāpi paccuppannārammaṇā hotīti ayamettha viseso. ‘Somanassasahagatā’ pana pañcadvāre santīraṇavasena tadārammaṇavasena ca paccuppannārammaṇā hoti. Manodvāre tadārammaṇavasena sahetukavipākā viya atītānāgatapaccuppannārammaṇāti veditabbā.
‘அகுஸலவிபாகாஹேதுகமனோவிஞ்ஞாணதா⁴து’ பன குஸலவிபாகாய உபெக்கா²ஸஹக³தாஹேதுகாய ஸமானக³திகா ஏவ. கேவலஞ்ஹி ஸா ஆபாயிகானங் படிஸந்தி⁴ப⁴வங்க³சுதிவஸேன பவத்ததீதி அயமெத்த² விஸேஸோ. ‘கிரியாஹேதுகமனோவிஞ்ஞாணதா⁴து’ ஸோமனஸ்ஸஸஹக³தா கீ²ணாஸவானங் பஞ்சத்³வாரே பஹட்டா²காரங் குருமானா பச்சுப்பன்னாரம்மணா ஹோதி. மனொத்³வாரே அதீதாதி³பே⁴தே³ த⁴ம்மே ஆரப்³ப⁴ ஹஸிதுப்பாத³வஸேன பவத்தியங் அதீதானாக³தபச்சுப்பன்னாரம்மணா ஹோதி.
‘Akusalavipākāhetukamanoviññāṇadhātu’ pana kusalavipākāya upekkhāsahagatāhetukāya samānagatikā eva. Kevalañhi sā āpāyikānaṃ paṭisandhibhavaṅgacutivasena pavattatīti ayamettha viseso. ‘Kiriyāhetukamanoviññāṇadhātu’ somanassasahagatā khīṇāsavānaṃ pañcadvāre pahaṭṭhākāraṃ kurumānā paccuppannārammaṇā hoti. Manodvāre atītādibhede dhamme ārabbha hasituppādavasena pavattiyaṃ atītānāgatapaccuppannārammaṇā hoti.
காமாவசரகுஸலந்திஆதீ³ஸு குஸலதோ தாவ சத்தாரோ ஞாணஸம்பயுத்தசித்துப்பாதா³. ஸெக்க²புது²ஜ்ஜனானங் அதீதாதி³பே⁴தா³னி க²ந்த⁴தா⁴துஆயதனானி ஸம்மஸந்தானங் பச்சவெக்க²ந்தானங் அதீதானாக³தபச்சுப்பன்னாரம்மணா ஹொந்தி. பண்ணத்தினிப்³பா³னபச்சவெக்க²ணே நவத்தப்³பா³ரம்மணா. ஞாணவிப்பயுத்தேஸுபி ஏஸேவ நயோ . கேவலஞ்ஹி தேஹி மக்³க³ப²லனிப்³பா³னபச்சவெக்க²ணா நத்தி². அயமேவெத்த² விஸேஸோ.
Kāmāvacarakusalantiādīsu kusalato tāva cattāro ñāṇasampayuttacittuppādā. Sekkhaputhujjanānaṃ atītādibhedāni khandhadhātuāyatanāni sammasantānaṃ paccavekkhantānaṃ atītānāgatapaccuppannārammaṇā honti. Paṇṇattinibbānapaccavekkhaṇe navattabbārammaṇā. Ñāṇavippayuttesupi eseva nayo . Kevalañhi tehi maggaphalanibbānapaccavekkhaṇā natthi. Ayamevettha viseso.
அகுஸலதோ சத்தாரோ தி³ட்டி²ஸம்பயுத்தசித்துப்பாதா³ அதீதாதி³பே⁴தா³னங் க²ந்த⁴தா⁴துஆயதனானங் அஸ்ஸாத³னாபி⁴னந்த³னபராமாஸகாலே அதீதாதி³ஆரம்மணா ஹொந்தி. பண்ணத்திங் ஆரப்³ப⁴ அஸ்ஸாதெ³ந்தஸ்ஸ அபி⁴னந்த³ந்தஸ்ஸ ‘ஸத்தோ ஸத்தோ’தி பராமஸித்வா க³ண்ஹந்தஸ்ஸ நவத்தப்³பா³ரம்மணா ஹொந்தி. தி³ட்டி²விப்பயுத்தேஸுபி ஏஸேவ நயோ. கேவலஞ்ஹி தேஹி பராமாஸக்³க³ஹணங் நத்தி². த்³வே படிக⁴ஸம்பயுத்தசித்துப்பாதா³ அதீதாதி³பே⁴தே³ த⁴ம்மே ஆரப்³ப⁴ தோ³மனஸ்ஸிதானங் அதீதாதி³ஆரம்மணா, பண்ணத்திங் ஆரப்³ப⁴ தோ³மனஸ்ஸிதானங் நவத்தப்³பா³ரம்மணா. விசிகிச்சு²த்³த⁴ச்சஸம்பயுத்தா தேஸு ஏவ த⁴ம்மேஸு அனிட்ட²ங்க³தபா⁴வேன சேவ உத்³த⁴தபா⁴வேன ச பவத்தியங் அதீதானாக³தபச்சுப்பன்னநவத்தப்³பா³ரம்மணா. கிரியதோ அட்ட² ஸஹேதுகசித்துப்பாதா³ குஸலசித்துப்பாத³க³திகா ஏவ. கிரியாஹேதுகமனோவிஞ்ஞாணதா⁴து உபெக்கா²ஸஹக³தா பஞ்சத்³வாரே வொட்ட²ப்³ப³னவஸேன பவத்தியங் பச்சுப்பன்னாரம்மணாவ . மனொத்³வாரே அதீதானாக³தபச்சுப்பன்னாரம்மணானஞ்சேவ பண்ணத்தினிப்³பா³னாரம்மணானஞ்ச ஜவனானங் புரேசாரிககாலே அதீதானாக³தபச்சுப்பன்னநவத்தப்³பா³ரம்மணா.
Akusalato cattāro diṭṭhisampayuttacittuppādā atītādibhedānaṃ khandhadhātuāyatanānaṃ assādanābhinandanaparāmāsakāle atītādiārammaṇā honti. Paṇṇattiṃ ārabbha assādentassa abhinandantassa ‘satto satto’ti parāmasitvā gaṇhantassa navattabbārammaṇā honti. Diṭṭhivippayuttesupi eseva nayo. Kevalañhi tehi parāmāsaggahaṇaṃ natthi. Dve paṭighasampayuttacittuppādā atītādibhede dhamme ārabbha domanassitānaṃ atītādiārammaṇā, paṇṇattiṃ ārabbha domanassitānaṃ navattabbārammaṇā. Vicikicchuddhaccasampayuttā tesu eva dhammesu aniṭṭhaṅgatabhāvena ceva uddhatabhāvena ca pavattiyaṃ atītānāgatapaccuppannanavattabbārammaṇā. Kiriyato aṭṭha sahetukacittuppādā kusalacittuppādagatikā eva. Kiriyāhetukamanoviññāṇadhātu upekkhāsahagatā pañcadvāre voṭṭhabbanavasena pavattiyaṃ paccuppannārammaṇāva . Manodvāre atītānāgatapaccuppannārammaṇānañceva paṇṇattinibbānārammaṇānañca javanānaṃ purecārikakāle atītānāgatapaccuppannanavattabbārammaṇā.
யதா²வுத்தப்பபே⁴தே³ ரூபாவசரஜ்ஜா²னே ஸப்³ப³த்த²பாத³கசதுத்த²ங் ஆகாஸகஸிணசதுத்த²ங் ஆலோககஸிணசதுத்த²ங் ப்³ரஹ்மவிஹாரசதுத்த²ங் ஆனாபானசதுத்த²ந்தி இமானி பஞ்ச நவத்தப்³பா³ரம்மணானேவ. ‘இத்³தி⁴வித⁴சதுத்த²ங்’ காயவஸேன சித்தங் பரிணாமெந்தஸ்ஸ அதீதபாத³கஜ்ஜா²னசித்தங் ஆரப்³ப⁴ பவத்தனதோ அதீதாரம்மணங். மஹாதா⁴துனிதா⁴னே மஹாகஸ்ஸபத்தே²ராதீ³னங் விய அனாக³தங் அதி⁴ட்ட²ஹந்தானங் அனாக³தாரம்மணங் ஹோதி. மஹாகஸ்ஸபத்தே²ரோ கிர மஹாதா⁴துனிதா⁴னங் கரொந்தோ அனாக³தே அட்டா²ரஸவஸ்ஸாதி⁴கானி த்³வே வஸ்ஸஸதானி இமே க³ந்தா⁴ மா ஸுஸ்ஸிங்ஸு, புப்பா²னி மா மிலாயிங்ஸு, தீ³பா மா நிப்³பா³யிங்ஸூதி அதி⁴ட்ட²ஹி. ஸப்³ப³ங் ததே²வ அஹோஸி. அஸ்ஸகு³த்தத்தே²ரோ வத்தனியஸேனாஸனே பி⁴க்கு²ஸங்க⁴ங் ஸுக்க²ப⁴த்தங் பு⁴ஞ்ஜமானங் தி³ஸ்வா ‘உத³கஸொண்டி³ தி³வஸே தி³வஸே, புரேப⁴த்தங் த³தி⁴ரஸா ஹோதூ’தி அதி⁴ட்ட²ஹி. புரேப⁴த்தங் க³ஹிதங் த³தி⁴ரஸங் ஹோதி பச்சா²ப⁴த்தே பாகதிகமேவ. காயங் பன சித்தஸன்னிஸ்ஸிதங் கத்வா அதி³ஸ்ஸமானேன காயேன க³மனகாலே, அஞ்ஞஸ்ஸ வா பாடிஹாரியஸ்ஸ கரணகாலே, காயங் ஆரப்³ப⁴ பவத்தத்தா பச்சுப்பன்னாரம்மணங் ஹோதி.
Yathāvuttappabhede rūpāvacarajjhāne sabbatthapādakacatutthaṃ ākāsakasiṇacatutthaṃ ālokakasiṇacatutthaṃ brahmavihāracatutthaṃ ānāpānacatutthanti imāni pañca navattabbārammaṇāneva. ‘Iddhividhacatutthaṃ’ kāyavasena cittaṃ pariṇāmentassa atītapādakajjhānacittaṃ ārabbha pavattanato atītārammaṇaṃ. Mahādhātunidhāne mahākassapattherādīnaṃ viya anāgataṃ adhiṭṭhahantānaṃ anāgatārammaṇaṃ hoti. Mahākassapatthero kira mahādhātunidhānaṃ karonto anāgate aṭṭhārasavassādhikāni dve vassasatāni ime gandhā mā sussiṃsu, pupphāni mā milāyiṃsu, dīpā mā nibbāyiṃsūti adhiṭṭhahi. Sabbaṃ tatheva ahosi. Assaguttatthero vattaniyasenāsane bhikkhusaṅghaṃ sukkhabhattaṃ bhuñjamānaṃ disvā ‘udakasoṇḍi divase divase, purebhattaṃ dadhirasā hotū’ti adhiṭṭhahi. Purebhattaṃ gahitaṃ dadhirasaṃ hoti pacchābhatte pākatikameva. Kāyaṃ pana cittasannissitaṃ katvā adissamānena kāyena gamanakāle, aññassa vā pāṭihāriyassa karaṇakāle, kāyaṃ ārabbha pavattattā paccuppannārammaṇaṃ hoti.
‘தி³ப்³ப³ஸோதசதுத்த²ங்’ விஜ்ஜமானஸத்³த³மேவ ஆரப்³ப⁴ பவத்திதோ பச்சுப்பன்னாரம்மணங் ஹோதி. சேதோபரியஞாணசதுத்த²ங் அதீதே ஸத்ததி³வஸப்³ப⁴ந்தரே அனாக³தே ஸத்ததி³வஸப்³ப⁴ந்தரே பரேஸங் சித்தங் ஜானந்தஸ்ஸ அதீதாரம்மணங் அனாக³தாரம்மணஞ்ச ஹோதி. ஸத்ததி³வஸாதிக்கமே பன தங் ஜானிதுங் ந ஸக்கோதி. அதீதானாக³தங்ஸஞாணானஞ்ஹி ஏஸ விஸயோ. ந ஏதஸ்ஸ பச்சுப்பன்னஜானநகாலே பன பச்சுப்பன்னாரம்மணங் ஹோதி.
‘Dibbasotacatutthaṃ’ vijjamānasaddameva ārabbha pavattito paccuppannārammaṇaṃ hoti. Cetopariyañāṇacatutthaṃ atīte sattadivasabbhantare anāgate sattadivasabbhantare paresaṃ cittaṃ jānantassa atītārammaṇaṃ anāgatārammaṇañca hoti. Sattadivasātikkame pana taṃ jānituṃ na sakkoti. Atītānāgataṃsañāṇānañhi esa visayo. Na etassa paccuppannajānanakāle pana paccuppannārammaṇaṃ hoti.
பச்சுப்பன்னஞ்ச நாமேதங் திவித⁴ங் – க²ணபச்சுப்பன்னங் ஸந்ததிபச்சுப்பன்னங் அத்³தா⁴பச்சுப்பன்னஞ்ச. தத்த² உப்பாத³ட்டி²திப⁴ங்க³ப்பத்தங் ‘க²ணபச்சுப்பன்னங்’. ஏகத்³விஸந்ததிவாரபரியாபன்னங் ‘ஸந்ததிபச்சுப்பன்னங்’. தத்த² அந்த⁴காரே நிஸீதி³த்வா ஆலோகட்டா²னங் க³தஸ்ஸ ந தாவ ஆரம்மணங் பாகடங் ஹோதி; யாவ பன தங் பாகடங் ஹோதி, எத்த²ந்தரே ஏகத்³விஸந்ததிவாரா வேதி³தப்³பா³. ஆலோகட்டா²னே விசரித்வா ஓவரகங் பவிட்ட²ஸ்ஸாபி ந தாவ ஸஹஸா ரூபங் பாகடங் ஹோதி; யாவ தங் பாகடங் ஹோதி, எத்த²ந்தரே ஏகத்³விஸந்ததிவாரா வேதி³தப்³பா³. தூ³ரே ட²த்வா பன ரஜகானங் ஹத்த²விகாரங் க⁴ண்டி³பே⁴ரீஆதி³ஆகோடனவிகாரஞ்ச தி³ஸ்வாபி ந தாவ ஸத்³த³ங் ஸுணாதி; யாவ பன தங் ஸுணாதி, ஏதஸ்மிம்பி அந்தரே ஏகத்³விஸந்ததிவாரா வேதி³தப்³பா³. ஏவங் தாவ மஜ்ஜி²மபா⁴ணகா. ஸங்யுத்தபா⁴ணகா பன ‘ரூபஸந்ததி அரூபஸந்ததீ’தி த்³வே ஸந்ததியோ வத்வா, ‘உத³கங் அக்கமித்வா க³தஸ்ஸ யாவ தீரே அக்கந்தஉத³கலேகா² ந விப்பஸீத³தி, அத்³தா⁴னதோ ஆக³தஸ்ஸ யாவ காயே உஸுமபா⁴வோ ந வூபஸம்மதி, ஆதபா ஆக³ந்த்வா க³ப்³ப⁴ங் பவிட்ட²ஸ்ஸ யாவ அந்த⁴காரபா⁴வோ ந விக³ச்ச²தி, அந்தோக³ப்³பே⁴ கம்மட்டா²னங் மனஸிகரித்வா தி³வா வாதபானங் விவரித்வா ஓலோகெந்தஸ்ஸ யாவ அக்கீ²னங் ப²ந்த³னபா⁴வோ ந வூபஸம்மதி, அயங் ரூபஸந்ததி நாம; த்³வே தயோ ஜவனவாரா அரூபஸந்ததி நாமா’தி வத்வா ‘தது³ப⁴யம்பி ஸந்ததிபச்சுப்பன்னங் நாமா’தி வத³ந்தி.
Paccuppannañca nāmetaṃ tividhaṃ – khaṇapaccuppannaṃ santatipaccuppannaṃ addhāpaccuppannañca. Tattha uppādaṭṭhitibhaṅgappattaṃ ‘khaṇapaccuppannaṃ’. Ekadvisantativārapariyāpannaṃ ‘santatipaccuppannaṃ’. Tattha andhakāre nisīditvā ālokaṭṭhānaṃ gatassa na tāva ārammaṇaṃ pākaṭaṃ hoti; yāva pana taṃ pākaṭaṃ hoti, etthantare ekadvisantativārā veditabbā. Ālokaṭṭhāne vicaritvā ovarakaṃ paviṭṭhassāpi na tāva sahasā rūpaṃ pākaṭaṃ hoti; yāva taṃ pākaṭaṃ hoti, etthantare ekadvisantativārā veditabbā. Dūre ṭhatvā pana rajakānaṃ hatthavikāraṃ ghaṇḍibherīādiākoṭanavikārañca disvāpi na tāva saddaṃ suṇāti; yāva pana taṃ suṇāti, etasmimpi antare ekadvisantativārā veditabbā. Evaṃ tāva majjhimabhāṇakā. Saṃyuttabhāṇakā pana ‘rūpasantati arūpasantatī’ti dve santatiyo vatvā, ‘udakaṃ akkamitvā gatassa yāva tīre akkantaudakalekhā na vippasīdati, addhānato āgatassa yāva kāye usumabhāvo na vūpasammati, ātapā āgantvā gabbhaṃ paviṭṭhassa yāva andhakārabhāvo na vigacchati, antogabbhe kammaṭṭhānaṃ manasikaritvā divā vātapānaṃ vivaritvā olokentassa yāva akkhīnaṃ phandanabhāvo na vūpasammati, ayaṃ rūpasantati nāma; dve tayo javanavārā arūpasantati nāmā’ti vatvā ‘tadubhayampi santatipaccuppannaṃ nāmā’ti vadanti.
ஏகப⁴வபரிச்சி²ன்னங் பன அத்³தா⁴பச்சுப்பன்னங் நாம. யங் ஸந்தா⁴ய ப⁴த்³தே³கரத்தஸுத்தே ‘‘யோ சாவுஸோ, மனோ யே ச த⁴ம்மா உப⁴யமேதங் பச்சுப்பன்னங். தஸ்மிங் சே பச்சுப்பன்னே ச²ந்த³ராக³படிப³த்³த⁴ங் ஹோதி விஞ்ஞாணங், ச²ந்த³ராக³படிப³த்³த⁴த்தா விஞ்ஞாணஸ்ஸ தத³பி⁴னந்த³தி, தத³பி⁴னந்த³ந்தோ பச்சுப்பன்னேஸு த⁴ம்மேஸு ஸங்ஹீரதீ’’தி (ம॰ நி॰ 3.284) வுத்தங். ஸந்ததிபச்சுப்பன்னஞ்செத்த² அட்ட²கதா²ஸு ஆக³தங். அத்³தா⁴பச்சுப்பன்னங் ஸுத்தே.
Ekabhavaparicchinnaṃ pana addhāpaccuppannaṃ nāma. Yaṃ sandhāya bhaddekarattasutte ‘‘yo cāvuso, mano ye ca dhammā ubhayametaṃ paccuppannaṃ. Tasmiṃ ce paccuppanne chandarāgapaṭibaddhaṃ hoti viññāṇaṃ, chandarāgapaṭibaddhattā viññāṇassa tadabhinandati, tadabhinandanto paccuppannesu dhammesu saṃhīratī’’ti (ma. ni. 3.284) vuttaṃ. Santatipaccuppannañcettha aṭṭhakathāsu āgataṃ. Addhāpaccuppannaṃ sutte.
தத்த² கேசி ‘க²ணபச்சுப்பன்னங் சித்தங் சேதோபரியஞாணஸ்ஸ ஆரம்மணங் ஹோதீ’தி வத³ந்தி. கிங்காரணா? யஸ்மா இத்³தி⁴மஸ்ஸ ச பரஸ்ஸ ச ஏகக்க²ணே சித்தங் உப்பஜ்ஜதீதி. இத³ஞ்ச நேஸங் ஓபம்மங் – யதா² ஆகாஸே கி²த்தே புப்ப²முட்டி²ம்ஹி அவஸ்ஸங் ஏகங் புப்ப²ங் ஏகஸ்ஸ வண்டங் படிவிஜ்ஜ²தி வண்டேன வண்டங் படிவிஜ்ஜ²தி, ஏவங் பரஸ்ஸ சித்தங் ஜானிஸ்ஸாமீதி ராஸிவஸேன மஹாஜனஸ்ஸ சித்தே ஆவஜ்ஜிதே அவஸ்ஸங் ஏகஸ்ஸ சித்தங் ஏகேன சித்தேன உப்பாத³க்க²ணே வா டி²திக்க²ணே வா ப⁴ங்க³க்க²ணே வா படிவிஜ்ஜ²தீதி. தங் பன வஸ்ஸஸதம்பி வஸ்ஸஸஹஸ்ஸம்பி ஆவஜ்ஜந்தோ யேன சித்தேன ஆவஜ்ஜேதி, யேன ச ஜானாதி தேஸங் த்³வின்னங் ஸஹட்டா²னாபா⁴வதோ ஆவஜ்ஜனஜவனானஞ்ச அனிட்டே² டா²னே நானாரம்மணபா⁴வப்பத்திதோ³ஸதோ அயுத்தந்தி அட்ட²கதா²ஸு படிக்கி²த்தங். ஸந்ததிபச்சுப்பன்னங் பன அத்³தா⁴பச்சுப்பன்னஞ்ச ஆரம்மணங் ஹோதீதி வேதி³தப்³ப³ங்.
Tattha keci ‘khaṇapaccuppannaṃ cittaṃ cetopariyañāṇassa ārammaṇaṃ hotī’ti vadanti. Kiṃkāraṇā? Yasmā iddhimassa ca parassa ca ekakkhaṇe cittaṃ uppajjatīti. Idañca nesaṃ opammaṃ – yathā ākāse khitte pupphamuṭṭhimhi avassaṃ ekaṃ pupphaṃ ekassa vaṇṭaṃ paṭivijjhati vaṇṭena vaṇṭaṃ paṭivijjhati, evaṃ parassa cittaṃ jānissāmīti rāsivasena mahājanassa citte āvajjite avassaṃ ekassa cittaṃ ekena cittena uppādakkhaṇe vā ṭhitikkhaṇe vā bhaṅgakkhaṇe vā paṭivijjhatīti. Taṃ pana vassasatampi vassasahassampi āvajjanto yena cittena āvajjeti, yena ca jānāti tesaṃ dvinnaṃ sahaṭṭhānābhāvato āvajjanajavanānañca aniṭṭhe ṭhāne nānārammaṇabhāvappattidosato ayuttanti aṭṭhakathāsu paṭikkhittaṃ. Santatipaccuppannaṃ pana addhāpaccuppannañca ārammaṇaṃ hotīti veditabbaṃ.
தத்த² யங் வத்தமானஜவனவீதி²தோ அதீதானாக³தவஸேன த்³விதிஜவனவீதி²பரிமாணகாலே பரஸ்ஸ சித்தங், தங் ஸப்³ப³ம்பி ஸந்ததிபச்சுப்பன்னங் நாம. அத்³தா⁴பச்சுப்பன்னங் பன ஜவனவாரேன தீ³பேதப்³ப³ந்தி யங் அட்ட²கதா²யங் வுத்தங் தங் ஸுவுத்தங். தத்ராயங் தீ³பனா – இத்³தி⁴மா பரஸ்ஸ சித்தங் ஜானிதுகாமோ ஆவஜ்ஜேதி. ஆவஜ்ஜனங் க²ணபச்சுப்பன்னங் ஆரம்மணங் கத்வா தேனேவ ஸஹ நிருஜ்ஜ²தி. ததோ சத்தாரி பஞ்ச ஜவனானி யேஸங் பச்சி²மங் இத்³தி⁴சித்தங், ஸேஸானி காமாவசரானி. தேஸங் ஸப்³பே³ஸம்பி ததே³வ நிருத்³த⁴ங் சித்தமாரம்மணங் ஹோதி. ந ச தானி நானாரம்மணானி ஹொந்தி. அத்³தா⁴பச்சுப்பன்னவஸேன பச்சுப்பன்னாரம்மணத்தா ஏகாரம்மணானி. ஏகாரம்மணத்தேபி ச இத்³தி⁴சித்தமேவ பரஸ்ஸ சித்தங் பஜானாதி, ந இதரானி; யதா² சக்கு²த்³வாரே சக்கு²விஞ்ஞாணமேவ ரூபங் பஸ்ஸதி, ந இதரானீதி. இதி இத³ங் ஸந்ததிபச்சுப்பன்னஸ்ஸ சேவ அத்³தா⁴பச்சுப்பன்னஸ்ஸ ச வஸேன பச்சுப்பன்னாரம்மணங் ஹோதி. யஸ்மா வா ஸந்ததிபச்சுப்பன்னம்பி அத்³தா⁴பச்சுப்பன்னேயேவ பததி, தஸ்மா அத்³தா⁴பச்சுப்பன்னவஸேனேதங் பச்சுப்பன்னாரம்மணந்தி வேதி³தப்³ப³ங்.
Tattha yaṃ vattamānajavanavīthito atītānāgatavasena dvitijavanavīthiparimāṇakāle parassa cittaṃ, taṃ sabbampi santatipaccuppannaṃ nāma. Addhāpaccuppannaṃ pana javanavārena dīpetabbanti yaṃ aṭṭhakathāyaṃ vuttaṃ taṃ suvuttaṃ. Tatrāyaṃ dīpanā – iddhimā parassa cittaṃ jānitukāmo āvajjeti. Āvajjanaṃ khaṇapaccuppannaṃ ārammaṇaṃ katvā teneva saha nirujjhati. Tato cattāri pañca javanāni yesaṃ pacchimaṃ iddhicittaṃ, sesāni kāmāvacarāni. Tesaṃ sabbesampi tadeva niruddhaṃ cittamārammaṇaṃ hoti. Na ca tāni nānārammaṇāni honti. Addhāpaccuppannavasena paccuppannārammaṇattā ekārammaṇāni. Ekārammaṇattepi ca iddhicittameva parassa cittaṃ pajānāti, na itarāni; yathā cakkhudvāre cakkhuviññāṇameva rūpaṃ passati, na itarānīti. Iti idaṃ santatipaccuppannassa ceva addhāpaccuppannassa ca vasena paccuppannārammaṇaṃ hoti. Yasmā vā santatipaccuppannampi addhāpaccuppanneyeva patati, tasmā addhāpaccuppannavasenetaṃ paccuppannārammaṇanti veditabbaṃ.
‘புப்³பே³னிவாஸஞாணசதுத்த²ங்’ நாமகொ³த்தானுஸ்ஸரணே நிப்³பா³னநிமித்தபச்சவெக்க²ணே ச நவத்தப்³பா³ரம்மணங், ஸேஸகாலே அதீதாரம்மணமேவ. யதா²கம்முபக³ஞாணசதுத்த²ம்பி அதீதாரம்மணமேவ. தத்த² கிஞ்சாபி புப்³பே³னிவாஸசேதோபரியஞாணானிபி அதீதாரம்மணானி ஹொந்தி, அத² கோ² தேஸங் புப்³பே³னிவாஸஞாணஸ்ஸ அதீதக்க²ந்தா⁴ க²ந்த⁴படிப³த்³த⁴ஞ்ச கிஞ்சி அனாரம்மணங் நாம நத்தி². தஞ்ஹி அதீதக்க²ந்த⁴க²ந்த⁴படிப³த்³தே⁴ஸு த⁴ம்மேஸு ஸப்³ப³ஞ்ஞுதஞ்ஞாணஸமக³திகங் ஹோதி. சேதோபரியஞாணஸ்ஸ ச ஸத்ததி³வஸப்³ப⁴ந்தராதீதங் சித்தமேவ ஆரம்மணங். தஞ்ஹி அஞ்ஞங் க²ந்த⁴ங் வா க²ந்த⁴படிப³த்³த⁴ங் வா ந ஜானாதி, மக்³க³ஸம்பயுத்தசித்தாரம்மணத்தா பன பரியாயதோ மக்³கா³ரம்மணந்தி வுத்தங். யதா²கம்முபக³ஞாணஸ்ஸ ச அதீதசேதனாமத்தமேவாரம்மணந்தி. அயங் விஸேஸோ வேதி³தப்³போ³. அயமெத்த² அட்ட²கதா²னயோ. யஸ்மா பன ‘‘குஸலா க²ந்தா⁴ இத்³தி⁴வித⁴ஞாணஸ்ஸ சேதோபரியஞாணஸ்ஸ புப்³பே³னிவாஸானுஸ்ஸதிஞாணஸ்ஸ யதா²கம்முபக³ஞாணஸ்ஸ அனாக³தங்ஸஞாணஸ்ஸ ஆரம்மணபச்சயேன பச்சயோ’’தி (பட்டா²॰ 1.1.404) பட்டா²னே வுத்தங், தஸ்மா சத்தாரோபி க²ந்தா⁴ சேதோபரியஞாணயதா²கம்முபக³ஞாணானங் ஆரம்மணங் ஹொந்தி. தத்ராபி யதா²கம்முபக³ஞாணஸ்ஸ குஸலாகுஸலா ஏவாதி.
‘Pubbenivāsañāṇacatutthaṃ’ nāmagottānussaraṇe nibbānanimittapaccavekkhaṇe ca navattabbārammaṇaṃ, sesakāle atītārammaṇameva. Yathākammupagañāṇacatutthampi atītārammaṇameva. Tattha kiñcāpi pubbenivāsacetopariyañāṇānipi atītārammaṇāni honti, atha kho tesaṃ pubbenivāsañāṇassa atītakkhandhā khandhapaṭibaddhañca kiñci anārammaṇaṃ nāma natthi. Tañhi atītakkhandhakhandhapaṭibaddhesu dhammesu sabbaññutaññāṇasamagatikaṃ hoti. Cetopariyañāṇassa ca sattadivasabbhantarātītaṃ cittameva ārammaṇaṃ. Tañhi aññaṃ khandhaṃ vā khandhapaṭibaddhaṃ vā na jānāti, maggasampayuttacittārammaṇattā pana pariyāyato maggārammaṇanti vuttaṃ. Yathākammupagañāṇassa ca atītacetanāmattamevārammaṇanti. Ayaṃ viseso veditabbo. Ayamettha aṭṭhakathānayo. Yasmā pana ‘‘kusalā khandhā iddhividhañāṇassa cetopariyañāṇassa pubbenivāsānussatiñāṇassa yathākammupagañāṇassa anāgataṃsañāṇassa ārammaṇapaccayena paccayo’’ti (paṭṭhā. 1.1.404) paṭṭhāne vuttaṃ, tasmā cattāropi khandhā cetopariyañāṇayathākammupagañāṇānaṃ ārammaṇaṃ honti. Tatrāpi yathākammupagañāṇassa kusalākusalā evāti.
‘தி³ப்³ப³சக்கு²ஞாணசதுத்த²ங்’ விஜ்ஜமானவண்ணாரம்மணத்தா பச்சுப்பன்னாரம்மணமேவ. அனாக³தங்ஸஞாணசதுத்த²ங் அனாக³தாரம்மணமேவ. தஞ்ஹி அனாக³தக்க²ந்த⁴க²ந்த⁴படிப³த்³தே⁴ஸு த⁴ம்மேஸு புப்³பே³னிவாஸஞாணங் விய ஸப்³ப³ஞ்ஞுதஞ்ஞாணஸமக³திகங் ஹோதி. தத்த² கிஞ்சாபி சேதோபரியஞாணம்பி அனாக³தாரம்மணங் ஹோதி, தங் பன ஸத்ததி³வஸப்³ப⁴ந்தரே உப்பஜ்ஜனகசித்தமேவ ஆரம்மணங் கரோதி. இத³ங் அனாக³தே கப்பஸதஸஹஸ்ஸே உப்பஜ்ஜனகசித்தம்பி க²ந்தே⁴பி க²ந்த⁴படிப³த்³த⁴ம்பி. ரூபாவசரதிகசதுக்கஜ்ஜா²னாதீ³னி அதீதானாக³தபச்சுப்பன்னேஸு ஏகத⁴ம்மம்பி ஆரப்³ப⁴ அப்பவத்திதோ ஏகந்தனவத்தப்³பா³ரம்மணானேவாதி வேதி³தப்³பா³னி.
‘Dibbacakkhuñāṇacatutthaṃ’ vijjamānavaṇṇārammaṇattā paccuppannārammaṇameva. Anāgataṃsañāṇacatutthaṃ anāgatārammaṇameva. Tañhi anāgatakkhandhakhandhapaṭibaddhesu dhammesu pubbenivāsañāṇaṃ viya sabbaññutaññāṇasamagatikaṃ hoti. Tattha kiñcāpi cetopariyañāṇampi anāgatārammaṇaṃ hoti, taṃ pana sattadivasabbhantare uppajjanakacittameva ārammaṇaṃ karoti. Idaṃ anāgate kappasatasahasse uppajjanakacittampi khandhepi khandhapaṭibaddhampi. Rūpāvacaratikacatukkajjhānādīni atītānāgatapaccuppannesu ekadhammampi ārabbha appavattito ekantanavattabbārammaṇānevāti veditabbāni.
1435. அஜ்ஜ²த்தத்திகே அனிந்த்³ரியப³த்³த⁴ரூபஞ்ச நிப்³பா³னஞ்ச ப³ஹித்³தா⁴தி இத³ங் யதா² இந்த்³ரியப³த்³த⁴ங் பரபுக்³க³லஸந்தானே ப³ஹித்³தா⁴தி வுச்சமானம்பி தஸ்ஸ அத்தனோ ஸந்தானபரியாபன்னத்தா நியகஜ்ஜ²த்தங் ஹோதி, ஏவங் ந கேனசி பரியாயேன அஜ்ஜ²த்தங் ஹோதீதி நியகஜ்ஜ²த்தபரியாயஸ்ஸ அபா⁴வேன ப³ஹித்³தா⁴தி வுத்தங், ந நியகஜ்ஜ²த்தமத்தஸ்ஸ அஸம்ப⁴வதோ. நியகஜ்ஜ²த்தமத்தஸ்ஸ பன அஸம்ப⁴வமத்தங் ஸந்தா⁴ய அஜ்ஜ²த்தாரம்மணத்திகே ப³ஹித்³தா⁴ரம்மணதா வுத்தா. அஜ்ஜ²த்தத⁴ம்மாபக³மமத்ததோவ ஆகிஞ்சஞ்ஞாயதனாரம்மணஸ்ஸ அஜ்ஜ²த்தபா⁴வம்பி ப³ஹித்³தா⁴பா⁴வம்பி அஜ்ஜ²த்தப³ஹித்³தா⁴பா⁴வம்பி அனநுஜானித்வா ஆகிஞ்சஞ்ஞாயதனங் ந வத்தப்³ப³ங் அஜ்ஜ²த்தாரம்மணந்திபீதிஆதி³ வுத்தங்.
1435. Ajjhattattike anindriyabaddharūpañca nibbānañca bahiddhāti idaṃ yathā indriyabaddhaṃ parapuggalasantāne bahiddhāti vuccamānampi tassa attano santānapariyāpannattā niyakajjhattaṃ hoti, evaṃ na kenaci pariyāyena ajjhattaṃ hotīti niyakajjhattapariyāyassa abhāvena bahiddhāti vuttaṃ, na niyakajjhattamattassa asambhavato. Niyakajjhattamattassa pana asambhavamattaṃ sandhāya ajjhattārammaṇattike bahiddhārammaṇatā vuttā. Ajjhattadhammāpagamamattatova ākiñcaññāyatanārammaṇassa ajjhattabhāvampi bahiddhābhāvampi ajjhattabahiddhābhāvampi ananujānitvā ākiñcaññāyatanaṃ na vattabbaṃ ajjhattārammaṇantipītiādi vuttaṃ.
தத்த² ந கேவலங் ததே³வ நவத்தப்³பா³ரம்மணங், தஸ்ஸ பன ஆவஜ்ஜனம்பி, உபசாரசித்தானிபி, தஸ்ஸாரம்மணஸ்ஸ பச்சவெக்க²ணசித்தானிபி, தஸ்ஸேவ அஸ்ஸாத³னாதி³வஸேன பவத்தானி அகுஸலசித்தானிபி நவத்தப்³பா³ரம்மணானேவாதி. தானி பன தஸ்மிங் வுத்தே வுத்தானேவ ஹொந்தீதி விஸுங் ந வுத்தானி. கத²ங் வுத்தானேவ ஹொந்தீதி? ஏதஞ்ஹி ஆகிஞ்சஞ்ஞாயதனங், யஞ்ச தஸ்ஸ புரேசாரிகங் ஆவஜ்ஜனஉபசாராதி³வஸேன பவத்தங், தேன ஸஹ ஏகாரம்மணங் ப⁴வெய்ய. தங் ஸப்³ப³ங் அதீதாரம்மணத்திகே ‘காமாவசரகுஸலங், அகுஸலங், கிரியதோ நவ சித்துப்பாதா³, ரூபாவசரசதுத்த²ஜ்ஜா²ன’ந்தி ஏவங் வுத்தானங் ஏதேஸங் சித்துப்பாதா³னங் ‘ஸியா ந வத்தப்³பா³ அதீதாரம்மணாதிபீ’திஆதி³னா நயேன நவத்தப்³பா³ரம்மணபா⁴வஸ்ஸ அனுஞ்ஞாதத்தா, ஆகிஞ்சஞ்ஞாயதனஸ்ஸ ச ‘ஆகிஞ்சஞ்ஞாயதனங், சத்தாரோ மக்³கா³ அபரியாபன்னா, சத்தாரி ச ஸாமஞ்ஞப²லானி, இமே த⁴ம்மா ந வத்தப்³பா³ அதீதாரம்மணாதிபீ’தி ஏவங் ஏகந்தேன நவத்தப்³பா³ரம்மணத்தவசனதோ நவத்தப்³பா³ரம்மணந்தி வுத்தங். இதா³னி தங் அஜ்ஜ²த்தாரம்மணத்திகே ஏகம்பி வுச்சமானங் யஸ்மா ஹெட்டா² தேன ஸஹ ஏகாரம்மணபா⁴வம்பி ஸந்தா⁴ய காமாவசரகுஸலாதீ³னங் நவத்தப்³பா³ரம்மணதா வுத்தா, தஸ்மா இதா⁴பி தேஸங் நவத்தப்³பா³ரம்மணபா⁴வங் தீ³பேதி. கோ ஹி தேன ஸஹ ஏகாரம்மணானங் நவத்தப்³பா³ரம்மணபா⁴வே அந்தராயோதி ? ஏவங் தஸ்மிங் வுத்தே ‘வுத்தானேவ ஹொந்தீ’தி வேதி³தப்³பா³னி. ஸேஸமெத்த² அஜ்ஜ²த்தாரம்மணத்திகே பாளிதோ உத்தானமேவ.
Tattha na kevalaṃ tadeva navattabbārammaṇaṃ, tassa pana āvajjanampi, upacāracittānipi, tassārammaṇassa paccavekkhaṇacittānipi, tasseva assādanādivasena pavattāni akusalacittānipi navattabbārammaṇānevāti. Tāni pana tasmiṃ vutte vuttāneva hontīti visuṃ na vuttāni. Kathaṃ vuttāneva hontīti? Etañhi ākiñcaññāyatanaṃ, yañca tassa purecārikaṃ āvajjanaupacārādivasena pavattaṃ, tena saha ekārammaṇaṃ bhaveyya. Taṃ sabbaṃ atītārammaṇattike ‘kāmāvacarakusalaṃ, akusalaṃ, kiriyato nava cittuppādā, rūpāvacaracatutthajjhāna’nti evaṃ vuttānaṃ etesaṃ cittuppādānaṃ ‘siyā na vattabbā atītārammaṇātipī’tiādinā nayena navattabbārammaṇabhāvassa anuññātattā, ākiñcaññāyatanassa ca ‘ākiñcaññāyatanaṃ, cattāro maggā apariyāpannā, cattāri ca sāmaññaphalāni, ime dhammā na vattabbā atītārammaṇātipī’ti evaṃ ekantena navattabbārammaṇattavacanato navattabbārammaṇanti vuttaṃ. Idāni taṃ ajjhattārammaṇattike ekampi vuccamānaṃ yasmā heṭṭhā tena saha ekārammaṇabhāvampi sandhāya kāmāvacarakusalādīnaṃ navattabbārammaṇatā vuttā, tasmā idhāpi tesaṃ navattabbārammaṇabhāvaṃ dīpeti. Ko hi tena saha ekārammaṇānaṃ navattabbārammaṇabhāve antarāyoti ? Evaṃ tasmiṃ vutte ‘vuttāneva hontī’ti veditabbāni. Sesamettha ajjhattārammaṇattike pāḷito uttānameva.
ஆரம்மணவிபா⁴கே³ பன விஞ்ஞாணஞ்சாயதனங் நேவஸஞ்ஞானாஸஞ்ஞாயதனந்தி இமேஸங் தாவ குஸலவிபாககிரியவஸேன ச²ன்னங் சித்துப்பாதா³னங் அத்தனோ ஸந்தானஸம்ப³ந்த⁴ங் ஹெட்டி²மஸமாபத்திங் ஆரப்³ப⁴ பவத்திதோ அஜ்ஜ²த்தாரம்மணதா வேதி³தப்³பா³. எத்த² ச கிரியஆகாஸானஞ்சாயதனங் கிரியவிஞ்ஞாணஞ்சாயதனஸ்ஸேவ ஆரம்மணங் ஹோதி, ந இதரஸ்ஸ. கஸ்மா? ஆகாஸானஞ்சாயதனகிரியஸமங்கி³னோ குஸலஸ்ஸ வா விபாகஸ்ஸ வா விஞ்ஞாணஞ்சாயதனஸ்ஸ அபா⁴வதோ. குஸலங் பன குஸலவிபாககிரியானங் திண்ணம்பி ஆரம்மணங் ஹோதி. கஸ்மா? ஆகாஸானஞ்சாயதனகுஸலங் நிப்³ப³த்தெத்வா டி²தஸ்ஸ ததோ உத்³த⁴ங் திவித⁴ஸ்ஸபி விஞ்ஞாணஞ்சாயதனஸ்ஸ உப்பத்திஸம்ப⁴வதோ. விபாகங் பன ந கஸ்ஸசி ஆரம்மணங் ஹோதி. கஸ்மா? விபாகதோ வுட்ட²ஹித்வா சித்தஸ்ஸ அபி⁴னீஹாராஸம்ப⁴வதோ. நேவஸஞ்ஞானாஸஞ்ஞாயதனஸ்ஸ ஆரம்மணகரணேபி ஏஸேவ நயோ. ரூபாவசரத்திகசதுக்கஜ்ஜா²னாதீ³னங் ஸப்³பே³ஸம்பி நியகஜ்ஜ²த்ததோ ப³ஹித்³தா⁴பா⁴வேன ப³ஹித்³தா⁴பூ⁴தானி பத²வீகஸிணாதீ³னி ஆரப்³ப⁴ பவத்திதோ ப³ஹித்³தா⁴ரம்மணதா வேதி³தப்³பா³.
Ārammaṇavibhāge pana viññāṇañcāyatanaṃ nevasaññānāsaññāyatananti imesaṃ tāva kusalavipākakiriyavasena channaṃ cittuppādānaṃ attano santānasambandhaṃ heṭṭhimasamāpattiṃ ārabbha pavattito ajjhattārammaṇatā veditabbā. Ettha ca kiriyaākāsānañcāyatanaṃ kiriyaviññāṇañcāyatanasseva ārammaṇaṃ hoti, na itarassa. Kasmā? Ākāsānañcāyatanakiriyasamaṅgino kusalassa vā vipākassa vā viññāṇañcāyatanassa abhāvato. Kusalaṃ pana kusalavipākakiriyānaṃ tiṇṇampi ārammaṇaṃ hoti. Kasmā? Ākāsānañcāyatanakusalaṃ nibbattetvā ṭhitassa tato uddhaṃ tividhassapi viññāṇañcāyatanassa uppattisambhavato. Vipākaṃ pana na kassaci ārammaṇaṃ hoti. Kasmā? Vipākato vuṭṭhahitvā cittassa abhinīhārāsambhavato. Nevasaññānāsaññāyatanassa ārammaṇakaraṇepi eseva nayo. Rūpāvacarattikacatukkajjhānādīnaṃ sabbesampi niyakajjhattato bahiddhābhāvena bahiddhābhūtāni pathavīkasiṇādīni ārabbha pavattito bahiddhārammaṇatā veditabbā.
ஸப்³பே³வ காமாவசரா குஸலாகுஸலாப்³யாகதா த⁴ம்மா, ரூபாவசரங் சதுத்த²ங் ஜா²னந்தி எத்த² குஸலதோ தாவ சத்தாரோ ஞாணஸம்பயுத்தசித்துப்பாதா³ அத்தனோ க²ந்தா⁴தீ³னி பச்சவெக்க²ந்தஸ்ஸ அஜ்ஜ²த்தாரம்மணா. பரேஸங் க²ந்தா⁴தி³பச்சவெக்க²ணே பண்ணத்தினிப்³பா³னபச்சவெக்க²ணே ச ப³ஹித்³தா⁴ரம்மணா. தது³ப⁴யவஸேன அஜ்ஜ²த்தப³ஹித்³தா⁴ரம்மணா. ஞாணவிப்பயுத்தேஸுபி ஏஸேவ நயோ. கேவலஞ்ஹி தேஸங் நிப்³பா³னபச்சவெக்க²ணங் நத்தி². அகுஸலதோ சத்தாரோ தி³ட்டி²ஸம்பயுத்தசித்துப்பாதா³ அத்தனோ க²ந்தா⁴தீ³னங் அஸ்ஸாத³னாபி⁴னந்த³னபராமாஸக³ஹணகாலே அஜ்ஜ²த்தாரம்மணா, பரஸ்ஸ க²ந்தா⁴தீ³ஸு சேவ அனிந்த்³ரியப³த்³த⁴ரூபகஸிணாதீ³ஸு ச ததே²வ பவத்திகாலே ப³ஹித்³தா⁴ரம்மணா, தது³ப⁴யவஸேன அஜ்ஜ²த்தப³ஹித்³தா⁴ரம்மணா. தி³ட்டி²விப்பயுத்தேஸுபி ஏஸேவ நயோ. கேவலஞ்ஹி தேஸங் பராமாஸக³ஹணங் நத்தி². த்³வேபி படிக⁴ஸம்பயுத்தா அத்தனோ க²ந்தா⁴தீ³ஸு தோ³மனஸ்ஸிதஸ்ஸ அஜ்ஜ²த்தாரம்மணா, பரஸ்ஸ க²ந்தா⁴தீ³ஸு சேவ அனிந்த்³ரியப³த்³த⁴ரூபபண்ணத்தீஸு ச ப³ஹித்³தா⁴ரம்மணா, தது³ப⁴யவஸேன அஜ்ஜ²த்தப³ஹித்³தா⁴ரம்மணா. விசிகிச்சு²த்³த⁴ச்சஸம்பயுத்தானம்பி வுத்தபகாரேஸு த⁴ம்மேஸு விசிகிச்ச²னப²ந்த³னபா⁴வவஸேன பவத்தியங் அஜ்ஜ²த்தாதி³ஆரம்மணதா வேதி³தப்³பா³.
Sabbeva kāmāvacarā kusalākusalābyākatā dhammā, rūpāvacaraṃ catutthaṃ jhānanti ettha kusalato tāva cattāro ñāṇasampayuttacittuppādā attano khandhādīni paccavekkhantassa ajjhattārammaṇā. Paresaṃ khandhādipaccavekkhaṇe paṇṇattinibbānapaccavekkhaṇe ca bahiddhārammaṇā. Tadubhayavasena ajjhattabahiddhārammaṇā. Ñāṇavippayuttesupi eseva nayo. Kevalañhi tesaṃ nibbānapaccavekkhaṇaṃ natthi. Akusalato cattāro diṭṭhisampayuttacittuppādā attano khandhādīnaṃ assādanābhinandanaparāmāsagahaṇakāle ajjhattārammaṇā, parassa khandhādīsu ceva anindriyabaddharūpakasiṇādīsu ca tatheva pavattikāle bahiddhārammaṇā, tadubhayavasena ajjhattabahiddhārammaṇā. Diṭṭhivippayuttesupi eseva nayo. Kevalañhi tesaṃ parāmāsagahaṇaṃ natthi. Dvepi paṭighasampayuttā attano khandhādīsu domanassitassa ajjhattārammaṇā, parassa khandhādīsu ceva anindriyabaddharūpapaṇṇattīsu ca bahiddhārammaṇā, tadubhayavasena ajjhattabahiddhārammaṇā. Vicikicchuddhaccasampayuttānampi vuttapakāresu dhammesu vicikicchanaphandanabhāvavasena pavattiyaṃ ajjhattādiārammaṇatā veditabbā.
த்³விபஞ்சவிஞ்ஞாணானி , திஸ்ஸோ ச மனோதா⁴துயோதி, இமே தேரஸ சித்துப்பாதா³ அத்தனோ ரூபாதீ³னி ஆரப்³ப⁴ பவத்தியங் அஜ்ஜ²த்தாரம்மணா, பரஸ்ஸ ரூபாதீ³ஸு பவத்தா ப³ஹித்³தா⁴ரம்மணா, தது³ப⁴யவஸேன அஜ்ஜ²த்தப³ஹித்³தா⁴ரம்மணா. ஸோமனஸ்ஸஸஹக³தஅஹேதுகவிபாகமனோவிஞ்ஞாணதா⁴து பஞ்சத்³வாரே ஸந்தீரணததா³ரம்மணவஸேன அத்தனோ பஞ்ச ரூபாதி³த⁴ம்மே, மனொத்³வாரே ததா³ரம்மணவஸேனேவ அஞ்ஞேபி அஜ்ஜ²த்திகே காமாவசரத⁴ம்மே ஆரப்³ப⁴ பவத்தியங் அஜ்ஜ²த்தாரம்மணா, பரேஸங் த⁴ம்மேஸு பவத்தமானா ப³ஹித்³தா⁴ரம்மணா, உப⁴யவஸேன அஜ்ஜ²த்தப³ஹித்³தா⁴ரம்மணா. உபெக்கா²ஸஹக³தவிபாகாஹேதுகமனோவிஞ்ஞாணதா⁴துத்³வயேபி ஏஸேவ நயோ. கேவலங் பனேதா ஸுக³தியங் து³க்³க³தியஞ்ச படிஸந்தி⁴ப⁴வங்க³சுதிவஸேனாபி அஜ்ஜ²த்தாதி³பே⁴தே³ஸு கம்மாதீ³ஸு பவத்தந்தி.
Dvipañcaviññāṇāni , tisso ca manodhātuyoti, ime terasa cittuppādā attano rūpādīni ārabbha pavattiyaṃ ajjhattārammaṇā, parassa rūpādīsu pavattā bahiddhārammaṇā, tadubhayavasena ajjhattabahiddhārammaṇā. Somanassasahagataahetukavipākamanoviññāṇadhātu pañcadvāre santīraṇatadārammaṇavasena attano pañca rūpādidhamme, manodvāre tadārammaṇavaseneva aññepi ajjhattike kāmāvacaradhamme ārabbha pavattiyaṃ ajjhattārammaṇā, paresaṃ dhammesu pavattamānā bahiddhārammaṇā, ubhayavasena ajjhattabahiddhārammaṇā. Upekkhāsahagatavipākāhetukamanoviññāṇadhātudvayepi eseva nayo. Kevalaṃ panetā sugatiyaṃ duggatiyañca paṭisandhibhavaṅgacutivasenāpi ajjhattādibhedesu kammādīsu pavattanti.
அட்ட² மஹாவிபாகசித்தானிபி தாஸங்யேவ த்³வின்னங் ஸமானக³திகானி. கேவலங் பனேதானி ஸந்தீரணவஸேன ந பவத்தந்தி. படிஸந்தி⁴ப⁴வங்க³சுதிவஸேனேவ ஏதானி ஸுக³தியங்யேவ பவத்தந்தி. ஸோமனஸ்ஸஸஹக³தாஹேதுககிரியா பஞ்சத்³வாரே அத்தனோ ரூபாதீ³னி ஆரப்³ப⁴ பஹட்டா²காரகரணவஸேன பவத்தியங் அஜ்ஜ²த்தாரம்மணா, பரஸ்ஸ ரூபாதீ³ஸு பவத்தா ப³ஹித்³தா⁴ரம்மணா. மனொத்³வாரே ததா²க³தஸ்ஸ ஜோதிபாலமாணவமக⁴தே³வராஜகண்ஹதாபஸாதி³காலேஸு அத்தனா கதகிரியங் பச்சவெக்க²ந்தஸ்ஸ ஹஸிதுப்பாத³வஸேன பவத்தா அஜ்ஜ²த்தாரம்மணா .
Aṭṭha mahāvipākacittānipi tāsaṃyeva dvinnaṃ samānagatikāni. Kevalaṃ panetāni santīraṇavasena na pavattanti. Paṭisandhibhavaṅgacutivaseneva etāni sugatiyaṃyeva pavattanti. Somanassasahagatāhetukakiriyā pañcadvāre attano rūpādīni ārabbha pahaṭṭhākārakaraṇavasena pavattiyaṃ ajjhattārammaṇā, parassa rūpādīsu pavattā bahiddhārammaṇā. Manodvāre tathāgatassa jotipālamāṇavamaghadevarājakaṇhatāpasādikālesu attanā katakiriyaṃ paccavekkhantassa hasituppādavasena pavattā ajjhattārammaṇā .
மல்லிகாய தே³வியா ஸந்ததிமஹாமத்தஸ்ஸ ஸுமனமாலாகாரஸ்ஸாதி ஏவமாதீ³னங் கிரியாகரணங் ஆரப்³ப⁴ பவத்திகாலே ப³ஹித்³தா⁴ரம்மணா. உப⁴யவஸேன அஜ்ஜ²த்தப³ஹித்³தா⁴ரம்மணா. உபெக்கா²ஸஹக³தகிரியாஹேதுகமனோவிஞ்ஞாணதா⁴து பஞ்சத்³வாரே வொட்ட²ப்³ப³னவஸேன மனொத்³வாரே ச ஆவஜ்ஜனவஸேன பவத்தியங் அஜ்ஜ²த்தாதி³ஆரம்மணா. அட்ட² மஹாகிரியா குஸலசித்தக³திகா ஏவ. கேவலஞ்ஹி தா கீ²ணாஸவானங் உப்பஜ்ஜந்தி, குஸலானி ஸெக்க²புது²ஜ்ஜனானந்தி எத்தகமேவெத்த² நானாகரணங்.
Mallikāya deviyā santatimahāmattassa sumanamālākārassāti evamādīnaṃ kiriyākaraṇaṃ ārabbha pavattikāle bahiddhārammaṇā. Ubhayavasena ajjhattabahiddhārammaṇā. Upekkhāsahagatakiriyāhetukamanoviññāṇadhātu pañcadvāre voṭṭhabbanavasena manodvāre ca āvajjanavasena pavattiyaṃ ajjhattādiārammaṇā. Aṭṭha mahākiriyā kusalacittagatikā eva. Kevalañhi tā khīṇāsavānaṃ uppajjanti, kusalāni sekkhaputhujjanānanti ettakamevettha nānākaraṇaṃ.
வுத்தப்பகாரே ரூபாவசரசதுத்த²ஜ்ஜா²னே ஸப்³ப³த்த²பாத³கசதுத்தா²தீ³னி பஞ்ச ஜா²னானி இமஸ்மிங் திகே ஓகாஸங் லப⁴ந்தி. ஏதானி ஹி கஸிணபண்ணத்தினிமித்தாரம்மணத்தா ப³ஹித்³தா⁴ரம்மணானி.
Vuttappakāre rūpāvacaracatutthajjhāne sabbatthapādakacatutthādīni pañca jhānāni imasmiṃ tike okāsaṃ labhanti. Etāni hi kasiṇapaṇṇattinimittārammaṇattā bahiddhārammaṇāni.
‘இத்³தி⁴வித⁴சதுத்த²ங்’ காயவஸேன சித்தங், சித்தவஸேன வா காயங் பரிணாமனகாலே அத்தனோ குமாரகவண்ணாதி³னிம்மானகாலே ச ஸகாயசித்தானங் ஆரம்மணகரணதோ அஜ்ஜ²த்தாரம்மணங், ப³ஹித்³தா⁴ ஹத்தி²அஸ்ஸாதி³த³ஸ்ஸனகாலே ப³ஹித்³தா⁴ரம்மணங், காலேன அஜ்ஜ²த்தங் காலேன ப³ஹித்³தா⁴, பவத்தியங் அஜ்ஜ²த்தப³ஹித்³தா⁴ரம்மணங்.
‘Iddhividhacatutthaṃ’ kāyavasena cittaṃ, cittavasena vā kāyaṃ pariṇāmanakāle attano kumārakavaṇṇādinimmānakāle ca sakāyacittānaṃ ārammaṇakaraṇato ajjhattārammaṇaṃ, bahiddhā hatthiassādidassanakāle bahiddhārammaṇaṃ, kālena ajjhattaṃ kālena bahiddhā, pavattiyaṃ ajjhattabahiddhārammaṇaṃ.
‘தி³ப்³ப³ஸோதசதுத்த²ங்’ அத்தனோ குச்சி²ஸத்³த³ஸவனகாலே அஜ்ஜ²த்தாரம்மணங், பரேஸங் ஸத்³த³ஸவனகாலே ப³ஹித்³தா⁴ரம்மணங், உப⁴யவஸேன அஜ்ஜ²த்தப³ஹித்³தா⁴ரம்மணங். ‘சேதோபரியஞாணசதுத்த²ங்’ பரேஸங் சித்தாரம்மணதோ ப³ஹித்³தா⁴ரம்மணமேவ. அத்தனோ சித்தஜானநே பன தேன பயோஜனங் நத்தி². ‘புப்³பே³னிவாஸசதுத்த²ங்’ அத்தனோ க²ந்தா⁴னுஸ்ஸரணகாலே அஜ்ஜ²த்தாரம்மணங், பரஸ்ஸ க²ந்தே⁴, அனித்³ரியப³த்³த⁴ரூபங், திஸ்ஸோ ச பண்ணத்தியோ அனுஸ்ஸரணதோ ப³ஹித்³தா⁴ரம்மணங், உப⁴யவஸேன அஜ்ஜ²த்தப³ஹித்³தா⁴ரம்மணங்.
‘Dibbasotacatutthaṃ’ attano kucchisaddasavanakāle ajjhattārammaṇaṃ, paresaṃ saddasavanakāle bahiddhārammaṇaṃ, ubhayavasena ajjhattabahiddhārammaṇaṃ. ‘Cetopariyañāṇacatutthaṃ’ paresaṃ cittārammaṇato bahiddhārammaṇameva. Attano cittajānane pana tena payojanaṃ natthi. ‘Pubbenivāsacatutthaṃ’ attano khandhānussaraṇakāle ajjhattārammaṇaṃ, parassa khandhe, anidriyabaddharūpaṃ, tisso ca paṇṇattiyo anussaraṇato bahiddhārammaṇaṃ, ubhayavasena ajjhattabahiddhārammaṇaṃ.
‘தி³ப்³ப³சக்கு²சதுத்த²ங்’ அத்தனோ குச்சி²க³தாதி³ரூபத³ஸ்ஸனகாலே அஜ்ஜ²த்தாரம்மணங், அவஸேஸரூபத³ஸ்ஸனகாலே ப³ஹித்³தா⁴ரம்மணங், உப⁴யவஸேன அஜ்ஜ²த்தப³ஹித்³தா⁴ரம்மணங். ‘அனாக³தங்ஸஞாணசதுத்த²ங்’ அத்தனோ அனாக³தக்க²ந்தா⁴னுஸ்ஸரணகாலே அஜ்ஜ²த்தாரம்மணங், பரஸ்ஸ அனாக³தக்க²ந்தா⁴னங் வா அனிந்த்³ரியப³த்³த⁴ஸ்ஸ வா ரூபஸ்ஸ அனுஸ்ஸரணகாலே ப³ஹித்³தா⁴ரம்மணங், உப⁴யவஸேன அஜ்ஜ²த்தப³ஹித்³தா⁴ரம்மணங். ஆகிஞ்சஞ்ஞாயதனஸ்ஸ நவத்தப்³பா³ரம்மணதாய காரணங் ஹெட்டா² வுத்தமேவ.
‘Dibbacakkhucatutthaṃ’ attano kucchigatādirūpadassanakāle ajjhattārammaṇaṃ, avasesarūpadassanakāle bahiddhārammaṇaṃ, ubhayavasena ajjhattabahiddhārammaṇaṃ. ‘Anāgataṃsañāṇacatutthaṃ’ attano anāgatakkhandhānussaraṇakāle ajjhattārammaṇaṃ, parassa anāgatakkhandhānaṃ vā anindriyabaddhassa vā rūpassa anussaraṇakāle bahiddhārammaṇaṃ, ubhayavasena ajjhattabahiddhārammaṇaṃ. Ākiñcaññāyatanassa navattabbārammaṇatāya kāraṇaṃ heṭṭhā vuttameva.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / திகஅத்து²த்³தா⁴ரோ • Tikaatthuddhāro
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / திகஅத்து²த்³தா⁴ரவண்ணனா • Tikaatthuddhāravaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / திகஅத்து²த்³தா⁴ரவண்ணனா • Tikaatthuddhāravaṇṇanā
