| Library / Tipiṭaka / তিপিটক • Tipiṭaka / ধম্মসঙ্গণীপাল়ি • Dhammasaṅgaṇīpāḷi |
৪. অট্ঠকথাকণ্ডং
4. Aṭṭhakathākaṇḍaṃ
তিকঅত্থুদ্ধারো
Tikaatthuddhāro
১৩৮৪. কতমে ধম্মা কুসলা? চতূসু ভূমীসু কুসলং – ইমে ধম্মা কুসলা।
1384. Katame dhammā kusalā? Catūsu bhūmīsu kusalaṃ – ime dhammā kusalā.
১৩৮৫. কতমে ধম্মা অকুসলা? দ্ৰাদস অকুসলচিত্তুপ্পাদা – ইমে ধম্মা অকুসলা।
1385. Katame dhammā akusalā? Dvādasa akusalacittuppādā – ime dhammā akusalā.
১৩৮৬. কতমে ধম্মা অব্যাকতা? চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা অব্যাকতা।
1386. Katame dhammā abyākatā? Catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā abyākatā.
১৩৮৭. কতমে ধম্মা সুখায ৰেদনায সম্পযুত্তা? কামাৰচরকুসলতো চত্তারো সোমনস্সসহগতচিত্তুপ্পাদা, অকুসলতো চত্তারো কামাৰচরকুসলস্স ৰিপাকতো চ কিরিযতো চ পঞ্চ, রূপাৰচরতিকচতুক্কজ্ঝানা কুসলতো চ ৰিপাকতো চ কিরিযতো চ, লোকুত্তরতিকচতুক্কজ্ঝানা কুসলতো চ ৰিপাকতো চ, এত্থুপ্পন্নং সুখং ৰেদনং ঠপেত্ৰা – ইমে ধম্মা সুখায ৰেদনায সম্পযুত্তা।
1387. Katame dhammā sukhāya vedanāya sampayuttā? Kāmāvacarakusalato cattāro somanassasahagatacittuppādā, akusalato cattāro kāmāvacarakusalassa vipākato ca kiriyato ca pañca, rūpāvacaratikacatukkajjhānā kusalato ca vipākato ca kiriyato ca, lokuttaratikacatukkajjhānā kusalato ca vipākato ca, etthuppannaṃ sukhaṃ vedanaṃ ṭhapetvā – ime dhammā sukhāya vedanāya sampayuttā.
১৩৮৮. কতমে ধম্মা দুক্খায ৰেদনায সম্পযুত্তা? দ্ৰে দোমনস্সসহগতচিত্তুপ্পাদা, দুক্খসহগতং কাযৰিঞ্ঞাণং, এত্থুপ্পন্নং দুক্খং ৰেদনং ঠপেত্ৰা – ইমে ধম্মা দুক্খায ৰেদনায সম্পযুত্তা।
1388. Katame dhammā dukkhāya vedanāya sampayuttā? Dve domanassasahagatacittuppādā, dukkhasahagataṃ kāyaviññāṇaṃ, etthuppannaṃ dukkhaṃ vedanaṃ ṭhapetvā – ime dhammā dukkhāya vedanāya sampayuttā.
১৩৮৯. কতমে ধম্মা অদুক্খমসুখায ৰেদনায সম্পযুত্তা? কামাৰচরকুসলতো চত্তারো উপেক্খাসহগতচিত্তুপ্পাদা, অকুসলতো ছ, কামাৰচরকুসলস্স ৰিপাকতো দস, অকুসলস্স ৰিপাকতো ছ, কিরিযতো ছ, রূপাৰচরং চতুত্থং ঝানং কুসলতো চ ৰিপাকতো চ কিরিযতো চ, চত্তারো অরূপাৰচরা কুসলতো চ ৰিপাকতো চ কিরিযতো চ, লোকুত্তরং চতুত্থং ঝানং কুসলতো চ ৰিপাকতো চ, এত্থুপ্পন্নং অদুক্খমসুখং ৰেদনং ঠপেত্ৰা – ইমে ধম্মা অদুক্খমসুখায ৰেদনায সম্পযুত্তা। তিস্সো চ ৰেদনা, রূপঞ্চ, নিব্বানঞ্চ – ইমে ধম্মা ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, য ৰেদনায সম্পযুত্তাতিপি।
1389. Katame dhammā adukkhamasukhāya vedanāya sampayuttā? Kāmāvacarakusalato cattāro upekkhāsahagatacittuppādā, akusalato cha, kāmāvacarakusalassa vipākato dasa, akusalassa vipākato cha, kiriyato cha, rūpāvacaraṃ catutthaṃ jhānaṃ kusalato ca vipākato ca kiriyato ca, cattāro arūpāvacarā kusalato ca vipākato ca kiriyato ca, lokuttaraṃ catutthaṃ jhānaṃ kusalato ca vipākato ca, etthuppannaṃ adukkhamasukhaṃ vedanaṃ ṭhapetvā – ime dhammā adukkhamasukhāya vedanāya sampayuttā. Tisso ca vedanā, rūpañca, nibbānañca – ime dhammā na vattabbā sukhāya vedanāya sampayuttātipi, dukkhāya vedanāya sampayuttātipi, ya vedanāya sampayuttātipi.
১৩৯০. কতমে ধম্মা ৰিপাকা? চতূসু ভূমীসু ৰিপাকো – ইমে ধম্মা ৰিপাকা।
1390. Katame dhammā vipākā? Catūsu bhūmīsu vipāko – ime dhammā vipākā.
১৩৯১. কতমে ধম্মা ৰিপাকধম্মধম্মা? চতূসু ভূমীসু কুসলং অকুসলং – ইমে ধম্মা ৰিপাকধম্মধম্মা।
1391. Katame dhammā vipākadhammadhammā? Catūsu bhūmīsu kusalaṃ akusalaṃ – ime dhammā vipākadhammadhammā.
১৩৯২. কতমে ধম্মা নেৰৰিপাকনৰিপাকধম্মধম্মা? তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নেৰৰিপাকনৰিপাকধম্মধম্মা।
1392. Katame dhammā nevavipākanavipākadhammadhammā? Tīsu bhūmīsu kiriyābyākataṃ, rūpañca, nibbānañca – ime dhammā nevavipākanavipākadhammadhammā.
১৩৯৩. কতমে ধম্মা উপাদিণ্ণুপাদানিযা? তীসু ভূমীসু ৰিপাকো, যঞ্চ রূপং কম্মস্স কতত্তা – ইমে ধম্মা উপাদিণ্ণুপাদানিযা।
1393. Katame dhammā upādiṇṇupādāniyā? Tīsu bhūmīsu vipāko, yañca rūpaṃ kammassa katattā – ime dhammā upādiṇṇupādāniyā.
১৩৯৪. কতমে ধম্মা অনুপাদিণ্ণুপাদানিযা? তীসু ভূমীসু কুসলং, অকুসলং, তীসু ভূমীসু কিরিযাব্যাকতং , যঞ্চ রূপং ন কম্মস্স কতত্তা – ইমে ধম্মা অনুপাদিণ্ণুপাদানিযা।
1394. Katame dhammā anupādiṇṇupādāniyā? Tīsu bhūmīsu kusalaṃ, akusalaṃ, tīsu bhūmīsu kiriyābyākataṃ , yañca rūpaṃ na kammassa katattā – ime dhammā anupādiṇṇupādāniyā.
১৩৯৫. কতমে ধম্মা অনুপাদিণ্ণঅনুপাদানিযা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অনুপাদিণ্ণঅনুপাদানিযা।
1395. Katame dhammā anupādiṇṇaanupādāniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā anupādiṇṇaanupādāniyā.
১৩৯৬. কতমে ধম্মা সংকিলিট্ঠসংকিলেসিকা? দ্ৰাদসাকুসলচিত্তুপ্পাদা – ইমে ধম্মা সংকিলিট্ঠসংকিলেসিকা।
1396. Katame dhammā saṃkiliṭṭhasaṃkilesikā? Dvādasākusalacittuppādā – ime dhammā saṃkiliṭṭhasaṃkilesikā.
১৩৯৭. কতমে ধম্মা অসংকিলিট্ঠসংকিলেসিকা? তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা অসংকিলিট্ঠসংকিলেসিকা।
1397. Katame dhammā asaṃkiliṭṭhasaṃkilesikā? Tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā asaṃkiliṭṭhasaṃkilesikā.
১৩৯৮. কতমে ধম্মা অসংকিলিট্ঠঅসংকিলেসিকা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অসংকিলিট্ঠঅসংকিলেসিকা।
1398. Katame dhammā asaṃkiliṭṭhaasaṃkilesikā? Cattāro maggā apariyāpannā, cattāri ca sāmaññaphalāni, nibbānañca – ime dhammā asaṃkiliṭṭhaasaṃkilesikā.
১৩৯৯. কতমে ধম্মা সৰিতক্কসৰিচারা? কামাৰচরং কুসলং, অকুসলং, কামাৰচরকুসলস্স ৰিপাকতো একাদস চিত্তুপ্পাদা, অকুসলস্স ৰিপাকতো দ্ৰে, কিরিযতো একাদস, রূপাৰচরং পঠমং ঝানং কুসলতো চ ৰিপাকতো চ কিরিযতো চ, লোকুত্তরং পঠমং ঝানং কুসলতো চ ৰিপাকতো চ, এত্থুপ্পন্নে ৰিতক্কৰিচারে ঠপেত্ৰা – ইমে ধম্মা সৰিতক্কসৰিচারা।
1399. Katame dhammā savitakkasavicārā? Kāmāvacaraṃ kusalaṃ, akusalaṃ, kāmāvacarakusalassa vipākato ekādasa cittuppādā, akusalassa vipākato dve, kiriyato ekādasa, rūpāvacaraṃ paṭhamaṃ jhānaṃ kusalato ca vipākato ca kiriyato ca, lokuttaraṃ paṭhamaṃ jhānaṃ kusalato ca vipākato ca, etthuppanne vitakkavicāre ṭhapetvā – ime dhammā savitakkasavicārā.
১৪০০. কতমে ধম্মা অৰিতক্কৰিচারমত্তা? রূপাৰচরপঞ্চকনযে দুতিযং ঝানং কুসলতো চ ৰিপাকতো চ কিরিযতো চ, লোকুত্তরপঞ্চকনযে দুতিযং ঝানং কুসলতো চ ৰিপাকতো চ, এত্থুপ্পন্নং ৰিচারং ঠপেত্ৰা, ৰিতক্কো চ – ইমে ধম্মা অৰিতক্কৰিচারমত্তা।
1400. Katame dhammā avitakkavicāramattā? Rūpāvacarapañcakanaye dutiyaṃ jhānaṃ kusalato ca vipākato ca kiriyato ca, lokuttarapañcakanaye dutiyaṃ jhānaṃ kusalato ca vipākato ca, etthuppannaṃ vicāraṃ ṭhapetvā, vitakko ca – ime dhammā avitakkavicāramattā.
১৪০১. কতমে ধম্মা অৰিতক্কঅৰিচারা? দ্ৰেপঞ্চৰিঞ্ঞাণানি, রূপাৰচরতিকতিকজ্ঝানা কুসলতো চ ৰিপাকতো চ কিরিযতো চ, চত্তারো আরুপ্পা কুসলতো চ ৰিপাকতো চ কিরিযতো চ লোকুত্তরতিকতিকজ্ঝানা কুসলতো চ ৰিপাকতো চ পঞ্চকনযে দুতিযে ঝানে 1, উপ্পন্নো চ ৰিচারো রূপঞ্চ নিব্বানঞ্চ – ইমে ধম্মা অৰিতক্কঅৰিচারা। ৰিতক্কসহজাতো ৰিচারো ন ৰত্তব্বো সৰিতক্কসৰিচারোতিপি, অৰিতক্কৰিচারমত্তোতিপি, অৰিতক্কঅৰিচারোতিপি।
1401. Katame dhammā avitakkaavicārā? Dvepañcaviññāṇāni, rūpāvacaratikatikajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca lokuttaratikatikajjhānā kusalato ca vipākato ca pañcakanaye dutiye jhāne 2, uppanno ca vicāro rūpañca nibbānañca – ime dhammā avitakkaavicārā. Vitakkasahajāto vicāro na vattabbo savitakkasavicārotipi, avitakkavicāramattotipi, avitakkaavicārotipi.
১৪০২. কতমে ধম্মা পীতিসহগতা? কামাৰচরকুসলতো চত্তারো সোমনস্সসহগতচিত্তুপ্পাদা , অকুসলতো চত্তারো, কামাৰচরকুসলস্স ৰিপাকতো পঞ্চ, কিরিযতো পঞ্চ, রূপাৰচরদুকতিকজ্ঝানা কুসলতো চ ৰিপাকতো চ কিরিযতো চ, লোকুত্তরদুকতিকজ্ঝানা কুসলতো চ ৰিপাকতো চ, এত্থুপ্পন্নং পীতিং ঠপেত্ৰা – ইমে ধম্মা পীতিসহগতা।
1402. Katame dhammā pītisahagatā? Kāmāvacarakusalato cattāro somanassasahagatacittuppādā , akusalato cattāro, kāmāvacarakusalassa vipākato pañca, kiriyato pañca, rūpāvacaradukatikajjhānā kusalato ca vipākato ca kiriyato ca, lokuttaradukatikajjhānā kusalato ca vipākato ca, etthuppannaṃ pītiṃ ṭhapetvā – ime dhammā pītisahagatā.
১৪০৩. কতমে ধম্মা সুখসহগতা? কামাৰচরকুসলতো চত্তারো সোমনস্সসহগতচিত্তুপ্পাদা, অকুসলতো চত্তারো, কামাৰচরকুসলস্স ৰিপাকতো ছ, কিরিযতো পঞ্চ, রূপাৰচরতিকচতুক্কজ্ঝানা কুসলতো চ ৰিপাকতো চ কিরিযতো চ, লোকুত্তরতিকচতুক্কজ্ঝানা কুসলতো চ ৰিপাকতো চ, এত্থুপ্পন্নং সুখং ঠপেত্ৰা – ইমে ধম্মা সুখসহগতা।
1403. Katame dhammā sukhasahagatā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato cha, kiriyato pañca, rūpāvacaratikacatukkajjhānā kusalato ca vipākato ca kiriyato ca, lokuttaratikacatukkajjhānā kusalato ca vipākato ca, etthuppannaṃ sukhaṃ ṭhapetvā – ime dhammā sukhasahagatā.
১৪০৪. কতমে ধম্মা উপেক্খাসহগতা? কামাৰচরকুসলতো চত্তারো উপেক্খাসহগতচিত্তুপ্পাদা, অকুসলতো ছ, কামাৰচরকুসলস্স ৰিপাকতো দস, অকুসলস্স ৰিপাকতো ছ, কিরিযতো ছ, রূপাৰচরং চতুত্থং ঝানং কুসলতো চ ৰিপাকতো চ কিরিযতো চ, চত্তারো আরুপ্পা কুসলতো চ ৰিপাকতো চ কিরিযতো চ, লোকুত্তরং চতুত্থং ঝানং কুসলতো চ ৰিপাকতো চ, এত্থুপ্পন্নং উপেক্খং ঠপেত্ৰা – ইমে ধম্মা উপেক্খাসহগতা। পীতি ন পীতিসহগতা, সুখসহগতা, ন উপেক্খাসহগতা। সুখং ন সুখসহগতং, সিযা পীতিসহগতং, ন উপেক্খাসহগতং, সিযা ন ৰত্তব্বং পীতিসহগতন্তি। দ্ৰে দোমনস্সসহগতচিত্তুপ্পাদা, দুক্খসহগতকাযৰিঞ্ঞাণং, যা চ ৰেদনা উপেক্খা , রূপঞ্চ নিব্বানঞ্চ – ইমে ধম্মা ন ৰত্তব্বা পীতিসহগতাতিপি, সুখসহগতাতিপি, উপেক্খাসহগতাতিপি।
1404. Katame dhammā upekkhāsahagatā? Kāmāvacarakusalato cattāro upekkhāsahagatacittuppādā, akusalato cha, kāmāvacarakusalassa vipākato dasa, akusalassa vipākato cha, kiriyato cha, rūpāvacaraṃ catutthaṃ jhānaṃ kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaraṃ catutthaṃ jhānaṃ kusalato ca vipākato ca, etthuppannaṃ upekkhaṃ ṭhapetvā – ime dhammā upekkhāsahagatā. Pīti na pītisahagatā, sukhasahagatā, na upekkhāsahagatā. Sukhaṃ na sukhasahagataṃ, siyā pītisahagataṃ, na upekkhāsahagataṃ, siyā na vattabbaṃ pītisahagatanti. Dve domanassasahagatacittuppādā, dukkhasahagatakāyaviññāṇaṃ, yā ca vedanā upekkhā , rūpañca nibbānañca – ime dhammā na vattabbā pītisahagatātipi, sukhasahagatātipi, upekkhāsahagatātipi.
১৪০৫. কতমে ধম্মা দস্সনেন পহাতব্বা? চত্তারো দিট্ঠিগতসম্পযুত্তচিত্তুপ্পাদা, ৰিচিকিচ্ছাসহগতো চিত্তুপ্পাদো – ইমে ধম্মা দস্সনেন পহাতব্বা।
1405. Katame dhammā dassanena pahātabbā? Cattāro diṭṭhigatasampayuttacittuppādā, vicikicchāsahagato cittuppādo – ime dhammā dassanena pahātabbā.
১৪০৬. কতমে ধম্মা ভাৰনায পহাতব্বা? উদ্ধচ্চসহগতো চিত্তুপ্পাদো – ইমে ধম্মা ভাৰনায পহাতব্বা। চত্তারো দিট্ঠিগতৰিপ্পযুত্তা লোভসহগতচিত্তুপ্পাদা, দ্ৰে দোমনস্সসহগতচিত্তুপ্পাদা – ইমে ধম্মা সিযা দস্সনেন পহাতব্বা সিযা ভাৰনায পহাতব্বা।
1406. Katame dhammā bhāvanāya pahātabbā? Uddhaccasahagato cittuppādo – ime dhammā bhāvanāya pahātabbā. Cattāro diṭṭhigatavippayuttā lobhasahagatacittuppādā, dve domanassasahagatacittuppādā – ime dhammā siyā dassanena pahātabbā siyā bhāvanāya pahātabbā.
১৪০৭. কতমে ধম্মা নেৰ দস্সনেন ন ভাৰনায পহাতব্বা? চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নেৰ দস্সনেন ন ভাৰনায পহাতব্বা।
1407. Katame dhammā neva dassanena na bhāvanāya pahātabbā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā neva dassanena na bhāvanāya pahātabbā.
১৪০৮. কতমে ধম্মা দস্সনেন পহাতব্বহেতুকা? চত্তারো দিট্ঠিগতসম্পযুত্তচিত্তুপ্পাদা, ৰিচিকিচ্ছাসহগতো চিত্তুপ্পাদো, এত্থুপ্পন্নং মোহং ঠপেত্ৰা – ইমে ধম্মা দস্সনেন পহাতব্বহেতুকা।
1408. Katame dhammā dassanena pahātabbahetukā? Cattāro diṭṭhigatasampayuttacittuppādā, vicikicchāsahagato cittuppādo, etthuppannaṃ mohaṃ ṭhapetvā – ime dhammā dassanena pahātabbahetukā.
১৪০৯. কতমে ধম্মা ভাৰনায পহাতব্বহেতুকা? উদ্ধচ্চসহগতো চিত্তুপ্পাদো, এত্থুপ্পন্নং মোহং ঠপেত্ৰা – ইমে ধম্মা ভাৰনায পহাতব্বহেতুকা। চত্তারো দিট্ঠিগতৰিপ্পযুত্তা লোভসহগতচিত্তুপ্পাদা, দ্ৰে দোমনস্সসহগতচিত্তুপ্পাদা – ইমে ধম্মা সিযা দস্সনেন পহাতব্বহেতুকা, সিযা ভাৰনায পহাতব্বহেতুকা।
1409. Katame dhammā bhāvanāya pahātabbahetukā? Uddhaccasahagato cittuppādo, etthuppannaṃ mohaṃ ṭhapetvā – ime dhammā bhāvanāya pahātabbahetukā. Cattāro diṭṭhigatavippayuttā lobhasahagatacittuppādā, dve domanassasahagatacittuppādā – ime dhammā siyā dassanena pahātabbahetukā, siyā bhāvanāya pahātabbahetukā.
১৪১০. কতমে ধম্মা নেৰ দস্সনেন ন ভাৰনায পহাতব্বহেতুকা? ৰিচিকিচ্ছাসহগতো মোহো, উদ্ধচ্চসহগতো মোহো, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নেৰ দস্সনেন ন ভাৰনায পহাতব্বহেতুকা।
1410. Katame dhammā neva dassanena na bhāvanāya pahātabbahetukā? Vicikicchāsahagato moho, uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā neva dassanena na bhāvanāya pahātabbahetukā.
১৪১১. কতমে ধম্মা আচযগামিনো? তীসু ভূমীসু কুসলং, অকুসলং – ইমে ধম্মা আচযগামিনো।
1411. Katame dhammā ācayagāmino? Tīsu bhūmīsu kusalaṃ, akusalaṃ – ime dhammā ācayagāmino.
১৪১২. কতমে ধম্মা অপচযগামিনো? চত্তারো মগ্গা অপরিযাপন্না – ইমে ধম্মা অপচযগামিনো।
1412. Katame dhammā apacayagāmino? Cattāro maggā apariyāpannā – ime dhammā apacayagāmino.
১৪১৩. কতমে ধম্মা নেৰাচযগামিনাপচযগামিনো? চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নেৰাচযগামিনাপচযগামিনো।
1413. Katame dhammā nevācayagāmināpacayagāmino? Catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā nevācayagāmināpacayagāmino.
১৪১৪. কতমে ধম্মা সেক্খা? চত্তারো মগ্গা অপরিযাপন্না, হেট্ঠিমানি চ তীণি সামঞ্ঞফলানি – ইমে ধম্মা সেক্খা।
1414. Katame dhammā sekkhā? Cattāro maggā apariyāpannā, heṭṭhimāni ca tīṇi sāmaññaphalāni – ime dhammā sekkhā.
১৪১৫. কতমে ধম্মা অসেক্খা? উপরিট্ঠিমং অরহত্তফলং – ইমে ধম্মা অসেক্খা।
1415. Katame dhammā asekkhā? Upariṭṭhimaṃ arahattaphalaṃ – ime dhammā asekkhā.
১৪১৬. কতমে ধম্মা নেৰসেক্খনাসেক্খা? তীসু ভূমীসু কুসলং, অকুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নেৰসেক্খনাসেক্খা।
1416. Katame dhammā nevasekkhanāsekkhā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā nevasekkhanāsekkhā.
১৪১৭. কতমে ধম্মা পরিত্তা? কামাৰচরকুসলং , অকুসলং, সব্বো কামাৰচরস্স ৰিপাকো, কামাৰচরকিরিযাব্যাকতং, সব্বঞ্চ রূপং – ইমে ধম্মা পরিত্তা।
1417. Katame dhammā parittā? Kāmāvacarakusalaṃ , akusalaṃ, sabbo kāmāvacarassa vipāko, kāmāvacarakiriyābyākataṃ, sabbañca rūpaṃ – ime dhammā parittā.
১৪১৮. কতমে ধম্মা মহগ্গতা? রূপাৰচরা, অরূপাৰচরা, কুসলাব্যাকতা – ইমে ধম্মা মহগ্গতা।
1418. Katame dhammā mahaggatā? Rūpāvacarā, arūpāvacarā, kusalābyākatā – ime dhammā mahaggatā.
১৪১৯. কতমে ধম্মা অপ্পমাণা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অপ্পমাণা।
1419. Katame dhammā appamāṇā? Cattāro maggā apariyāpannā, cattāri ca sāmaññaphalāni, nibbānañca – ime dhammā appamāṇā.
১৪২০. কতমে ধম্মা পরিত্তারম্মণা? সব্বো কামাৰচরস্স ৰিপাকো, কিরিযামনোধাতু, কিরিযাহেতুকমনোৰিঞ্ঞাণধাতু সোমনস্সসহগতা – ইমে ধম্মা পরিত্তারম্মণা।
1420. Katame dhammā parittārammaṇā? Sabbo kāmāvacarassa vipāko, kiriyāmanodhātu, kiriyāhetukamanoviññāṇadhātu somanassasahagatā – ime dhammā parittārammaṇā.
১৪২১. কতমে ধম্মা মহগ্গতারম্মণা? ৰিঞ্ঞাণঞ্চাযতনং, নেৰসঞ্ঞানাসঞ্ঞাযতনং – ইমে ধম্মা মহগ্গতারম্মণা।
1421. Katame dhammā mahaggatārammaṇā? Viññāṇañcāyatanaṃ, nevasaññānāsaññāyatanaṃ – ime dhammā mahaggatārammaṇā.
১৪২২. কতমে ধম্মা অপ্পমাণারম্মণা? চত্তারো মগ্গা অপরিযাপন্না, চত্তারি চ সামঞ্ঞফলানি – ইমে ধম্মা অপ্পমাণারম্মণা। কামাৰচরকুসলতো চত্তারো ঞাণৰিপ্পযুত্তচিত্তুপ্পাদা, কিরিযতো চত্তারো ঞাণৰিপ্পযুত্তচিত্তুপ্পাদা, সব্বং অকুসলং – ইমে ধম্মা সিযা পরিত্তারম্মণা, সিযা মহগ্গতারম্মণা, ন অপ্পমাণারম্মণা, সিযা ন ৰত্তব্বা পরিত্তারম্মণাতিপি, মহগ্গতারম্মণাতিপি। কামাৰচরকুসলতো চত্তারো ঞাণসম্পযুত্তচিত্তুপ্পাদা, কিরিযতো চত্তারো ঞাণসম্পযুত্তচিত্তুপ্পাদা, রূপাৰচরং চতুত্থং ঝানং কুসলতো চ কিরিযতো চ, কিরিযাহেতুকমনোৰিঞ্ঞাণধাতু উপেক্খাসহগতা – ইমে ধম্মা সিযা পরিত্তারম্মণা, সিযা মহগ্গতারম্মণা, সিযা অপ্পমাণারম্মণা, সিযা ন ৰত্তব্বা পরিত্তারম্মণাতিপি , মহগ্গতারম্মণাতিপি, অপ্পমাণারম্মণাতিপি। রূপাৰচরতিকচতুক্কজ্ঝানা কুসলতো চ ৰিপাকতো চ কিরিযতো চ, চতুত্থস্স ঝানস্স ৰিপাকো, আকাসানঞ্চাযতনং , আকিঞ্চঞ্ঞাযতনং – ইমে ধম্মা ন ৰত্তব্বা পরিত্তারম্মণাতিপি, মহগ্গতারম্মণাতিপি, অপ্পমাণারম্মণাতিপি। রূপঞ্চ নিব্বানঞ্চ অনারম্মণা।
1422. Katame dhammā appamāṇārammaṇā? Cattāro maggā apariyāpannā, cattāri ca sāmaññaphalāni – ime dhammā appamāṇārammaṇā. Kāmāvacarakusalato cattāro ñāṇavippayuttacittuppādā, kiriyato cattāro ñāṇavippayuttacittuppādā, sabbaṃ akusalaṃ – ime dhammā siyā parittārammaṇā, siyā mahaggatārammaṇā, na appamāṇārammaṇā, siyā na vattabbā parittārammaṇātipi, mahaggatārammaṇātipi. Kāmāvacarakusalato cattāro ñāṇasampayuttacittuppādā, kiriyato cattāro ñāṇasampayuttacittuppādā, rūpāvacaraṃ catutthaṃ jhānaṃ kusalato ca kiriyato ca, kiriyāhetukamanoviññāṇadhātu upekkhāsahagatā – ime dhammā siyā parittārammaṇā, siyā mahaggatārammaṇā, siyā appamāṇārammaṇā, siyā na vattabbā parittārammaṇātipi , mahaggatārammaṇātipi, appamāṇārammaṇātipi. Rūpāvacaratikacatukkajjhānā kusalato ca vipākato ca kiriyato ca, catutthassa jhānassa vipāko, ākāsānañcāyatanaṃ , ākiñcaññāyatanaṃ – ime dhammā na vattabbā parittārammaṇātipi, mahaggatārammaṇātipi, appamāṇārammaṇātipi. Rūpañca nibbānañca anārammaṇā.
১৪২৩. কতমে ধম্মা হীনা? দ্ৰাদস অকুসলচিত্তুপ্পাদা – ইমে ধম্মা হীনা।
1423. Katame dhammā hīnā? Dvādasa akusalacittuppādā – ime dhammā hīnā.
১৪২৪. কতমে ধম্মা মজ্ঝিমা? তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা মজ্ঝিমা।
1424. Katame dhammā majjhimā? Tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā majjhimā.
১৪২৫. কতমে ধম্মা পণীতা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা পণীতা।
1425. Katame dhammā paṇītā? Cattāro maggā apariyāpannā, cattāri ca sāmaññaphalāni, nibbānañca – ime dhammā paṇītā.
১৪২৬. কতমে ধম্মা মিচ্ছত্তনিযতা? চত্তারো দিট্ঠিগতসম্পযুত্তচিত্তুপ্পাদা, দ্ৰে দোমনস্সসহগতচিত্তুপ্পাদা – ইমে ধম্মা সিযা মিচ্ছত্তনিযতা, সিযা অনিযতা।
1426. Katame dhammā micchattaniyatā? Cattāro diṭṭhigatasampayuttacittuppādā, dve domanassasahagatacittuppādā – ime dhammā siyā micchattaniyatā, siyā aniyatā.
১৪২৭. কতমে ধম্মা সম্মত্তনিযতা? চত্তারো মগ্গা অপরিযাপন্না – ইমে ধম্মা সম্মত্তনিযতা।
1427. Katame dhammā sammattaniyatā? Cattāro maggā apariyāpannā – ime dhammā sammattaniyatā.
১৪২৮. কতমে ধম্মা অনিযতা? চত্তারো দিট্ঠিগতৰিপ্পযুত্তলোভসহগতচিত্তুপ্পাদা, ৰিচিকিচ্ছাসহগতো চিত্তুপ্পাদো, উদ্ধচ্চসহগতো চিত্তুপ্পাদো, তীসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা অনিযতা।
1428. Katame dhammā aniyatā? Cattāro diṭṭhigatavippayuttalobhasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā aniyatā.
১৪২৯. কতমে ধম্মা মগ্গারম্মণা? কামাৰচরকুসলতো চত্তারো ঞাণসম্পযুত্তচিত্তুপ্পাদা, কিরিযতো চত্তারো ঞাণসম্পযুত্তচিত্তুপ্পাদা – ইমে ধম্মা সিযা মগ্গারম্মণা, ন মগ্গহেতুকা; সিযা মগ্গাধিপতিনো, সিযা ন ৰত্তব্বা মগ্গারম্মণাতিপি, মগ্গাধিপতিনোতিপি । চত্তারো অরিযমগ্গা ন মগ্গারম্মণা, মগ্গহেতুকা; সিযা মগ্গাধিপতিনো, সিযা ন ৰত্তব্বা মগ্গাধিপতিনোতি। রূপাৰচরচতুত্থং ঝানং কুসলতো চ কিরিযতো চ, কিরিযাহেতুকমনোৰিঞ্ঞাণধাতু উপেক্খাসহগতা – ইমে ধম্মা সিযা মগ্গারম্মণা; ন মগ্গহেতুকা, ন মগ্গাধিপতিনো; সিযা ন ৰত্তব্বা মগ্গারম্মণাতি। কামাৰচরকুসলতো চত্তারো ঞাণৰিপ্পযুত্তচিত্তুপ্পাদা, সব্বং অকুসলং, সব্বো কামাৰচরস্স ৰিপাকো, কিরিযতো ছ চিত্তুপ্পাদা, রূপাৰচরতিকচতুক্কজ্ঝানা কুসলতো চ ৰিপাকতো চ কিরিযতো চ, চতুত্থস্স ঝানস্স ৰিপাকো, চত্তারো আরুপ্পা কুসলতো চ ৰিপাকতো চ কিরিযতো চ, চত্তারি চ সামঞ্ঞফলানি – ইমে ধম্মা ন ৰত্তব্বা মগ্গারম্মণাতিপি, মগ্গহেতুকাতিপি, মগ্গাধিপতিনোতিপি। রূপঞ্চ নিব্বানঞ্চ অনারম্মণা।
1429. Katame dhammā maggārammaṇā? Kāmāvacarakusalato cattāro ñāṇasampayuttacittuppādā, kiriyato cattāro ñāṇasampayuttacittuppādā – ime dhammā siyā maggārammaṇā, na maggahetukā; siyā maggādhipatino, siyā na vattabbā maggārammaṇātipi, maggādhipatinotipi . Cattāro ariyamaggā na maggārammaṇā, maggahetukā; siyā maggādhipatino, siyā na vattabbā maggādhipatinoti. Rūpāvacaracatutthaṃ jhānaṃ kusalato ca kiriyato ca, kiriyāhetukamanoviññāṇadhātu upekkhāsahagatā – ime dhammā siyā maggārammaṇā; na maggahetukā, na maggādhipatino; siyā na vattabbā maggārammaṇāti. Kāmāvacarakusalato cattāro ñāṇavippayuttacittuppādā, sabbaṃ akusalaṃ, sabbo kāmāvacarassa vipāko, kiriyato cha cittuppādā, rūpāvacaratikacatukkajjhānā kusalato ca vipākato ca kiriyato ca, catutthassa jhānassa vipāko, cattāro āruppā kusalato ca vipākato ca kiriyato ca, cattāri ca sāmaññaphalāni – ime dhammā na vattabbā maggārammaṇātipi, maggahetukātipi, maggādhipatinotipi. Rūpañca nibbānañca anārammaṇā.
১৪৩০. কতমে ধম্মা উপ্পন্না? চতূসু ভূমীসু ৰিপাকো, যঞ্চ রূপং কম্মস্স কতত্তা – ইমে ধম্মা সিযা উপ্পন্না, সিযা উপ্পাদিনো; ন ৰত্তব্বা অনুপ্পন্নাতি। চতূসু ভূমীসু কুসলং, অকুসলং, তীসু ভূমীসু কিরিযাব্যাকতং, যঞ্চ রূপং ন কম্মস্স কতত্তা – ইমে ধম্মা সিযা উপ্পন্না, সিযা অনুপ্পন্না, ন ৰত্তব্বা উপ্পাদিনোতি। নিব্বানং ন ৰত্তব্বং উপ্পন্নন্তিপি, অনুপ্পন্নন্তিপি, উপ্পাদিনোতিপি।
1430. Katame dhammā uppannā? Catūsu bhūmīsu vipāko, yañca rūpaṃ kammassa katattā – ime dhammā siyā uppannā, siyā uppādino; na vattabbā anuppannāti. Catūsu bhūmīsu kusalaṃ, akusalaṃ, tīsu bhūmīsu kiriyābyākataṃ, yañca rūpaṃ na kammassa katattā – ime dhammā siyā uppannā, siyā anuppannā, na vattabbā uppādinoti. Nibbānaṃ na vattabbaṃ uppannantipi, anuppannantipi, uppādinotipi.
১৪৩১. নিব্বানং ঠপেত্ৰা সব্বে ধম্মা সিযা অতীতা, সিযা অনাগতা, সিযা পচ্চুপ্পন্না। নিব্বানং ন ৰত্তব্বং অতীতন্তিপি, অনাগতন্তিপি , পচ্চুপ্পন্নন্তিপি।
1431. Nibbānaṃ ṭhapetvā sabbe dhammā siyā atītā, siyā anāgatā, siyā paccuppannā. Nibbānaṃ na vattabbaṃ atītantipi, anāgatantipi , paccuppannantipi.
১৪৩২. কতমে ধম্মা অতীতারম্মণা? ৰিঞ্ঞাণঞ্চাযতনং, নেৰসঞ্ঞানাসঞ্ঞাযতনং – ইমে ধম্মা অতীতারম্মণা।
1432. Katame dhammā atītārammaṇā? Viññāṇañcāyatanaṃ, nevasaññānāsaññāyatanaṃ – ime dhammā atītārammaṇā.
১৪৩৩. নিযোগা অনাগতারম্মণা নত্থি।
1433. Niyogā anāgatārammaṇā natthi.
১৪৩৪. কতমে ধম্মা পচ্চুপ্পন্নারম্মণা? দ্ৰেপঞ্চৰিঞ্ঞাণানি, তিস্সো চ মনোধাতুযো – ইমে ধম্মা পচ্চুপ্পন্নারম্মণা। কামাৰচরকুসলস্স ৰিপাকতো দস চিত্তুপ্পাদা, অকুসলস্স ৰিপাকতো মনোৰিঞ্ঞাণধাতু উপেক্খাসহগতা, কিরিযাহেতুকমনোৰিঞ্ঞাণধাতু সোমনস্সসহগতা – ইমে ধম্মা সিযা অতীতারম্মণা, সিযা অনাগতারম্মণা, সিযা পচ্চুপ্পন্নারম্মণা। কামাৰচরকুসলং, অকুসলং, কিরিযতো নৰ চিত্তুপ্পাদা, রূপাৰচরং চতুত্থং ঝানং কুসলতো চ কিরিযতো চ – ইমে ধম্মা সিযা অতীতারম্মণা, সিযা অনাগতারম্মণা, সিযা পচ্চুপ্পন্নারম্মণা; সিযা ন ৰত্তব্বা অতীতারম্মণাতিপি, অনাগতারম্মণাতিপি, পচ্চুপ্পন্নারম্মণাতিপি। রূপাৰচরতিকচতুক্কজ্ঝানা কুসলতো চ ৰিপাকতো চ কিরিযতো চ, চতুত্থস্স ঝানস্স ৰিপাকো, আকাসানঞ্চাযতনং, আকিঞ্চঞ্ঞাযতনং, চত্তারো মগ্গা অপরিযাপন্না, চত্তারি চ সামঞ্ঞফলানি – ইমে ধম্মা ন ৰত্তব্বা অতীতারম্মণাতিপি, অনাগতারম্মণাতিপি, পচ্চুপ্পন্নারম্মণাতিপি। রূপঞ্চ নিব্বানঞ্চ অনারম্মণা।
1434. Katame dhammā paccuppannārammaṇā? Dvepañcaviññāṇāni, tisso ca manodhātuyo – ime dhammā paccuppannārammaṇā. Kāmāvacarakusalassa vipākato dasa cittuppādā, akusalassa vipākato manoviññāṇadhātu upekkhāsahagatā, kiriyāhetukamanoviññāṇadhātu somanassasahagatā – ime dhammā siyā atītārammaṇā, siyā anāgatārammaṇā, siyā paccuppannārammaṇā. Kāmāvacarakusalaṃ, akusalaṃ, kiriyato nava cittuppādā, rūpāvacaraṃ catutthaṃ jhānaṃ kusalato ca kiriyato ca – ime dhammā siyā atītārammaṇā, siyā anāgatārammaṇā, siyā paccuppannārammaṇā; siyā na vattabbā atītārammaṇātipi, anāgatārammaṇātipi, paccuppannārammaṇātipi. Rūpāvacaratikacatukkajjhānā kusalato ca vipākato ca kiriyato ca, catutthassa jhānassa vipāko, ākāsānañcāyatanaṃ, ākiñcaññāyatanaṃ, cattāro maggā apariyāpannā, cattāri ca sāmaññaphalāni – ime dhammā na vattabbā atītārammaṇātipi, anāgatārammaṇātipi, paccuppannārammaṇātipi. Rūpañca nibbānañca anārammaṇā.
১৪৩৫. অনিন্দ্রিযবদ্ধরূপঞ্চ নিব্বানঞ্চ ঠপেত্ৰা, সব্বে ধম্মা সিযা অজ্ঝত্তা, সিযা বহিদ্ধা, সিযা অজ্ঝত্তবহিদ্ধা। অনিন্দ্রিযবদ্ধরূপঞ্চ নিব্বানঞ্চ বহিদ্ধা।
1435. Anindriyabaddharūpañca nibbānañca ṭhapetvā, sabbe dhammā siyā ajjhattā, siyā bahiddhā, siyā ajjhattabahiddhā. Anindriyabaddharūpañca nibbānañca bahiddhā.
১৪৩৬. কতমে ধম্মা অজ্ঝত্তারম্মণা? ৰিঞ্ঞাণঞ্চাযতনং, নেৰসঞ্ঞানাসঞ্ঞাযতনং – ইমে ধম্মা অজ্ঝত্তারম্মণা।
1436. Katame dhammā ajjhattārammaṇā? Viññāṇañcāyatanaṃ, nevasaññānāsaññāyatanaṃ – ime dhammā ajjhattārammaṇā.
১৪৩৭. কতমে ধম্মা বহিদ্ধারম্মণা? রূপাৰচরতিকচতুক্কজ্ঝানা কুসলতো চ ৰিপাকতো চ কিরিযতো চ, চতুত্থস্স ঝানস্স ৰিপাকো, আকাসানঞ্চাযতনং, চত্তারো মগ্গা অপরিযাপন্না চত্তারি চ সামঞ্ঞফলানি – ইমে ধম্মা বহিদ্ধারম্মণা। রূপং ঠপেত্ৰা, সব্বেৰ কামাৰচরা কুসলাকুসলাব্যাকতা ধম্মা, রূপাৰচরং চতুত্থং ঝানং কুসলতো চ কিরিযতো চ – ইমে ধম্মা সিযা অজ্ঝত্তারম্মণা, সিযা বহিদ্ধারম্মণা, সিযা অজ্ঝত্তবহিদ্ধারম্মণা। আকিঞ্চঞ্ঞাযতনং ন ৰত্তব্বং অজ্ঝত্তারম্মণন্তিপি, বহিদ্ধারম্মণন্তিপি, অজ্ঝত্তবহিদ্ধারম্মণন্তিপি। রূপঞ্চ নিব্বানঞ্চ অনারম্মণা।
1437. Katame dhammā bahiddhārammaṇā? Rūpāvacaratikacatukkajjhānā kusalato ca vipākato ca kiriyato ca, catutthassa jhānassa vipāko, ākāsānañcāyatanaṃ, cattāro maggā apariyāpannā cattāri ca sāmaññaphalāni – ime dhammā bahiddhārammaṇā. Rūpaṃ ṭhapetvā, sabbeva kāmāvacarā kusalākusalābyākatā dhammā, rūpāvacaraṃ catutthaṃ jhānaṃ kusalato ca kiriyato ca – ime dhammā siyā ajjhattārammaṇā, siyā bahiddhārammaṇā, siyā ajjhattabahiddhārammaṇā. Ākiñcaññāyatanaṃ na vattabbaṃ ajjhattārammaṇantipi, bahiddhārammaṇantipi, ajjhattabahiddhārammaṇantipi. Rūpañca nibbānañca anārammaṇā.
১৪৩৮. কতমে ধম্মা সনিদস্সনসপ্পটিঘা? রূপাযতনং – ইমে ধম্মা সনিদস্সনসপ্পটিঘা।
1438. Katame dhammā sanidassanasappaṭighā? Rūpāyatanaṃ – ime dhammā sanidassanasappaṭighā.
১৪৩৯. কতমে ধম্মা অনিদস্সনসপ্পটিঘা? চক্খাযতনং…পে॰… ফোট্ঠব্বাযতনং – ইমে ধম্মা অনিদস্সনসপ্পটিঘা।
1439. Katame dhammā anidassanasappaṭighā? Cakkhāyatanaṃ…pe… phoṭṭhabbāyatanaṃ – ime dhammā anidassanasappaṭighā.
১৪৪০. কতমে ধম্মা অনিদস্সনঅপ্পটিঘা? চতূসু ভূমীসু কুসলং, অকুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, যঞ্চ রূপং অনিদস্সনং অপ্পটিঘং ধম্মাযতনপরিযাপন্নং, নিব্বানঞ্চ – ইমে ধম্মা অনিদস্সনঅপ্পটিঘা।
1440. Katame dhammā anidassanaappaṭighā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, yañca rūpaṃ anidassanaṃ appaṭighaṃ dhammāyatanapariyāpannaṃ, nibbānañca – ime dhammā anidassanaappaṭighā.
তিকং।
Tikaṃ.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / ধম্মসঙ্গণি-অট্ঠকথা • Dhammasaṅgaṇi-aṭṭhakathā / তিকঅত্থুদ্ধারৰণ্ণনা • Tikaatthuddhāravaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-মূলটীকা • Dhammasaṅgaṇī-mūlaṭīkā / তিকঅত্থুদ্ধারৰণ্ণনা • Tikaatthuddhāravaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-অনুটীকা • Dhammasaṅgaṇī-anuṭīkā / তিকঅত্থুদ্ধারৰণ্ণনা • Tikaatthuddhāravaṇṇanā
