| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၄. တိကဒုကပဋ္ဌာနဝဏ္ဏနာ
4. Tikadukapaṭṭhānavaṇṇanā
တိကဒုကပဋ္ဌာနေပိ ကုသလံ ဟေတုံ ဓမ္မံ ပဋိစ္စ ကုသလော ဟေတု ဓမ္မော ဥပ္ပဇ္ဇတိ ဟေတုပစ္စယာတိ ပဉ္ဟာမတ္တုဒ္ဓာရဝသေနေဝ ဒေသနာ ကတာ။ တတ္ထ ယထာ ဟေဋ္ဌာ ဟေတုဒုကေန သဒ္ဓိံ ကုသလပဒံ ယောဇေတ္ဝာ သဗ္ဗပစ္စယဝသေန သဗ္ဗဝာရေသု သင္ခေပတော ဒေသနာ ကတာ, ဧဝမိဓ ကုသလတ္တိကေန သဒ္ဓိံ ဟေတုပဒံ ယောဇေတ္ဝာ သဗ္ဗပစ္စယဝသေန သဗ္ဗဝာရေသု သင္ခေပတော ဒေသနာ ကတာ။ ယထာ စ ဟေတုပဒံ, ဧဝံ နဟေတုပဒမ္ပိ ကုသလတ္တိကေန သဒ္ဓိံ ယောဇေတ္ဝာ ကုသလတ္တိကဟေတုဒုကံ နိဋ္ဌာပိတံ။ တတော ပရံ သုခာယ ဝေဒနာယ သမ္ပယုတ္တံ ဟေတုံ ဓမ္မန္တိအာဒိနာ နယေန ဝေဒနာတ္တိကဟေတုဒုကာဒီနိ ဧကဝီသတိ တိကဒုကာနိ ဒသ္သိတာနိ။
Tikadukapaṭṭhānepi kusalaṃ hetuṃ dhammaṃ paṭicca kusalo hetu dhammo uppajjati hetupaccayāti pañhāmattuddhāravaseneva desanā katā. Tattha yathā heṭṭhā hetudukena saddhiṃ kusalapadaṃ yojetvā sabbapaccayavasena sabbavāresu saṅkhepato desanā katā, evamidha kusalattikena saddhiṃ hetupadaṃ yojetvā sabbapaccayavasena sabbavāresu saṅkhepato desanā katā. Yathā ca hetupadaṃ, evaṃ nahetupadampi kusalattikena saddhiṃ yojetvā kusalattikahetudukaṃ niṭṭhāpitaṃ. Tato paraṃ sukhāya vedanāya sampayuttaṃ hetuṃ dhammantiādinā nayena vedanāttikahetudukādīni ekavīsati tikadukāni dassitāni.
ဧဝံ ဗာဝီသတိယာ တိကေဟိ သဒ္ဓိံ ဟေတုဒုကံ ယောဇေတ္ဝာ ပုန တေဟိယေဝ သဒ္ဓိံ သဟေတုကဒုကာဒယော သရဏဒုကပရိယောသာနာ လဗ္ဘမာနဝသေန သဗ္ဗဒုကာ ယောဇိတာ။ ဣဓာပိ ယံ ယံ ပဒံ ယောဇနံ န ဂစ္ဆတိ, တံ တံ ပာဠိယံယေဝ ပဋိက္ခိတ္တံ။ ဧဝံ ဒုကသတံ ဂဟေတ္ဝာ ဒ္ဝာဝီသတိယာ တိကေသု ပက္ခိပိတ္ဝာ တိကဒုကပဋ္ဌာနံ နာမ ဒေသိတံ။ တတ္ရာပိ ယေန ယေန နယေန ပာဠိ သင္ခိတ္တာ, သော သော နယော ဝိတ္ထာရတော ဝေဒိတဗ္ဗော။
Evaṃ bāvīsatiyā tikehi saddhiṃ hetudukaṃ yojetvā puna tehiyeva saddhiṃ sahetukadukādayo saraṇadukapariyosānā labbhamānavasena sabbadukā yojitā. Idhāpi yaṃ yaṃ padaṃ yojanaṃ na gacchati, taṃ taṃ pāḷiyaṃyeva paṭikkhittaṃ. Evaṃ dukasataṃ gahetvā dvāvīsatiyā tikesu pakkhipitvā tikadukapaṭṭhānaṃ nāma desitaṃ. Tatrāpi yena yena nayena pāḷi saṅkhittā, so so nayo vitthārato veditabbo.
တိကဒုကပဋ္ဌာနဝဏ္ဏနာ။
Tikadukapaṭṭhānavaṇṇanā.
