| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೪. ತಿಕದುಕಪಟ್ಠಾನವಣ್ಣನಾ
4. Tikadukapaṭṭhānavaṇṇanā
ತಿಕದುಕಪಟ್ಠಾನೇಪಿ ಕುಸಲಂ ಹೇತುಂ ಧಮ್ಮಂ ಪಟಿಚ್ಚ ಕುಸಲೋ ಹೇತು ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾತಿ ಪಞ್ಹಾಮತ್ತುದ್ಧಾರವಸೇನೇವ ದೇಸನಾ ಕತಾ। ತತ್ಥ ಯಥಾ ಹೇಟ್ಠಾ ಹೇತುದುಕೇನ ಸದ್ಧಿಂ ಕುಸಲಪದಂ ಯೋಜೇತ್ವಾ ಸಬ್ಬಪಚ್ಚಯವಸೇನ ಸಬ್ಬವಾರೇಸು ಸಙ್ಖೇಪತೋ ದೇಸನಾ ಕತಾ, ಏವಮಿಧ ಕುಸಲತ್ತಿಕೇನ ಸದ್ಧಿಂ ಹೇತುಪದಂ ಯೋಜೇತ್ವಾ ಸಬ್ಬಪಚ್ಚಯವಸೇನ ಸಬ್ಬವಾರೇಸು ಸಙ್ಖೇಪತೋ ದೇಸನಾ ಕತಾ। ಯಥಾ ಚ ಹೇತುಪದಂ, ಏವಂ ನಹೇತುಪದಮ್ಪಿ ಕುಸಲತ್ತಿಕೇನ ಸದ್ಧಿಂ ಯೋಜೇತ್ವಾ ಕುಸಲತ್ತಿಕಹೇತುದುಕಂ ನಿಟ್ಠಾಪಿತಂ। ತತೋ ಪರಂ ಸುಖಾಯ ವೇದನಾಯ ಸಮ್ಪಯುತ್ತಂ ಹೇತುಂ ಧಮ್ಮನ್ತಿಆದಿನಾ ನಯೇನ ವೇದನಾತ್ತಿಕಹೇತುದುಕಾದೀನಿ ಏಕವೀಸತಿ ತಿಕದುಕಾನಿ ದಸ್ಸಿತಾನಿ।
Tikadukapaṭṭhānepi kusalaṃ hetuṃ dhammaṃ paṭicca kusalo hetu dhammo uppajjati hetupaccayāti pañhāmattuddhāravaseneva desanā katā. Tattha yathā heṭṭhā hetudukena saddhiṃ kusalapadaṃ yojetvā sabbapaccayavasena sabbavāresu saṅkhepato desanā katā, evamidha kusalattikena saddhiṃ hetupadaṃ yojetvā sabbapaccayavasena sabbavāresu saṅkhepato desanā katā. Yathā ca hetupadaṃ, evaṃ nahetupadampi kusalattikena saddhiṃ yojetvā kusalattikahetudukaṃ niṭṭhāpitaṃ. Tato paraṃ sukhāya vedanāya sampayuttaṃ hetuṃ dhammantiādinā nayena vedanāttikahetudukādīni ekavīsati tikadukāni dassitāni.
ಏವಂ ಬಾವೀಸತಿಯಾ ತಿಕೇಹಿ ಸದ್ಧಿಂ ಹೇತುದುಕಂ ಯೋಜೇತ್ವಾ ಪುನ ತೇಹಿಯೇವ ಸದ್ಧಿಂ ಸಹೇತುಕದುಕಾದಯೋ ಸರಣದುಕಪರಿಯೋಸಾನಾ ಲಬ್ಭಮಾನವಸೇನ ಸಬ್ಬದುಕಾ ಯೋಜಿತಾ। ಇಧಾಪಿ ಯಂ ಯಂ ಪದಂ ಯೋಜನಂ ನ ಗಚ್ಛತಿ, ತಂ ತಂ ಪಾಳಿಯಂಯೇವ ಪಟಿಕ್ಖಿತ್ತಂ। ಏವಂ ದುಕಸತಂ ಗಹೇತ್ವಾ ದ್ವಾವೀಸತಿಯಾ ತಿಕೇಸು ಪಕ್ಖಿಪಿತ್ವಾ ತಿಕದುಕಪಟ್ಠಾನಂ ನಾಮ ದೇಸಿತಂ। ತತ್ರಾಪಿ ಯೇನ ಯೇನ ನಯೇನ ಪಾಳಿ ಸಙ್ಖಿತ್ತಾ, ಸೋ ಸೋ ನಯೋ ವಿತ್ಥಾರತೋ ವೇದಿತಬ್ಬೋ।
Evaṃ bāvīsatiyā tikehi saddhiṃ hetudukaṃ yojetvā puna tehiyeva saddhiṃ sahetukadukādayo saraṇadukapariyosānā labbhamānavasena sabbadukā yojitā. Idhāpi yaṃ yaṃ padaṃ yojanaṃ na gacchati, taṃ taṃ pāḷiyaṃyeva paṭikkhittaṃ. Evaṃ dukasataṃ gahetvā dvāvīsatiyā tikesu pakkhipitvā tikadukapaṭṭhānaṃ nāma desitaṃ. Tatrāpi yena yena nayena pāḷi saṅkhittā, so so nayo vitthārato veditabbo.
ತಿಕದುಕಪಟ್ಠಾನವಣ್ಣನಾ।
Tikadukapaṭṭhānavaṇṇanā.
