| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
४. तिकण्डकीसुत्तवण्णना
4. Tikaṇḍakīsuttavaṇṇanā
१४४. चतुत्थे अप्पटिकूलेति अप्पटिकूलारम्मणे। पटिकूलसञ्ञीति पटिकूलन्ति एवंसञ्ञी। एस नयो सब्बत्थ। कथं पनायं एवं विहरतीति? इट्ठस्मिं वत्थुस्मिं पन असुभाय वा फरति, अनिच्चतो वा उपसंहरति। एवं ताव अप्पटिकूले पटिकूलसञ्ञी विहरति। अनिट्ठस्मिं वत्थुस्मिं मेत्ताय वा फरति, धातुतो वा उपसंहरति। एवं पटिकूले अप्पटिकूलसञ्ञी विहरति। उभयस्मिं पन पुरिमनयस्स च पच्छिमनयस्स च वसेन ततियचतुत्थवारा वुत्ता, छळङ्गुपेक्खावसेन पञ्चमो। छळङ्गुपेक्खा चेसा खीणासवस्स उपेक्खासदिसा, न पन खीणासवुपेक्खा। तत्थ उपेक्खको विहरेय्याति मज्झत्तभावे ठितो विहरेय्य। क्वचनीति किस्मिञ्चि आरम्मणे। कत्थचीति किस्मिञ्चि पदेसे। किञ्चनति कोचि अप्पमत्तकोपि। इति इमस्मिं सुत्ते पञ्चसु ठानेसु विपस्सनाव कथिता। तं आरद्धविपस्सको भिक्खु कातुं सक्कोति, ञाणवा पञ्ञुत्तरो बहुस्सुतसमणोपि कातुं सक्कोति। सोतापन्नसकदागामिअनागामिनो कातुं सक्कोन्तियेव, खीणासवे वत्तब्बमेव नत्थीति। पञ्चमं उत्तानमेव।
144. Catutthe appaṭikūleti appaṭikūlārammaṇe. Paṭikūlasaññīti paṭikūlanti evaṃsaññī. Esa nayo sabbattha. Kathaṃ panāyaṃ evaṃ viharatīti? Iṭṭhasmiṃ vatthusmiṃ pana asubhāya vā pharati, aniccato vā upasaṃharati. Evaṃ tāva appaṭikūle paṭikūlasaññī viharati. Aniṭṭhasmiṃ vatthusmiṃ mettāya vā pharati, dhātuto vā upasaṃharati. Evaṃ paṭikūle appaṭikūlasaññī viharati. Ubhayasmiṃ pana purimanayassa ca pacchimanayassa ca vasena tatiyacatutthavārā vuttā, chaḷaṅgupekkhāvasena pañcamo. Chaḷaṅgupekkhā cesā khīṇāsavassa upekkhāsadisā, na pana khīṇāsavupekkhā. Tattha upekkhako vihareyyāti majjhattabhāve ṭhito vihareyya. Kvacanīti kismiñci ārammaṇe. Katthacīti kismiñci padese. Kiñcanati koci appamattakopi. Iti imasmiṃ sutte pañcasu ṭhānesu vipassanāva kathitā. Taṃ āraddhavipassako bhikkhu kātuṃ sakkoti, ñāṇavā paññuttaro bahussutasamaṇopi kātuṃ sakkoti. Sotāpannasakadāgāmianāgāmino kātuṃ sakkontiyeva, khīṇāsave vattabbameva natthīti. Pañcamaṃ uttānameva.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ४. तिकण्डकीसुत्तं • 4. Tikaṇḍakīsuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ४-६. तिकण्डकीसुत्तादिवण्णना • 4-6. Tikaṇḍakīsuttādivaṇṇanā
