| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๔. ติกณฺฑกีสุตฺตวณฺณนา
4. Tikaṇḍakīsuttavaṇṇanā
๑๔๔. จตุเตฺถ อปฺปฎิกูเลติ อปฺปฎิกูลารมฺมเณฯ ปฎิกูลสญฺญีติ ปฎิกูลนฺติ เอวํสญฺญีฯ เอส นโย สพฺพตฺถฯ กถํ ปนายํ เอวํ วิหรตีติ? อิฎฺฐสฺมิํ วตฺถุสฺมิํ ปน อสุภาย วา ผรติ, อนิจฺจโต วา อุปสํหรติฯ เอวํ ตาว อปฺปฎิกูเล ปฎิกูลสญฺญี วิหรติฯ อนิฎฺฐสฺมิํ วตฺถุสฺมิํ เมตฺตาย วา ผรติ, ธาตุโต วา อุปสํหรติฯ เอวํ ปฎิกูเล อปฺปฎิกูลสญฺญี วิหรติฯ อุภยสฺมิํ ปน ปุริมนยสฺส จ ปจฺฉิมนยสฺส จ วเสน ตติยจตุตฺถวารา วุตฺตา, ฉฬงฺคุเปกฺขาวเสน ปญฺจโมฯ ฉฬงฺคุเปกฺขา เจสา ขีณาสวสฺส อุเปกฺขาสทิสา, น ปน ขีณาสวุเปกฺขาฯ ตตฺถ อุเปกฺขโก วิหเรยฺยาติ มชฺฌตฺตภาเว ฐิโต วิหเรยฺยฯ กฺวจนีติ กิสฺมิญฺจิ อารมฺมเณฯ กตฺถจีติ กิสฺมิญฺจิ ปเทเสฯ กิญฺจนติ โกจิ อปฺปมตฺตโกปิฯ อิติ อิมสฺมิํ สุเตฺต ปญฺจสุ ฐาเนสุ วิปสฺสนาว กถิตาฯ ตํ อารทฺธวิปสฺสโก ภิกฺขุ กาตุํ สโกฺกติ, ญาณวา ปญฺญุตฺตโร พหุสฺสุตสมโณปิ กาตุํ สโกฺกติฯ โสตาปนฺนสกทาคามิอนาคามิโน กาตุํ สโกฺกนฺติเยว, ขีณาสเว วตฺตพฺพเมว นตฺถีติฯ ปญฺจมํ อุตฺตานเมวฯ
144. Catutthe appaṭikūleti appaṭikūlārammaṇe. Paṭikūlasaññīti paṭikūlanti evaṃsaññī. Esa nayo sabbattha. Kathaṃ panāyaṃ evaṃ viharatīti? Iṭṭhasmiṃ vatthusmiṃ pana asubhāya vā pharati, aniccato vā upasaṃharati. Evaṃ tāva appaṭikūle paṭikūlasaññī viharati. Aniṭṭhasmiṃ vatthusmiṃ mettāya vā pharati, dhātuto vā upasaṃharati. Evaṃ paṭikūle appaṭikūlasaññī viharati. Ubhayasmiṃ pana purimanayassa ca pacchimanayassa ca vasena tatiyacatutthavārā vuttā, chaḷaṅgupekkhāvasena pañcamo. Chaḷaṅgupekkhā cesā khīṇāsavassa upekkhāsadisā, na pana khīṇāsavupekkhā. Tattha upekkhako vihareyyāti majjhattabhāve ṭhito vihareyya. Kvacanīti kismiñci ārammaṇe. Katthacīti kismiñci padese. Kiñcanati koci appamattakopi. Iti imasmiṃ sutte pañcasu ṭhānesu vipassanāva kathitā. Taṃ āraddhavipassako bhikkhu kātuṃ sakkoti, ñāṇavā paññuttaro bahussutasamaṇopi kātuṃ sakkoti. Sotāpannasakadāgāmianāgāmino kātuṃ sakkontiyeva, khīṇāsave vattabbameva natthīti. Pañcamaṃ uttānameva.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๔. ติกณฺฑกีสุตฺตํ • 4. Tikaṇḍakīsuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๔-๖. ติกณฺฑกีสุตฺตาทิวณฺณนา • 4-6. Tikaṇḍakīsuttādivaṇṇanā
