| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៤. តិកណ្ឌកីសុត្តវណ្ណនា
4. Tikaṇḍakīsuttavaṇṇanā
១៤៤. ចតុត្ថេ អប្បដិកូលេតិ អប្បដិកូលារម្មណេ។ បដិកូលសញ្ញីតិ បដិកូលន្តិ ឯវំសញ្ញី។ ឯស នយោ សព្ពត្ថ។ កថំ បនាយំ ឯវំ វិហរតីតិ? ឥដ្ឋស្មិំ វត្ថុស្មិំ បន អសុភាយ វា ផរតិ, អនិច្ចតោ វា ឧបសំហរតិ។ ឯវំ តាវ អប្បដិកូលេ បដិកូលសញ្ញី វិហរតិ។ អនិដ្ឋស្មិំ វត្ថុស្មិំ មេត្តាយ វា ផរតិ, ធាតុតោ វា ឧបសំហរតិ។ ឯវំ បដិកូលេ អប្បដិកូលសញ្ញី វិហរតិ។ ឧភយស្មិំ បន បុរិមនយស្ស ច បច្ឆិមនយស្ស ច វសេន តតិយចតុត្ថវារា វុត្តា, ឆឡង្គុបេក្ខាវសេន បញ្ចមោ។ ឆឡង្គុបេក្ខា ចេសា ខីណាសវស្ស ឧបេក្ខាសទិសា, ន បន ខីណាសវុបេក្ខា។ តត្ថ ឧបេក្ខកោ វិហរេយ្យាតិ មជ្ឈត្តភាវេ ឋិតោ វិហរេយ្យ។ ក្វចនីតិ កិស្មិញ្ចិ អារម្មណេ។ កត្ថចីតិ កិស្មិញ្ចិ បទេសេ។ កិញ្ចនតិ កោចិ អប្បមត្តកោបិ។ ឥតិ ឥមស្មិំ សុត្តេ បញ្ចសុ ឋានេសុ វិបស្សនាវ កថិតា។ តំ អារទ្ធវិបស្សកោ ភិក្ខុ កាតុំ សក្កោតិ, ញាណវា បញ្ញុត្តរោ ពហុស្សុតសមណោបិ កាតុំ សក្កោតិ។ សោតាបន្នសកទាគាមិអនាគាមិនោ កាតុំ សក្កោន្តិយេវ, ខីណាសវេ វត្តព្ពមេវ នត្ថីតិ។ បញ្ចមំ ឧត្តានមេវ។
144. Catutthe appaṭikūleti appaṭikūlārammaṇe. Paṭikūlasaññīti paṭikūlanti evaṃsaññī. Esa nayo sabbattha. Kathaṃ panāyaṃ evaṃ viharatīti? Iṭṭhasmiṃ vatthusmiṃ pana asubhāya vā pharati, aniccato vā upasaṃharati. Evaṃ tāva appaṭikūle paṭikūlasaññī viharati. Aniṭṭhasmiṃ vatthusmiṃ mettāya vā pharati, dhātuto vā upasaṃharati. Evaṃ paṭikūle appaṭikūlasaññī viharati. Ubhayasmiṃ pana purimanayassa ca pacchimanayassa ca vasena tatiyacatutthavārā vuttā, chaḷaṅgupekkhāvasena pañcamo. Chaḷaṅgupekkhā cesā khīṇāsavassa upekkhāsadisā, na pana khīṇāsavupekkhā. Tattha upekkhako vihareyyāti majjhattabhāve ṭhito vihareyya. Kvacanīti kismiñci ārammaṇe. Katthacīti kismiñci padese. Kiñcanati koci appamattakopi. Iti imasmiṃ sutte pañcasu ṭhānesu vipassanāva kathitā. Taṃ āraddhavipassako bhikkhu kātuṃ sakkoti, ñāṇavā paññuttaro bahussutasamaṇopi kātuṃ sakkoti. Sotāpannasakadāgāmianāgāmino kātuṃ sakkontiyeva, khīṇāsave vattabbameva natthīti. Pañcamaṃ uttānameva.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៤. តិកណ្ឌកីសុត្តំ • 4. Tikaṇḍakīsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៤-៦. តិកណ្ឌកីសុត្តាទិវណ្ណនា • 4-6. Tikaṇḍakīsuttādivaṇṇanā
