| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၄. တိကဏ္ဍကီသုတ္တဝဏ္ဏနာ
4. Tikaṇḍakīsuttavaṇṇanā
၁၄၄. စတုတ္ထေ အပ္ပဋိကူလေတိ အပ္ပဋိကူလာရမ္မဏေ။ ပဋိကူလသညီတိ ပဋိကူလန္တိ ဧဝံသညီ။ ဧသ နယော သဗ္ဗတ္ထ။ ကထံ ပနာယံ ဧဝံ ဝိဟရတီတိ? ဣဋ္ဌသ္မိံ ဝတ္ထုသ္မိံ ပန အသုဘာယ ဝာ ဖရတိ, အနိစ္စတော ဝာ ဥပသံဟရတိ။ ဧဝံ တာဝ အပ္ပဋိကူလေ ပဋိကူလသညီ ဝိဟရတိ။ အနိဋ္ဌသ္မိံ ဝတ္ထုသ္မိံ မေတ္တာယ ဝာ ဖရတိ, ဓာတုတော ဝာ ဥပသံဟရတိ။ ဧဝံ ပဋိကူလေ အပ္ပဋိကူလသညီ ဝိဟရတိ။ ဥဘယသ္မိံ ပန ပုရိမနယသ္သ စ ပစ္ဆိမနယသ္သ စ ဝသေန တတိယစတုတ္ထဝာရာ ဝုတ္တာ, ဆဠင္ဂုပေက္ခာဝသေန ပဉ္စမော။ ဆဠင္ဂုပေက္ခာ စေသာ ခီဏာသဝသ္သ ဥပေက္ခာသဒိသာ, န ပန ခီဏာသဝုပေက္ခာ။ တတ္ထ ဥပေက္ခကော ဝိဟရေယ္ယာတိ မဇ္ဈတ္တဘာဝေ ဌိတော ဝိဟရေယ္ယ။ က္ဝစနီတိ ကိသ္မိဉ္စိ အာရမ္မဏေ။ ကတ္ထစီတိ ကိသ္မိဉ္စိ ပဒေသေ။ ကိဉ္စနတိ ကောစိ အပ္ပမတ္တကောပိ။ ဣတိ ဣမသ္မိံ သုတ္တေ ပဉ္စသု ဌာနေသု ဝိပသ္သနာဝ ကထိတာ။ တံ အာရဒ္ဓဝိပသ္သကော ဘိက္ခု ကာတုံ သက္ကောတိ, ဉာဏဝာ ပညုတ္တရော ဗဟုသ္သုတသမဏောပိ ကာတုံ သက္ကောတိ။ သောတာပန္နသကဒာဂာမိအနာဂာမိနော ကာတုံ သက္ကောန္တိယေဝ, ခီဏာသဝေ ဝတ္တဗ္ဗမေဝ နတ္ထီတိ။ ပဉ္စမံ ဥတ္တာနမေဝ။
144. Catutthe appaṭikūleti appaṭikūlārammaṇe. Paṭikūlasaññīti paṭikūlanti evaṃsaññī. Esa nayo sabbattha. Kathaṃ panāyaṃ evaṃ viharatīti? Iṭṭhasmiṃ vatthusmiṃ pana asubhāya vā pharati, aniccato vā upasaṃharati. Evaṃ tāva appaṭikūle paṭikūlasaññī viharati. Aniṭṭhasmiṃ vatthusmiṃ mettāya vā pharati, dhātuto vā upasaṃharati. Evaṃ paṭikūle appaṭikūlasaññī viharati. Ubhayasmiṃ pana purimanayassa ca pacchimanayassa ca vasena tatiyacatutthavārā vuttā, chaḷaṅgupekkhāvasena pañcamo. Chaḷaṅgupekkhā cesā khīṇāsavassa upekkhāsadisā, na pana khīṇāsavupekkhā. Tattha upekkhako vihareyyāti majjhattabhāve ṭhito vihareyya. Kvacanīti kismiñci ārammaṇe. Katthacīti kismiñci padese. Kiñcanati koci appamattakopi. Iti imasmiṃ sutte pañcasu ṭhānesu vipassanāva kathitā. Taṃ āraddhavipassako bhikkhu kātuṃ sakkoti, ñāṇavā paññuttaro bahussutasamaṇopi kātuṃ sakkoti. Sotāpannasakadāgāmianāgāmino kātuṃ sakkontiyeva, khīṇāsave vattabbameva natthīti. Pañcamaṃ uttānameva.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၄. တိကဏ္ဍကီသုတ္တံ • 4. Tikaṇḍakīsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၄-၆. တိကဏ္ဍကီသုတ္တာဒိဝဏ္ဏနာ • 4-6. Tikaṇḍakīsuttādivaṇṇanā
