| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
৩. তিকনিদ্দেসৰণ্ণনা
3. Tikaniddesavaṇṇanā
৯১. সেসসংৰরভেদেনাতি মনোসংৰরভেদেন, সতিসংৰরাদিভেদেন ৰা। অকুসলসীলসমন্নাগমেনাতি ‘‘কতমে চ থপতি অকুসলা সীলা? অকুসলং কাযকম্মং অকুসলং ৰচীকম্মং পাপকো আজীৰো’’তি ৰুত্তেহি সমন্নাগমেন। তস্স হি…পে॰… এৰং সাসঙ্কসমাচারো হোতীতি এৰং সাসঙ্কো সমাচারো হোতীতি অত্থো।
91. Sesasaṃvarabhedenāti manosaṃvarabhedena, satisaṃvarādibhedena vā. Akusalasīlasamannāgamenāti ‘‘katame ca thapati akusalā sīlā? Akusalaṃ kāyakammaṃ akusalaṃ vacīkammaṃ pāpako ājīvo’’ti vuttehi samannāgamena. Tassa hi…pe… evaṃ sāsaṅkasamācāro hotīti evaṃ sāsaṅko samācāro hotīti attho.
৯৪. সমানৰিসযানং পুগ্গলানং ৰিসেসদস্সনৰসেন ‘‘কাযসক্খী’’তিআদিকং ৰুত্তং।
94. Samānavisayānaṃ puggalānaṃ visesadassanavasena ‘‘kāyasakkhī’’tiādikaṃ vuttaṃ.
১০৭. সমাধি ৰা আদীতি লোকুত্তরধম্মা হি পরমত্থতো সাসনন্তি তদত্থো পাদকসমাধি তস্স আদি ৰুত্তো, তদাসন্নত্তা ৰিপস্সনা, তস্স মূলেকদেসত্তা মগ্গো।
107. Samādhi vā ādīti lokuttaradhammā hi paramatthato sāsananti tadattho pādakasamādhi tassa ādi vutto, tadāsannattā vipassanā, tassa mūlekadesattā maggo.
১০৮. উচ্ছঙ্গো ৰিয উচ্ছঙ্গপঞ্ঞো পুগ্গলো দট্ঠব্বোতি উচ্ছঙ্গসদিসপঞ্ঞতায এৰ পঞ্ঞা ৰিয পুগ্গলোপি উচ্ছঙ্গো ৰিয হোতি, তস্মিং ধম্মানং অচিরট্ঠানতোতি অধিপ্পাযেন ৰুত্তং। ৰক্খতি হি ‘‘উচ্ছঙ্গসদিসপঞ্ঞোতিঅত্থো’’তি।
108. Ucchaṅgo viya ucchaṅgapañño puggalo daṭṭhabboti ucchaṅgasadisapaññatāya eva paññā viya puggalopi ucchaṅgo viya hoti, tasmiṃ dhammānaṃ aciraṭṭhānatoti adhippāyena vuttaṃ. Vakkhati hi ‘‘ucchaṅgasadisapaññotiattho’’ti.
১০৯. যথা চ উচ্ছঙ্গসদিসা পঞ্ঞা, এৰং নিক্কুজ্জকুম্ভসদিসা পঞ্ঞা এৰাতি দট্ঠব্বো, তত্থ ধম্মানং অনৰট্ঠানতো।
109. Yathā ca ucchaṅgasadisā paññā, evaṃ nikkujjakumbhasadisā paññā evāti daṭṭhabbo, tattha dhammānaṃ anavaṭṭhānato.
১১৩. চিরট্ঠানতো থিরট্ঠানতো চ পাসাণলেখসদিসা পরাপরাধনিব্বত্তা কোধলেখা যস্স সো পাসাণলেখূপমসমন্নাগতো পাসাণলেখূপমোতি ৰুত্তো, এৰং ইতরেপি।
113. Ciraṭṭhānato thiraṭṭhānato ca pāsāṇalekhasadisā parāparādhanibbattā kodhalekhā yassa so pāsāṇalekhūpamasamannāgato pāsāṇalekhūpamoti vutto, evaṃ itarepi.
১১৮. সুতাদিৰত্থুরহিতো তুচ্ছমানো নল়ো ৰিযাতি ‘‘নল়ো’’তি ৰুচ্চতি, সো উগ্গতো নল়ো এতস্সাতি উন্নল়ো।
118. Sutādivatthurahito tucchamāno naḷo viyāti ‘‘naḷo’’ti vuccati, so uggato naḷo etassāti unnaḷo.
১২২. ‘‘সীলকথা চ নো ভৰিস্সতী’’তি এত্থ ৰুত্তং সীলকথাভৰনং পঠমারম্ভোপি দুস্সীলেন সহ ন হোতীতি দস্সেন্তো আহ নেৰ সীলকথা হোতী’’তি।
122. ‘‘Sīlakathā ca no bhavissatī’’ti ettha vuttaṃ sīlakathābhavanaṃ paṭhamārambhopi dussīlena saha na hotīti dassento āha neva sīlakathā hotī’’ti.
১২৩. তত্থ তত্থাতি তস্মিং তস্মিং অনুগ্গহেতব্বে পঞ্ঞায সোধেতব্বে চ ৰড্ঢেতব্বে চ অধিকসীলং নিস্সায উপ্পন্নপঞ্ঞায অনুগ্গণ্হাতি নামাতি অত্থো।
123. Tatthatatthāti tasmiṃ tasmiṃ anuggahetabbe paññāya sodhetabbe ca vaḍḍhetabbe ca adhikasīlaṃ nissāya uppannapaññāya anuggaṇhāti nāmāti attho.
১২৪. গূথকূপো ৰিয দুস্সীল্যন্তি এতেন দুস্সীল্যস্স গূথসদিসত্তমেৰ দস্সেতি।
124. Gūthakūpo viya dussīlyanti etena dussīlyassa gūthasadisattameva dasseti.
১৩০. নো চ সম্মা পঞ্ঞপেতুং সক্কোন্তীতি যেভুয্যেন ন সক্কোন্তীতি ইমমত্থং সন্ধায ৰুত্তং, উপ্পন্নে তথাগতে তস্মিং অনাদরিযং কত্ৰা সমাপত্তিং উপ্পাদেতুং ৰাযমন্তস্স অসমত্থভাৰং ৰা। তিত্থিযা ৰা পূরণাদযো অধিপ্পেতা।
130. No ca sammā paññapetuṃ sakkontīti yebhuyyena na sakkontīti imamatthaṃ sandhāya vuttaṃ, uppanne tathāgate tasmiṃ anādariyaṃ katvā samāpattiṃ uppādetuṃ vāyamantassa asamatthabhāvaṃ vā. Titthiyā vā pūraṇādayo adhippetā.
তিকনিদ্দেসৰণ্ণনা নিট্ঠিতা।
Tikaniddesavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পুগ্গলপঞ্ঞত্তিপাল়ি • Puggalapaññattipāḷi / ৩. তিকপুগ্গলপঞ্ঞত্তি • 3. Tikapuggalapaññatti
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৩. তিকনিদ্দেসৰণ্ণনা • 3. Tikaniddesavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৩. তিকনিদ্দেসৰণ্ণনা • 3. Tikaniddesavaṇṇanā
