| Library / Tipiṭaka / တိပိဋက • Tipiṭaka / ပဉ္စပကရဏ-အနုဋီကာ • Pañcapakaraṇa-anuṭīkā |
၃. တိကနိဒ္ဒေသဝဏ္ဏနာ
3. Tikaniddesavaṇṇanā
၉၁. သေသသံဝရဘေဒေနာတိ ကာယိကဝာစသိကဝီတိက္ကမတော သေသေန သံဝရဝိနာသေန။ သော ပန ဒ္ဝာရဝသေန ဝုစ္စမာနော မနောဒ္ဝာရိကော ဟောတီတိ အာဟ ‘‘မနောသံဝရဘေဒေနာ’’တိ။ ဣဒာနိ တံ ပကာရဘေဒေန ဒသ္သေန္တော ‘‘သတိသံဝရာဒိဘေဒေန ဝာ’’တိ အာဟ, မုဋ္ဌသစ္စာဒိပ္ပဝတ္တိယာတိ အတ္ထော။ ယံ ကိဉ္စိ သဘာဝဘူတံ စရိတမ္ပိ ‘‘သီလ’’န္တိ ဝုစ္စတီတိ အကုသလသ္သပိ သီလပရိယာယော ဝုတ္တော။
91. Sesasaṃvarabhedenāti kāyikavācasikavītikkamato sesena saṃvaravināsena. So pana dvāravasena vuccamāno manodvāriko hotīti āha ‘‘manosaṃvarabhedenā’’ti. Idāni taṃ pakārabhedena dassento ‘‘satisaṃvarādibhedena vā’’ti āha, muṭṭhasaccādippavattiyāti attho. Yaṃ kiñci sabhāvabhūtaṃ caritampi ‘‘sīla’’nti vuccatīti akusalassapi sīlapariyāyo vutto.
၉၄. သမာနဝိသယာနန္တိ ပဌမဖလာဒိကော သမာနော ဧဝရူပော ဝိသယော ဧတေသန္တိ သမာနဝိသယာ, တေသံ။
94. Samānavisayānanti paṭhamaphalādiko samāno evarūpo visayo etesanti samānavisayā, tesaṃ.
၁၀၇. တဒတ္ထော တပ္ပယောဇနော လောကုတ္တရသာဓကောတိ အတ္ထော။ တသ္သ ပရမတ္ထသာသနသ္သ။ မူလေကဒေသတ္တာတိ မူလဘာဝေန ဧကဒေသတ္တာ။
107. Tadattho tappayojano lokuttarasādhakoti attho. Tassa paramatthasāsanassa. Mūlekadesattāti mūlabhāvena ekadesattā.
၁၁၈. ဥန္နဠော ဥဂ္ဂတတုစ္ဆမာနော။
118. Unnaḷo uggatatucchamāno.
၁၂၃. သီလသ္သ အနုဂ္ဂဏ္ဟနံ အပရိသုဒ္ဓိယံ သောဓနံ အပာရိပူရိယံ ပူရဏဉ္စာတိ အာဟ ‘‘သောဓေတဗ္ဗေ စ ဝဍ္ဎေတဗ္ဗေ စာ’’တိ။ အဓိသီလံ နိသ္သာယာတိ အဓိသီလံ နိသ္သယံ ကတ္ဝာ ဥပ္ပန္နပညာယ။
123. Sīlassa anuggaṇhanaṃ aparisuddhiyaṃ sodhanaṃ apāripūriyaṃ pūraṇañcāti āha ‘‘sodhetabbe ca vaḍḍhetabbe cā’’ti. Adhisīlaṃ nissāyāti adhisīlaṃ nissayaṃ katvā uppannapaññāya.
၁၂၄. ဂူထသဒိသတ္တမေဝ ဒသ္သေတိ, န ဂူထကူပသဒိသတ္တန္တိ အဓိပ္ပာယော။ ဂူထဝသေနေဝ ဟိ ကူပသ္သပိ ဇိဂုစ္ဆနီယတာတိ။ အယဉ္စ အတ္ထော ဂူထရာသိယေဝ ဂူထကူပောတိ ဣမသ္မိံ ပက္ခေ နဝတ္တဗ္ဗော သိယာ။
124. Gūthasadisattameva dasseti, na gūthakūpasadisattanti adhippāyo. Gūthavaseneva hi kūpassapi jigucchanīyatāti. Ayañca attho gūtharāsiyeva gūthakūpoti imasmiṃ pakkhe navattabbo siyā.
၁၃၀. သရဘင္ဂသတ္ထာရာဒယော ရူပဘဝာဒိကာမာဒိပရိညံ ကတ္ဝာ ပညပေန္တော လောကိယံ ပရိညံ သမ္မဒေဝ ပညပေန္တီတိ အာဟ ‘‘ယေဘုယ္ယေန န သက္ကောန္တီ’’တိ။ အသမတ္ထဘာဝံ ဝာ သန္ဓာယ နော စ ပညာပေတုံ သက္ကောန္တီတိ ဝုတ္တန္တိ ယောဇနာ။
130. Sarabhaṅgasatthārādayo rūpabhavādikāmādipariññaṃ katvā paññapento lokiyaṃ pariññaṃ sammadeva paññapentīti āha ‘‘yebhuyyena na sakkontī’’ti. Asamatthabhāvaṃ vā sandhāya no ca paññāpetuṃ sakkontīti vuttanti yojanā.
တိကနိဒ္ဒေသဝဏ္ဏနာ နိဋ္ဌိတာ။
Tikaniddesavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ပုဂ္ဂလပညတ္တိပာဠိ • Puggalapaññattipāḷi / ၃. တိကပုဂ္ဂလပညတ္တိ • 3. Tikapuggalapaññatti
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၃. တိကနိဒ္ဒေသဝဏ္ဏနာ • 3. Tikaniddesavaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၃. တိကနိဒ္ဒေသဝဏ္ဏနာ • 3. Tikaniddesavaṇṇanā
