| Library / Tipiṭaka / তিপিটক • Tipiṭaka / ধম্মসঙ্গণীপাল়ি • Dhammasaṅgaṇīpāḷi |
৩. নিক্খেপকণ্ডং
3. Nikkhepakaṇḍaṃ
তিকনিক্খেপং
Tikanikkhepaṃ
৯৮৫. কতমে ধম্মা কুসলা? তীণি কুসলমূলানি – অলোভো, অদোসো, অমোহো; তংসম্পযুত্তো ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো; তংসমুট্ঠানং কাযকম্মং, ৰচীকম্মং, মনোকম্মং – ইমে ধম্মা কুসলা।
985. Katame dhammā kusalā? Tīṇi kusalamūlāni – alobho, adoso, amoho; taṃsampayutto vedanākkhandho, saññākkhandho, saṅkhārakkhandho, viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā kusalā.
৯৮৬. কতমে ধম্মা অকুসলা? তীণি অকুসলমূলানি – লোভো, দোসো, মোহো; তদেকট্ঠা চ কিলেসা; তংসম্পযুত্তো ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো; তংসমুট্ঠানং কাযকম্মং, ৰচীকম্মং, মনোকম্মং – ইমে ধম্মা অকুসলা।
986. Katame dhammā akusalā? Tīṇi akusalamūlāni – lobho, doso, moho; tadekaṭṭhā ca kilesā; taṃsampayutto vedanākkhandho, saññākkhandho, saṅkhārakkhandho, viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā akusalā.
৯৮৭. কতমে ধম্মা অব্যাকতা? কুসলাকুসলানং ধম্মানং ৰিপাকা কামাৰচরা, রূপাৰচরা, অরূপাৰচরা, অপরিযাপন্না; ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো; যে চ ধম্মা কিরিযা নেৰ কুসলা নাকুসলা ন চ কম্মৰিপাকা; সব্বঞ্চ রূপং, অসঙ্খতা চ ধাতু – ইমে ধম্মা অব্যাকতা।
987. Katame dhammā abyākatā? Kusalākusalānaṃ dhammānaṃ vipākā kāmāvacarā, rūpāvacarā, arūpāvacarā, apariyāpannā; vedanākkhandho, saññākkhandho, saṅkhārakkhandho, viññāṇakkhandho; ye ca dhammā kiriyā neva kusalā nākusalā na ca kammavipākā; sabbañca rūpaṃ, asaṅkhatā ca dhātu – ime dhammā abyākatā.
৯৮৮. কতমে ধম্মা সুখায ৰেদনায সম্পযুত্তা? সুখভূমিযং কামাৰচরে, রূপাৰচরে, অপরিযাপন্নে, সুখং ৰেদনং ঠপেত্ৰা; তংসম্পযুত্তো সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ধম্মা সুখায ৰেদনায সম্পযুত্তা।
988. Katame dhammā sukhāya vedanāya sampayuttā? Sukhabhūmiyaṃ kāmāvacare, rūpāvacare, apariyāpanne, sukhaṃ vedanaṃ ṭhapetvā; taṃsampayutto saññākkhandho, saṅkhārakkhandho, viññāṇakkhandho – ime dhammā sukhāya vedanāya sampayuttā.
৯৮৯. কতমে ধম্মা দুক্খায ৰেদনায সম্পযুত্তা? দুক্খভূমিযং কামাৰচরে, দুক্খং ৰেদনং ঠপেত্ৰা; তংসম্পযুত্তো সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ধম্মা দুক্খায ৰেদনায সম্পযুত্তা ।
989. Katame dhammā dukkhāya vedanāya sampayuttā? Dukkhabhūmiyaṃ kāmāvacare, dukkhaṃ vedanaṃ ṭhapetvā; taṃsampayutto saññākkhandho, saṅkhārakkhandho, viññāṇakkhandho – ime dhammā dukkhāya vedanāya sampayuttā .
৯৯০. কতমে ধম্মা অদুক্খমসুখায ৰেদনায সম্পযুত্তা? অদুক্খমসুখভূমিযং কামাৰচরে, রূপাৰচরে, অরূপাৰচরে, অপরিযাপন্নে, অদুক্খমসুখং ৰেদনং ঠপেত্ৰা; তংসম্পযুত্তো সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ধম্মা অদুক্খমসুখায ৰেদনায সম্পযুত্তা।
990. Katame dhammā adukkhamasukhāya vedanāya sampayuttā? Adukkhamasukhabhūmiyaṃ kāmāvacare, rūpāvacare, arūpāvacare, apariyāpanne, adukkhamasukhaṃ vedanaṃ ṭhapetvā; taṃsampayutto saññākkhandho, saṅkhārakkhandho, viññāṇakkhandho – ime dhammā adukkhamasukhāya vedanāya sampayuttā.
৯৯১. কতমে ধম্মা ৰিপাকা? কুসলাকুসলানং ধম্মানং ৰিপাকা কামাৰচরা, রূপাৰচরা, অরূপাৰচরা, অপরিযাপন্না; ৰেদনাক্খন্ধো…পে॰… ৰিঞ্ঞাণক্খন্ধো – ইমে ধম্মা ৰিপাকা।
991. Katame dhammā vipākā? Kusalākusalānaṃ dhammānaṃ vipākā kāmāvacarā, rūpāvacarā, arūpāvacarā, apariyāpannā; vedanākkhandho…pe… viññāṇakkhandho – ime dhammā vipākā.
৯৯২. কতমে ধম্মা ৰিপাকধম্মধম্মা? কুসলাকুসলা ধম্মা কামাৰচরা, রূপাৰচরা, অরূপাৰচরা, অপরিযাপন্না; ৰেদনাক্খন্ধো…পে॰… ৰিঞ্ঞাণক্খন্ধো – ইমে ধম্মা ৰিপাকধম্মধম্মা।
992. Katame dhammā vipākadhammadhammā? Kusalākusalā dhammā kāmāvacarā, rūpāvacarā, arūpāvacarā, apariyāpannā; vedanākkhandho…pe… viññāṇakkhandho – ime dhammā vipākadhammadhammā.
৯৯৩. কতমে ধম্মা নেৰৰিপাকনৰিপাকধম্মধম্মা? যে চ ধম্মা কিরিযা নেৰ কুসলা নাকুসলা ন চ কম্মৰিপাকা, সব্বঞ্চ রূপং, অসঙ্খতা চ ধাতু – ইমে ধম্মা নেৰৰিপাকনৰিপাকধম্মধম্মা।
993. Katame dhammā nevavipākanavipākadhammadhammā? Ye ca dhammā kiriyā neva kusalā nākusalā na ca kammavipākā, sabbañca rūpaṃ, asaṅkhatā ca dhātu – ime dhammā nevavipākanavipākadhammadhammā.
৯৯৪. কতমে ধম্মা উপাদিণ্ণুপাদানিযা? সাসৰা কুসলাকুসলানং ধম্মানং ৰিপাকা কামাৰচরা, রূপাৰচরা, অরূপাৰচরা; ৰেদনাক্খন্ধো…পে॰… ৰিঞ্ঞাণক্খন্ধো; যঞ্চ রূপং কম্মস্স কতত্তা – ইমে ধম্মা উপাদিণ্ণুপাদানিযা।
994. Katame dhammā upādiṇṇupādāniyā? Sāsavā kusalākusalānaṃ dhammānaṃ vipākā kāmāvacarā, rūpāvacarā, arūpāvacarā; vedanākkhandho…pe… viññāṇakkhandho; yañca rūpaṃ kammassa katattā – ime dhammā upādiṇṇupādāniyā.
৯৯৫. কতমে ধম্মা অনুপাদিণ্ণুপাদানিযা? সাসৰা কুসলাকুসলা ধম্মা কামাৰচরা, রূপাৰচরা, অরূপাৰচরা; ৰেদনাক্খন্ধো…পে॰… ৰিঞ্ঞাণক্খন্ধো; যে চ ধম্মা কিরিযা নেৰ কুসলা নাকুসলা ন চ কম্মৰিপাকা; যঞ্চ রূপং ন কম্মস্স কতত্তা – ইমে ধম্মা অনুপাদিণ্ণুপাদানিযা।
995. Katame dhammā anupādiṇṇupādāniyā? Sāsavā kusalākusalā dhammā kāmāvacarā, rūpāvacarā, arūpāvacarā; vedanākkhandho…pe… viññāṇakkhandho; ye ca dhammā kiriyā neva kusalā nākusalā na ca kammavipākā; yañca rūpaṃ na kammassa katattā – ime dhammā anupādiṇṇupādāniyā.
৯৯৬. কতমে ধম্মা অনুপাদিণ্ণঅনুপাদানিযা? অপরিযাপন্না মগ্গা চ, মগ্গফলানি চ, অসঙ্খতা চ ধাতু – ইমে ধম্মা অনুপাদিণ্ণঅনুপাদানিযা।
996. Katame dhammā anupādiṇṇaanupādāniyā? Apariyāpannā maggā ca, maggaphalāni ca, asaṅkhatā ca dhātu – ime dhammā anupādiṇṇaanupādāniyā.
৯৯৭. কতমে ধম্মা সংকিলিট্ঠসংকিলেসিকা? তীণি অকুসলমূলানি – লোভো, দোসো, মোহো; তদেকট্ঠা চ কিলেসা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো; তংসমুট্ঠানং কাযকম্মং, ৰচীকম্মং, মনোকম্মং – ইমে ধম্মা সংকিলিট্ঠসংকিলেসিকা।
997. Katame dhammā saṃkiliṭṭhasaṃkilesikā? Tīṇi akusalamūlāni – lobho, doso, moho; tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā saṃkiliṭṭhasaṃkilesikā.
৯৯৮. কতমে ধম্মা অসংকিলিট্ঠসংকিলেসিকা? সাসৰা কুসলাব্যাকতা ধম্মা কামাৰচরা, রূপাৰচরা, অরূপাৰচরা; রূপক্খন্ধো, ৰেদনাক্খন্ধো , সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ধম্মা অসংকিলিট্ঠসংকিলেসিকা।
998. Katame dhammā asaṃkiliṭṭhasaṃkilesikā? Sāsavā kusalābyākatā dhammā kāmāvacarā, rūpāvacarā, arūpāvacarā; rūpakkhandho, vedanākkhandho , saññākkhandho, saṅkhārakkhandho, viññāṇakkhandho – ime dhammā asaṃkiliṭṭhasaṃkilesikā.
৯৯৯. কতমে ধম্মা অসংকিলিট্ঠঅসংকিলেসিকা? অপরিযাপন্না মগ্গা চ, মগ্গফলানি চ, অসঙ্খতা চ ধাতু – ইমে ধম্মা অসংকিলিট্ঠঅসংকিলেসিকা।
999. Katame dhammā asaṃkiliṭṭhaasaṃkilesikā? Apariyāpannā maggā ca, maggaphalāni ca, asaṅkhatā ca dhātu – ime dhammā asaṃkiliṭṭhaasaṃkilesikā.
১০০০. কতমে ধম্মা সৰিতক্কসৰিচারা? সৰিতক্কসৰিচারভূমিযং কামাৰচরে, রূপাৰচরে, অপরিযাপন্নে , ৰিতক্কৰিচারে ঠপেত্ৰা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো – ইমে ধম্মা সৰিতক্কসৰিচারা।
1000. Katame dhammā savitakkasavicārā? Savitakkasavicārabhūmiyaṃ kāmāvacare, rūpāvacare, apariyāpanne , vitakkavicāre ṭhapetvā; taṃsampayutto vedanākkhandho…pe… viññāṇakkhandho – ime dhammā savitakkasavicārā.
১০০১. কতমে ধম্মা অৰিতক্কৰিচারমত্তা? অৰিতক্কৰিচারমত্তভূমিযং রূপাৰচরে, অপরিযাপন্নে, ৰিচারং ঠপেত্ৰা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো – ইমে ধম্মা অৰিতক্কৰিচারমত্তা।
1001. Katame dhammā avitakkavicāramattā? Avitakkavicāramattabhūmiyaṃ rūpāvacare, apariyāpanne, vicāraṃ ṭhapetvā; taṃsampayutto vedanākkhandho…pe… viññāṇakkhandho – ime dhammā avitakkavicāramattā.
১০০২. কতমে ধম্মা অৰিতক্কঅৰিচারা? অৰিতক্কঅৰিচারভূমিযং কামাৰচরে, রূপাৰচরে , অরূপাৰচরে, অপরিযাপন্নে; ৰেদনাক্খন্ধো…পে॰… ৰিঞ্ঞাণক্খন্ধো; সব্বঞ্চ রূপং, অসঙ্খতা চ ধাতু – ইমে ধম্মা অৰিতক্কঅৰিচারা।
1002. Katame dhammā avitakkaavicārā? Avitakkaavicārabhūmiyaṃ kāmāvacare, rūpāvacare , arūpāvacare, apariyāpanne; vedanākkhandho…pe… viññāṇakkhandho; sabbañca rūpaṃ, asaṅkhatā ca dhātu – ime dhammā avitakkaavicārā.
১০০৩. কতমে ধম্মা পীতিসহগতা? পীতিভূমিযং কামাৰচরে, রূপাৰচরে, অপরিযাপন্নে , পীতিং ঠপেত্ৰা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো – ইমে ধম্মা পীতিসহগতা।
1003. Katame dhammā pītisahagatā? Pītibhūmiyaṃ kāmāvacare, rūpāvacare, apariyāpanne , pītiṃ ṭhapetvā; taṃsampayutto vedanākkhandho…pe… viññāṇakkhandho – ime dhammā pītisahagatā.
১০০৪. কতমে ধম্মা সুখসহগতা? সুখভূমিযং কামাৰচরে, রূপাৰচরে, অপরিযাপন্নে, সুখং ঠপেত্ৰা; তংসম্পযুত্তো সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ধম্মা সুখসহগতা।
1004. Katame dhammā sukhasahagatā? Sukhabhūmiyaṃ kāmāvacare, rūpāvacare, apariyāpanne, sukhaṃ ṭhapetvā; taṃsampayutto saññākkhandho, saṅkhārakkhandho, viññāṇakkhandho – ime dhammā sukhasahagatā.
১০০৫. কতমে ধম্মা উপেক্খাসহগতা? উপেক্খাভূমিযং কামাৰচরে, রূপাৰচরে, অরূপাৰচরে, অপরিযাপন্নে, উপেক্খং ঠপেত্ৰা; তংসম্পযুত্তো সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ধম্মা উপেক্খাসহগতা।
1005. Katame dhammā upekkhāsahagatā? Upekkhābhūmiyaṃ kāmāvacare, rūpāvacare, arūpāvacare, apariyāpanne, upekkhaṃ ṭhapetvā; taṃsampayutto saññākkhandho, saṅkhārakkhandho, viññāṇakkhandho – ime dhammā upekkhāsahagatā.
১০০৬. কতমে ধম্মা দস্সনেন পহাতব্বা? তীণি সংযোজনানি – সক্কাযদিট্ঠি, ৰিচিকিচ্ছা, সীলব্বতপরামাসো।
1006. Katame dhammā dassanena pahātabbā? Tīṇi saṃyojanāni – sakkāyadiṭṭhi, vicikicchā, sīlabbataparāmāso.
১০০৭. তত্থ কতমা সক্কাযদিট্ঠি? ইধ অস্সুতৰা পুথুজ্জনো অরিযানং অদস্সাৰী অরিযধম্মস্স অকোৰিদো অরিযধম্মে অৰিনীতো সপ্পুরিসানং অদস্সাৰী সপ্পুরিসধম্মস্স অকোৰিদো সপ্পুরিসধম্মে অৰিনীতো রূপং অত্ততো সমনুপস্সতি, রূপৰন্তং ৰা অত্তানং, অত্তনি ৰা রূপং, রূপস্মিং ৰা অত্তানং। ৰেদনং অত্ততো সমনুপস্সতি, ৰেদনাৰন্তং ৰা অত্তানং, অত্তনি ৰা ৰেদনং, ৰেদনায ৰা অত্তানং। সঞ্ঞং অত্ততো সমনুপস্সতি, সঞ্ঞাৰন্তং ৰা অত্তানং, অত্তনি ৰা সঞ্ঞং, সঞ্ঞায ৰা অত্তানং। সঙ্খারে অত্ততো সমনুপস্সতি, সঙ্খারৰন্তং ৰা অত্তানং, অত্তনি ৰা সঙ্খারে, সঙ্খারেসু ৰা অত্তানং। ৰিঞ্ঞাণং অত্ততো সমনুপস্সতি, ৰিঞ্ঞাণৰন্তং ৰা অত্তানং, অত্তনি ৰা ৰিঞ্ঞাণং, ৰিঞ্ঞাণস্মিং ৰা অত্তানং। যা এৰরূপা দিট্ঠি দিট্ঠিগতং দিট্ঠিগহনং দিট্ঠিকন্তারো দিট্ঠিৰিসূকাযিকং 1 দিট্ঠিৰিপ্ফন্দিতং দিট্ঠিসংযোজনং গাহো পটিগ্গাহো অভিনিৰেসো পরামাসো কুম্মগ্গো মিচ্ছাপথো মিচ্ছত্তং তিত্থাযতনং ৰিপরিযাসগ্গাহো – অযং ৰুচ্চতি সক্কাযদিট্ঠি।
1007. Tattha katamā sakkāyadiṭṭhi? Idha assutavā puthujjano ariyānaṃ adassāvī ariyadhammassa akovido ariyadhamme avinīto sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati, rūpavantaṃ vā attānaṃ, attani vā rūpaṃ, rūpasmiṃ vā attānaṃ. Vedanaṃ attato samanupassati, vedanāvantaṃ vā attānaṃ, attani vā vedanaṃ, vedanāya vā attānaṃ. Saññaṃ attato samanupassati, saññāvantaṃ vā attānaṃ, attani vā saññaṃ, saññāya vā attānaṃ. Saṅkhāre attato samanupassati, saṅkhāravantaṃ vā attānaṃ, attani vā saṅkhāre, saṅkhāresu vā attānaṃ. Viññāṇaṃ attato samanupassati, viññāṇavantaṃ vā attānaṃ, attani vā viññāṇaṃ, viññāṇasmiṃ vā attānaṃ. Yā evarūpā diṭṭhi diṭṭhigataṃ diṭṭhigahanaṃ diṭṭhikantāro diṭṭhivisūkāyikaṃ 2 diṭṭhivipphanditaṃ diṭṭhisaṃyojanaṃ gāho paṭiggāho abhiniveso parāmāso kummaggo micchāpatho micchattaṃ titthāyatanaṃ vipariyāsaggāho – ayaṃ vuccati sakkāyadiṭṭhi.
১০০৮. তত্থ কতমা ৰিচিকিচ্ছা? সত্থরি কঙ্খতি ৰিচিকিচ্ছতি, ধম্মে কঙ্খতি ৰিচিকিচ্ছতি, সঙ্ঘে কঙ্খতি ৰিচিকিচ্ছতি, সিক্খায কঙ্খতি ৰিচিকিচ্ছতি, পুব্বন্তে কঙ্খতি ৰিচিকিচ্ছতি, অপরন্তে কঙ্খতি ৰিচিকিচ্ছতি, পুব্বন্তাপরন্তে কঙ্খতি ৰিচিকিচ্ছতি, ইদপ্পচ্চযতা পটিচ্চসমুপ্পন্নেসু ধম্মেসু কঙ্খতি ৰিচিকিচ্ছতি। যা এৰরূপা কঙ্খা কঙ্খাযনা কঙ্খাযিতত্তং ৰিমতি ৰিচিকিচ্ছা দ্ৰেল়্হকং দ্ৰেধাপথো সংসযো অনেকংসগ্গাহো আসপ্পনা পরিসপ্পনা অপরিযোগাহনা থম্ভিতত্তং চিত্তস্স মনোৰিলেখো – অযং ৰুচ্চতি ৰিচিকিচ্ছা।
1008. Tattha katamā vicikicchā? Satthari kaṅkhati vicikicchati, dhamme kaṅkhati vicikicchati, saṅghe kaṅkhati vicikicchati, sikkhāya kaṅkhati vicikicchati, pubbante kaṅkhati vicikicchati, aparante kaṅkhati vicikicchati, pubbantāparante kaṅkhati vicikicchati, idappaccayatā paṭiccasamuppannesu dhammesu kaṅkhati vicikicchati. Yā evarūpā kaṅkhā kaṅkhāyanā kaṅkhāyitattaṃ vimati vicikicchā dveḷhakaṃ dvedhāpatho saṃsayo anekaṃsaggāho āsappanā parisappanā apariyogāhanā thambhitattaṃ cittassa manovilekho – ayaṃ vuccati vicikicchā.
১০০৯. তত্থ কতমো সীলব্বতপরামাসো? ইতো বহিদ্ধা সমণব্রাহ্মণানং ‘সীলেন সুদ্ধি, ৰতেন সুদ্ধি, সীলব্বতেন সুদ্ধী’তি যা এৰরূপা দিট্ঠি দিট্ঠিগতং দিট্ঠিগহনং দিট্ঠিকন্তারো দিট্ঠিৰিসূকাযিকং দিট্ঠিৰিপ্ফন্দিতং দিট্ঠিসংযোজনং গাহো পটিগ্গাহো অভিনিৰেসো পরামাসো কুম্মগ্গো মিচ্ছাপথো মিচ্ছত্তং তিত্থাযতনং ৰিপরিযাসগ্গাহো – অযং ৰুচ্চতি সীলব্বতপরামাসো।
1009. Tattha katamo sīlabbataparāmāso? Ito bahiddhā samaṇabrāhmaṇānaṃ ‘sīlena suddhi, vatena suddhi, sīlabbatena suddhī’ti yā evarūpā diṭṭhi diṭṭhigataṃ diṭṭhigahanaṃ diṭṭhikantāro diṭṭhivisūkāyikaṃ diṭṭhivipphanditaṃ diṭṭhisaṃyojanaṃ gāho paṭiggāho abhiniveso parāmāso kummaggo micchāpatho micchattaṃ titthāyatanaṃ vipariyāsaggāho – ayaṃ vuccati sīlabbataparāmāso.
১০১০. ইমানি তীণি সংযোজনানি; তদেকট্ঠা চ কিলেসা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো; তংসমুট্ঠানং কাযকম্মং ৰচীকম্মং মনোকম্মং – ইমে ধম্মা দস্সনেন পহাতব্বা।
1010. Imāni tīṇi saṃyojanāni; tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ vacīkammaṃ manokammaṃ – ime dhammā dassanena pahātabbā.
১০১১. কতমে ধম্মা ভাৰনায পহাতব্বা? অৰসেসো লোভো, দোসো, মোহো; তদেকট্ঠা চ কিলেসা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো; তংসমুট্ঠানং কাযকম্মং, ৰচীকম্মং, মনোকম্মং – ইমে ধম্মা ভাৰনায পহাতব্বা।
1011. Katame dhammā bhāvanāya pahātabbā? Avaseso lobho, doso, moho; tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā bhāvanāya pahātabbā.
১০১২. কতমে ধম্মা নেৰ দস্সনেন ন ভাৰনায পহাতব্বা? কুসলাব্যাকতা ধম্মা কামাৰচরা, রূপাৰচরা, অরূপাৰচরা, অপরিযাপন্না; ৰেদনাক্খন্ধো…পে॰… ৰিঞ্ঞাণক্খন্ধো ; সব্বঞ্চ রূপং, অসঙ্খতা চ ধাতু – ইমে ধম্মা নেৰ দস্সনেন ন ভাৰনায পহাতব্বা।
1012. Katame dhammā neva dassanena na bhāvanāya pahātabbā? Kusalābyākatā dhammā kāmāvacarā, rūpāvacarā, arūpāvacarā, apariyāpannā; vedanākkhandho…pe… viññāṇakkhandho ; sabbañca rūpaṃ, asaṅkhatā ca dhātu – ime dhammā neva dassanena na bhāvanāya pahātabbā.
১০১৩. কতমে ধম্মা দস্সনেন পহাতব্বহেতুকা? তীণি সংযোজনানি – সক্কাযদিট্ঠি, ৰিচিকিচ্ছা, সীলব্বতপরামাসো।
1013. Katame dhammā dassanena pahātabbahetukā? Tīṇi saṃyojanāni – sakkāyadiṭṭhi, vicikicchā, sīlabbataparāmāso.
১০১৪. তত্থ কতমা সক্কাযদিট্ঠি…পে॰… অযং ৰুচ্চতি সক্কাযদিট্ঠি।
1014. Tattha katamā sakkāyadiṭṭhi…pe… ayaṃ vuccati sakkāyadiṭṭhi.
১০১৫. তত্থ কতমা ৰিচিকিচ্ছা…পে॰… অযং ৰুচ্চতি ৰিচিকিচ্ছা।
1015. Tattha katamā vicikicchā…pe… ayaṃ vuccati vicikicchā.
১০১৬. তত্থ কতমো সীলব্বতপরামাসো…পে॰… অযং ৰুচ্চতি সীলব্বতপরামাসো।
1016. Tattha katamo sīlabbataparāmāso…pe… ayaṃ vuccati sīlabbataparāmāso.
১০১৭. ইমানি তীণি সংযোজনানি; তদেকট্ঠা চ কিলেসা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো; তংসমুট্ঠানং কাযকম্মং, ৰচীকম্মং, মনোকম্মং – ইমে ধম্মা দস্সনেন পহাতব্বহেতুকা। তীণি সংযোজনানি – সক্কাযদিট্ঠি, ৰিচিকিচ্ছা, সীলব্বতপরামাসো – ইমে ধম্মা দস্সনেন পহাতব্বা। তদেকট্ঠো লোভো, দোসো, মোহো – ইমে ধম্মা দস্সনেন পহাতব্বহেতূ। তদেকট্ঠা চ কিলেসা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো; তংসমুট্ঠানং কাযকম্মং, ৰচীকম্মং, মনোকম্মং – ইমে ধম্মা দস্সনেন পহাতব্বহেতুকা।
1017. Imāni tīṇi saṃyojanāni; tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā dassanena pahātabbahetukā. Tīṇi saṃyojanāni – sakkāyadiṭṭhi, vicikicchā, sīlabbataparāmāso – ime dhammā dassanena pahātabbā. Tadekaṭṭho lobho, doso, moho – ime dhammā dassanena pahātabbahetū. Tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā dassanena pahātabbahetukā.
১০১৮. কতমে ধম্মা ভাৰনায পহাতব্বহেতুকা? অৰসেসো লোভো, দোসো, মোহো – ইমে ধম্মা ভাৰনায পহাতব্বহেতূ। তদেকট্ঠা চ কিলেসা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো; তংসমুট্ঠানং কাযকম্মং, ৰচীকম্মং, মনোকম্মং – ইমে ধম্মা ভাৰনায পহাতব্বহেতুকা।
1018. Katame dhammā bhāvanāya pahātabbahetukā? Avaseso lobho, doso, moho – ime dhammā bhāvanāya pahātabbahetū. Tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā bhāvanāya pahātabbahetukā.
১০১৯. কতমে ধম্মা নেৰ দস্সনেন ন ভাৰনায পহাতব্বহেতুকা? তে ধম্মে ঠপেত্ৰা অৰসেসা কুসলাকুসলাব্যাকতা ধম্মা কামাৰচরা রূপাৰচরা, অরূপাৰচরা, অপরিযাপন্না; ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো; সব্বঞ্চ রূপং, অসঙ্খতা চ ধাতু – ইমে ধম্মা নেৰ দস্সনেন ন ভাৰনায পহাতব্বহেতুকা।
1019. Katame dhammā neva dassanena na bhāvanāya pahātabbahetukā? Te dhamme ṭhapetvā avasesā kusalākusalābyākatā dhammā kāmāvacarā rūpāvacarā, arūpāvacarā, apariyāpannā; vedanākkhandho, saññākkhandho, saṅkhārakkhandho, viññāṇakkhandho; sabbañca rūpaṃ, asaṅkhatā ca dhātu – ime dhammā neva dassanena na bhāvanāya pahātabbahetukā.
১০২০. কতমে ধম্মা আচযগামিনো? সাসৰা কুসলাকুসলা ধম্মা কামাৰচরা, রূপাৰচরা, অরূপাৰচরা; ৰেদনাক্খন্ধো…পে॰… ৰিঞ্ঞাণক্খন্ধো – ইমে ধম্মা আচযগামিনো।
1020. Katame dhammā ācayagāmino? Sāsavā kusalākusalā dhammā kāmāvacarā, rūpāvacarā, arūpāvacarā; vedanākkhandho…pe… viññāṇakkhandho – ime dhammā ācayagāmino.
১০২১. কতমে ধম্মা অপচযগামিনো? চত্তারো মগ্গা অপরিযাপন্না – ইমে ধম্মা অপচযগামিনো।
1021. Katame dhammā apacayagāmino? Cattāro maggā apariyāpannā – ime dhammā apacayagāmino.
১০২২. কতমে ধম্মা নেৰ আচযগামি ন অপচযগামিনো? কুসলাকুসলানং ধম্মানং ৰিপাকা কামাৰচরা, রূপাৰচরা, অরূপাৰচরা, অপরিযাপন্না ; ৰেদনাক্খন্ধো…পে॰… ৰিঞ্ঞাণক্খন্ধো; যে চ ধম্মা কিরিযা নেৰ কুসলা নাকুসলা ন চ কম্মৰিপাকা; সব্বঞ্চ রূপং, অসঙ্খতা চ ধাতু – ইমে ধম্মা নেৰ আচযগামি ন অপচযগামিনো।
1022. Katame dhammā neva ācayagāmi na apacayagāmino? Kusalākusalānaṃ dhammānaṃ vipākā kāmāvacarā, rūpāvacarā, arūpāvacarā, apariyāpannā ; vedanākkhandho…pe… viññāṇakkhandho; ye ca dhammā kiriyā neva kusalā nākusalā na ca kammavipākā; sabbañca rūpaṃ, asaṅkhatā ca dhātu – ime dhammā neva ācayagāmi na apacayagāmino.
১০২৩. কতমে ধম্মা সেক্খা? চত্তারো মগ্গা অপরিযাপন্না, হেট্ঠিমানি চ তীণি সামঞ্ঞফলানি – ইমে ধম্মা সেক্খা।
1023. Katame dhammā sekkhā? Cattāro maggā apariyāpannā, heṭṭhimāni ca tīṇi sāmaññaphalāni – ime dhammā sekkhā.
১০২৪. কতমে ধম্মা অসেক্খা? উপরিট্ঠিমং 3 অরহত্তফলং – ইমে ধম্মা অসেক্খা।
1024. Katame dhammā asekkhā? Upariṭṭhimaṃ 4 arahattaphalaṃ – ime dhammā asekkhā.
১০২৫. কতমে ধম্মা নেৰসেক্খনাসেক্খা? তে ধম্মে ঠপেত্ৰা, অৰসেসা কুসলাকুসলাব্যাকতা ধম্মা কামাৰচরা, রূপাৰচরা, অরূপাৰচরা; ৰেদনাক্খন্ধো…পে॰… ৰিঞ্ঞাণক্খন্ধো; সব্বঞ্চ রূপং, অসঙ্খতা চ ধাতু – ইমে ধম্মা নেৰসেক্খনাসেক্খা।
1025. Katame dhammā nevasekkhanāsekkhā? Te dhamme ṭhapetvā, avasesā kusalākusalābyākatā dhammā kāmāvacarā, rūpāvacarā, arūpāvacarā; vedanākkhandho…pe… viññāṇakkhandho; sabbañca rūpaṃ, asaṅkhatā ca dhātu – ime dhammā nevasekkhanāsekkhā.
১০২৬. কতমে ধম্মা পরিত্তা? সব্বেৰ কামাৰচরা কুসলাকুসলাব্যাকতা ধম্মা; রূপক্খন্ধো…পে॰… ৰিঞ্ঞাণক্খন্ধো – ইমে ধম্মা পরিত্তা।
1026. Katame dhammā parittā? Sabbeva kāmāvacarā kusalākusalābyākatā dhammā; rūpakkhandho…pe… viññāṇakkhandho – ime dhammā parittā.
১০২৭. কতমে ধম্মা মহগ্গতা? রূপাৰচরা, অরূপাৰচরা, কুসলাব্যাকতা ধম্মা; ৰেদনাক্খন্ধো…পে॰… ৰিঞ্ঞাণক্খন্ধো – ইমে ধম্মা মহগ্গতা।
1027. Katame dhammā mahaggatā? Rūpāvacarā, arūpāvacarā, kusalābyākatā dhammā; vedanākkhandho…pe… viññāṇakkhandho – ime dhammā mahaggatā.
১০২৮. কতমে ধম্মা অপ্পমাণা? অপরিযাপন্না মগ্গা চ, মগ্গফলানি চ, অসঙ্খতা চ ধাতু – ইমে ধম্মা অপ্পমাণা।
1028. Katame dhammā appamāṇā? Apariyāpannā maggā ca, maggaphalāni ca, asaṅkhatā ca dhātu – ime dhammā appamāṇā.
১০২৯. কতমে ধম্মা পরিত্তারম্মণা? পরিত্তে ধম্মে আরব্ভ যে উপ্পজ্জন্তি চিত্তচেতসিকা ধম্মা – ইমে ধম্মা পরিত্তারম্মণা।
1029. Katame dhammā parittārammaṇā? Paritte dhamme ārabbha ye uppajjanti cittacetasikā dhammā – ime dhammā parittārammaṇā.
১০৩০. কতমে ধম্মা মহগ্গতারম্মণা? মহগ্গতে ধম্মে আরব্ভ যে উপ্পজ্জন্তি চিত্তচেতসিকা ধম্মা – ইমে ধম্মা মহগ্গতারম্মণা।
1030. Katame dhammā mahaggatārammaṇā? Mahaggate dhamme ārabbha ye uppajjanti cittacetasikā dhammā – ime dhammā mahaggatārammaṇā.
১০৩১. কতমে ধম্মা অপ্পমাণারম্মণা? অপ্পমাণে ধম্মে আরব্ভ যে উপ্পজ্জন্তি চিত্তচেতসিকা ধম্মা – ইমে ধম্মা অপ্পমাণারম্মণা।
1031. Katame dhammā appamāṇārammaṇā? Appamāṇe dhamme ārabbha ye uppajjanti cittacetasikā dhammā – ime dhammā appamāṇārammaṇā.
১০৩২. কতমে ধম্মা হীনা? তীণি অকুসলমূলানি – লোভো, দোসো, মোহো; তদেকট্ঠা চ কিলেসা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো; তংসমুট্ঠানং কাযকম্মং, ৰচীকম্মং, মনোকম্মং – ইমে ধম্মা হীনা।
1032. Katame dhammā hīnā? Tīṇi akusalamūlāni – lobho, doso, moho; tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā hīnā.
১০৩৩. কতমে ধম্মা মজ্ঝিমা? সাসৰা কুসলাব্যাকতা ধম্মা কামাৰচরা, রূপাৰচরা, অরূপাৰচরা, রূপক্খন্ধো…পে॰… ৰিঞ্ঞাণক্খন্ধো – ইমে ধম্মা মজ্ঝিমা।
1033. Katame dhammā majjhimā? Sāsavā kusalābyākatā dhammā kāmāvacarā, rūpāvacarā, arūpāvacarā, rūpakkhandho…pe… viññāṇakkhandho – ime dhammā majjhimā.
১০৩৪. কতমে ধম্মা পণীতা? অপরিযাপন্না মগ্গা চ, মগ্গফলানি চ, অসঙ্খতা চ ধাতু – ইমে ধম্মা পণীতা।
1034. Katame dhammā paṇītā? Apariyāpannā maggā ca, maggaphalāni ca, asaṅkhatā ca dhātu – ime dhammā paṇītā.
১০৩৫. কতমে ধম্মা মিচ্ছত্তনিযতা? পঞ্চ কম্মানি আনন্তরিকানি, যা চ মিচ্ছাদিট্ঠিনিযতা – ইমে ধম্মা মিচ্ছত্তনিযতা।
1035. Katame dhammā micchattaniyatā? Pañca kammāni ānantarikāni, yā ca micchādiṭṭhiniyatā – ime dhammā micchattaniyatā.
১০৩৬. কতমে ধম্মা সম্মত্তনিযতা? চত্তারো মগ্গা অপরিযাপন্না – ইমে ধম্মা সম্মত্তনিযতা।
1036. Katame dhammā sammattaniyatā? Cattāro maggā apariyāpannā – ime dhammā sammattaniyatā.
১০৩৭. কতমে ধম্মা অনিযতা? তে ধম্মে ঠপেত্ৰা, অৰসেসা কুসলাকুসলাব্যাকতা ধম্মা কামাৰচরা, রূপাৰচরা, অরূপাৰচরা, অপরিযাপন্না; ৰেদনাক্খন্ধো…পে॰… ৰিঞ্ঞাণক্খন্ধো; সব্বঞ্চ রূপং, অসঙ্খতা চ ধাতু – ইমে ধম্মা অনিযতা।
1037. Katame dhammā aniyatā? Te dhamme ṭhapetvā, avasesā kusalākusalābyākatā dhammā kāmāvacarā, rūpāvacarā, arūpāvacarā, apariyāpannā; vedanākkhandho…pe… viññāṇakkhandho; sabbañca rūpaṃ, asaṅkhatā ca dhātu – ime dhammā aniyatā.
১০৩৮. কতমে ধম্মা মগ্গারম্মণা? অরিযমগ্গং আরব্ভ যে উপ্পজ্জন্তি চিত্তচেতসিকা ধম্মা – ইমে ধম্মা মগ্গারম্মণা।
1038. Katame dhammā maggārammaṇā? Ariyamaggaṃ ārabbha ye uppajjanti cittacetasikā dhammā – ime dhammā maggārammaṇā.
১০৩৯. কতমে ধম্মা মগ্গহেতুকা? অরিযমগ্গসমঙ্গিস্স মগ্গঙ্গানি ঠপেত্ৰা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো – ইমে ধম্মা মগ্গহেতুকা। অরিযমগ্গসমঙ্গিস্স সম্মাদিট্ঠি মগ্গো চেৰ হেতু চ, সম্মাদিট্ঠিং ঠপেত্ৰা, তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো – ইমে ধম্মা মগ্গহেতুকা। অরিযমগ্গসমঙ্গিস্স অলোভো, অদোসো, অমোহো – ইমে ধম্মা মগ্গহেতূ। তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো – ইমে ধম্মা মগ্গহেতুকা।
1039. Katame dhammā maggahetukā? Ariyamaggasamaṅgissa maggaṅgāni ṭhapetvā; taṃsampayutto vedanākkhandho…pe… viññāṇakkhandho – ime dhammā maggahetukā. Ariyamaggasamaṅgissa sammādiṭṭhi maggo ceva hetu ca, sammādiṭṭhiṃ ṭhapetvā, taṃsampayutto vedanākkhandho…pe… viññāṇakkhandho – ime dhammā maggahetukā. Ariyamaggasamaṅgissa alobho, adoso, amoho – ime dhammā maggahetū. Taṃsampayutto vedanākkhandho…pe… viññāṇakkhandho – ime dhammā maggahetukā.
১০৪০. কতমে ধম্মা মগ্গাধিপতিনো? অরিযমগ্গং অধিপতিং করিত্ৰা যে উপ্পজ্জন্তি চিত্তচেতসিকা ধম্মা – ইমে ধম্মা মগ্গাধিপতিনো। অরিযমগ্গসমঙ্গিস্স ৰীমংসাধিপতেয্যং মগ্গং ভাৰযন্তস্স ৰীমংসং ঠপেত্ৰা; তংসম্পযুত্তো ৰেদনাক্খন্ধো…পে॰… ৰিঞ্ঞাণক্খন্ধো – ইমে ধম্মা মগ্গাধিপতিনো।
1040. Katame dhammā maggādhipatino? Ariyamaggaṃ adhipatiṃ karitvā ye uppajjanti cittacetasikā dhammā – ime dhammā maggādhipatino. Ariyamaggasamaṅgissa vīmaṃsādhipateyyaṃ maggaṃ bhāvayantassa vīmaṃsaṃ ṭhapetvā; taṃsampayutto vedanākkhandho…pe… viññāṇakkhandho – ime dhammā maggādhipatino.
১০৪১. কতমে ধম্মা উপ্পন্না? যে ধম্মা জাতা ভূতা সঞ্জাতা নিব্বত্তা অভিনিব্বত্তা পাতুভূতা উপ্পন্না সমুপ্পন্না উট্ঠিতা সমুট্ঠিতা উপ্পন্না উপ্পন্নংসেন সঙ্গহিতা, রূপং 5, ৰেদনা, সঞ্ঞা, সঙ্খারা, ৰিঞ্ঞাণং – ইমে ধম্মা উপ্পন্না।
1041. Katame dhammā uppannā? Ye dhammā jātā bhūtā sañjātā nibbattā abhinibbattā pātubhūtā uppannā samuppannā uṭṭhitā samuṭṭhitā uppannā uppannaṃsena saṅgahitā, rūpaṃ 6, vedanā, saññā, saṅkhārā, viññāṇaṃ – ime dhammā uppannā.
১০৪২. কতমে ধম্মা অনুপ্পন্না? যে ধম্মা অজাতা অভূতা অসঞ্জাতা অনিব্বত্তা অনভিনিব্বত্তা অপাতুভূতা অনুপ্পন্না অসমুপ্পন্না অনুট্ঠিতা অসমুট্ঠিতা অনুপ্পন্না অনুপ্পন্নংসেন সঙ্গহিতা, রূপং, ৰেদনা, সঞ্ঞা, সঙ্খারা, ৰিঞ্ঞাণং – ইমে ধম্মা অনুপ্পন্না।
1042. Katame dhammā anuppannā? Ye dhammā ajātā abhūtā asañjātā anibbattā anabhinibbattā apātubhūtā anuppannā asamuppannā anuṭṭhitā asamuṭṭhitā anuppannā anuppannaṃsena saṅgahitā, rūpaṃ, vedanā, saññā, saṅkhārā, viññāṇaṃ – ime dhammā anuppannā.
১০৪৩. কতমে ধম্মা উপ্পাদিনো? কুসলাকুসলানং ধম্মানং অৰিপক্কৰিপাকানং ৰিপাকা কামাৰচরা, রূপাৰচরা, অরূপাৰচরা, অপরিযাপন্না; ৰেদনাক্খন্ধো…পে॰… ৰিঞ্ঞাণক্খন্ধো; যঞ্চ রূপং কম্মস্স কতত্তা উপ্পজ্জিস্সতি – ইমে ধম্মা উপ্পাদিনো।
1043. Katame dhammā uppādino? Kusalākusalānaṃ dhammānaṃ avipakkavipākānaṃ vipākā kāmāvacarā, rūpāvacarā, arūpāvacarā, apariyāpannā; vedanākkhandho…pe… viññāṇakkhandho; yañca rūpaṃ kammassa katattā uppajjissati – ime dhammā uppādino.
১০৪৪. কতমে ধম্মা অতীতা? যে ধম্মা অতীতা নিরুদ্ধা ৰিগতা ৰিপরিণতা অত্থঙ্গতা অব্ভত্থঙ্গতা উপ্পজ্জিত্ৰা ৰিগতা অতীতা অতীতংসেন সঙ্গহিতা, রূপং, ৰেদনা, সঞ্ঞা, সঙ্খারা, ৰিঞ্ঞাণং – ইমে ধম্মা অতীতা।
1044. Katame dhammā atītā? Ye dhammā atītā niruddhā vigatā vipariṇatā atthaṅgatā abbhatthaṅgatā uppajjitvā vigatā atītā atītaṃsena saṅgahitā, rūpaṃ, vedanā, saññā, saṅkhārā, viññāṇaṃ – ime dhammā atītā.
১০৪৫. কতমে ধম্মা অনাগতা? যে ধম্মা অজাতা অভূতা অসঞ্জাতা অনিব্বত্তা অনভিনিব্বত্তা অপাতুভূতা অনুপ্পন্না অসমুপ্পন্না অনুট্ঠিতা অসমুট্ঠিতা অনাগতা অনাগতংসেন সঙ্গহিতা, রূপং, ৰেদনা, সঞ্ঞা, সঙ্খারা, ৰিঞ্ঞাণং – ইমে ধম্মা অনাগতা।
1045. Katame dhammā anāgatā? Ye dhammā ajātā abhūtā asañjātā anibbattā anabhinibbattā apātubhūtā anuppannā asamuppannā anuṭṭhitā asamuṭṭhitā anāgatā anāgataṃsena saṅgahitā, rūpaṃ, vedanā, saññā, saṅkhārā, viññāṇaṃ – ime dhammā anāgatā.
১০৪৬. কতমে ধম্মা পচ্চুপ্পন্না? যে ধম্মা জাতা ভূতা সঞ্জাতা নিব্বত্তা অভিনিব্বত্তা পাতুভূতা উপ্পন্না সমুপ্পন্না উট্ঠিতা সমুট্ঠিতা পচ্চুপ্পন্না পচ্চুপ্পন্নংসেন সঙ্গহিতা, রূপং, ৰেদনা, সঞ্ঞা, সঙ্খারা, ৰিঞ্ঞাণং – ইমে ধম্মা পচ্চুপ্পন্না।
1046. Katame dhammā paccuppannā? Ye dhammā jātā bhūtā sañjātā nibbattā abhinibbattā pātubhūtā uppannā samuppannā uṭṭhitā samuṭṭhitā paccuppannā paccuppannaṃsena saṅgahitā, rūpaṃ, vedanā, saññā, saṅkhārā, viññāṇaṃ – ime dhammā paccuppannā.
১০৪৭. কতমে ধম্মা অতীতারম্মণা? অতীতে ধম্মে আরব্ভ যে উপ্পজ্জন্তি চিত্তচেতসিকা ধম্মা – ইমে ধম্মা অতীতারম্মণা।
1047. Katame dhammā atītārammaṇā? Atīte dhamme ārabbha ye uppajjanti cittacetasikā dhammā – ime dhammā atītārammaṇā.
১০৪৮. কতমে ধম্মা অনাগতারম্মণা? অনাগতে ধম্মে আরব্ভ যে উপ্পজ্জন্তি চিত্তচেতসিকা ধম্মা – ইমে ধম্মা অনাগতারম্মণা।
1048. Katame dhammā anāgatārammaṇā? Anāgate dhamme ārabbha ye uppajjanti cittacetasikā dhammā – ime dhammā anāgatārammaṇā.
১০৪৯. কতমে ধম্মা পচ্চুপ্পন্নারম্মণা? পচ্চুপ্পন্নে ধম্মে আরব্ভ যে উপ্পজ্জন্তি চিত্তচেতসিকা ধম্মা – ইমে ধম্মা পচ্চুপ্পন্নারম্মণা।
1049. Katame dhammā paccuppannārammaṇā? Paccuppanne dhamme ārabbha ye uppajjanti cittacetasikā dhammā – ime dhammā paccuppannārammaṇā.
১০৫০. কতমে ধম্মা অজ্ঝত্তা? যে ধম্মা তেসং তেসং সত্তানং অজ্ঝত্তং পচ্চত্তং নিযতা পাটিপুগ্গলিকা উপাদিণ্ণা, রূপং, ৰেদনা, সঞ্ঞা, সঙ্খারা, ৰিঞ্ঞাণং – ইমে ধম্মা অজ্ঝত্তা।
1050. Katame dhammā ajjhattā? Ye dhammā tesaṃ tesaṃ sattānaṃ ajjhattaṃ paccattaṃ niyatā pāṭipuggalikā upādiṇṇā, rūpaṃ, vedanā, saññā, saṅkhārā, viññāṇaṃ – ime dhammā ajjhattā.
১০৫১. কতমে ধম্মা বহিদ্ধা? যে ধম্মা তেসং তেসং পরসত্তানং পরপুগ্গলানং অজ্ঝত্তং পচ্চত্তং নিযতা পাটিপুগ্গলিকা উপাদিণ্ণা, রূপং, ৰেদনা, সঞ্ঞা, সঙ্খারা, ৰিঞ্ঞাণং – ইমে ধম্মা বহিদ্ধা।
1051. Katame dhammā bahiddhā? Ye dhammā tesaṃ tesaṃ parasattānaṃ parapuggalānaṃ ajjhattaṃ paccattaṃ niyatā pāṭipuggalikā upādiṇṇā, rūpaṃ, vedanā, saññā, saṅkhārā, viññāṇaṃ – ime dhammā bahiddhā.
১০৫২. কতমে ধম্মা অজ্ঝত্তবহিদ্ধা? তদুভযং – ইমে ধম্মা অজ্ঝত্তবহিদ্ধা।
1052. Katame dhammā ajjhattabahiddhā? Tadubhayaṃ – ime dhammā ajjhattabahiddhā.
১০৫৩. কতমে ধম্মা অজ্ঝত্তারম্মণা? অজ্ঝত্তে ধম্মে আরব্ভ যে উপ্পজ্জন্তি চিত্তচেতসিকা ধম্মা – ইমে ধম্মা অজ্ঝত্তারম্মণা।
1053. Katame dhammā ajjhattārammaṇā? Ajjhatte dhamme ārabbha ye uppajjanti cittacetasikā dhammā – ime dhammā ajjhattārammaṇā.
১০৫৪. কতমে ধম্মা বহিদ্ধারম্মণা? বহিদ্ধা ধম্মে আরব্ভ যে উপ্পজ্জন্তি চিত্তচেতসিকা ধম্মা – ইমে ধম্মা বহিদ্ধারম্মণা।
1054. Katame dhammā bahiddhārammaṇā? Bahiddhā dhamme ārabbha ye uppajjanti cittacetasikā dhammā – ime dhammā bahiddhārammaṇā.
১০৫৫. কতমে ধম্মা অজ্ঝত্তবহিদ্ধারম্মণা? অজ্ঝত্তবহিদ্ধা ধম্মে আরব্ভ যে উপ্পজ্জন্তি চিত্তচেতসিকা ধম্মা – ইমে ধম্মা অজ্ঝত্তবহিদ্ধারম্মণা।
1055. Katame dhammā ajjhattabahiddhārammaṇā? Ajjhattabahiddhā dhamme ārabbha ye uppajjanti cittacetasikā dhammā – ime dhammā ajjhattabahiddhārammaṇā.
১০৫৬. কতমে ধম্মা সনিদস্সনসপ্পটিঘা? রূপাযতনং – ইমে ধম্মা সনিদস্সনসপ্পটিঘা।
1056. Katame dhammā sanidassanasappaṭighā? Rūpāyatanaṃ – ime dhammā sanidassanasappaṭighā.
১০৫৭. কতমে ধম্মা অনিদস্সনসপ্পটিঘা? চক্খাযতনং, সোতাযতনং, ঘানাযতনং, জিৰ্হাযতনং, কাযাযতনং, সদ্দাযতনং, গন্ধাযতনং , রসাযতনং, ফোট্ঠব্বাযতনং – ইমে ধম্মা অনিদস্সনসপ্পটিঘা।
1057. Katame dhammā anidassanasappaṭighā? Cakkhāyatanaṃ, sotāyatanaṃ, ghānāyatanaṃ, jivhāyatanaṃ, kāyāyatanaṃ, saddāyatanaṃ, gandhāyatanaṃ , rasāyatanaṃ, phoṭṭhabbāyatanaṃ – ime dhammā anidassanasappaṭighā.
১০৫৮. কতমে ধম্মা অনিদস্সনঅপ্পটিঘা? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো; যঞ্চ রূপং অনিদস্সনং অপ্পটিঘং ধম্মাযতনপরিযাপন্নং; অসঙ্খতা চ ধাতু – ইমে ধম্মা অনিদস্সনঅপ্পটিঘা।
1058. Katame dhammā anidassanaappaṭighā? Vedanākkhandho, saññākkhandho, saṅkhārakkhandho, viññāṇakkhandho; yañca rūpaṃ anidassanaṃ appaṭighaṃ dhammāyatanapariyāpannaṃ; asaṅkhatā ca dhātu – ime dhammā anidassanaappaṭighā.
তিকং।
Tikaṃ.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / ধম্মসঙ্গণি-অট্ঠকথা • Dhammasaṅgaṇi-aṭṭhakathā / তিকনিক্খেপকথা • Tikanikkhepakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-মূলটীকা • Dhammasaṅgaṇī-mūlaṭīkā / তিকনিক্খেপকথাৰণ্ণনা • Tikanikkhepakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-অনুটীকা • Dhammasaṅgaṇī-anuṭīkā / তিকনিক্খেপকথাৰণ্ণনা • Tikanikkhepakathāvaṇṇanā
