| Library / Tipiṭaka / တိပိဋက • Tipiṭaka / ဓမ္မသင္ဂဏီပာဠိ • Dhammasaṅgaṇīpāḷi |
၃. နိက္ခေပကဏ္ဍံ
3. Nikkhepakaṇḍaṃ
တိကနိက္ခေပံ
Tikanikkhepaṃ
၉၈၅. ကတမေ ဓမ္မာ ကုသလာ? တီဏိ ကုသလမူလာနိ – အလောဘော, အဒောသော, အမောဟော; တံသမ္ပယုတ္တော ဝေဒနာက္ခန္ဓော, သညာက္ခန္ဓော, သင္ခာရက္ခန္ဓော, ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ကုသလာ။
985. Katame dhammā kusalā? Tīṇi kusalamūlāni – alobho, adoso, amoho; taṃsampayutto vedanākkhandho, saññākkhandho, saṅkhārakkhandho, viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā kusalā.
၉၈၆. ကတမေ ဓမ္မာ အကုသလာ? တီဏိ အကုသလမူလာနိ – လောဘော, ဒောသော, မောဟော; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော, သညာက္ခန္ဓော, သင္ခာရက္ခန္ဓော, ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ အကုသလာ။
986. Katame dhammā akusalā? Tīṇi akusalamūlāni – lobho, doso, moho; tadekaṭṭhā ca kilesā; taṃsampayutto vedanākkhandho, saññākkhandho, saṅkhārakkhandho, viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā akusalā.
၉၈၇. ကတမေ ဓမ္မာ အဗ္ယာကတာ? ကုသလာကုသလာနံ ဓမ္မာနံ ဝိပာကာ ကာမာဝစရာ, ရူပာဝစရာ, အရူပာဝစရာ, အပရိယာပန္နာ; ဝေဒနာက္ခန္ဓော, သညာက္ခန္ဓော, သင္ခာရက္ခန္ဓော, ဝိညာဏက္ခန္ဓော; ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပာကာ; သဗ္ဗဉ္စ ရူပံ, အသင္ခတာ စ ဓာတု – ဣမေ ဓမ္မာ အဗ္ယာကတာ။
987. Katame dhammā abyākatā? Kusalākusalānaṃ dhammānaṃ vipākā kāmāvacarā, rūpāvacarā, arūpāvacarā, apariyāpannā; vedanākkhandho, saññākkhandho, saṅkhārakkhandho, viññāṇakkhandho; ye ca dhammā kiriyā neva kusalā nākusalā na ca kammavipākā; sabbañca rūpaṃ, asaṅkhatā ca dhātu – ime dhammā abyākatā.
၉၈၈. ကတမေ ဓမ္မာ သုခာယ ဝေဒနာယ သမ္ပယုတ္တာ? သုခဘူမိယံ ကာမာဝစရေ, ရူပာဝစရေ, အပရိယာပန္နေ, သုခံ ဝေဒနံ ဌပေတ္ဝာ; တံသမ္ပယုတ္တော သညာက္ခန္ဓော, သင္ခာရက္ခန္ဓော, ဝိညာဏက္ခန္ဓော – ဣမေ ဓမ္မာ သုခာယ ဝေဒနာယ သမ္ပယုတ္တာ။
988. Katame dhammā sukhāya vedanāya sampayuttā? Sukhabhūmiyaṃ kāmāvacare, rūpāvacare, apariyāpanne, sukhaṃ vedanaṃ ṭhapetvā; taṃsampayutto saññākkhandho, saṅkhārakkhandho, viññāṇakkhandho – ime dhammā sukhāya vedanāya sampayuttā.
၉၈၉. ကတမေ ဓမ္မာ ဒုက္ခာယ ဝေဒနာယ သမ္ပယုတ္တာ? ဒုက္ခဘူမိယံ ကာမာဝစရေ, ဒုက္ခံ ဝေဒနံ ဌပေတ္ဝာ; တံသမ္ပယုတ္တော သညာက္ခန္ဓော, သင္ခာရက္ခန္ဓော, ဝိညာဏက္ခန္ဓော – ဣမေ ဓမ္မာ ဒုက္ခာယ ဝေဒနာယ သမ္ပယုတ္တာ ။
989. Katame dhammā dukkhāya vedanāya sampayuttā? Dukkhabhūmiyaṃ kāmāvacare, dukkhaṃ vedanaṃ ṭhapetvā; taṃsampayutto saññākkhandho, saṅkhārakkhandho, viññāṇakkhandho – ime dhammā dukkhāya vedanāya sampayuttā .
၉၉၀. ကတမေ ဓမ္မာ အဒုက္ခမသုခာယ ဝေဒနာယ သမ္ပယုတ္တာ? အဒုက္ခမသုခဘူမိယံ ကာမာဝစရေ, ရူပာဝစရေ, အရူပာဝစရေ, အပရိယာပန္နေ, အဒုက္ခမသုခံ ဝေဒနံ ဌပေတ္ဝာ; တံသမ္ပယုတ္တော သညာက္ခန္ဓော, သင္ခာရက္ခန္ဓော, ဝိညာဏက္ခန္ဓော – ဣမေ ဓမ္မာ အဒုက္ခမသုခာယ ဝေဒနာယ သမ္ပယုတ္တာ။
990. Katame dhammā adukkhamasukhāya vedanāya sampayuttā? Adukkhamasukhabhūmiyaṃ kāmāvacare, rūpāvacare, arūpāvacare, apariyāpanne, adukkhamasukhaṃ vedanaṃ ṭhapetvā; taṃsampayutto saññākkhandho, saṅkhārakkhandho, viññāṇakkhandho – ime dhammā adukkhamasukhāya vedanāya sampayuttā.
၉၉၁. ကတမေ ဓမ္မာ ဝိပာကာ? ကုသလာကုသလာနံ ဓမ္မာနံ ဝိပာကာ ကာမာဝစရာ, ရူပာဝစရာ, အရူပာဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဝိပာကာ။
991. Katame dhammā vipākā? Kusalākusalānaṃ dhammānaṃ vipākā kāmāvacarā, rūpāvacarā, arūpāvacarā, apariyāpannā; vedanākkhandho…pe… viññāṇakkhandho – ime dhammā vipākā.
၉၉၂. ကတမေ ဓမ္မာ ဝိပာကဓမ္မဓမ္မာ? ကုသလာကုသလာ ဓမ္မာ ကာမာဝစရာ, ရူပာဝစရာ, အရူပာဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ဝိပာကဓမ္မဓမ္မာ။
992. Katame dhammā vipākadhammadhammā? Kusalākusalā dhammā kāmāvacarā, rūpāvacarā, arūpāvacarā, apariyāpannā; vedanākkhandho…pe… viññāṇakkhandho – ime dhammā vipākadhammadhammā.
၉၉၃. ကတမေ ဓမ္မာ နေဝဝိပာကနဝိပာကဓမ္မဓမ္မာ? ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပာကာ, သဗ္ဗဉ္စ ရူပံ, အသင္ခတာ စ ဓာတု – ဣမေ ဓမ္မာ နေဝဝိပာကနဝိပာကဓမ္မဓမ္မာ။
993. Katame dhammā nevavipākanavipākadhammadhammā? Ye ca dhammā kiriyā neva kusalā nākusalā na ca kammavipākā, sabbañca rūpaṃ, asaṅkhatā ca dhātu – ime dhammā nevavipākanavipākadhammadhammā.
၉၉၄. ကတမေ ဓမ္မာ ဥပာဒိဏ္ဏုပာဒာနိယာ? သာသဝာ ကုသလာကုသလာနံ ဓမ္မာနံ ဝိပာကာ ကာမာဝစရာ, ရူပာဝစရာ, အရူပာဝစရာ; ဝေဒနာက္ခန္ဓော။ပေ.။ ဝိညာဏက္ခန္ဓော; ယဉ္စ ရူပံ ကမ္မသ္သ ကတတ္တာ – ဣမေ ဓမ္မာ ဥပာဒိဏ္ဏုပာဒာနိယာ။
994. Katame dhammā upādiṇṇupādāniyā? Sāsavā kusalākusalānaṃ dhammānaṃ vipākā kāmāvacarā, rūpāvacarā, arūpāvacarā; vedanākkhandho…pe… viññāṇakkhandho; yañca rūpaṃ kammassa katattā – ime dhammā upādiṇṇupādāniyā.
၉၉၅. ကတမေ ဓမ္မာ အနုပာဒိဏ္ဏုပာဒာနိယာ? သာသဝာ ကုသလာကုသလာ ဓမ္မာ ကာမာဝစရာ, ရူပာဝစရာ, အရူပာဝစရာ; ဝေဒနာက္ခန္ဓော။ပေ.။ ဝိညာဏက္ခန္ဓော; ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပာကာ; ယဉ္စ ရူပံ န ကမ္မသ္သ ကတတ္တာ – ဣမေ ဓမ္မာ အနုပာဒိဏ္ဏုပာဒာနိယာ။
995. Katame dhammā anupādiṇṇupādāniyā? Sāsavā kusalākusalā dhammā kāmāvacarā, rūpāvacarā, arūpāvacarā; vedanākkhandho…pe… viññāṇakkhandho; ye ca dhammā kiriyā neva kusalā nākusalā na ca kammavipākā; yañca rūpaṃ na kammassa katattā – ime dhammā anupādiṇṇupādāniyā.
၉၉၆. ကတမေ ဓမ္မာ အနုပာဒိဏ္ဏအနုပာဒာနိယာ? အပရိယာပန္နာ မဂ္ဂာ စ, မဂ္ဂဖလာနိ စ, အသင္ခတာ စ ဓာတု – ဣမေ ဓမ္မာ အနုပာဒိဏ္ဏအနုပာဒာနိယာ။
996. Katame dhammā anupādiṇṇaanupādāniyā? Apariyāpannā maggā ca, maggaphalāni ca, asaṅkhatā ca dhātu – ime dhammā anupādiṇṇaanupādāniyā.
၉၉၇. ကတမေ ဓမ္မာ သံကိလိဋ္ဌသံကိလေသိကာ? တီဏိ အကုသလမူလာနိ – လောဘော, ဒောသော, မောဟော; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ သံကိလိဋ္ဌသံကိလေသိကာ။
997. Katame dhammā saṃkiliṭṭhasaṃkilesikā? Tīṇi akusalamūlāni – lobho, doso, moho; tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā saṃkiliṭṭhasaṃkilesikā.
၉၉၈. ကတမေ ဓမ္မာ အသံကိလိဋ္ဌသံကိလေသိကာ? သာသဝာ ကုသလာဗ္ယာကတာ ဓမ္မာ ကာမာဝစရာ, ရူပာဝစရာ, အရူပာဝစရာ; ရူပက္ခန္ဓော, ဝေဒနာက္ခန္ဓော , သညာက္ခန္ဓော, သင္ခာရက္ခန္ဓော, ဝိညာဏက္ခန္ဓော – ဣမေ ဓမ္မာ အသံကိလိဋ္ဌသံကိလေသိကာ။
998. Katame dhammā asaṃkiliṭṭhasaṃkilesikā? Sāsavā kusalābyākatā dhammā kāmāvacarā, rūpāvacarā, arūpāvacarā; rūpakkhandho, vedanākkhandho , saññākkhandho, saṅkhārakkhandho, viññāṇakkhandho – ime dhammā asaṃkiliṭṭhasaṃkilesikā.
၉၉၉. ကတမေ ဓမ္မာ အသံကိလိဋ္ဌအသံကိလေသိကာ? အပရိယာပန္နာ မဂ္ဂာ စ, မဂ္ဂဖလာနိ စ, အသင္ခတာ စ ဓာတု – ဣမေ ဓမ္မာ အသံကိလိဋ္ဌအသံကိလေသိကာ။
999. Katame dhammā asaṃkiliṭṭhaasaṃkilesikā? Apariyāpannā maggā ca, maggaphalāni ca, asaṅkhatā ca dhātu – ime dhammā asaṃkiliṭṭhaasaṃkilesikā.
၁၀၀၀. ကတမေ ဓမ္မာ သဝိတက္ကသဝိစာရာ? သဝိတက္ကသဝိစာရဘူမိယံ ကာမာဝစရေ, ရူပာဝစရေ, အပရိယာပန္နေ , ဝိတက္ကဝိစာရေ ဌပေတ္ဝာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ သဝိတက္ကသဝိစာရာ။
1000. Katame dhammā savitakkasavicārā? Savitakkasavicārabhūmiyaṃ kāmāvacare, rūpāvacare, apariyāpanne , vitakkavicāre ṭhapetvā; taṃsampayutto vedanākkhandho…pe… viññāṇakkhandho – ime dhammā savitakkasavicārā.
၁၀၀၁. ကတမေ ဓမ္မာ အဝိတက္ကဝိစာရမတ္တာ? အဝိတက္ကဝိစာရမတ္တဘူမိယံ ရူပာဝစရေ, အပရိယာပန္နေ, ဝိစာရံ ဌပေတ္ဝာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ အဝိတက္ကဝိစာရမတ္တာ။
1001. Katame dhammā avitakkavicāramattā? Avitakkavicāramattabhūmiyaṃ rūpāvacare, apariyāpanne, vicāraṃ ṭhapetvā; taṃsampayutto vedanākkhandho…pe… viññāṇakkhandho – ime dhammā avitakkavicāramattā.
၁၀၀၂. ကတမေ ဓမ္မာ အဝိတက္ကအဝိစာရာ? အဝိတက္ကအဝိစာရဘူမိယံ ကာမာဝစရေ, ရူပာဝစရေ , အရူပာဝစရေ, အပရိယာပန္နေ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင္ခတာ စ ဓာတု – ဣမေ ဓမ္မာ အဝိတက္ကအဝိစာရာ။
1002. Katame dhammā avitakkaavicārā? Avitakkaavicārabhūmiyaṃ kāmāvacare, rūpāvacare , arūpāvacare, apariyāpanne; vedanākkhandho…pe… viññāṇakkhandho; sabbañca rūpaṃ, asaṅkhatā ca dhātu – ime dhammā avitakkaavicārā.
၁၀၀၃. ကတမေ ဓမ္မာ ပီတိသဟဂတာ? ပီတိဘူမိယံ ကာမာဝစရေ, ရူပာဝစရေ, အပရိယာပန္နေ , ပီတိံ ဌပေတ္ဝာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ပီတိသဟဂတာ။
1003. Katame dhammā pītisahagatā? Pītibhūmiyaṃ kāmāvacare, rūpāvacare, apariyāpanne , pītiṃ ṭhapetvā; taṃsampayutto vedanākkhandho…pe… viññāṇakkhandho – ime dhammā pītisahagatā.
၁၀၀၄. ကတမေ ဓမ္မာ သုခသဟဂတာ? သုခဘူမိယံ ကာမာဝစရေ, ရူပာဝစရေ, အပရိယာပန္နေ, သုခံ ဌပေတ္ဝာ; တံသမ္ပယုတ္တော သညာက္ခန္ဓော, သင္ခာရက္ခန္ဓော, ဝိညာဏက္ခန္ဓော – ဣမေ ဓမ္မာ သုခသဟဂတာ။
1004. Katame dhammā sukhasahagatā? Sukhabhūmiyaṃ kāmāvacare, rūpāvacare, apariyāpanne, sukhaṃ ṭhapetvā; taṃsampayutto saññākkhandho, saṅkhārakkhandho, viññāṇakkhandho – ime dhammā sukhasahagatā.
၁၀၀၅. ကတမေ ဓမ္မာ ဥပေက္ခာသဟဂတာ? ဥပေက္ခာဘူမိယံ ကာမာဝစရေ, ရူပာဝစရေ, အရူပာဝစရေ, အပရိယာပန္နေ, ဥပေက္ခံ ဌပေတ္ဝာ; တံသမ္ပယုတ္တော သညာက္ခန္ဓော, သင္ခာရက္ခန္ဓော, ဝိညာဏက္ခန္ဓော – ဣမေ ဓမ္မာ ဥပေက္ခာသဟဂတာ။
1005. Katame dhammā upekkhāsahagatā? Upekkhābhūmiyaṃ kāmāvacare, rūpāvacare, arūpāvacare, apariyāpanne, upekkhaṃ ṭhapetvā; taṃsampayutto saññākkhandho, saṅkhārakkhandho, viññāṇakkhandho – ime dhammā upekkhāsahagatā.
၁၀၀၆. ကတမေ ဓမ္မာ ဒသ္သနေန ပဟာတဗ္ဗာ? တီဏိ သံယောဇနာနိ – သက္ကာယဒိဋ္ဌိ, ဝိစိကိစ္ဆာ, သီလဗ္ဗတပရာမာသော။
1006. Katame dhammā dassanena pahātabbā? Tīṇi saṃyojanāni – sakkāyadiṭṭhi, vicikicchā, sīlabbataparāmāso.
၁၀၀၇. တတ္ထ ကတမာ သက္ကာယဒိဋ္ဌိ? ဣဓ အသ္သုတဝာ ပုထုဇ္ဇနော အရိယာနံ အဒသ္သာဝီ အရိယဓမ္မသ္သ အကောဝိဒော အရိယဓမ္မေ အဝိနီတော သပ္ပုရိသာနံ အဒသ္သာဝီ သပ္ပုရိသဓမ္မသ္သ အကောဝိဒော သပ္ပုရိသဓမ္မေ အဝိနီတော ရူပံ အတ္တတော သမနုပသ္သတိ, ရူပဝန္တံ ဝာ အတ္တာနံ, အတ္တနိ ဝာ ရူပံ, ရူပသ္မိံ ဝာ အတ္တာနံ။ ဝေဒနံ အတ္တတော သမနုပသ္သတိ, ဝေဒနာဝန္တံ ဝာ အတ္တာနံ, အတ္တနိ ဝာ ဝေဒနံ, ဝေဒနာယ ဝာ အတ္တာနံ။ သညံ အတ္တတော သမနုပသ္သတိ, သညာဝန္တံ ဝာ အတ္တာနံ, အတ္တနိ ဝာ သညံ, သညာယ ဝာ အတ္တာနံ။ သင္ခာရေ အတ္တတော သမနုပသ္သတိ, သင္ခာရဝန္တံ ဝာ အတ္တာနံ, အတ္တနိ ဝာ သင္ခာရေ, သင္ခာရေသု ဝာ အတ္တာနံ။ ဝိညာဏံ အတ္တတော သမနုပသ္သတိ, ဝိညာဏဝန္တံ ဝာ အတ္တာနံ, အတ္တနိ ဝာ ဝိညာဏံ, ဝိညာဏသ္မိံ ဝာ အတ္တာနံ။ ယာ ဧဝရူပာ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ 1 ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂာဟော ပဋိဂ္ဂာဟော အဘိနိဝေသော ပရာမာသော ကုမ္မဂ္ဂော မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂာဟော – အယံ ဝုစ္စတိ သက္ကာယဒိဋ္ဌိ။
1007. Tattha katamā sakkāyadiṭṭhi? Idha assutavā puthujjano ariyānaṃ adassāvī ariyadhammassa akovido ariyadhamme avinīto sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati, rūpavantaṃ vā attānaṃ, attani vā rūpaṃ, rūpasmiṃ vā attānaṃ. Vedanaṃ attato samanupassati, vedanāvantaṃ vā attānaṃ, attani vā vedanaṃ, vedanāya vā attānaṃ. Saññaṃ attato samanupassati, saññāvantaṃ vā attānaṃ, attani vā saññaṃ, saññāya vā attānaṃ. Saṅkhāre attato samanupassati, saṅkhāravantaṃ vā attānaṃ, attani vā saṅkhāre, saṅkhāresu vā attānaṃ. Viññāṇaṃ attato samanupassati, viññāṇavantaṃ vā attānaṃ, attani vā viññāṇaṃ, viññāṇasmiṃ vā attānaṃ. Yā evarūpā diṭṭhi diṭṭhigataṃ diṭṭhigahanaṃ diṭṭhikantāro diṭṭhivisūkāyikaṃ 2 diṭṭhivipphanditaṃ diṭṭhisaṃyojanaṃ gāho paṭiggāho abhiniveso parāmāso kummaggo micchāpatho micchattaṃ titthāyatanaṃ vipariyāsaggāho – ayaṃ vuccati sakkāyadiṭṭhi.
၁၀၀၈. တတ္ထ ကတမာ ဝိစိကိစ္ဆာ? သတ္ထရိ ကင္ခတိ ဝိစိကိစ္ဆတိ, ဓမ္မေ ကင္ခတိ ဝိစိကိစ္ဆတိ, သင္ဃေ ကင္ခတိ ဝိစိကိစ္ဆတိ, သိက္ခာယ ကင္ခတိ ဝိစိကိစ္ဆတိ, ပုဗ္ဗန္တေ ကင္ခတိ ဝိစိကိစ္ဆတိ, အပရန္တေ ကင္ခတိ ဝိစိကိစ္ဆတိ, ပုဗ္ဗန္တာပရန္တေ ကင္ခတိ ဝိစိကိစ္ဆတိ, ဣဒပ္ပစ္စယတာ ပဋိစ္စသမုပ္ပန္နေသု ဓမ္မေသု ကင္ခတိ ဝိစိကိစ္ဆတိ။ ယာ ဧဝရူပာ ကင္ခာ ကင္ခာယနာ ကင္ခာယိတတ္တံ ဝိမတိ ဝိစိကိစ္ဆာ ဒ္ဝေဠ္ဟကံ ဒ္ဝေဓာပထော သံသယော အနေကံသဂ္ဂာဟော အာသပ္ပနာ ပရိသပ္ပနာ အပရိယောဂာဟနာ ထမ္ဘိတတ္တံ စိတ္တသ္သ မနောဝိလေခော – အယံ ဝုစ္စတိ ဝိစိကိစ္ဆာ။
1008. Tattha katamā vicikicchā? Satthari kaṅkhati vicikicchati, dhamme kaṅkhati vicikicchati, saṅghe kaṅkhati vicikicchati, sikkhāya kaṅkhati vicikicchati, pubbante kaṅkhati vicikicchati, aparante kaṅkhati vicikicchati, pubbantāparante kaṅkhati vicikicchati, idappaccayatā paṭiccasamuppannesu dhammesu kaṅkhati vicikicchati. Yā evarūpā kaṅkhā kaṅkhāyanā kaṅkhāyitattaṃ vimati vicikicchā dveḷhakaṃ dvedhāpatho saṃsayo anekaṃsaggāho āsappanā parisappanā apariyogāhanā thambhitattaṃ cittassa manovilekho – ayaṃ vuccati vicikicchā.
၁၀၀၉. တတ္ထ ကတမော သီလဗ္ဗတပရာမာသော? ဣတော ဗဟိဒ္ဓာ သမဏဗ္ရာဟ္မဏာနံ ‘သီလေန သုဒ္ဓိ, ဝတေန သုဒ္ဓိ, သီလဗ္ဗတေန သုဒ္ဓီ’တိ ယာ ဧဝရူပာ ဒိဋ္ဌိ ဒိဋ္ဌိဂတံ ဒိဋ္ဌိဂဟနံ ဒိဋ္ဌိကန္တာရော ဒိဋ္ဌိဝိသူကာယိကံ ဒိဋ္ဌိဝိပ္ဖန္ဒိတံ ဒိဋ္ဌိသံယောဇနံ ဂာဟော ပဋိဂ္ဂာဟော အဘိနိဝေသော ပရာမာသော ကုမ္မဂ္ဂော မိစ္ဆာပထော မိစ္ဆတ္တံ တိတ္ထာယတနံ ဝိပရိယာသဂ္ဂာဟော – အယံ ဝုစ္စတိ သီလဗ္ဗတပရာမာသော။
1009. Tattha katamo sīlabbataparāmāso? Ito bahiddhā samaṇabrāhmaṇānaṃ ‘sīlena suddhi, vatena suddhi, sīlabbatena suddhī’ti yā evarūpā diṭṭhi diṭṭhigataṃ diṭṭhigahanaṃ diṭṭhikantāro diṭṭhivisūkāyikaṃ diṭṭhivipphanditaṃ diṭṭhisaṃyojanaṃ gāho paṭiggāho abhiniveso parāmāso kummaggo micchāpatho micchattaṃ titthāyatanaṃ vipariyāsaggāho – ayaṃ vuccati sīlabbataparāmāso.
၁၀၁၀. ဣမာနိ တီဏိ သံယောဇနာနိ; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ ဝစီကမ္မံ မနောကမ္မံ – ဣမေ ဓမ္မာ ဒသ္သနေန ပဟာတဗ္ဗာ။
1010. Imāni tīṇi saṃyojanāni; tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ vacīkammaṃ manokammaṃ – ime dhammā dassanena pahātabbā.
၁၀၁၁. ကတမေ ဓမ္မာ ဘာဝနာယ ပဟာတဗ္ဗာ? အဝသေသော လောဘော, ဒောသော, မောဟော; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဘာဝနာယ ပဟာတဗ္ဗာ။
1011. Katame dhammā bhāvanāya pahātabbā? Avaseso lobho, doso, moho; tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā bhāvanāya pahātabbā.
၁၀၁၂. ကတမေ ဓမ္မာ နေဝ ဒသ္သနေန န ဘာဝနာယ ပဟာတဗ္ဗာ? ကုသလာဗ္ယာကတာ ဓမ္မာ ကာမာဝစရာ, ရူပာဝစရာ, အရူပာဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော ; သဗ္ဗဉ္စ ရူပံ, အသင္ခတာ စ ဓာတု – ဣမေ ဓမ္မာ နေဝ ဒသ္သနေန န ဘာဝနာယ ပဟာတဗ္ဗာ။
1012. Katame dhammā neva dassanena na bhāvanāya pahātabbā? Kusalābyākatā dhammā kāmāvacarā, rūpāvacarā, arūpāvacarā, apariyāpannā; vedanākkhandho…pe… viññāṇakkhandho ; sabbañca rūpaṃ, asaṅkhatā ca dhātu – ime dhammā neva dassanena na bhāvanāya pahātabbā.
၁၀၁၃. ကတမေ ဓမ္မာ ဒသ္သနေန ပဟာတဗ္ဗဟေတုကာ? တီဏိ သံယောဇနာနိ – သက္ကာယဒိဋ္ဌိ, ဝိစိကိစ္ဆာ, သီလဗ္ဗတပရာမာသော။
1013. Katame dhammā dassanena pahātabbahetukā? Tīṇi saṃyojanāni – sakkāyadiṭṭhi, vicikicchā, sīlabbataparāmāso.
၁၀၁၄. တတ္ထ ကတမာ သက္ကာယဒိဋ္ဌိ။ပေ.။ အယံ ဝုစ္စတိ သက္ကာယဒိဋ္ဌိ။
1014. Tattha katamā sakkāyadiṭṭhi…pe… ayaṃ vuccati sakkāyadiṭṭhi.
၁၀၁၅. တတ္ထ ကတမာ ဝိစိကိစ္ဆာ။ပေ.။ အယံ ဝုစ္စတိ ဝိစိကိစ္ဆာ။
1015. Tattha katamā vicikicchā…pe… ayaṃ vuccati vicikicchā.
၁၀၁၆. တတ္ထ ကတမော သီလဗ္ဗတပရာမာသော။ပေ.။ အယံ ဝုစ္စတိ သီလဗ္ဗတပရာမာသော။
1016. Tattha katamo sīlabbataparāmāso…pe… ayaṃ vuccati sīlabbataparāmāso.
၁၀၁၇. ဣမာနိ တီဏိ သံယောဇနာနိ; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဒသ္သနေန ပဟာတဗ္ဗဟေတုကာ။ တီဏိ သံယောဇနာနိ – သက္ကာယဒိဋ္ဌိ, ဝိစိကိစ္ဆာ, သီလဗ္ဗတပရာမာသော – ဣမေ ဓမ္မာ ဒသ္သနေန ပဟာတဗ္ဗာ။ တဒေကဋ္ဌော လောဘော, ဒောသော, မောဟော – ဣမေ ဓမ္မာ ဒသ္သနေန ပဟာတဗ္ဗဟေတူ။ တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဒသ္သနေန ပဟာတဗ္ဗဟေတုကာ။
1017. Imāni tīṇi saṃyojanāni; tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā dassanena pahātabbahetukā. Tīṇi saṃyojanāni – sakkāyadiṭṭhi, vicikicchā, sīlabbataparāmāso – ime dhammā dassanena pahātabbā. Tadekaṭṭho lobho, doso, moho – ime dhammā dassanena pahātabbahetū. Tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā dassanena pahātabbahetukā.
၁၀၁၈. ကတမေ ဓမ္မာ ဘာဝနာယ ပဟာတဗ္ဗဟေတုကာ? အဝသေသော လောဘော, ဒောသော, မောဟော – ဣမေ ဓမ္မာ ဘာဝနာယ ပဟာတဗ္ဗဟေတူ။ တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဘာဝနာယ ပဟာတဗ္ဗဟေတုကာ။
1018. Katame dhammā bhāvanāya pahātabbahetukā? Avaseso lobho, doso, moho – ime dhammā bhāvanāya pahātabbahetū. Tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā bhāvanāya pahātabbahetukā.
၁၀၁၉. ကတမေ ဓမ္မာ နေဝ ဒသ္သနေန န ဘာဝနာယ ပဟာတဗ္ဗဟေတုကာ? တေ ဓမ္မေ ဌပေတ္ဝာ အဝသေသာ ကုသလာကုသလာဗ္ယာကတာ ဓမ္မာ ကာမာဝစရာ ရူပာဝစရာ, အရူပာဝစရာ, အပရိယာပန္နာ; ဝေဒနာက္ခန္ဓော, သညာက္ခန္ဓော, သင္ခာရက္ခန္ဓော, ဝိညာဏက္ခန္ဓော; သဗ္ဗဉ္စ ရူပံ, အသင္ခတာ စ ဓာတု – ဣမေ ဓမ္မာ နေဝ ဒသ္သနေန န ဘာဝနာယ ပဟာတဗ္ဗဟေတုကာ။
1019. Katame dhammā neva dassanena na bhāvanāya pahātabbahetukā? Te dhamme ṭhapetvā avasesā kusalākusalābyākatā dhammā kāmāvacarā rūpāvacarā, arūpāvacarā, apariyāpannā; vedanākkhandho, saññākkhandho, saṅkhārakkhandho, viññāṇakkhandho; sabbañca rūpaṃ, asaṅkhatā ca dhātu – ime dhammā neva dassanena na bhāvanāya pahātabbahetukā.
၁၀၂၀. ကတမေ ဓမ္မာ အာစယဂာမိနော? သာသဝာ ကုသလာကုသလာ ဓမ္မာ ကာမာဝစရာ, ရူပာဝစရာ, အရူပာဝစရာ; ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ အာစယဂာမိနော။
1020. Katame dhammā ācayagāmino? Sāsavā kusalākusalā dhammā kāmāvacarā, rūpāvacarā, arūpāvacarā; vedanākkhandho…pe… viññāṇakkhandho – ime dhammā ācayagāmino.
၁၀၂၁. ကတမေ ဓမ္မာ အပစယဂာမိနော? စတ္တာရော မဂ္ဂာ အပရိယာပန္နာ – ဣမေ ဓမ္မာ အပစယဂာမိနော။
1021. Katame dhammā apacayagāmino? Cattāro maggā apariyāpannā – ime dhammā apacayagāmino.
၁၀၂၂. ကတမေ ဓမ္မာ နေဝ အာစယဂာမိ န အပစယဂာမိနော? ကုသလာကုသလာနံ ဓမ္မာနံ ဝိပာကာ ကာမာဝစရာ, ရူပာဝစရာ, အရူပာဝစရာ, အပရိယာပန္နာ ; ဝေဒနာက္ခန္ဓော။ပေ.။ ဝိညာဏက္ခန္ဓော; ယေ စ ဓမ္မာ ကိရိယာ နေဝ ကုသလာ နာကုသလာ န စ ကမ္မဝိပာကာ; သဗ္ဗဉ္စ ရူပံ, အသင္ခတာ စ ဓာတု – ဣမေ ဓမ္မာ နေဝ အာစယဂာမိ န အပစယဂာမိနော။
1022. Katame dhammā neva ācayagāmi na apacayagāmino? Kusalākusalānaṃ dhammānaṃ vipākā kāmāvacarā, rūpāvacarā, arūpāvacarā, apariyāpannā ; vedanākkhandho…pe… viññāṇakkhandho; ye ca dhammā kiriyā neva kusalā nākusalā na ca kammavipākā; sabbañca rūpaṃ, asaṅkhatā ca dhātu – ime dhammā neva ācayagāmi na apacayagāmino.
၁၀၂၃. ကတမေ ဓမ္မာ သေက္ခာ? စတ္တာရော မဂ္ဂာ အပရိယာပန္နာ, ဟေဋ္ဌိမာနိ စ တီဏိ သာမညဖလာနိ – ဣမေ ဓမ္မာ သေက္ခာ။
1023. Katame dhammā sekkhā? Cattāro maggā apariyāpannā, heṭṭhimāni ca tīṇi sāmaññaphalāni – ime dhammā sekkhā.
၁၀၂၄. ကတမေ ဓမ္မာ အသေက္ခာ? ဥပရိဋ္ဌိမံ 3 အရဟတ္တဖလံ – ဣမေ ဓမ္မာ အသေက္ခာ။
1024. Katame dhammā asekkhā? Upariṭṭhimaṃ 4 arahattaphalaṃ – ime dhammā asekkhā.
၁၀၂၅. ကတမေ ဓမ္မာ နေဝသေက္ခနာသေက္ခာ? တေ ဓမ္မေ ဌပေတ္ဝာ, အဝသေသာ ကုသလာကုသလာဗ္ယာကတာ ဓမ္မာ ကာမာဝစရာ, ရူပာဝစရာ, အရူပာဝစရာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင္ခတာ စ ဓာတု – ဣမေ ဓမ္မာ နေဝသေက္ခနာသေက္ခာ။
1025. Katame dhammā nevasekkhanāsekkhā? Te dhamme ṭhapetvā, avasesā kusalākusalābyākatā dhammā kāmāvacarā, rūpāvacarā, arūpāvacarā; vedanākkhandho…pe… viññāṇakkhandho; sabbañca rūpaṃ, asaṅkhatā ca dhātu – ime dhammā nevasekkhanāsekkhā.
၁၀၂၆. ကတမေ ဓမ္မာ ပရိတ္တာ? သဗ္ဗေဝ ကာမာဝစရာ ကုသလာကုသလာဗ္ယာကတာ ဓမ္မာ; ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ ပရိတ္တာ။
1026. Katame dhammā parittā? Sabbeva kāmāvacarā kusalākusalābyākatā dhammā; rūpakkhandho…pe… viññāṇakkhandho – ime dhammā parittā.
၁၀၂၇. ကတမေ ဓမ္မာ မဟဂ္ဂတာ? ရူပာဝစရာ, အရူပာဝစရာ, ကုသလာဗ္ယာကတာ ဓမ္မာ; ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဟဂ္ဂတာ။
1027. Katame dhammā mahaggatā? Rūpāvacarā, arūpāvacarā, kusalābyākatā dhammā; vedanākkhandho…pe… viññāṇakkhandho – ime dhammā mahaggatā.
၁၀၂၈. ကတမေ ဓမ္မာ အပ္ပမာဏာ? အပရိယာပန္နာ မဂ္ဂာ စ, မဂ္ဂဖလာနိ စ, အသင္ခတာ စ ဓာတု – ဣမေ ဓမ္မာ အပ္ပမာဏာ။
1028. Katame dhammā appamāṇā? Apariyāpannā maggā ca, maggaphalāni ca, asaṅkhatā ca dhātu – ime dhammā appamāṇā.
၁၀၂၉. ကတမေ ဓမ္မာ ပရိတ္တာရမ္မဏာ? ပရိတ္တေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ ပရိတ္တာရမ္မဏာ။
1029. Katame dhammā parittārammaṇā? Paritte dhamme ārabbha ye uppajjanti cittacetasikā dhammā – ime dhammā parittārammaṇā.
၁၀၃၀. ကတမေ ဓမ္မာ မဟဂ္ဂတာရမ္မဏာ? မဟဂ္ဂတေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ မဟဂ္ဂတာရမ္မဏာ။
1030. Katame dhammā mahaggatārammaṇā? Mahaggate dhamme ārabbha ye uppajjanti cittacetasikā dhammā – ime dhammā mahaggatārammaṇā.
၁၀၃၁. ကတမေ ဓမ္မာ အပ္ပမာဏာရမ္မဏာ? အပ္ပမာဏေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အပ္ပမာဏာရမ္မဏာ။
1031. Katame dhammā appamāṇārammaṇā? Appamāṇe dhamme ārabbha ye uppajjanti cittacetasikā dhammā – ime dhammā appamāṇārammaṇā.
၁၀၃၂. ကတမေ ဓမ္မာ ဟီနာ? တီဏိ အကုသလမူလာနိ – လောဘော, ဒောသော, မောဟော; တဒေကဋ္ဌာ စ ကိလေသာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော; တံသမုဋ္ဌာနံ ကာယကမ္မံ, ဝစီကမ္မံ, မနောကမ္မံ – ဣမေ ဓမ္မာ ဟီနာ။
1032. Katame dhammā hīnā? Tīṇi akusalamūlāni – lobho, doso, moho; tadekaṭṭhā ca kilesā; taṃsampayutto vedanākkhandho…pe… viññāṇakkhandho; taṃsamuṭṭhānaṃ kāyakammaṃ, vacīkammaṃ, manokammaṃ – ime dhammā hīnā.
၁၀၃၃. ကတမေ ဓမ္မာ မဇ္ဈိမာ? သာသဝာ ကုသလာဗ္ယာကတာ ဓမ္မာ ကာမာဝစရာ, ရူပာဝစရာ, အရူပာဝစရာ, ရူပက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဇ္ဈိမာ။
1033. Katame dhammā majjhimā? Sāsavā kusalābyākatā dhammā kāmāvacarā, rūpāvacarā, arūpāvacarā, rūpakkhandho…pe… viññāṇakkhandho – ime dhammā majjhimā.
၁၀၃၄. ကတမေ ဓမ္မာ ပဏီတာ? အပရိယာပန္နာ မဂ္ဂာ စ, မဂ္ဂဖလာနိ စ, အသင္ခတာ စ ဓာတု – ဣမေ ဓမ္မာ ပဏီတာ။
1034. Katame dhammā paṇītā? Apariyāpannā maggā ca, maggaphalāni ca, asaṅkhatā ca dhātu – ime dhammā paṇītā.
၁၀၃၅. ကတမေ ဓမ္မာ မိစ္ဆတ္တနိယတာ? ပဉ္စ ကမ္မာနိ အာနန္တရိကာနိ, ယာ စ မိစ္ဆာဒိဋ္ဌိနိယတာ – ဣမေ ဓမ္မာ မိစ္ဆတ္တနိယတာ။
1035. Katame dhammā micchattaniyatā? Pañca kammāni ānantarikāni, yā ca micchādiṭṭhiniyatā – ime dhammā micchattaniyatā.
၁၀၃၆. ကတမေ ဓမ္မာ သမ္မတ္တနိယတာ? စတ္တာရော မဂ္ဂာ အပရိယာပန္နာ – ဣမေ ဓမ္မာ သမ္မတ္တနိယတာ။
1036. Katame dhammā sammattaniyatā? Cattāro maggā apariyāpannā – ime dhammā sammattaniyatā.
၁၀၃၇. ကတမေ ဓမ္မာ အနိယတာ? တေ ဓမ္မေ ဌပေတ္ဝာ, အဝသေသာ ကုသလာကုသလာဗ္ယာကတာ ဓမ္မာ ကာမာဝစရာ, ရူပာဝစရာ, အရူပာဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; သဗ္ဗဉ္စ ရူပံ, အသင္ခတာ စ ဓာတု – ဣမေ ဓမ္မာ အနိယတာ။
1037. Katame dhammā aniyatā? Te dhamme ṭhapetvā, avasesā kusalākusalābyākatā dhammā kāmāvacarā, rūpāvacarā, arūpāvacarā, apariyāpannā; vedanākkhandho…pe… viññāṇakkhandho; sabbañca rūpaṃ, asaṅkhatā ca dhātu – ime dhammā aniyatā.
၁၀၃၈. ကတမေ ဓမ္မာ မဂ္ဂာရမ္မဏာ? အရိယမဂ္ဂံ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ မဂ္ဂာရမ္မဏာ။
1038. Katame dhammā maggārammaṇā? Ariyamaggaṃ ārabbha ye uppajjanti cittacetasikā dhammā – ime dhammā maggārammaṇā.
၁၀၃၉. ကတမေ ဓမ္မာ မဂ္ဂဟေတုကာ? အရိယမဂ္ဂသမင္ဂိသ္သ မဂ္ဂင္ဂာနိ ဌပေတ္ဝာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဂ္ဂဟေတုကာ။ အရိယမဂ္ဂသမင္ဂိသ္သ သမ္မာဒိဋ္ဌိ မဂ္ဂော စေဝ ဟေတု စ, သမ္မာဒိဋ္ဌိံ ဌပေတ္ဝာ, တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဂ္ဂဟေတုကာ။ အရိယမဂ္ဂသမင္ဂိသ္သ အလောဘော, အဒောသော, အမောဟော – ဣမေ ဓမ္မာ မဂ္ဂဟေတူ။ တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဂ္ဂဟေတုကာ။
1039. Katame dhammā maggahetukā? Ariyamaggasamaṅgissa maggaṅgāni ṭhapetvā; taṃsampayutto vedanākkhandho…pe… viññāṇakkhandho – ime dhammā maggahetukā. Ariyamaggasamaṅgissa sammādiṭṭhi maggo ceva hetu ca, sammādiṭṭhiṃ ṭhapetvā, taṃsampayutto vedanākkhandho…pe… viññāṇakkhandho – ime dhammā maggahetukā. Ariyamaggasamaṅgissa alobho, adoso, amoho – ime dhammā maggahetū. Taṃsampayutto vedanākkhandho…pe… viññāṇakkhandho – ime dhammā maggahetukā.
၁၀၄၀. ကတမေ ဓမ္မာ မဂ္ဂာဓိပတိနော? အရိယမဂ္ဂံ အဓိပတိံ ကရိတ္ဝာ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ မဂ္ဂာဓိပတိနော။ အရိယမဂ္ဂသမင္ဂိသ္သ ဝီမံသာဓိပတေယ္ယံ မဂ္ဂံ ဘာဝယန္တသ္သ ဝီမံသံ ဌပေတ္ဝာ; တံသမ္ပယုတ္တော ဝေဒနာက္ခန္ဓော။ပေ.။ ဝိညာဏက္ခန္ဓော – ဣမေ ဓမ္မာ မဂ္ဂာဓိပတိနော။
1040. Katame dhammā maggādhipatino? Ariyamaggaṃ adhipatiṃ karitvā ye uppajjanti cittacetasikā dhammā – ime dhammā maggādhipatino. Ariyamaggasamaṅgissa vīmaṃsādhipateyyaṃ maggaṃ bhāvayantassa vīmaṃsaṃ ṭhapetvā; taṃsampayutto vedanākkhandho…pe… viññāṇakkhandho – ime dhammā maggādhipatino.
၁၀၄၁. ကတမေ ဓမ္မာ ဥပ္ပန္နာ? ယေ ဓမ္မာ ဇာတာ ဘူတာ သဉ္ဇာတာ နိဗ္ဗတ္တာ အဘိနိဗ္ဗတ္တာ ပာတုဘူတာ ဥပ္ပန္နာ သမုပ္ပန္နာ ဥဋ္ဌိတာ သမုဋ္ဌိတာ ဥပ္ပန္နာ ဥပ္ပန္နံသေန သင္ဂဟိတာ, ရူပံ 5, ဝေဒနာ, သညာ, သင္ခာရာ, ဝိညာဏံ – ဣမေ ဓမ္မာ ဥပ္ပန္နာ။
1041. Katame dhammā uppannā? Ye dhammā jātā bhūtā sañjātā nibbattā abhinibbattā pātubhūtā uppannā samuppannā uṭṭhitā samuṭṭhitā uppannā uppannaṃsena saṅgahitā, rūpaṃ 6, vedanā, saññā, saṅkhārā, viññāṇaṃ – ime dhammā uppannā.
၁၀၄၂. ကတမေ ဓမ္မာ အနုပ္ပန္နာ? ယေ ဓမ္မာ အဇာတာ အဘူတာ အသဉ္ဇာတာ အနိဗ္ဗတ္တာ အနဘိနိဗ္ဗတ္တာ အပာတုဘူတာ အနုပ္ပန္နာ အသမုပ္ပန္နာ အနုဋ္ဌိတာ အသမုဋ္ဌိတာ အနုပ္ပန္နာ အနုပ္ပန္နံသေန သင္ဂဟိတာ, ရူပံ, ဝေဒနာ, သညာ, သင္ခာရာ, ဝိညာဏံ – ဣမေ ဓမ္မာ အနုပ္ပန္နာ။
1042. Katame dhammā anuppannā? Ye dhammā ajātā abhūtā asañjātā anibbattā anabhinibbattā apātubhūtā anuppannā asamuppannā anuṭṭhitā asamuṭṭhitā anuppannā anuppannaṃsena saṅgahitā, rūpaṃ, vedanā, saññā, saṅkhārā, viññāṇaṃ – ime dhammā anuppannā.
၁၀၄၃. ကတမေ ဓမ္မာ ဥပ္ပာဒိနော? ကုသလာကုသလာနံ ဓမ္မာနံ အဝိပက္ကဝိပာကာနံ ဝိပာကာ ကာမာဝစရာ, ရူပာဝစရာ, အရူပာဝစရာ, အပရိယာပန္နာ; ဝေဒနာက္ခန္ဓော။ပေ.။ ဝိညာဏက္ခန္ဓော; ယဉ္စ ရူပံ ကမ္မသ္သ ကတတ္တာ ဥပ္ပဇ္ဇိသ္သတိ – ဣမေ ဓမ္မာ ဥပ္ပာဒိနော။
1043. Katame dhammā uppādino? Kusalākusalānaṃ dhammānaṃ avipakkavipākānaṃ vipākā kāmāvacarā, rūpāvacarā, arūpāvacarā, apariyāpannā; vedanākkhandho…pe… viññāṇakkhandho; yañca rūpaṃ kammassa katattā uppajjissati – ime dhammā uppādino.
၁၀၄၄. ကတမေ ဓမ္မာ အတီတာ? ယေ ဓမ္မာ အတီတာ နိရုဒ္ဓာ ဝိဂတာ ဝိပရိဏတာ အတ္ထင္ဂတာ အဗ္ဘတ္ထင္ဂတာ ဥပ္ပဇ္ဇိတ္ဝာ ဝိဂတာ အတီတာ အတီတံသေန သင္ဂဟိတာ, ရူပံ, ဝေဒနာ, သညာ, သင္ခာရာ, ဝိညာဏံ – ဣမေ ဓမ္မာ အတီတာ။
1044. Katame dhammā atītā? Ye dhammā atītā niruddhā vigatā vipariṇatā atthaṅgatā abbhatthaṅgatā uppajjitvā vigatā atītā atītaṃsena saṅgahitā, rūpaṃ, vedanā, saññā, saṅkhārā, viññāṇaṃ – ime dhammā atītā.
၁၀၄၅. ကတမေ ဓမ္မာ အနာဂတာ? ယေ ဓမ္မာ အဇာတာ အဘူတာ အသဉ္ဇာတာ အနိဗ္ဗတ္တာ အနဘိနိဗ္ဗတ္တာ အပာတုဘူတာ အနုပ္ပန္နာ အသမုပ္ပန္နာ အနုဋ္ဌိတာ အသမုဋ္ဌိတာ အနာဂတာ အနာဂတံသေန သင္ဂဟိတာ, ရူပံ, ဝေဒနာ, သညာ, သင္ခာရာ, ဝိညာဏံ – ဣမေ ဓမ္မာ အနာဂတာ။
1045. Katame dhammā anāgatā? Ye dhammā ajātā abhūtā asañjātā anibbattā anabhinibbattā apātubhūtā anuppannā asamuppannā anuṭṭhitā asamuṭṭhitā anāgatā anāgataṃsena saṅgahitā, rūpaṃ, vedanā, saññā, saṅkhārā, viññāṇaṃ – ime dhammā anāgatā.
၁၀၄၆. ကတမေ ဓမ္မာ ပစ္စုပ္ပန္နာ? ယေ ဓမ္မာ ဇာတာ ဘူတာ သဉ္ဇာတာ နိဗ္ဗတ္တာ အဘိနိဗ္ဗတ္တာ ပာတုဘူတာ ဥပ္ပန္နာ သမုပ္ပန္နာ ဥဋ္ဌိတာ သမုဋ္ဌိတာ ပစ္စုပ္ပန္နာ ပစ္စုပ္ပန္နံသေန သင္ဂဟိတာ, ရူပံ, ဝေဒနာ, သညာ, သင္ခာရာ, ဝိညာဏံ – ဣမေ ဓမ္မာ ပစ္စုပ္ပန္နာ။
1046. Katame dhammā paccuppannā? Ye dhammā jātā bhūtā sañjātā nibbattā abhinibbattā pātubhūtā uppannā samuppannā uṭṭhitā samuṭṭhitā paccuppannā paccuppannaṃsena saṅgahitā, rūpaṃ, vedanā, saññā, saṅkhārā, viññāṇaṃ – ime dhammā paccuppannā.
၁၀၄၇. ကတမေ ဓမ္မာ အတီတာရမ္မဏာ? အတီတေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အတီတာရမ္မဏာ။
1047. Katame dhammā atītārammaṇā? Atīte dhamme ārabbha ye uppajjanti cittacetasikā dhammā – ime dhammā atītārammaṇā.
၁၀၄၈. ကတမေ ဓမ္မာ အနာဂတာရမ္မဏာ? အနာဂတေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အနာဂတာရမ္မဏာ။
1048. Katame dhammā anāgatārammaṇā? Anāgate dhamme ārabbha ye uppajjanti cittacetasikā dhammā – ime dhammā anāgatārammaṇā.
၁၀၄၉. ကတမေ ဓမ္မာ ပစ္စုပ္ပန္နာရမ္မဏာ? ပစ္စုပ္ပန္နေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ ပစ္စုပ္ပန္နာရမ္မဏာ။
1049. Katame dhammā paccuppannārammaṇā? Paccuppanne dhamme ārabbha ye uppajjanti cittacetasikā dhammā – ime dhammā paccuppannārammaṇā.
၁၀၅၀. ကတမေ ဓမ္မာ အဇ္ဈတ္တာ? ယေ ဓမ္မာ တေသံ တေသံ သတ္တာနံ အဇ္ဈတ္တံ ပစ္စတ္တံ နိယတာ ပာဋိပုဂ္ဂလိကာ ဥပာဒိဏ္ဏာ, ရူပံ, ဝေဒနာ, သညာ, သင္ခာရာ, ဝိညာဏံ – ဣမေ ဓမ္မာ အဇ္ဈတ္တာ။
1050. Katame dhammā ajjhattā? Ye dhammā tesaṃ tesaṃ sattānaṃ ajjhattaṃ paccattaṃ niyatā pāṭipuggalikā upādiṇṇā, rūpaṃ, vedanā, saññā, saṅkhārā, viññāṇaṃ – ime dhammā ajjhattā.
၁၀၅၁. ကတမေ ဓမ္မာ ဗဟိဒ္ဓာ? ယေ ဓမ္မာ တေသံ တေသံ ပရသတ္တာနံ ပရပုဂ္ဂလာနံ အဇ္ဈတ္တံ ပစ္စတ္တံ နိယတာ ပာဋိပုဂ္ဂလိကာ ဥပာဒိဏ္ဏာ, ရူပံ, ဝေဒနာ, သညာ, သင္ခာရာ, ဝိညာဏံ – ဣမေ ဓမ္မာ ဗဟိဒ္ဓာ။
1051. Katame dhammā bahiddhā? Ye dhammā tesaṃ tesaṃ parasattānaṃ parapuggalānaṃ ajjhattaṃ paccattaṃ niyatā pāṭipuggalikā upādiṇṇā, rūpaṃ, vedanā, saññā, saṅkhārā, viññāṇaṃ – ime dhammā bahiddhā.
၁၀၅၂. ကတမေ ဓမ္မာ အဇ္ဈတ္တဗဟိဒ္ဓာ? တဒုဘယံ – ဣမေ ဓမ္မာ အဇ္ဈတ္တဗဟိဒ္ဓာ။
1052. Katame dhammā ajjhattabahiddhā? Tadubhayaṃ – ime dhammā ajjhattabahiddhā.
၁၀၅၃. ကတမေ ဓမ္မာ အဇ္ဈတ္တာရမ္မဏာ? အဇ္ဈတ္တေ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အဇ္ဈတ္တာရမ္မဏာ။
1053. Katame dhammā ajjhattārammaṇā? Ajjhatte dhamme ārabbha ye uppajjanti cittacetasikā dhammā – ime dhammā ajjhattārammaṇā.
၁၀၅၄. ကတမေ ဓမ္မာ ဗဟိဒ္ဓာရမ္မဏာ? ဗဟိဒ္ဓာ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ ဗဟိဒ္ဓာရမ္မဏာ။
1054. Katame dhammā bahiddhārammaṇā? Bahiddhā dhamme ārabbha ye uppajjanti cittacetasikā dhammā – ime dhammā bahiddhārammaṇā.
၁၀၅၅. ကတမေ ဓမ္မာ အဇ္ဈတ္တဗဟိဒ္ဓာရမ္မဏာ? အဇ္ဈတ္တဗဟိဒ္ဓာ ဓမ္မေ အာရဗ္ဘ ယေ ဥပ္ပဇ္ဇန္တိ စိတ္တစေတသိကာ ဓမ္မာ – ဣမေ ဓမ္မာ အဇ္ဈတ္တဗဟိဒ္ဓာရမ္မဏာ။
1055. Katame dhammā ajjhattabahiddhārammaṇā? Ajjhattabahiddhā dhamme ārabbha ye uppajjanti cittacetasikā dhammā – ime dhammā ajjhattabahiddhārammaṇā.
၁၀၅၆. ကတမေ ဓမ္မာ သနိဒသ္သနသပ္ပဋိဃာ? ရူပာယတနံ – ဣမေ ဓမ္မာ သနိဒသ္သနသပ္ပဋိဃာ။
1056. Katame dhammā sanidassanasappaṭighā? Rūpāyatanaṃ – ime dhammā sanidassanasappaṭighā.
၁၀၅၇. ကတမေ ဓမ္မာ အနိဒသ္သနသပ္ပဋိဃာ? စက္ခာယတနံ, သောတာယတနံ, ဃာနာယတနံ, ဇိဝ္ဟာယတနံ, ကာယာယတနံ, သဒ္ဒာယတနံ, ဂန္ဓာယတနံ , ရသာယတနံ, ဖောဋ္ဌဗ္ဗာယတနံ – ဣမေ ဓမ္မာ အနိဒသ္သနသပ္ပဋိဃာ။
1057. Katame dhammā anidassanasappaṭighā? Cakkhāyatanaṃ, sotāyatanaṃ, ghānāyatanaṃ, jivhāyatanaṃ, kāyāyatanaṃ, saddāyatanaṃ, gandhāyatanaṃ , rasāyatanaṃ, phoṭṭhabbāyatanaṃ – ime dhammā anidassanasappaṭighā.
၁၀၅၈. ကတမေ ဓမ္မာ အနိဒသ္သနအပ္ပဋိဃာ? ဝေဒနာက္ခန္ဓော, သညာက္ခန္ဓော, သင္ခာရက္ခန္ဓော, ဝိညာဏက္ခန္ဓော; ယဉ္စ ရူပံ အနိဒသ္သနံ အပ္ပဋိဃံ ဓမ္မာယတနပရိယာပန္နံ; အသင္ခတာ စ ဓာတု – ဣမေ ဓမ္မာ အနိဒသ္သနအပ္ပဋိဃာ။
1058. Katame dhammā anidassanaappaṭighā? Vedanākkhandho, saññākkhandho, saṅkhārakkhandho, viññāṇakkhandho; yañca rūpaṃ anidassanaṃ appaṭighaṃ dhammāyatanapariyāpannaṃ; asaṅkhatā ca dhātu – ime dhammā anidassanaappaṭighā.
တိကံ။
Tikaṃ.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ဓမ္မသင္ဂဏိ-အဋ္ဌကထာ • Dhammasaṅgaṇi-aṭṭhakathā / တိကနိက္ခေပကထာ • Tikanikkhepakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ဓမ္မသင္ဂဏီ-မူလဋီကာ • Dhammasaṅgaṇī-mūlaṭīkā / တိကနိက္ခေပကထာဝဏ္ဏနာ • Tikanikkhepakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ဓမ္မသင္ဂဏီ-အနုဋီကာ • Dhammasaṅgaṇī-anuṭīkā / တိကနိက္ခေပကထာဝဏ္ဏနာ • Tikanikkhepakathāvaṇṇanā
