| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
திகாபத்திமானத்தங்
Tikāpattimānattaṃ
128. ஸோ பரிவுத்த²பரிவாஸோ பி⁴க்கூ²னங் ஆரோசேஸி – ‘‘அஹங், ஆவுஸோ, ஏகங் ஆபத்திங் ஆபஜ்ஜிங் ஸஞ்சேதனிகங் ஸுக்கவிஸ்ஸட்டி²ங் பக்க²ப்படிச்ச²ன்னங்…பே॰… ஸோஹங் பரிவுத்த²பரிவாஸோ. கத²ங் நு கோ² மயா படிபஜ்ஜிதப்³ப³’’ந்தி? ப⁴க³வதோ ஏதமத்த²ங் ஆரோசேஸுங். ‘‘தேன ஹி , பி⁴க்க²வே, ஸங்கோ⁴ உதா³யிஸ்ஸ பி⁴க்கு²னோ திஸ்ஸன்னங் ஆபத்தீனங் சா²ரத்தங் மானத்தங் தே³து. ஏவஞ்ச பன, பி⁴க்க²வே, தா³தப்³ப³ங் –
128. So parivutthaparivāso bhikkhūnaṃ ārocesi – ‘‘ahaṃ, āvuso, ekaṃ āpattiṃ āpajjiṃ sañcetanikaṃ sukkavissaṭṭhiṃ pakkhappaṭicchannaṃ…pe… sohaṃ parivutthaparivāso. Kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. ‘‘Tena hi , bhikkhave, saṅgho udāyissa bhikkhuno tissannaṃ āpattīnaṃ chārattaṃ mānattaṃ detu. Evañca pana, bhikkhave, dātabbaṃ –
‘‘தேன, பி⁴க்க²வே, உதா³யினா பி⁴க்கு²னா ஸங்க⁴ங் உபஸங்கமித்வா…பே॰… ஏவமஸ்ஸ வசனீயோ – ‘அஹங், ப⁴ந்தே, ஏகங் ஆபத்திங் ஆபஜ்ஜிங் ஸஞ்சேதனிகங் ஸுக்கவிஸ்ஸட்டி²ங் பக்க²ப்படிச்ச²ன்னங்…பே॰… ஸோஹங், ப⁴ந்தே, பரிவுத்த²பரிவாஸோ ஸங்க⁴ங் திஸ்ஸன்னங் ஆபத்தீனங் சா²ரத்தங் மானத்தங் யாசாமீ’தி. து³தியம்பி யாசிதப்³ப³ங். ததியம்பி யாசிதப்³ப³ங். ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
‘‘Tena, bhikkhave, udāyinā bhikkhunā saṅghaṃ upasaṅkamitvā…pe… evamassa vacanīyo – ‘ahaṃ, bhante, ekaṃ āpattiṃ āpajjiṃ sañcetanikaṃ sukkavissaṭṭhiṃ pakkhappaṭicchannaṃ…pe… sohaṃ, bhante, parivutthaparivāso saṅghaṃ tissannaṃ āpattīnaṃ chārattaṃ mānattaṃ yācāmī’ti. Dutiyampi yācitabbaṃ. Tatiyampi yācitabbaṃ. Byattena bhikkhunā paṭibalena saṅgho ñāpetabbo –
129. ‘‘ஸுணாது மே, ப⁴ந்தே, ஸங்கோ⁴. அயங் உதா³யீ பி⁴க்கு² ஏகங் ஆபத்திங் ஆபஜ்ஜி ஸஞ்சேதனிகங் ஸுக்கவிஸ்ஸட்டி²ங் பக்க²ப்படிச்ச²ன்னங்…பே॰… ஸோ பரிவுத்த²பரிவாஸோ ஸங்க⁴ங் திஸ்ஸன்னங் ஆபத்தீனங் சா²ரத்தங் மானத்தங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ உதா³யிஸ்ஸ பி⁴க்கு²னோ திஸ்ஸன்னங் ஆபத்தீனங் சா²ரத்தங் மானத்தங் த³தெ³ய்ய. ஏஸா ஞத்தி.
129. ‘‘Suṇātu me, bhante, saṅgho. Ayaṃ udāyī bhikkhu ekaṃ āpattiṃ āpajji sañcetanikaṃ sukkavissaṭṭhiṃ pakkhappaṭicchannaṃ…pe… so parivutthaparivāso saṅghaṃ tissannaṃ āpattīnaṃ chārattaṃ mānattaṃ yācati. Yadi saṅghassa pattakallaṃ, saṅgho udāyissa bhikkhuno tissannaṃ āpattīnaṃ chārattaṃ mānattaṃ dadeyya. Esā ñatti.
‘‘ஸுணாது மே, ப⁴ந்தே, ஸங்கோ⁴. அயங் உதா³யீ பி⁴க்கு² ஏகங் ஆபத்திங் ஆபஜ்ஜி ஸஞ்சேதனிகங் ஸுக்கவிஸ்ஸட்டி²ங் பக்க²ப்படிச்ச²ன்னங்…பே॰… ஸோ பரிவுத்த²பரிவாஸோ ஸங்க⁴ங் திஸ்ஸன்னங் ஆபத்தீனங் சா²ரத்தங் மானத்தங் யாசதி. ஸங்கோ⁴ உதா³யிஸ்ஸ பி⁴க்கு²னோ திஸ்ஸன்னங் ஆபத்தீனங் சா²ரத்தங் மானத்தங் தே³தி. யஸ்ஸாயஸ்மதோ க²மதி உதா³யிஸ்ஸ பி⁴க்கு²னோ திஸ்ஸன்னங் ஆபத்தீனங் சா²ரத்தங் மானத்தஸ்ஸ தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ayaṃ udāyī bhikkhu ekaṃ āpattiṃ āpajji sañcetanikaṃ sukkavissaṭṭhiṃ pakkhappaṭicchannaṃ…pe… so parivutthaparivāso saṅghaṃ tissannaṃ āpattīnaṃ chārattaṃ mānattaṃ yācati. Saṅgho udāyissa bhikkhuno tissannaṃ āpattīnaṃ chārattaṃ mānattaṃ deti. Yassāyasmato khamati udāyissa bhikkhuno tissannaṃ āpattīnaṃ chārattaṃ mānattassa dānaṃ, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி…பே॰….
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘தி³ன்னங் ஸங்கே⁴ன உதா³யிஸ்ஸ பி⁴க்கு²னோ திஸ்ஸன்னங் ஆபத்தீனங் சா²ரத்தங் மானத்தங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Dinnaṃ saṅghena udāyissa bhikkhuno tissannaṃ āpattīnaṃ chārattaṃ mānattaṃ. Khamati saṅghassa, tasmā tuṇhī, evametaṃ dhārayāmī’’ti.
