| Library / Tipiṭaka / तिपिटक • Tipiṭaka / पञ्चपकरण-अट्ठकथा • Pañcapakaraṇa-aṭṭhakathā |
५. तिकतिकपट्ठानवण्णना
5. Tikatikapaṭṭhānavaṇṇanā
तिकतिकपट्ठानेपि कुसलं सुखाय वेदनाय सम्पयुत्तं धम्मं पटिच्च कुसलो सुखाय वेदनाय सम्पयुत्तो धम्मो उप्पज्जति हेतुपच्चयाति पञ्हुद्धारवसेनेव सङ्खेपतो देसना कता। एत्थ च कुसलत्तिकं वेदनात्तिकादीहि, वेदनात्तिकादयो च कुसलत्तिकेनाति एवं तिकेसुयेव तिका पक्खित्ता। येन येन च पदेन सद्धिं यं यं पदं योजनं न गच्छति, तं तं हापेत्वा लब्भमानवसेनेव सब्बपच्चयेसु वारा च गणननया च दस्सिता, तस्मा ते साधुकं पाळिं उपपरिक्खित्वा वेदितब्बा। यथा च कुसलत्तिकं वेदनात्तिकादीहि, वेदनात्तिकादयो च तेन सद्धिं योजेत्वा वेदितब्बा; तथा एकेकं तिकं सेसेहि। सेसा च तेहि सद्धिं योजेत्वा वेदितब्बाति।
Tikatikapaṭṭhānepi kusalaṃ sukhāya vedanāya sampayuttaṃ dhammaṃ paṭicca kusalo sukhāya vedanāya sampayutto dhammo uppajjati hetupaccayāti pañhuddhāravaseneva saṅkhepato desanā katā. Ettha ca kusalattikaṃ vedanāttikādīhi, vedanāttikādayo ca kusalattikenāti evaṃ tikesuyeva tikā pakkhittā. Yena yena ca padena saddhiṃ yaṃ yaṃ padaṃ yojanaṃ na gacchati, taṃ taṃ hāpetvā labbhamānavaseneva sabbapaccayesu vārā ca gaṇananayā ca dassitā, tasmā te sādhukaṃ pāḷiṃ upaparikkhitvā veditabbā. Yathā ca kusalattikaṃ vedanāttikādīhi, vedanāttikādayo ca tena saddhiṃ yojetvā veditabbā; tathā ekekaṃ tikaṃ sesehi. Sesā ca tehi saddhiṃ yojetvā veditabbāti.
तिकतिकपट्ठानवण्णना।
Tikatikapaṭṭhānavaṇṇanā.
