| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၅. တိကတိကပဋ္ဌာနဝဏ္ဏနာ
5. Tikatikapaṭṭhānavaṇṇanā
တိကတိကပဋ္ဌာနေပိ ကုသလံ သုခာယ ဝေဒနာယ သမ္ပယုတ္တံ ဓမ္မံ ပဋိစ္စ ကုသလော သုခာယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာတိ ပဉ္ဟုဒ္ဓာရဝသေနေဝ သင္ခေပတော ဒေသနာ ကတာ။ ဧတ္ထ စ ကုသလတ္တိကံ ဝေဒနာတ္တိကာဒီဟိ, ဝေဒနာတ္တိကာဒယော စ ကုသလတ္တိကေနာတိ ဧဝံ တိကေသုယေဝ တိကာ ပက္ခိတ္တာ။ ယေန ယေန စ ပဒေန သဒ္ဓိံ ယံ ယံ ပဒံ ယောဇနံ န ဂစ္ဆတိ, တံ တံ ဟာပေတ္ဝာ လဗ္ဘမာနဝသေနေဝ သဗ္ဗပစ္စယေသု ဝာရာ စ ဂဏနနယာ စ ဒသ္သိတာ, တသ္မာ တေ သာဓုကံ ပာဠိံ ဥပပရိက္ခိတ္ဝာ ဝေဒိတဗ္ဗာ။ ယထာ စ ကုသလတ္တိကံ ဝေဒနာတ္တိကာဒီဟိ, ဝေဒနာတ္တိကာဒယော စ တေန သဒ္ဓိံ ယောဇေတ္ဝာ ဝေဒိတဗ္ဗာ; တထာ ဧကေကံ တိကံ သေသေဟိ။ သေသာ စ တေဟိ သဒ္ဓိံ ယောဇေတ္ဝာ ဝေဒိတဗ္ဗာတိ။
Tikatikapaṭṭhānepi kusalaṃ sukhāya vedanāya sampayuttaṃ dhammaṃ paṭicca kusalo sukhāya vedanāya sampayutto dhammo uppajjati hetupaccayāti pañhuddhāravaseneva saṅkhepato desanā katā. Ettha ca kusalattikaṃ vedanāttikādīhi, vedanāttikādayo ca kusalattikenāti evaṃ tikesuyeva tikā pakkhittā. Yena yena ca padena saddhiṃ yaṃ yaṃ padaṃ yojanaṃ na gacchati, taṃ taṃ hāpetvā labbhamānavaseneva sabbapaccayesu vārā ca gaṇananayā ca dassitā, tasmā te sādhukaṃ pāḷiṃ upaparikkhitvā veditabbā. Yathā ca kusalattikaṃ vedanāttikādīhi, vedanāttikādayo ca tena saddhiṃ yojetvā veditabbā; tathā ekekaṃ tikaṃ sesehi. Sesā ca tehi saddhiṃ yojetvā veditabbāti.
တိကတိကပဋ္ဌာနဝဏ္ဏနာ။
Tikatikapaṭṭhānavaṇṇanā.
