| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೫. ತಿಕತಿಕಪಟ್ಠಾನವಣ್ಣನಾ
5. Tikatikapaṭṭhānavaṇṇanā
ತಿಕತಿಕಪಟ್ಠಾನೇಪಿ ಕುಸಲಂ ಸುಖಾಯ ವೇದನಾಯ ಸಮ್ಪಯುತ್ತಂ ಧಮ್ಮಂ ಪಟಿಚ್ಚ ಕುಸಲೋ ಸುಖಾಯ ವೇದನಾಯ ಸಮ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾತಿ ಪಞ್ಹುದ್ಧಾರವಸೇನೇವ ಸಙ್ಖೇಪತೋ ದೇಸನಾ ಕತಾ। ಏತ್ಥ ಚ ಕುಸಲತ್ತಿಕಂ ವೇದನಾತ್ತಿಕಾದೀಹಿ, ವೇದನಾತ್ತಿಕಾದಯೋ ಚ ಕುಸಲತ್ತಿಕೇನಾತಿ ಏವಂ ತಿಕೇಸುಯೇವ ತಿಕಾ ಪಕ್ಖಿತ್ತಾ। ಯೇನ ಯೇನ ಚ ಪದೇನ ಸದ್ಧಿಂ ಯಂ ಯಂ ಪದಂ ಯೋಜನಂ ನ ಗಚ್ಛತಿ, ತಂ ತಂ ಹಾಪೇತ್ವಾ ಲಬ್ಭಮಾನವಸೇನೇವ ಸಬ್ಬಪಚ್ಚಯೇಸು ವಾರಾ ಚ ಗಣನನಯಾ ಚ ದಸ್ಸಿತಾ, ತಸ್ಮಾ ತೇ ಸಾಧುಕಂ ಪಾಳಿಂ ಉಪಪರಿಕ್ಖಿತ್ವಾ ವೇದಿತಬ್ಬಾ। ಯಥಾ ಚ ಕುಸಲತ್ತಿಕಂ ವೇದನಾತ್ತಿಕಾದೀಹಿ, ವೇದನಾತ್ತಿಕಾದಯೋ ಚ ತೇನ ಸದ್ಧಿಂ ಯೋಜೇತ್ವಾ ವೇದಿತಬ್ಬಾ; ತಥಾ ಏಕೇಕಂ ತಿಕಂ ಸೇಸೇಹಿ। ಸೇಸಾ ಚ ತೇಹಿ ಸದ್ಧಿಂ ಯೋಜೇತ್ವಾ ವೇದಿತಬ್ಬಾತಿ।
Tikatikapaṭṭhānepi kusalaṃ sukhāya vedanāya sampayuttaṃ dhammaṃ paṭicca kusalo sukhāya vedanāya sampayutto dhammo uppajjati hetupaccayāti pañhuddhāravaseneva saṅkhepato desanā katā. Ettha ca kusalattikaṃ vedanāttikādīhi, vedanāttikādayo ca kusalattikenāti evaṃ tikesuyeva tikā pakkhittā. Yena yena ca padena saddhiṃ yaṃ yaṃ padaṃ yojanaṃ na gacchati, taṃ taṃ hāpetvā labbhamānavaseneva sabbapaccayesu vārā ca gaṇananayā ca dassitā, tasmā te sādhukaṃ pāḷiṃ upaparikkhitvā veditabbā. Yathā ca kusalattikaṃ vedanāttikādīhi, vedanāttikādayo ca tena saddhiṃ yojetvā veditabbā; tathā ekekaṃ tikaṃ sesehi. Sesā ca tehi saddhiṃ yojetvā veditabbāti.
ತಿಕತಿಕಪಟ್ಠಾನವಣ್ಣನಾ।
Tikatikapaṭṭhānavaṇṇanā.
