| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
திகவாரவண்ணனா
Tikavāravaṇṇanā
323. திகேஸு அத்தா²பத்தி திட்ட²ந்தே ப⁴க³வதி ஆபஜ்ஜதீதி அத்தி² ஆபத்தி, யங் திட்ட²ந்தே ப⁴க³வதி ஆபஜ்ஜதீதி அத்தோ². ஏஸேவ நயோ ஸப்³ப³த்த². தத்த² லோஹிதுப்பாதா³பத்திங் திட்ட²ந்தே ஆபஜ்ஜதி. ‘‘ஏதரஹி கோ² பனானந்த³, பி⁴க்கூ² அஞ்ஞமஞ்ஞங் ஆவுஸோவாதே³ன ஸமுதா³சரந்தி, ந வோ மமச்சயேன ஏவங் ஸமுதா³சரிதப்³ப³ங், நவகேன, ஆனந்த³, பி⁴க்கு²னா தே²ரோ பி⁴க்கூ² ‘ப⁴ந்தே’தி வா ‘ஆயஸ்மா’தி வா ஸமுதா³சரிதப்³போ³’’தி வசனதோ தே²ரங் ஆவுஸோவாதே³ன ஸமுதா³சரணபச்சயா ஆபத்திங் பரினிப்³பு³தே ப⁴க³வதி ஆபஜ்ஜதி, நோ திட்ட²ந்தே. இமா த்³வே ஆபத்தியோ ட²பெத்வா அவஸேஸா த⁴ரந்தேபி ப⁴க³வதி ஆபஜ்ஜதி, பரினிப்³பு³தேபி.
323. Tikesu atthāpatti tiṭṭhante bhagavati āpajjatīti atthi āpatti, yaṃ tiṭṭhante bhagavati āpajjatīti attho. Eseva nayo sabbattha. Tattha lohituppādāpattiṃ tiṭṭhante āpajjati. ‘‘Etarahi kho panānanda, bhikkhū aññamaññaṃ āvusovādena samudācaranti, na vo mamaccayena evaṃ samudācaritabbaṃ, navakena, ānanda, bhikkhunā thero bhikkhū ‘bhante’ti vā ‘āyasmā’ti vā samudācaritabbo’’ti vacanato theraṃ āvusovādena samudācaraṇapaccayā āpattiṃ parinibbute bhagavati āpajjati, no tiṭṭhante. Imā dve āpattiyo ṭhapetvā avasesā dharantepi bhagavati āpajjati, parinibbutepi.
பவாரெத்வா அனதிரித்தங் பு⁴ஞ்ஜந்தோ ஆபத்திங் காலே ஆபஜ்ஜதி நோ விகாலே. விகாலபோ⁴ஜனாபத்திங் பன விகாலே ஆபஜ்ஜதி நோ காலே. அவஸேஸா காலே சேவ ஆபஜ்ஜதி விகாலே ச. ஸஹகா³ரஸெய்யங் ரத்திங் ஆபஜ்ஜதி, த்³வாரங் அஸங்வரித்வா படிஸல்லீயனங் தி³வா. ஸேஸா ரத்திஞ்சேவ தி³வா ச. ‘‘த³ஸவஸ்ஸொம்ஹி அதிரேகத³ஸவஸ்ஸொம்ஹீ’’தி பா³லோ அப்³யத்தோ பரிஸங் உபட்டா²பெந்தோ த³ஸவஸ்ஸோ ஆபஜ்ஜதி நோ ஊனத³ஸவஸ்ஸோ . ‘‘அஹங் பண்டி³தோ ப்³யத்தோ’’தி நவோ வா மஜ்ஜி²மோ வா பரிஸங் உபட்டா²பெந்தோ ஊனத³ஸவஸ்ஸோ ஆபஜ்ஜதி நோ த³ஸவஸ்ஸோ. ஸேஸா த³ஸவஸ்ஸோ சேவ ஆபஜ்ஜதி ஊனத³ஸவஸ்ஸோ ச. ‘‘பஞ்சவஸ்ஸொம்ஹீ’’தி பா³லோ அப்³யத்தோ அனிஸ்ஸாய வஸந்தோ பஞ்சவஸ்ஸோ ஆபஜ்ஜதி. ‘‘அஹங் பண்டி³தோ ப்³யத்தோ’’தி நவகோ அனிஸ்ஸாய வஸந்தோ ஊனபஞ்சவஸ்ஸோ ஆபஜ்ஜதி. ஸேஸங் பஞ்சவஸ்ஸோ சேவ ஆபஜ்ஜதி ஊனபஞ்சவஸ்ஸோ ச. அனுபஸம்பன்னங் பத³ஸோத⁴ம்மங் வாசெந்தோ, மாதுகா³மஸ்ஸ த⁴ம்மங் தே³ஸெந்தோ ஏவரூபங் ஆபத்திங் குஸலசித்தோ ஆபஜ்ஜதி, பாராஜிக-ஸுக்கவிஸ்ஸட்டி²-காயஸங்ஸக்³க³-து³ட்டு²ல்ல-அத்தகாமபாரிசரிய-து³ட்ட²தோ³ஸ-ஸங்க⁴பே⁴த³பஹாரதா³ன-தலஸத்திகாதி³பே⁴த³ங் அகுஸலசித்தோ ஆபஜ்ஜதி, அஸஞ்சிச்ச ஸஹகா³ரஸெய்யாதி³ங் அப்³யாகதசித்தோ ஆபஜ்ஜதி, யங் அரஹாவ ஆபஜ்ஜதி, ஸப்³ப³ங் அப்³யாகதசித்தோவ ஆபஜ்ஜதி, மேது²னத⁴ம்மாதி³பே⁴த³மாபத்திங் ஸுக²வேத³னாஸமங்கீ³ ஆபஜ்ஜதி, து³ட்ட²தோ³ஸாதி³பே⁴த³ங் து³க்க²வேத³னாஸமங்கீ³, யங் ஸுக²வேத³னாஸமங்கீ³ ஆபஜ்ஜதி, தங்யேவ மஜ்ஜ²த்தோ ஹுத்வா ஆபஜ்ஜந்தோ அது³க்க²மஸுக²வேத³னாஸமங்கீ³ ஆபஜ்ஜதி.
Pavāretvā anatirittaṃ bhuñjanto āpattiṃ kāle āpajjati no vikāle. Vikālabhojanāpattiṃ pana vikāle āpajjati no kāle. Avasesā kāle ceva āpajjati vikāle ca. Sahagāraseyyaṃ rattiṃ āpajjati, dvāraṃ asaṃvaritvā paṭisallīyanaṃ divā. Sesā rattiñceva divā ca. ‘‘Dasavassomhi atirekadasavassomhī’’ti bālo abyatto parisaṃ upaṭṭhāpento dasavasso āpajjati no ūnadasavasso . ‘‘Ahaṃ paṇḍito byatto’’ti navo vā majjhimo vā parisaṃ upaṭṭhāpento ūnadasavasso āpajjati no dasavasso. Sesā dasavasso ceva āpajjati ūnadasavasso ca. ‘‘Pañcavassomhī’’ti bālo abyatto anissāya vasanto pañcavasso āpajjati. ‘‘Ahaṃ paṇḍito byatto’’ti navako anissāya vasanto ūnapañcavasso āpajjati. Sesaṃ pañcavasso ceva āpajjati ūnapañcavasso ca. Anupasampannaṃ padasodhammaṃ vācento, mātugāmassa dhammaṃ desento evarūpaṃ āpattiṃ kusalacitto āpajjati, pārājika-sukkavissaṭṭhi-kāyasaṃsagga-duṭṭhulla-attakāmapāricariya-duṭṭhadosa-saṅghabhedapahāradāna-talasattikādibhedaṃ akusalacitto āpajjati, asañcicca sahagāraseyyādiṃ abyākatacitto āpajjati, yaṃ arahāva āpajjati, sabbaṃ abyākatacittova āpajjati, methunadhammādibhedamāpattiṃ sukhavedanāsamaṅgī āpajjati, duṭṭhadosādibhedaṃ dukkhavedanāsamaṅgī, yaṃ sukhavedanāsamaṅgī āpajjati, taṃyeva majjhatto hutvā āpajjanto adukkhamasukhavedanāsamaṅgī āpajjati.
தயோ படிக்கே²பாதி பு³த்³த⁴ஸ்ஸ ப⁴க³வதோ தயோ படிக்கே²பா. சதூஸு பச்சயேஸு மஹிச்ச²தா அஸந்துட்டி²தா கிலேஸஸல்லேக²னபடிபத்தியா அகோ³பாயனா, இமே ஹி தயோ த⁴ம்மா பு³த்³தே⁴ன ப⁴க³வதா படிக்கி²த்தா. அப்பிச்ச²தாத³யோ பன தயோ பு³த்³தே⁴ன ப⁴க³வதா அனுஞ்ஞாதா, தேன வுத்தங் ‘‘தயோ அனுஞ்ஞாதா’’தி.
Tayo paṭikkhepāti buddhassa bhagavato tayo paṭikkhepā. Catūsu paccayesu mahicchatā asantuṭṭhitā kilesasallekhanapaṭipattiyā agopāyanā, ime hi tayo dhammā buddhena bhagavatā paṭikkhittā. Appicchatādayo pana tayo buddhena bhagavatā anuññātā, tena vuttaṃ ‘‘tayo anuññātā’’ti.
‘‘த³ஸவஸ்ஸொம்ஹீ’’தி பரிஸங் உபட்டா²பெந்தோ ‘‘பஞ்சவஸ்ஸொம்ஹீ’’தி நிஸ்ஸயங் அக³ண்ஹந்தோ பா³லோ ஆபஜ்ஜதி நோ பண்டி³தோ, ஊனத³ஸவஸ்ஸோ ‘‘ப்³யத்தொம்ஹீ’’தி ப³ஹுஸ்ஸுதத்தா பரிஸங் உபட்டா²பெந்தோ ஊனபஞ்சவஸ்ஸோ ச நிஸ்ஸயங் அக³ண்ஹந்தோ பண்டி³தோ ஆபஜ்ஜதி நோ பா³லோ; அவஸேஸங் பண்டி³தோ சேவ ஆபஜ்ஜதி பா³லோ ச. வஸ்ஸங் அனுபக³ச்ச²ந்தோ காளே ஆபஜ்ஜதி நோ ஜுண்ஹே; மஹாபவாரணாய அப்பவாரெந்தோ ஜுண்ஹே ஆபஜ்ஜதி நோ காளே; அவஸேஸங் காளே சேவ ஆபஜ்ஜதி ஜுண்ஹே ச. வஸ்ஸூபக³மனங் காளே கப்பதி நோ ஜுண்ஹே; மஹாபவாரணாய பவாரணா ஜுண்ஹே கப்பதி நோ காளே; ஸேஸங் அனுஞ்ஞாதகங் காளே சேவ கப்பதி ஜுண்ஹே ச.
‘‘Dasavassomhī’’ti parisaṃ upaṭṭhāpento ‘‘pañcavassomhī’’ti nissayaṃ agaṇhanto bālo āpajjati no paṇḍito, ūnadasavasso ‘‘byattomhī’’ti bahussutattā parisaṃ upaṭṭhāpento ūnapañcavasso ca nissayaṃ agaṇhanto paṇḍito āpajjati no bālo; avasesaṃ paṇḍito ceva āpajjati bālo ca. Vassaṃ anupagacchanto kāḷe āpajjati no juṇhe; mahāpavāraṇāya appavārento juṇhe āpajjati no kāḷe; avasesaṃ kāḷe ceva āpajjati juṇhe ca. Vassūpagamanaṃ kāḷe kappati no juṇhe; mahāpavāraṇāya pavāraṇā juṇhe kappati no kāḷe; sesaṃ anuññātakaṃ kāḷe ceva kappati juṇhe ca.
கத்திகபுண்ணமாஸியா பச்சி²மே பாடிபத³தி³வஸே விகப்பெத்வா ட²பிதங் வஸ்ஸிகஸாடிகங் நிவாஸெந்தோ ஹேமந்தே ஆபஜ்ஜதி. குருந்தி³யங் பன ‘‘கத்திகபுண்ணமதி³வஸே அபச்சுத்³த⁴ரித்வா ஹேமந்தே ஆபஜ்ஜதீ’’தி வுத்தங், தம்பி ஸுவுத்தங். ‘‘சாதுமாஸங் அதி⁴ட்டா²துங் ததோ பரங் விகப்பேது’’ந்தி ஹி வுத்தங். அதிரேகமாஸே ஸேஸே கி³ம்ஹானே பரியேஸந்தோ அதிரேகட்³ட⁴மாஸே ஸேஸே கத்வா நிவாஸெந்தோ ச கி³ம்ஹே ஆபஜ்ஜதி நாம. ஸதியா வஸ்ஸிகஸாடிகாய நக்³கோ³ காயங் ஓவஸ்ஸாபெந்தோ வஸ்ஸே ஆபஜ்ஜதி நாம. பாரிஸுத்³தி⁴உபோஸத²ங் வா அதி⁴ட்டா²னுபோஸத²ங் வா கரொந்தோ ஸங்கோ⁴ ஆபஜ்ஜதி. ஸுத்துத்³தே³ஸஞ்ச அதி⁴ட்டா²னுபோஸத²ஞ்ச கரொந்தோ க³ணோ ஆபஜ்ஜதி. ஏககோ ஸுத்துத்³தே³ஸங் பாரிஸுத்³தி⁴உபோஸத²ஞ்ச கரொந்தோ புக்³க³லோ ஆபஜ்ஜதி. பவாரணாயபி ஏஸேவ நயோ.
Kattikapuṇṇamāsiyā pacchime pāṭipadadivase vikappetvā ṭhapitaṃ vassikasāṭikaṃ nivāsento hemante āpajjati. Kurundiyaṃ pana ‘‘kattikapuṇṇamadivase apaccuddharitvā hemante āpajjatī’’ti vuttaṃ, tampi suvuttaṃ. ‘‘Cātumāsaṃ adhiṭṭhātuṃ tato paraṃ vikappetu’’nti hi vuttaṃ. Atirekamāse sese gimhāne pariyesanto atirekaḍḍhamāse sese katvā nivāsento ca gimhe āpajjati nāma. Satiyā vassikasāṭikāya naggo kāyaṃ ovassāpento vasse āpajjati nāma. Pārisuddhiuposathaṃ vā adhiṭṭhānuposathaṃ vā karonto saṅgho āpajjati. Suttuddesañca adhiṭṭhānuposathañca karonto gaṇo āpajjati. Ekako suttuddesaṃ pārisuddhiuposathañca karonto puggalo āpajjati. Pavāraṇāyapi eseva nayo.
ஸங்கு⁴போஸதோ² ச ஸங்க⁴பவாரணா ச ஸங்க⁴ஸ்ஸேவ கப்பதி. க³ணுபோஸதோ² ச க³ணபவாரணா ச க³ணஸ்ஸேவ கப்பதி. அதி⁴ட்டா²னுபோஸதோ² ச அதி⁴ட்டா²னபவாரணா ச புக்³க³லஸ்ஸேவ கப்பதி. ‘‘பாராஜிகங் ஆபன்னொம்ஹீ’’திஆதீ³னி ப⁴ணந்தோ வத்து²ங் சா²தே³தி ந ஆபத்திங், ‘‘மேது²னங் த⁴ம்மங் படிஸேவி’’ந்திஆதீ³னி ப⁴ணந்தோ ஆபத்திங் சா²தே³தி நோ வத்து²ங், யோ நேவ வத்து²ங் ந ஆபத்திங் ஆரோசேதி, அயங் வத்து²ஞ்சேவ சா²தே³தி ஆபத்திஞ்ச.
Saṅghuposatho ca saṅghapavāraṇā ca saṅghasseva kappati. Gaṇuposatho ca gaṇapavāraṇā ca gaṇasseva kappati. Adhiṭṭhānuposatho ca adhiṭṭhānapavāraṇā ca puggalasseva kappati. ‘‘Pārājikaṃ āpannomhī’’tiādīni bhaṇanto vatthuṃ chādeti na āpattiṃ, ‘‘methunaṃ dhammaṃ paṭisevi’’ntiādīni bhaṇanto āpattiṃ chādeti no vatthuṃ, yo neva vatthuṃ na āpattiṃ āroceti, ayaṃ vatthuñceva chādeti āpattiñca.
படிச்சா²தே³தீதி படிச்சா²தி³. ஜந்தாக⁴ரமேவ படிச்சா²தி³ ஜந்தாக⁴ரபடிச்சா²தி³. இதராஸுபி ஏஸேவ நயோ. த்³வாரங் பித³ஹித்வா அந்தோஜந்தாக⁴ரே டி²தேன பரிகம்மங் காதுங் வட்டதி. உத³கே ஓதிண்ணேனாபி ஏததே³வ வட்டதி. உப⁴யத்த² கா²தி³துங் பு⁴ஞ்ஜிதுங் வா ந வட்டதி. வத்த²படிச்சா²தி³ ஸப்³ப³கப்பியதாய படிச்ச²ன்னேன ஸப்³ப³ங் காதுங் வட்டதி. வஹந்தீதி யந்தி நிய்யந்தி; நிந்த³ங் வா படிக்கோஸங் வா ந லப⁴ந்தி. சந்த³மண்ட³லங் அப்³பா⁴மஹிகாதூ⁴மரஜராஹுவிமுத்தங் விவடங்யேவ விரோசதி, ந தேஸு அஞ்ஞதரேன படிச்ச²ன்னங். ததா² ஸூரியமண்ட³லங், த⁴ம்மவினயோபி விவரித்வா விப⁴ஜித்வா தே³ஸியமானோவ விரோசதி நோ படிச்ச²ன்னோ.
Paṭicchādetīti paṭicchādi. Jantāgharameva paṭicchādi jantāgharapaṭicchādi. Itarāsupi eseva nayo. Dvāraṃ pidahitvā antojantāghare ṭhitena parikammaṃ kātuṃ vaṭṭati. Udake otiṇṇenāpi etadeva vaṭṭati. Ubhayattha khādituṃ bhuñjituṃ vā na vaṭṭati. Vatthapaṭicchādi sabbakappiyatāya paṭicchannena sabbaṃ kātuṃ vaṭṭati. Vahantīti yanti niyyanti; nindaṃ vā paṭikkosaṃ vā na labhanti. Candamaṇḍalaṃ abbhāmahikādhūmarajarāhuvimuttaṃ vivaṭaṃyeva virocati, na tesu aññatarena paṭicchannaṃ. Tathā sūriyamaṇḍalaṃ, dhammavinayopi vivaritvā vibhajitvā desiyamānova virocati no paṭicchanno.
அஞ்ஞேன பே⁴ஸஜ்ஜேன கரணீயேன அஞ்ஞங் விஞ்ஞாபெந்தோ கி³லானோ ஆபஜ்ஜதி, ந பே⁴ஸஜ்ஜேன கரணீயேன பே⁴ஸஜ்ஜங் விஞ்ஞாபெந்தோ அகி³லானோ ஆபஜ்ஜதி, அவஸேஸங் ஆபத்திங் கி³லானோ சேவ ஆபஜ்ஜதி அகி³லானோ ச.
Aññena bhesajjena karaṇīyena aññaṃ viññāpento gilāno āpajjati, na bhesajjena karaṇīyena bhesajjaṃ viññāpento agilāno āpajjati, avasesaṃ āpattiṃ gilāno ceva āpajjati agilāno ca.
அந்தோ ஆபஜ்ஜதி நோ ப³ஹீதி அனுபக²ஜ்ஜ ஸெய்யங் கப்பெந்தோ அந்தோ ஆபஜ்ஜதி நோ ப³ஹி, ப³ஹி ஆபஜ்ஜதி நோ அந்தோதி ஸங்கி⁴கங் மஞ்சாதி³ங் அஜ்ஜோ²காஸே ஸந்த²ரித்வா பக்கமந்தோ ப³ஹி ஆபஜ்ஜதி நோ அந்தோ, அவஸேஸங் பன அந்தோ சேவ ஆபஜ்ஜதி ப³ஹி ச. அந்தோஸீமாயாதி ஆக³ந்துகோ ஆக³ந்துகவத்தங் அத³ஸ்ஸெத்வா ஸச²த்துபாஹனோ விஹாரங் பவிஸந்தோ உபசாரஸீமங் ஓக்கந்தமத்தோவ ஆபஜ்ஜதி. ப³ஹிஸீமாயாதி க³மிகோ தா³ருப⁴ண்ட³படிஸாமனாதி³க³மிகவத்தங் அபூரெத்வா பக்கமந்தோ உபசாரஸீமங் அதிக்கந்தமத்தோவ ஆபஜ்ஜதி. அவஸேஸங் அந்தோஸீமாய சேவ ஆபஜ்ஜதி ப³ஹிஸீமாய ச. ஸதி வுட்³ட⁴தரே அனஜ்ஜி²ட்டோ² த⁴ம்மங் பா⁴ஸந்தோ ஸங்க⁴மஜ்ஜே² ஆபஜ்ஜதி நாம. க³ணமஜ்ஜே²பி புக்³க³லஸந்திகேபி ஏஸேவ நயோ. காயேன வுட்டா²தீதி திணவத்தா²ரகஸமதே²ன வுட்டா²தி. காயங் அசாலெத்வா வாசாய தே³ஸெந்தஸ்ஸ வாசாய வுட்டா²தி. வசீஸம்பயுத்தங் காயகிரியங் கத்வா தே³ஸெந்தஸ்ஸ காயேன வாசாய வுட்டா²தி நாம. ஸங்க⁴மஜ்ஜே² தே³ஸனாகா³மினீபி வுட்டா²னகா³மினீபி வுட்டா²தி. க³ணபுக்³க³லமஜ்ஜே² பன தே³ஸனாகா³மினீயேவ வுட்டா²தி.
Anto āpajjati no bahīti anupakhajja seyyaṃ kappento anto āpajjati no bahi, bahiāpajjati no antoti saṅghikaṃ mañcādiṃ ajjhokāse santharitvā pakkamanto bahi āpajjati no anto, avasesaṃ pana anto ceva āpajjati bahi ca. Antosīmāyāti āgantuko āgantukavattaṃ adassetvā sachattupāhano vihāraṃ pavisanto upacārasīmaṃ okkantamattova āpajjati. Bahisīmāyāti gamiko dārubhaṇḍapaṭisāmanādigamikavattaṃ apūretvā pakkamanto upacārasīmaṃ atikkantamattova āpajjati. Avasesaṃ antosīmāya ceva āpajjati bahisīmāya ca. Sati vuḍḍhatare anajjhiṭṭho dhammaṃ bhāsanto saṅghamajjhe āpajjati nāma. Gaṇamajjhepi puggalasantikepi eseva nayo. Kāyena vuṭṭhātīti tiṇavatthārakasamathena vuṭṭhāti. Kāyaṃ acāletvā vācāya desentassa vācāya vuṭṭhāti. Vacīsampayuttaṃ kāyakiriyaṃ katvā desentassa kāyena vācāya vuṭṭhāti nāma. Saṅghamajjhe desanāgāminīpi vuṭṭhānagāminīpi vuṭṭhāti. Gaṇapuggalamajjhe pana desanāgāminīyeva vuṭṭhāti.
ஆகா³ள்ஹாய சேதெய்யாதி ஆகா³ள்ஹாய த³ள்ஹபா⁴வாய சேதெய்ய; தஜ்ஜனீயகம்மாதி³கதஸ்ஸ வத்தங் ந பூரயதோ இச்ச²மானோ ஸங்கோ⁴ உக்கே²பனீயகம்மங் கரெய்யாதி அத்தோ². அலஜ்ஜீ ச ஹோதி பா³லோ ச அபகதத்தோ சாதி எத்த² பா³லோ ‘‘அயங் த⁴ம்மாத⁴ம்மங் ந ஜானாதி’’ அபகதத்தோ வா ‘‘ஆபத்தானாபத்திங் ந ஜானாதீ’’தி ந எத்தாவதா கம்மங் காதப்³ப³ங்; பா³லபா⁴வமூலகங் பன அபகதத்தபா⁴வமூலகஞ்ச ஆபத்திங் ஆபன்னஸ்ஸ கம்மங் காதப்³ப³ந்தி அத்தோ². அதி⁴ஸீலே ஸீலவிபன்னோ நாம த்³வே ஆபத்திக்க²ந்தே⁴ ஆபன்னோ; ஆசாரவிபன்னோ நாம பஞ்ச ஆபத்திக்க²ந்தே⁴ ஆபன்னோ; தி³ட்டி²விபன்னோ நாம அந்தக்³கா³ஹிகாய தி³ட்டி²யா ஸமன்னாக³தோ. தேஸங் ஆபத்திங் அபஸ்ஸந்தானங் அப்படிகரொந்தானங் தி³ட்டி²ஞ்ச அனிஸ்ஸஜ்ஜந்தானங்யேவ கம்மங் காதப்³ப³ங்.
Āgāḷhāya ceteyyāti āgāḷhāya daḷhabhāvāya ceteyya; tajjanīyakammādikatassa vattaṃ na pūrayato icchamāno saṅgho ukkhepanīyakammaṃ kareyyāti attho. Alajjī ca hoti bālo ca apakatatto cāti ettha bālo ‘‘ayaṃ dhammādhammaṃ na jānāti’’ apakatatto vā ‘‘āpattānāpattiṃ na jānātī’’ti na ettāvatā kammaṃ kātabbaṃ; bālabhāvamūlakaṃ pana apakatattabhāvamūlakañca āpattiṃ āpannassa kammaṃ kātabbanti attho. Adhisīle sīlavipanno nāma dve āpattikkhandhe āpanno; ācāravipanno nāma pañca āpattikkhandhe āpanno; diṭṭhivipanno nāma antaggāhikāya diṭṭhiyā samannāgato. Tesaṃ āpattiṃ apassantānaṃ appaṭikarontānaṃ diṭṭhiñca anissajjantānaṃyeva kammaṃ kātabbaṃ.
காயிகோ த³வோ நாம பாஸகாதீ³ஹி ஜூதகீளனாதி³பே⁴தோ³ அனாசாரோ; வாசஸிகோ த³வோ நாம முகா²லம்ப³ரகரணாதி³பே⁴தோ³ அனாசாரோ; காயிகவாசஸிகோ நாம நச்சனகா³யனாதி³பே⁴தோ³ த்³வீஹிபி த்³வாரேஹி அனாசாரோ . காயிகோ அனாசாரோ நாம காயத்³வாரே பஞ்ஞத்தஸிக்கா²பத³வீதிக்கமோ; வாசஸிகோ அனாசாரோ நாம வசீத்³வாரே பஞ்ஞத்தஸிக்கா²பத³வீதிக்கமோ; காயிகவாசஸிகோ நாம த்³வாரத்³வயேபி பஞ்ஞத்தஸிக்கா²பத³வீதிக்கமோ. காயிகேன உபகா⁴திகேனாதி காயத்³வாரே பஞ்ஞத்தஸ்ஸ ஸிக்கா²பத³ஸ்ஸ அஸிக்க²னேன, யோ ஹி தங் ந ஸிக்க²தி, ஸோ நங் உபகா⁴தேதி, தஸ்மா தஸ்ஸ தங் அஸிக்க²னங் ‘‘காயிகங் உபகா⁴திக’’ந்தி வுச்சதி. ஸேஸபத³த்³வயேபி ஏஸேவ நயோ. காயிகேன மிச்சா²ஜீவேனாதி ஜங்க⁴பேஸனிகாதி³னா வா க³ண்ட³பா²லனாதி³னா வா வேஜ்ஜகம்மேன ; வாசஸிகேனாதி ஸாஸனஉக்³க³ஹணஆரோசனாதி³னா; ததியபத³ங் உப⁴யஸம்பயோக³வஸேன வுத்தங்.
Kāyiko davo nāma pāsakādīhi jūtakīḷanādibhedo anācāro; vācasiko davo nāma mukhālambarakaraṇādibhedo anācāro; kāyikavācasiko nāma naccanagāyanādibhedo dvīhipi dvārehi anācāro . Kāyiko anācāro nāma kāyadvāre paññattasikkhāpadavītikkamo; vācasiko anācāro nāma vacīdvāre paññattasikkhāpadavītikkamo; kāyikavācasiko nāma dvāradvayepi paññattasikkhāpadavītikkamo. Kāyikena upaghātikenāti kāyadvāre paññattassa sikkhāpadassa asikkhanena, yo hi taṃ na sikkhati, so naṃ upaghāteti, tasmā tassa taṃ asikkhanaṃ ‘‘kāyikaṃ upaghātika’’nti vuccati. Sesapadadvayepi eseva nayo. Kāyikena micchājīvenāti jaṅghapesanikādinā vā gaṇḍaphālanādinā vā vejjakammena ; vācasikenāti sāsanauggahaṇaārocanādinā; tatiyapadaṃ ubhayasampayogavasena vuttaṃ.
அலங் பி⁴க்கு² மா ப⁴ண்ட³னந்தி அலங் பி⁴க்கு² மா ப⁴ண்ட³னங் கரி, மா கலஹங், மா விவாத³ங் கரீதி அத்தோ². ந வோஹரிதப்³ப³ந்தி ந கிஞ்சி வத்தப்³ப³ங்; வத³தோபி ஹி தாதி³ஸஸ்ஸ வசனங் ந ஸோதப்³ப³ங் மஞ்ஞந்தி. ந கிஸ்மிஞ்சி பச்சேகட்டா²னேதி கிஸ்மிஞ்சி பீ³ஜனக்³கா³ஹாதி³கே ஏகஸ்மிம்பி ஜெட்ட²கட்டா²னே ந ட²பேதப்³போ³தி அத்தோ². ஓகாஸகம்மங் காரெந்தஸ்ஸாதி ‘‘கரோது ஆயஸ்மா ஓகாஸங், அஹங் தங் வத்துகாமோ’’தி ஏவங் ஓகாஸங் காரெந்தஸ்ஸ. நாலங் ஓகாஸகம்மங் காதுந்தி ‘‘கிங் த்வங் கரிஸ்ஸஸீ’’தி ஓகாஸோ ந காதப்³போ³. ஸவசனீயங் நாதா³தப்³ப³ந்தி வசனங் ந ஆதா³தப்³ப³ங், வசனம்பி ந ஸோதப்³ப³ங்; யத்த² க³ஹெத்வா க³ந்துகாமோ ஹோதி, ந தத்த² க³ந்தப்³ப³ந்தி அத்தோ².
Alaṃ bhikkhu mā bhaṇḍananti alaṃ bhikkhu mā bhaṇḍanaṃ kari, mā kalahaṃ, mā vivādaṃ karīti attho. Na voharitabbanti na kiñci vattabbaṃ; vadatopi hi tādisassa vacanaṃ na sotabbaṃ maññanti. Na kismiñci paccekaṭṭhāneti kismiñci bījanaggāhādike ekasmimpi jeṭṭhakaṭṭhāne na ṭhapetabboti attho. Okāsakammaṃ kārentassāti ‘‘karotu āyasmā okāsaṃ, ahaṃ taṃ vattukāmo’’ti evaṃ okāsaṃ kārentassa. Nālaṃ okāsakammaṃ kātunti ‘‘kiṃ tvaṃ karissasī’’ti okāso na kātabbo. Savacanīyaṃ nādātabbanti vacanaṃ na ādātabbaṃ, vacanampi na sotabbaṃ; yattha gahetvā gantukāmo hoti, na tattha gantabbanti attho.
தீஹங்கே³ஹி ஸமன்னாக³தஸ்ஸ பி⁴க்கு²னோ வினயோதி யங் ஸோ ஜானாதி, ஸோ தஸ்ஸ வினயோ நாம ஹோதி; ஸோ ந புச்சி²தப்³போ³தி அத்தோ². அனுயோகோ³ ந தா³தப்³போ³தி ‘‘இத³ங் கப்பதீ’’தி புச்ச²ந்தஸ்ஸ புச்சா²ய ஓகாஸோ ந தா³தப்³போ³, ‘‘அஞ்ஞங் புச்சா²’’தி வத்தப்³போ³. இதி ஸோ நேவ புச்சி²தப்³போ³ நாஸ்ஸ புச்சா² ஸோதப்³பா³தி அத்தோ². வினயோ ந ஸாகச்சா²தப்³போ³தி வினயபஞ்ஹோ ந ஸாகச்சி²தப்³போ³, கப்பியாகப்பியகதா² ந ஸங்ஸந்தே³தப்³பா³.
Tīhaṅgehi samannāgatassa bhikkhuno vinayoti yaṃ so jānāti, so tassa vinayo nāma hoti; so na pucchitabboti attho. Anuyogo na dātabboti ‘‘idaṃ kappatī’’ti pucchantassa pucchāya okāso na dātabbo, ‘‘aññaṃ pucchā’’ti vattabbo. Iti so neva pucchitabbo nāssa pucchā sotabbāti attho. Vinayo na sākacchātabboti vinayapañho na sākacchitabbo, kappiyākappiyakathā na saṃsandetabbā.
இத³மப்பஹாயாதி ஏதங் ப்³ரஹ்மசாரிபடிஞ்ஞாதாதி³கங் லத்³தி⁴ங் அவிஜஹித்வா. ஸுத்³த⁴ங் ப்³ரஹ்மசாரிந்தி கீ²ணாஸவங் பி⁴க்கு²ங். ‘‘பாதப்³யதங் ஆபஜ்ஜதீ’’தி பாதப்³யபா⁴வங் படிஸேவனங் ஆபஜ்ஜதி. ‘‘இத³மப்பஹாயா’’தி வசனதோ பன தங் ப்³ரஹ்மசாரிபடிஞ்ஞாதங் பஹாய கீ²ணாஸவங் ‘‘முஸா மயா ப⁴ணிதங், க²மத² மே’’தி க²மாபெத்வா ‘‘நத்தி² காமேஸு தோ³ஸோ’’தி லத்³தி⁴ங் விஜஹித்வா க³திவிஸோத⁴னங் கரெய்ய. அகுஸலமூலானீதி அகுஸலானி சேவ மூலானி ச, அகுஸலானங் வா மூலானி அகுஸலமூலானி. குஸலமூலேஸுபி ஏஸேவ நயோ. து³ட்டு² சரிதானி விரூபானி வா சரிதானி து³ச்சரிதானி. ஸுட்டு² சரிதானி ஸுந்த³ரானி வா சரிதானி ஸுசரிதானி. காயேன கரணபூ⁴தேன கதங் து³ச்சரிதங் காயது³ச்சரிதங். ஏஸ நயோ ஸப்³ப³த்த². ஸேஸங் தத்த² தத்த² வுத்தனயத்தா உத்தானமேவாதி.
Idamappahāyāti etaṃ brahmacāripaṭiññātādikaṃ laddhiṃ avijahitvā. Suddhaṃ brahmacārinti khīṇāsavaṃ bhikkhuṃ. ‘‘Pātabyataṃ āpajjatī’’ti pātabyabhāvaṃ paṭisevanaṃ āpajjati. ‘‘Idamappahāyā’’ti vacanato pana taṃ brahmacāripaṭiññātaṃ pahāya khīṇāsavaṃ ‘‘musā mayā bhaṇitaṃ, khamatha me’’ti khamāpetvā ‘‘natthi kāmesu doso’’ti laddhiṃ vijahitvā gativisodhanaṃ kareyya. Akusalamūlānīti akusalāni ceva mūlāni ca, akusalānaṃ vā mūlāni akusalamūlāni. Kusalamūlesupi eseva nayo. Duṭṭhu caritāni virūpāni vā caritāni duccaritāni. Suṭṭhu caritāni sundarāni vā caritāni sucaritāni. Kāyena karaṇabhūtena kataṃ duccaritaṃ kāyaduccaritaṃ. Esa nayo sabbattha. Sesaṃ tattha tattha vuttanayattā uttānamevāti.
திகவாரவண்ணனா நிட்டி²தா.
Tikavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 3. திகவாரோ • 3. Tikavāro
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஏகுத்தரிகனயோ திகவாரவண்ணனா • Ekuttarikanayo tikavāravaṇṇanā
