| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
திகவாரவண்ணனா
Tikavāravaṇṇanā
323. திகேஸு வசீஸம்பயுத்தங் காயகிரியங் கத்வாதி காயேன நிபச்சகாரங் கத்வா. முகா²லம்ப³ரகரணாதி³பே⁴தோ³தி முக²பே⁴ரிவாத³னாதி³ப்பபே⁴தோ³. யஸ்ஸ ஸிக்கா²பத³ஸ்ஸ வீதிக்கமே காயஸமுட்டா²னா ஆபத்தியோ, தங் காயத்³வாரே பஞ்ஞத்தஸிக்கா²பத³ங். உபகா⁴தேதீதி வினாஸேதி. ந ஆதா³தப்³ப³ந்தி ‘‘இமஸ்மா விஹாரா பரம்பி மா நிக்க²ம, வினயத⁴ரானங் வா ஸந்திகங் ஆக³ச்ச² வினிச்ச²யங் தா³து’’ந்தி வுத்தே தஸ்ஸ வசனங் ந க³ஹேதப்³ப³ந்தி அத்தோ².
323. Tikesu vacīsampayuttaṃ kāyakiriyaṃ katvāti kāyena nipaccakāraṃ katvā. Mukhālambarakaraṇādibhedoti mukhabherivādanādippabhedo. Yassa sikkhāpadassa vītikkame kāyasamuṭṭhānā āpattiyo, taṃ kāyadvāre paññattasikkhāpadaṃ. Upaghātetīti vināseti. Na ādātabbanti ‘‘imasmā vihārā parampi mā nikkhama, vinayadharānaṃ vā santikaṃ āgaccha vinicchayaṃ dātu’’nti vutte tassa vacanaṃ na gahetabbanti attho.
அகுஸலானி சேவ மூலானி சாதி அகோஸல்லஸம்பூ⁴தட்டே²ன ஏகந்தாகுஸலபா⁴வதோ அகுஸலானி, அத்தனா ஸம்பயுத்தத⁴ம்மானங் ஸுப்பதிட்டி²தபா⁴வஸாத⁴னதோ மூலானி, ந அகுஸலபா⁴வஸாத⁴னதோ. ந ஹி மூலதோ அகுஸலானங் அகுஸலபா⁴வோ, குஸலாதீ³னங் வா குஸலாதி³பா⁴வோ. ததா² ச ஸதி மோமூஹசித்தத்³வயமோஹஸ்ஸ அகுஸலபா⁴வோ ந ஸியா.
Akusalāni ceva mūlāni cāti akosallasambhūtaṭṭhena ekantākusalabhāvato akusalāni, attanā sampayuttadhammānaṃ suppatiṭṭhitabhāvasādhanato mūlāni, na akusalabhāvasādhanato. Na hi mūlato akusalānaṃ akusalabhāvo, kusalādīnaṃ vā kusalādibhāvo. Tathā ca sati momūhacittadvayamohassa akusalabhāvo na siyā.
து³ட்டு² சரிதானீதி பச்சயதோ ஸம்பயுத்தத⁴ம்மதோ பவத்திஆகாரதோ ச ந ஸுட்டு² அஸம்மாபவத்திதானி. விரூபானீதி பீ³ப⁴ச்சா²னி ஸம்பதி ஆயதிஞ்ச அனிட்ட²ரூபத்தா. ஸுட்டு² சரிதானீதிஆதீ³ஸு வுத்தவிபரியாயேன அத்தோ² வேதி³தப்³போ³. த்³வேபி சேதே திகா பண்ணத்தியா வா கம்மபதே²ஹி வா கதே²தப்³பா³. பண்ணத்தியா தாவ காயத்³வாரே பஞ்ஞத்தஸிக்கா²பத³ஸ்ஸ வீதிக்கமோ காயது³ச்சரிதங், அவீதிக்கமோ காயஸுசரிதங். வசீத்³வாரே பஞ்ஞத்தஸிக்கா²பத³ஸ்ஸ வீதிக்கமோ வசீது³ச்சரிதங், அவீதிக்கமோ வசீஸுசரிதங். உப⁴யத்த² பஞ்ஞத்தஸிக்கா²பத³ஸ்ஸ வீதிக்கமோ மனோது³ச்சரிதங் மனொத்³வாரே பஞ்ஞத்தஸிக்கா²பத³ஸ்ஸ அபா⁴வதோ. தயித³ங் த்³வாரத்³வயே அகிரியஸமுட்டா²னாய ஆபத்தியா வஸேன வேதி³தப்³ப³ங். யதா²வுத்தாய ஆபத்தியா அவீதிக்கமோவ மனோஸுசரிதங். அயங் பண்ணத்திகதா².
Duṭṭhu caritānīti paccayato sampayuttadhammato pavattiākārato ca na suṭṭhu asammāpavattitāni. Virūpānīti bībhacchāni sampati āyatiñca aniṭṭharūpattā. Suṭṭhu caritānītiādīsu vuttavipariyāyena attho veditabbo. Dvepi cete tikā paṇṇattiyā vā kammapathehi vā kathetabbā. Paṇṇattiyā tāva kāyadvāre paññattasikkhāpadassa vītikkamo kāyaduccaritaṃ, avītikkamo kāyasucaritaṃ. Vacīdvāre paññattasikkhāpadassa vītikkamo vacīduccaritaṃ, avītikkamo vacīsucaritaṃ. Ubhayattha paññattasikkhāpadassa vītikkamo manoduccaritaṃ manodvāre paññattasikkhāpadassa abhāvato. Tayidaṃ dvāradvaye akiriyasamuṭṭhānāya āpattiyā vasena veditabbaṃ. Yathāvuttāya āpattiyā avītikkamova manosucaritaṃ. Ayaṃ paṇṇattikathā.
பாணாதிபாதாத³யோ பன திஸ்ஸோ சேதனா காயத்³வாரே வசீத்³வாரேபி உப்பன்னா காயது³ச்சரிதங் த்³வாரந்தரே உப்பன்னஸ்ஸபி கம்மஸ்ஸ ஸனாமாபரிச்சாக³தோ யேபு⁴ய்யவுத்தியா தப்³ப³ஹுலவுத்தியா ச. தேனாஹு அட்ட²கதா²சரியா –
Pāṇātipātādayo pana tisso cetanā kāyadvāre vacīdvārepi uppannā kāyaduccaritaṃ dvārantare uppannassapi kammassa sanāmāpariccāgato yebhuyyavuttiyā tabbahulavuttiyā ca. Tenāhu aṭṭhakathācariyā –
‘‘த்³வாரே சரந்தி கம்மானி, ந த்³வாரா த்³வாரசாரினோ;
‘‘Dvāre caranti kammāni, na dvārā dvāracārino;
தஸ்மா த்³வாரேஹி கம்மானி, அஞ்ஞமஞ்ஞங் வவத்தி²தா’’தி. (த⁴॰ ஸ॰ அட்ட²॰ காமாவசரகுஸல த்³வாரகதா², காயகம்மத்³வார);
Tasmā dvārehi kammāni, aññamaññaṃ vavatthitā’’ti. (dha. sa. aṭṭha. kāmāvacarakusala dvārakathā, kāyakammadvāra);
ததா² சதஸ்ஸோ முஸாவாதா³தி³சேதனா காயத்³வாரேபி வசீத்³வாரேபி உப்பன்னா வசீது³ச்சரிதங், அபி⁴ஜ்ஜா² ப்³யாபாதோ³ மிச்சா²தி³ட்டீ²தி தயோ மனோகம்மபூ⁴தாய சேதனாய ஸம்பயுத்தத⁴ம்மா மனோது³ச்சரிதங், காயவசீகம்மபூ⁴தாய பன சேதனாய ஸம்பயுத்தா அபி⁴ஜ்ஜா²த³யோ தங்தங்பக்கி²கா வா ஹொந்தி அப்³போ³ஹாரிகா வா. பாணாதிபாதாதீ³ஹி விரமந்தஸ்ஸ உப்பன்னா திஸ்ஸோ சேதனாபி விரதியோபி காயஸுசரிதங் காயிகஸ்ஸ வீதிக்கமஸ்ஸ அகரணவஸேன பவத்தனதோ. காயேன பன ஸிக்கா²பதா³னங் ஸமாதி³யமானே ஸீலஸ்ஸ காயஸுசரிதபா⁴வே வத்தப்³ப³மேவ நத்தி². முஸாவாதா³தீ³ஹி விரமந்தஸ்ஸ சதஸ்ஸோ சேதனாபி விரதியோபி வசீஸுசரிதங் வாசஸிகஸ்ஸ வீதிக்கமஸ்ஸ அகரணவஸேன பவத்தனதோ. அனபி⁴ஜ்ஜா² அப்³யாபாதோ³ ஸம்மாதி³ட்டீ²தி தயோ சேதனாஸம்பயுத்தத⁴ம்மா மனோஸுசரிதந்தி அயங் கம்மபத²கதா².
Tathā catasso musāvādādicetanā kāyadvārepi vacīdvārepi uppannā vacīduccaritaṃ, abhijjhā byāpādo micchādiṭṭhīti tayo manokammabhūtāya cetanāya sampayuttadhammā manoduccaritaṃ, kāyavacīkammabhūtāya pana cetanāya sampayuttā abhijjhādayo taṃtaṃpakkhikā vā honti abbohārikā vā. Pāṇātipātādīhi viramantassa uppannā tisso cetanāpi viratiyopi kāyasucaritaṃ kāyikassa vītikkamassa akaraṇavasena pavattanato. Kāyena pana sikkhāpadānaṃ samādiyamāne sīlassa kāyasucaritabhāve vattabbameva natthi. Musāvādādīhi viramantassa catasso cetanāpi viratiyopi vacīsucaritaṃ vācasikassa vītikkamassa akaraṇavasena pavattanato. Anabhijjhā abyāpādo sammādiṭṭhīti tayo cetanāsampayuttadhammā manosucaritanti ayaṃ kammapathakathā.
திகவாரவண்ணனா நிட்டி²தா.
Tikavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 3. திகவாரோ • 3. Tikavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஏகுத்தரிகனயோ திகவாரவண்ணனா • Ekuttarikanayo tikavāravaṇṇanā
