| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
திகவாரவண்ணனா
Tikavāravaṇṇanā
323. திகேஸு லோஹிதுப்பாதா³பத்திந்தி பாராஜிகாபத்திங். ஆவுஸோவாதே³னாதி ‘‘ஆவுஸோ’’தி ஆலபனேன. ஆபத்திந்தி து³க்கடாபத்திங். ஸேஸா ரத்திஞ்சேவ தி³வா சாதி எத்த² அருணுக்³க³மனே ஆபஜ்ஜிதப்³பா³ பட²மகதி²னாதீ³ (பாரா॰ 459) ஸப்³பா³ ஆபத்தியோபி ரத்திந்தி³வானங் வேமஜ்ஜே²யேவ ஆபஜ்ஜிதப்³ப³த்தா ததியகொட்டா²ஸஞ்ஞேவ பவிட்டா²தி த³ட்ட²ப்³பா³. அத² வா உத்³த⁴ஸ்தே அருணே ஆபஜ்ஜிதப்³ப³த்தா தி³வா ஆபஜ்ஜிதப்³பே³ஸு ஏவ பவிட்டா²தி த³ட்ட²ப்³பா³, அத்த²ங்க³தே ஸூரியே பி⁴க்கு²னியோ ஓவாத³னாபத்தியோ, பன ரத்தந்த⁴காரே புரிஸேன ஸத்³தி⁴ங் ஸந்திட்ட²னாபத்தி ச ரத்தியஞ்ஞேவ ஆபஜ்ஜிதப்³பா³.
323. Tikesu lohituppādāpattinti pārājikāpattiṃ. Āvusovādenāti ‘‘āvuso’’ti ālapanena. Āpattinti dukkaṭāpattiṃ. Sesā rattiñceva divā cāti ettha aruṇuggamane āpajjitabbā paṭhamakathinādī (pārā. 459) sabbā āpattiyopi rattindivānaṃ vemajjheyeva āpajjitabbattā tatiyakoṭṭhāsaññeva paviṭṭhāti daṭṭhabbā. Atha vā uddhaste aruṇe āpajjitabbattā divā āpajjitabbesu eva paviṭṭhāti daṭṭhabbā, atthaṅgate sūriye bhikkhuniyo ovādanāpattiyo, pana rattandhakāre purisena saddhiṃ santiṭṭhanāpatti ca rattiyaññeva āpajjitabbā.
புரேப⁴த்தங் குலானி உபஸங்கமனஅனதிரித்தபோ⁴ஜனாதீ³னி தி³வா ஏவ ஆபஜ்ஜிதப்³பா³னி. கேசி பன ‘‘போ⁴ஜனபடிஸங்யுத்தானி ஸேகி²யானி, க³ணபோ⁴ஜனாதீ³னி ச தி³வா ஏவ ஆபஜ்ஜிதப்³பா³னீ’’தி வத³ந்தி. தஸ்மா ஈதி³ஸா ஆபத்தியோ முஞ்சித்வா ஸேஸாவ ததியகொட்டா²ஸங் ப⁴ஜந்தீதி வேதி³தப்³ப³ங்.
Purebhattaṃ kulāni upasaṅkamanaanatirittabhojanādīni divā eva āpajjitabbāni. Keci pana ‘‘bhojanapaṭisaṃyuttāni sekhiyāni, gaṇabhojanādīni ca divā eva āpajjitabbānī’’ti vadanti. Tasmā īdisā āpattiyo muñcitvā sesāva tatiyakoṭṭhāsaṃ bhajantīti veditabbaṃ.
ந ஊனத³ஸவஸ்ஸோதி த³ஸவஸ்ஸஸ்ஸ பா³லஸ்ஸேவ பஞ்ஞத்தஸிக்கா²பத³த்தா வுத்தங். ஸத்³தி⁴விஹாரிகஅந்தேவாஸிகேஸு அஸம்மாவத்தனாபத்திங், அலஜ்ஜீனங் நிஸ்ஸயதா³னாதி³ம்பி த³ஸவஸ்ஸோவ ஆபஜ்ஜதி, வுட்டா²பினிங் த்³வே வஸ்ஸானி அனநுப³ந்தா⁴தி³ம்பி ஊனத³ஸவஸ்ஸா ஆபஜ்ஜந்தி. அப்³யாகதசித்தோதி ஸுபந்தஸ்ஸ ப⁴வங்க³சித்தங் ஸந்தா⁴ய வுத்தங்.
Na ūnadasavassoti dasavassassa bālasseva paññattasikkhāpadattā vuttaṃ. Saddhivihārikaantevāsikesu asammāvattanāpattiṃ, alajjīnaṃ nissayadānādimpi dasavassova āpajjati, vuṭṭhāpiniṃ dve vassāni ananubandhādimpi ūnadasavassā āpajjanti. Abyākatacittoti supantassa bhavaṅgacittaṃ sandhāya vuttaṃ.
அப்பவாரெந்தோதி அனாத³ரியேன அப்பவாரெந்தோ கேனசி பச்சயேன அப்பவாரெத்வா காளபக்க²சாதுத்³த³ஸே ஸங்கே⁴ பவாரெந்தே தத்த² அனாத³ரியேன அப்பவாரெந்தோ தமேவ ஆபத்திங் காளேபி ஆபஜ்ஜதீதி ஜுண்ஹே ஏவாதி நியமோ ந தி³ஸ்ஸதி, பச்சி²மவஸ்ஸங்வுத்தோ² பன பச்சி²மகத்திகபுண்ணமியமேவ பவாரேதுங் லப்³ப⁴தீதி தத்த² அப்பவாரணாபச்சயா ஆபத்திங் ஆபஜ்ஜமானோ ஏவ ஜுண்ஹே ஆபஜ்ஜதீதி நியமேதப்³போ³தி த³ட்ட²ப்³ப³ங். ஜுண்ஹே கப்பதீதி எத்தா²பி ஏஸேவ நயோ.
Appavārentoti anādariyena appavārento kenaci paccayena appavāretvā kāḷapakkhacātuddase saṅghe pavārente tattha anādariyena appavārento tameva āpattiṃ kāḷepi āpajjatīti juṇhe evāti niyamo na dissati, pacchimavassaṃvuttho pana pacchimakattikapuṇṇamiyameva pavāretuṃ labbhatīti tattha appavāraṇāpaccayā āpattiṃ āpajjamāno eva juṇhe āpajjatīti niyametabboti daṭṭhabbaṃ. Juṇhe kappatīti etthāpi eseva nayo.
‘‘அபச்சுத்³த⁴ரித்வா ஹேமந்தே ஆபஜ்ஜதீ’’தி இமினா ‘‘வஸ்ஸானங் சாதுமாஸங் அதி⁴ட்டா²து’’ந்தி நியமவசனேனேவ அபச்சுத்³த⁴ரந்தஸ்ஸ து³க்கடந்தி த³ஸ்ஸேதி. வஸ்ஸானுபக³மனஅகரணீயேன பக்கமாத³யோபி வஸ்ஸே ஏவ ஆபஜ்ஜதி. வத்தி²கம்மாதி³ம்பி கி³லானோ ஏவ. அதோ⁴தபாதே³ஹி அக்கமனாதீ³னிபி அந்தோ ஏவ ஆபஜ்ஜதி . பி⁴க்கு²னியா அனாபுச்சா² ஆராமப்பவேஸனாதி³ ச அந்தோஸீமாயமேவ. நிஸ்ஸயபடிபன்னஸ்ஸ அனாபுச்சா²தி³ஸாபக்கமனாதி³ ச ப³ஹிஸீமாயமேவ. பாதிமொக்கு²த்³தே³ஸே ஸந்தியா ஆபத்தியா அனாவிகரணாபத்திஸமனுபா⁴ஸனஊனவீஸதிவஸ்ஸூபஸம்பாத³னாதி³ஸப்³ப³அத⁴ம்மகம்மாபத்தியோபி ஸங்கே⁴ ஏவ. அத⁴ம்மேன க³ணுபோஸதா²தீ³ஸுபி க³ணாதி³மஜ்ஜே² ஏவ. அலஜ்ஜிஸ்ஸ ஸந்திகே நிஸ்ஸயக்³க³ஹணாதி³பி புக்³க³லஸ்ஸ ஸந்திகே ஏவ ஆபஜ்ஜதி.
‘‘Apaccuddharitvā hemante āpajjatī’’ti iminā ‘‘vassānaṃ cātumāsaṃ adhiṭṭhātu’’nti niyamavacaneneva apaccuddharantassa dukkaṭanti dasseti. Vassānupagamanaakaraṇīyena pakkamādayopi vasse eva āpajjati. Vatthikammādimpi gilāno eva. Adhotapādehi akkamanādīnipi anto eva āpajjati . Bhikkhuniyā anāpucchā ārāmappavesanādi ca antosīmāyameva. Nissayapaṭipannassa anāpucchādisāpakkamanādi ca bahisīmāyameva. Pātimokkhuddese santiyā āpattiyā anāvikaraṇāpattisamanubhāsanaūnavīsativassūpasampādanādisabbaadhammakammāpattiyopi saṅghe eva. Adhammena gaṇuposathādīsupi gaṇādimajjhe eva. Alajjissa santike nissayaggahaṇādipi puggalassa santike eva āpajjati.
தீணி அத⁴ம்மிகானி அமூள்ஹவினயஸ்ஸ தா³னானீதி யோ உம்மத்தகோபி வீதிக்கமகாலே, அனும்மத்தோ ஸஞ்சிச்சேவ ஆபத்திங் ஆபஜ்ஜித்வா பி⁴க்கூ²ஹி பச்சா² சோதி³தோ ஸரமானோ ஏவ ‘‘ந ஸராமீ’’தி வத³தி, யோ ச ‘‘ஸுபினங் விய ஸராமீ’’தி வா முஸா வத³தி, யோ ச உம்மத்தககாலே கதங் ஸப்³ப³ம்பி ஸப்³பே³ஸங் வட்டதீதி வத³தி, இமேஸங் திண்ணங் தி³ன்னானி தீணி அமூள்ஹவினயஸ்ஸ தா³னானி அத⁴ம்மிகானி.
Tīṇi adhammikāni amūḷhavinayassa dānānīti yo ummattakopi vītikkamakāle, anummatto sañcicceva āpattiṃ āpajjitvā bhikkhūhi pacchā codito saramāno eva ‘‘na sarāmī’’ti vadati, yo ca ‘‘supinaṃ viya sarāmī’’ti vā musā vadati, yo ca ummattakakāle kataṃ sabbampi sabbesaṃ vaṭṭatīti vadati, imesaṃ tiṇṇaṃ dinnāni tīṇi amūḷhavinayassa dānāni adhammikāni.
அபகதத்தோதி வினயே அபகதஞ்ஞூ. தேனாஹ ‘‘ஆபத்தானாபத்திங் ந ஜானாதீ’’தி (பரி॰ 325). ‘‘தி³ட்டி²ஞ்ச அனிஸ்ஸஜ்ஜந்தானங்யேவ கம்மங் காதப்³ப³’’ந்தி இத³ங் பி⁴க்கூ²ஹி ஓவதி³யமானஸ்ஸ தி³ட்டி²யா அனிஸ்ஸஜ்ஜனபச்சயா து³க்கடங், பாசித்தியம்பி வா அவஸ்ஸமேவ ஸம்ப⁴வதீதி வுத்தங்.
Apakatattoti vinaye apakataññū. Tenāha ‘‘āpattānāpattiṃ na jānātī’’ti (pari. 325). ‘‘Diṭṭhiñca anissajjantānaṃyeva kammaṃ kātabba’’nti idaṃ bhikkhūhi ovadiyamānassa diṭṭhiyā anissajjanapaccayā dukkaṭaṃ, pācittiyampi vā avassameva sambhavatīti vuttaṃ.
முகா²லம்ப³ரகரணாதி³பே⁴தோ³தி முக²பே⁴ரீவாத³னாதி³ப்பபே⁴தோ³. உபகா⁴தேதீதி வினாஸேதி. பீ³ஜனிக்³கா³ஹாதி³கேதி சித்தங் பீ³ஜனிங் கா³ஹெத்வா அனுமோத³னாதி³கரணேதி அத்தோ².
Mukhālambarakaraṇādibhedoti mukhabherīvādanādippabhedo. Upaghātetīti vināseti. Bījaniggāhādiketi cittaṃ bījaniṃ gāhetvā anumodanādikaraṇeti attho.
திகவாரவண்ணனா நிட்டி²தா.
Tikavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 3. திகவாரோ • 3. Tikavāro
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / திகவாரவண்ணனா • Tikavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஏகுத்தரிகனயோ திகவாரவண்ணனா • Ekuttarikanayo tikavāravaṇṇanā
