| Library / Tipiṭaka / д̇ибидага • Tipiṭaka / бариваара-адтагат̇аа • Parivāra-aṭṭhakathā |
д̇игаваараван̣н̣анаа
Tikavāravaṇṇanā
323. д̇игзсу ад̇т̇аабад̇д̇и д̇идтанд̇з бхаг̇авад̇и аабаж̇ж̇ад̇ийд̇и ад̇т̇и аабад̇д̇и, яам̣ д̇идтанд̇з бхаг̇авад̇и аабаж̇ж̇ад̇ийд̇и ад̇т̇о. зсзва наяо саб̣б̣ад̇т̇а. д̇ад̇т̇а лохид̇уббаад̣̇аабад̇д̇им̣ д̇идтанд̇з аабаж̇ж̇ад̇и. ‘‘зд̇арахи ко банаананд̣̇а, бхигкуу ан̃н̃аман̃н̃ам̣ аавусоваад̣̇зна самуд̣̇аажаранд̇и, на во мамажжаязна звам̣ самуд̣̇аажарид̇аб̣б̣ам̣, навагзна, аананд̣̇а, бхигкунаа т̇зро бхигкуу ‘бханд̇з’д̇и ваа ‘ааяасмаа’д̇и ваа самуд̣̇аажарид̇аб̣б̣о’’д̇и важанад̇о т̇зрам̣ аавусоваад̣̇зна самуд̣̇аажаран̣абажжаяаа аабад̇д̇им̣ бариниб̣б̣уд̇з бхаг̇авад̇и аабаж̇ж̇ад̇и, но д̇идтанд̇з. имаа д̣̇вз аабад̇д̇ияо табзд̇ваа авасзсаа д̇харанд̇зби бхаг̇авад̇и аабаж̇ж̇ад̇и, бариниб̣б̣уд̇зби.
323. Tikesu atthāpatti tiṭṭhante bhagavati āpajjatīti atthi āpatti, yaṃ tiṭṭhante bhagavati āpajjatīti attho. Eseva nayo sabbattha. Tattha lohituppādāpattiṃ tiṭṭhante āpajjati. ‘‘Etarahi kho panānanda, bhikkhū aññamaññaṃ āvusovādena samudācaranti, na vo mamaccayena evaṃ samudācaritabbaṃ, navakena, ānanda, bhikkhunā thero bhikkhū ‘bhante’ti vā ‘āyasmā’ti vā samudācaritabbo’’ti vacanato theraṃ āvusovādena samudācaraṇapaccayā āpattiṃ parinibbute bhagavati āpajjati, no tiṭṭhante. Imā dve āpattiyo ṭhapetvā avasesā dharantepi bhagavati āpajjati, parinibbutepi.
баваарзд̇ваа анад̇ирид̇д̇ам̣ бхун̃ж̇анд̇о аабад̇д̇им̣ гаалз аабаж̇ж̇ад̇и но вигаалз. вигаалабхож̇анаабад̇д̇им̣ бана вигаалз аабаж̇ж̇ад̇и но гаалз. авасзсаа гаалз жзва аабаж̇ж̇ад̇и вигаалз жа. сахаг̇аарасзяяам̣ рад̇д̇им̣ аабаж̇ж̇ад̇и, д̣̇ваарам̣ асам̣варид̇ваа бадисаллийяанам̣ д̣̇иваа. сзсаа рад̇д̇ин̃жзва д̣̇иваа жа. ‘‘д̣̇асавассомхи ад̇ирзгад̣̇асавассомхий’’д̇и б̣аало аб̣яад̇д̇о барисам̣ убадтаабзнд̇о д̣̇асавассо аабаж̇ж̇ад̇и но уунад̣̇асавассо . ‘‘ахам̣ бан̣д̣ид̇о б̣яад̇д̇о’’д̇и наво ваа маж̇жхимо ваа барисам̣ убадтаабзнд̇о уунад̣̇асавассо аабаж̇ж̇ад̇и но д̣̇асавассо. сзсаа д̣̇асавассо жзва аабаж̇ж̇ад̇и уунад̣̇асавассо жа. ‘‘бан̃жавассомхий’’д̇и б̣аало аб̣яад̇д̇о аниссааяа васанд̇о бан̃жавассо аабаж̇ж̇ад̇и. ‘‘ахам̣ бан̣д̣ид̇о б̣яад̇д̇о’’д̇и наваго аниссааяа васанд̇о уунабан̃жавассо аабаж̇ж̇ад̇и. сзсам̣ бан̃жавассо жзва аабаж̇ж̇ад̇и уунабан̃жавассо жа. анубасамбаннам̣ бад̣̇асод̇хаммам̣ ваажзнд̇о, маад̇уг̇аамасса д̇хаммам̣ д̣̇зсзнд̇о зваруубам̣ аабад̇д̇им̣ гусалажид̇д̇о аабаж̇ж̇ад̇и, баарааж̇ига-суггависсадти-гааяасам̣саг̇г̇а-д̣̇удтулла-ад̇д̇агаамабаарижарияа-д̣̇удтад̣̇оса-сан̇гхабхзд̣̇абахаарад̣̇аана-д̇аласад̇д̇игаад̣̇ибхзд̣̇ам̣ агусалажид̇д̇о аабаж̇ж̇ад̇и, асан̃жижжа сахаг̇аарасзяяаад̣̇им̣ аб̣яаагад̇ажид̇д̇о аабаж̇ж̇ад̇и, яам̣ арахаава аабаж̇ж̇ад̇и, саб̣б̣ам̣ аб̣яаагад̇ажид̇д̇ова аабаж̇ж̇ад̇и, мзт̇унад̇хаммаад̣̇ибхзд̣̇амаабад̇д̇им̣ сукавзд̣̇анаасаман̇г̇ий аабаж̇ж̇ад̇и, д̣̇удтад̣̇осаад̣̇ибхзд̣̇ам̣ д̣̇угкавзд̣̇анаасаман̇г̇ий, яам̣ сукавзд̣̇анаасаман̇г̇ий аабаж̇ж̇ад̇и, д̇ам̣язва маж̇жхад̇д̇о худ̇ваа аабаж̇ж̇анд̇о ад̣̇угкамасукавзд̣̇анаасаман̇г̇ий аабаж̇ж̇ад̇и.
Pavāretvā anatirittaṃ bhuñjanto āpattiṃ kāle āpajjati no vikāle. Vikālabhojanāpattiṃ pana vikāle āpajjati no kāle. Avasesā kāle ceva āpajjati vikāle ca. Sahagāraseyyaṃ rattiṃ āpajjati, dvāraṃ asaṃvaritvā paṭisallīyanaṃ divā. Sesā rattiñceva divā ca. ‘‘Dasavassomhi atirekadasavassomhī’’ti bālo abyatto parisaṃ upaṭṭhāpento dasavasso āpajjati no ūnadasavasso . ‘‘Ahaṃ paṇḍito byatto’’ti navo vā majjhimo vā parisaṃ upaṭṭhāpento ūnadasavasso āpajjati no dasavasso. Sesā dasavasso ceva āpajjati ūnadasavasso ca. ‘‘Pañcavassomhī’’ti bālo abyatto anissāya vasanto pañcavasso āpajjati. ‘‘Ahaṃ paṇḍito byatto’’ti navako anissāya vasanto ūnapañcavasso āpajjati. Sesaṃ pañcavasso ceva āpajjati ūnapañcavasso ca. Anupasampannaṃ padasodhammaṃ vācento, mātugāmassa dhammaṃ desento evarūpaṃ āpattiṃ kusalacitto āpajjati, pārājika-sukkavissaṭṭhi-kāyasaṃsagga-duṭṭhulla-attakāmapāricariya-duṭṭhadosa-saṅghabhedapahāradāna-talasattikādibhedaṃ akusalacitto āpajjati, asañcicca sahagāraseyyādiṃ abyākatacitto āpajjati, yaṃ arahāva āpajjati, sabbaṃ abyākatacittova āpajjati, methunadhammādibhedamāpattiṃ sukhavedanāsamaṅgī āpajjati, duṭṭhadosādibhedaṃ dukkhavedanāsamaṅgī, yaṃ sukhavedanāsamaṅgī āpajjati, taṃyeva majjhatto hutvā āpajjanto adukkhamasukhavedanāsamaṅgī āpajjati.
д̇аяо бадигкзбаад̇и б̣уд̣̇д̇хасса бхаг̇авад̇о д̇аяо бадигкзбаа. жад̇уусу бажжаязсу махижчад̇аа асанд̇удтид̇аа гилзсасаллзканабадибад̇д̇ияаа аг̇обааяанаа, имз хи д̇аяо д̇хаммаа б̣уд̣̇д̇хзна бхаг̇авад̇аа бадигкид̇д̇аа. аббижчад̇аад̣̇аяо бана д̇аяо б̣уд̣̇д̇хзна бхаг̇авад̇аа анун̃н̃аад̇аа, д̇зна вуд̇д̇ам̣ ‘‘д̇аяо анун̃н̃аад̇аа’’д̇и.
Tayo paṭikkhepāti buddhassa bhagavato tayo paṭikkhepā. Catūsu paccayesu mahicchatā asantuṭṭhitā kilesasallekhanapaṭipattiyā agopāyanā, ime hi tayo dhammā buddhena bhagavatā paṭikkhittā. Appicchatādayo pana tayo buddhena bhagavatā anuññātā, tena vuttaṃ ‘‘tayo anuññātā’’ti.
‘‘д̣̇асавассомхий’’д̇и барисам̣ убадтаабзнд̇о ‘‘бан̃жавассомхий’’д̇и ниссаяам̣ аг̇ан̣ханд̇о б̣аало аабаж̇ж̇ад̇и но бан̣д̣ид̇о, уунад̣̇асавассо ‘‘б̣яад̇д̇омхий’’д̇и б̣ахуссуд̇ад̇д̇аа барисам̣ убадтаабзнд̇о уунабан̃жавассо жа ниссаяам̣ аг̇ан̣ханд̇о бан̣д̣ид̇о аабаж̇ж̇ад̇и но б̣аало; авасзсам̣ бан̣д̣ид̇о жзва аабаж̇ж̇ад̇и б̣аало жа. вассам̣ анубаг̇ажчанд̇о гаал̣з аабаж̇ж̇ад̇и но ж̇ун̣хз; махаабавааран̣ааяа аббаваарзнд̇о ж̇ун̣хз аабаж̇ж̇ад̇и но гаал̣з; авасзсам̣ гаал̣з жзва аабаж̇ж̇ад̇и ж̇ун̣хз жа. вассуубаг̇аманам̣ гаал̣з габбад̇и но ж̇ун̣хз; махаабавааран̣ааяа бавааран̣аа ж̇ун̣хз габбад̇и но гаал̣з; сзсам̣ анун̃н̃аад̇агам̣ гаал̣з жзва габбад̇и ж̇ун̣хз жа.
‘‘Dasavassomhī’’ti parisaṃ upaṭṭhāpento ‘‘pañcavassomhī’’ti nissayaṃ agaṇhanto bālo āpajjati no paṇḍito, ūnadasavasso ‘‘byattomhī’’ti bahussutattā parisaṃ upaṭṭhāpento ūnapañcavasso ca nissayaṃ agaṇhanto paṇḍito āpajjati no bālo; avasesaṃ paṇḍito ceva āpajjati bālo ca. Vassaṃ anupagacchanto kāḷe āpajjati no juṇhe; mahāpavāraṇāya appavārento juṇhe āpajjati no kāḷe; avasesaṃ kāḷe ceva āpajjati juṇhe ca. Vassūpagamanaṃ kāḷe kappati no juṇhe; mahāpavāraṇāya pavāraṇā juṇhe kappati no kāḷe; sesaṃ anuññātakaṃ kāḷe ceva kappati juṇhe ca.
гад̇д̇игабун̣н̣амаасияаа бажчимз баадибад̣̇ад̣̇ивасз вигаббзд̇ваа табид̇ам̣ вассигасаадигам̣ ниваасзнд̇о хзманд̇з аабаж̇ж̇ад̇и. гурунд̣̇ияам̣ бана ‘‘гад̇д̇игабун̣н̣амад̣̇ивасз абажжуд̣̇д̇харид̇ваа хзманд̇з аабаж̇ж̇ад̇ий’’д̇и вуд̇д̇ам̣, д̇амби сувуд̇д̇ам̣. ‘‘жаад̇умаасам̣ ад̇хидтаад̇ум̣ д̇ад̇о барам̣ вигаббзд̇у’’нд̇и хи вуд̇д̇ам̣. ад̇ирзгамаасз сзсз г̇имхаанз бариязсанд̇о ад̇ирзгад̣дхамаасз сзсз гад̇ваа ниваасзнд̇о жа г̇имхз аабаж̇ж̇ад̇и наама. сад̇ияаа вассигасаадигааяа наг̇г̇о гааяам̣ овассаабзнд̇о вассз аабаж̇ж̇ад̇и наама. баарисуд̣̇д̇хиубосат̇ам̣ ваа ад̇хидтаанубосат̇ам̣ ваа гаронд̇о сан̇гхо аабаж̇ж̇ад̇и. суд̇д̇уд̣̇д̣̇зсан̃жа ад̇хидтаанубосат̇ан̃жа гаронд̇о г̇ан̣о аабаж̇ж̇ад̇и. згаго суд̇д̇уд̣̇д̣̇зсам̣ баарисуд̣̇д̇хиубосат̇ан̃жа гаронд̇о буг̇г̇ало аабаж̇ж̇ад̇и. бавааран̣ааяаби зсзва наяо.
Kattikapuṇṇamāsiyā pacchime pāṭipadadivase vikappetvā ṭhapitaṃ vassikasāṭikaṃ nivāsento hemante āpajjati. Kurundiyaṃ pana ‘‘kattikapuṇṇamadivase apaccuddharitvā hemante āpajjatī’’ti vuttaṃ, tampi suvuttaṃ. ‘‘Cātumāsaṃ adhiṭṭhātuṃ tato paraṃ vikappetu’’nti hi vuttaṃ. Atirekamāse sese gimhāne pariyesanto atirekaḍḍhamāse sese katvā nivāsento ca gimhe āpajjati nāma. Satiyā vassikasāṭikāya naggo kāyaṃ ovassāpento vasse āpajjati nāma. Pārisuddhiuposathaṃ vā adhiṭṭhānuposathaṃ vā karonto saṅgho āpajjati. Suttuddesañca adhiṭṭhānuposathañca karonto gaṇo āpajjati. Ekako suttuddesaṃ pārisuddhiuposathañca karonto puggalo āpajjati. Pavāraṇāyapi eseva nayo.
сан̇гхубосат̇о жа сан̇гхабавааран̣аа жа сан̇гхассзва габбад̇и. г̇ан̣убосат̇о жа г̇ан̣абавааран̣аа жа г̇ан̣ассзва габбад̇и. ад̇хидтаанубосат̇о жа ад̇хидтаанабавааран̣аа жа буг̇г̇алассзва габбад̇и. ‘‘баарааж̇игам̣ аабанномхий’’д̇иаад̣̇ийни бхан̣анд̇о вад̇т̇ум̣ чаад̣̇зд̇и на аабад̇д̇им̣, ‘‘мзт̇унам̣ д̇хаммам̣ бадисзви’’нд̇иаад̣̇ийни бхан̣анд̇о аабад̇д̇им̣ чаад̣̇зд̇и но вад̇т̇ум̣, яо нзва вад̇т̇ум̣ на аабад̇д̇им̣ аарожзд̇и, аяам̣ вад̇т̇ун̃жзва чаад̣̇зд̇и аабад̇д̇ин̃жа.
Saṅghuposatho ca saṅghapavāraṇā ca saṅghasseva kappati. Gaṇuposatho ca gaṇapavāraṇā ca gaṇasseva kappati. Adhiṭṭhānuposatho ca adhiṭṭhānapavāraṇā ca puggalasseva kappati. ‘‘Pārājikaṃ āpannomhī’’tiādīni bhaṇanto vatthuṃ chādeti na āpattiṃ, ‘‘methunaṃ dhammaṃ paṭisevi’’ntiādīni bhaṇanto āpattiṃ chādeti no vatthuṃ, yo neva vatthuṃ na āpattiṃ āroceti, ayaṃ vatthuñceva chādeti āpattiñca.
бадижчаад̣̇зд̇ийд̇и бадижчаад̣̇и. ж̇анд̇аагхарамзва бадижчаад̣̇и ж̇анд̇аагхарабадижчаад̣̇и. ид̇араасуби зсзва наяо. д̣̇ваарам̣ бид̣̇ахид̇ваа анд̇ож̇анд̇аагхарз тид̇зна баригаммам̣ гаад̇ум̣ ваддад̇и. уд̣̇агз од̇ин̣н̣знааби зд̇ад̣̇зва ваддад̇и. убхаяад̇т̇а каад̣̇ид̇ум̣ бхун̃ж̇ид̇ум̣ ваа на ваддад̇и. вад̇т̇абадижчаад̣̇и саб̣б̣агаббияад̇ааяа бадижчаннзна саб̣б̣ам̣ гаад̇ум̣ ваддад̇и. ваханд̇ийд̇и яанд̇и нияяанд̇и; нинд̣̇ам̣ ваа бадиггосам̣ ваа на лабханд̇и. жанд̣̇аман̣д̣алам̣ аб̣бхаамахигаад̇хуумараж̇араахувимуд̇д̇ам̣ вивадам̣язва вирожад̇и, на д̇зсу ан̃н̃ад̇арзна бадижчаннам̣. д̇ат̇аа суурияаман̣д̣алам̣, д̇хаммавинаяоби виварид̇ваа вибхаж̇ид̇ваа д̣̇зсияамаанова вирожад̇и но бадижчанно.
Paṭicchādetīti paṭicchādi. Jantāgharameva paṭicchādi jantāgharapaṭicchādi. Itarāsupi eseva nayo. Dvāraṃ pidahitvā antojantāghare ṭhitena parikammaṃ kātuṃ vaṭṭati. Udake otiṇṇenāpi etadeva vaṭṭati. Ubhayattha khādituṃ bhuñjituṃ vā na vaṭṭati. Vatthapaṭicchādi sabbakappiyatāya paṭicchannena sabbaṃ kātuṃ vaṭṭati. Vahantīti yanti niyyanti; nindaṃ vā paṭikkosaṃ vā na labhanti. Candamaṇḍalaṃ abbhāmahikādhūmarajarāhuvimuttaṃ vivaṭaṃyeva virocati, na tesu aññatarena paṭicchannaṃ. Tathā sūriyamaṇḍalaṃ, dhammavinayopi vivaritvā vibhajitvā desiyamānova virocati no paṭicchanno.
ан̃н̃зна бхзсаж̇ж̇зна гаран̣ийязна ан̃н̃ам̣ вин̃н̃аабзнд̇о г̇илаано аабаж̇ж̇ад̇и, на бхзсаж̇ж̇зна гаран̣ийязна бхзсаж̇ж̇ам̣ вин̃н̃аабзнд̇о аг̇илаано аабаж̇ж̇ад̇и, авасзсам̣ аабад̇д̇им̣ г̇илаано жзва аабаж̇ж̇ад̇и аг̇илаано жа.
Aññena bhesajjena karaṇīyena aññaṃ viññāpento gilāno āpajjati, na bhesajjena karaṇīyena bhesajjaṃ viññāpento agilāno āpajjati, avasesaṃ āpattiṃ gilāno ceva āpajjati agilāno ca.
анд̇о аабаж̇ж̇ад̇и но б̣ахийд̇и анубакаж̇ж̇а сзяяам̣ габбзнд̇о анд̇о аабаж̇ж̇ад̇и но б̣ахи, б̣ахи аабаж̇ж̇ад̇и но анд̇од̇и сан̇гхигам̣ ман̃жаад̣̇им̣ аж̇жхогаасз сант̇арид̇ваа баггаманд̇о б̣ахи аабаж̇ж̇ад̇и но анд̇о, авасзсам̣ бана анд̇о жзва аабаж̇ж̇ад̇и б̣ахи жа. анд̇осиймааяаад̇и ааг̇анд̇уго ааг̇анд̇угавад̇д̇ам̣ ад̣̇ассзд̇ваа сачад̇д̇убаахано вихаарам̣ бависанд̇о убажаарасиймам̣ огганд̇амад̇д̇ова аабаж̇ж̇ад̇и. б̣ахисиймааяаад̇и г̇амиго д̣̇аарубхан̣д̣абадисааманаад̣̇иг̇амигавад̇д̇ам̣ абуурзд̇ваа баггаманд̇о убажаарасиймам̣ ад̇игганд̇амад̇д̇ова аабаж̇ж̇ад̇и. авасзсам̣ анд̇осиймааяа жзва аабаж̇ж̇ад̇и б̣ахисиймааяа жа. сад̇и вуд̣дхад̇арз анаж̇жхидто д̇хаммам̣ бхаасанд̇о сан̇гхамаж̇жхз аабаж̇ж̇ад̇и наама. г̇ан̣амаж̇жхзби буг̇г̇аласанд̇игзби зсзва наяо. гааязна вудтаад̇ийд̇и д̇ин̣авад̇т̇аарагасамат̇зна вудтаад̇и. гааяам̣ ажаалзд̇ваа ваажааяа д̣̇зсзнд̇асса ваажааяа вудтаад̇и. важийсамбаяуд̇д̇ам̣ гааяагирияам̣ гад̇ваа д̣̇зсзнд̇асса гааязна ваажааяа вудтаад̇и наама. сан̇гхамаж̇жхз д̣̇зсанааг̇ааминийби вудтаанаг̇ааминийби вудтаад̇и. г̇ан̣абуг̇г̇аламаж̇жхз бана д̣̇зсанааг̇ааминийязва вудтаад̇и.
Anto āpajjati no bahīti anupakhajja seyyaṃ kappento anto āpajjati no bahi, bahiāpajjati no antoti saṅghikaṃ mañcādiṃ ajjhokāse santharitvā pakkamanto bahi āpajjati no anto, avasesaṃ pana anto ceva āpajjati bahi ca. Antosīmāyāti āgantuko āgantukavattaṃ adassetvā sachattupāhano vihāraṃ pavisanto upacārasīmaṃ okkantamattova āpajjati. Bahisīmāyāti gamiko dārubhaṇḍapaṭisāmanādigamikavattaṃ apūretvā pakkamanto upacārasīmaṃ atikkantamattova āpajjati. Avasesaṃ antosīmāya ceva āpajjati bahisīmāya ca. Sati vuḍḍhatare anajjhiṭṭho dhammaṃ bhāsanto saṅghamajjhe āpajjati nāma. Gaṇamajjhepi puggalasantikepi eseva nayo. Kāyena vuṭṭhātīti tiṇavatthārakasamathena vuṭṭhāti. Kāyaṃ acāletvā vācāya desentassa vācāya vuṭṭhāti. Vacīsampayuttaṃ kāyakiriyaṃ katvā desentassa kāyena vācāya vuṭṭhāti nāma. Saṅghamajjhe desanāgāminīpi vuṭṭhānagāminīpi vuṭṭhāti. Gaṇapuggalamajjhe pana desanāgāminīyeva vuṭṭhāti.
ааг̇аал̣хааяа жзд̇зяяаад̇и ааг̇аал̣хааяа д̣̇ал̣хабхаавааяа жзд̇зяяа; д̇аж̇ж̇анийяагаммаад̣̇игад̇асса вад̇д̇ам̣ на буураяад̇о ижчамаано сан̇гхо угкзбанийяагаммам̣ гарзяяаад̇и ад̇т̇о. алаж̇ж̇ий жа ход̇и б̣аало жа абагад̇ад̇д̇о жаад̇и зд̇т̇а б̣аало ‘‘аяам̣ д̇хаммаад̇хаммам̣ на ж̇аанаад̇и’’ абагад̇ад̇д̇о ваа ‘‘аабад̇д̇аанаабад̇д̇им̣ на ж̇аанаад̇ий’’д̇и на зд̇д̇аавад̇аа гаммам̣ гаад̇аб̣б̣ам̣; б̣аалабхаавамуулагам̣ бана абагад̇ад̇д̇абхаавамуулаган̃жа аабад̇д̇им̣ аабаннасса гаммам̣ гаад̇аб̣б̣анд̇и ад̇т̇о. ад̇хисийлз сийлавибанно наама д̣̇вз аабад̇д̇игканд̇хз аабанно; аажааравибанно наама бан̃жа аабад̇д̇игканд̇хз аабанно; д̣̇идтивибанно наама анд̇аг̇г̇аахигааяа д̣̇идтияаа саманнааг̇ад̇о. д̇зсам̣ аабад̇д̇им̣ абассанд̇аанам̣ аббадигаронд̇аанам̣ д̣̇идтин̃жа аниссаж̇ж̇анд̇аанам̣язва гаммам̣ гаад̇аб̣б̣ам̣.
Āgāḷhāya ceteyyāti āgāḷhāya daḷhabhāvāya ceteyya; tajjanīyakammādikatassa vattaṃ na pūrayato icchamāno saṅgho ukkhepanīyakammaṃ kareyyāti attho. Alajjī ca hoti bālo ca apakatatto cāti ettha bālo ‘‘ayaṃ dhammādhammaṃ na jānāti’’ apakatatto vā ‘‘āpattānāpattiṃ na jānātī’’ti na ettāvatā kammaṃ kātabbaṃ; bālabhāvamūlakaṃ pana apakatattabhāvamūlakañca āpattiṃ āpannassa kammaṃ kātabbanti attho. Adhisīle sīlavipanno nāma dve āpattikkhandhe āpanno; ācāravipanno nāma pañca āpattikkhandhe āpanno; diṭṭhivipanno nāma antaggāhikāya diṭṭhiyā samannāgato. Tesaṃ āpattiṃ apassantānaṃ appaṭikarontānaṃ diṭṭhiñca anissajjantānaṃyeva kammaṃ kātabbaṃ.
гааяиго д̣̇аво наама баасагаад̣̇ийхи ж̇ууд̇агийл̣анаад̣̇ибхзд̣̇о анаажааро; ваажасиго д̣̇аво наама мукааламб̣арагаран̣аад̣̇ибхзд̣̇о анаажааро; гааяигаваажасиго наама нажжанаг̇ааяанаад̣̇ибхзд̣̇о д̣̇вийхиби д̣̇ваарзхи анаажааро . гааяиго анаажааро наама гааяад̣̇ваарз бан̃н̃ад̇д̇асигкаабад̣̇авийд̇иггамо; ваажасиго анаажааро наама важийд̣̇ваарз бан̃н̃ад̇д̇асигкаабад̣̇авийд̇иггамо; гааяигаваажасиго наама д̣̇ваарад̣̇ваязби бан̃н̃ад̇д̇асигкаабад̣̇авийд̇иггамо. гааяигзна убагхаад̇игзнаад̇и гааяад̣̇ваарз бан̃н̃ад̇д̇асса сигкаабад̣̇асса асигканзна, яо хи д̇ам̣ на сигкад̇и, со нам̣ убагхаад̇зд̇и, д̇асмаа д̇асса д̇ам̣ асигканам̣ ‘‘гааяигам̣ убагхаад̇ига’’нд̇и вужжад̇и. сзсабад̣̇ад̣̇ваязби зсзва наяо. гааяигзна мижчааж̇ийвзнаад̇и ж̇ан̇гхабзсанигаад̣̇инаа ваа г̇ан̣д̣апааланаад̣̇инаа ваа взж̇ж̇агаммзна ; ваажасигзнаад̇и саасанауг̇г̇ахан̣ааарожанаад̣̇инаа; д̇ад̇ияабад̣̇ам̣ убхаяасамбаяог̇авасзна вуд̇д̇ам̣.
Kāyiko davo nāma pāsakādīhi jūtakīḷanādibhedo anācāro; vācasiko davo nāma mukhālambarakaraṇādibhedo anācāro; kāyikavācasiko nāma naccanagāyanādibhedo dvīhipi dvārehi anācāro . Kāyiko anācāro nāma kāyadvāre paññattasikkhāpadavītikkamo; vācasiko anācāro nāma vacīdvāre paññattasikkhāpadavītikkamo; kāyikavācasiko nāma dvāradvayepi paññattasikkhāpadavītikkamo. Kāyikena upaghātikenāti kāyadvāre paññattassa sikkhāpadassa asikkhanena, yo hi taṃ na sikkhati, so naṃ upaghāteti, tasmā tassa taṃ asikkhanaṃ ‘‘kāyikaṃ upaghātika’’nti vuccati. Sesapadadvayepi eseva nayo. Kāyikena micchājīvenāti jaṅghapesanikādinā vā gaṇḍaphālanādinā vā vejjakammena ; vācasikenāti sāsanauggahaṇaārocanādinā; tatiyapadaṃ ubhayasampayogavasena vuttaṃ.
алам̣ бхигку маа бхан̣д̣ананд̇и алам̣ бхигку маа бхан̣д̣анам̣ гари, маа галахам̣, маа виваад̣̇ам̣ гарийд̇и ад̇т̇о. на вохарид̇аб̣б̣анд̇и на гин̃жи вад̇д̇аб̣б̣ам̣; вад̣̇ад̇оби хи д̇аад̣̇исасса важанам̣ на сод̇аб̣б̣ам̣ ман̃н̃анд̇и. на гисмин̃жи бажжзгадтаанзд̇и гисмин̃жи б̣ийж̇анаг̇г̇аахаад̣̇игз згасмимби ж̇здтагадтаанз на табзд̇аб̣б̣од̇и ад̇т̇о. огаасагаммам̣ гаарзнд̇ассаад̇и ‘‘гарод̇у ааяасмаа огаасам̣, ахам̣ д̇ам̣ вад̇д̇угаамо’’д̇и звам̣ огаасам̣ гаарзнд̇асса. наалам̣ огаасагаммам̣ гаад̇унд̇и ‘‘гим̣ д̇вам̣ гариссасий’’д̇и огаасо на гаад̇аб̣б̣о. саважанийяам̣ наад̣̇аад̇аб̣б̣анд̇и важанам̣ на аад̣̇аад̇аб̣б̣ам̣, важанамби на сод̇аб̣б̣ам̣; яад̇т̇а г̇ахзд̇ваа г̇анд̇угаамо ход̇и, на д̇ад̇т̇а г̇анд̇аб̣б̣анд̇и ад̇т̇о.
Alaṃ bhikkhu mā bhaṇḍananti alaṃ bhikkhu mā bhaṇḍanaṃ kari, mā kalahaṃ, mā vivādaṃ karīti attho. Na voharitabbanti na kiñci vattabbaṃ; vadatopi hi tādisassa vacanaṃ na sotabbaṃ maññanti. Na kismiñci paccekaṭṭhāneti kismiñci bījanaggāhādike ekasmimpi jeṭṭhakaṭṭhāne na ṭhapetabboti attho. Okāsakammaṃ kārentassāti ‘‘karotu āyasmā okāsaṃ, ahaṃ taṃ vattukāmo’’ti evaṃ okāsaṃ kārentassa. Nālaṃ okāsakammaṃ kātunti ‘‘kiṃ tvaṃ karissasī’’ti okāso na kātabbo. Savacanīyaṃ nādātabbanti vacanaṃ na ādātabbaṃ, vacanampi na sotabbaṃ; yattha gahetvā gantukāmo hoti, na tattha gantabbanti attho.
д̇ийхан̇г̇зхи саманнааг̇ад̇асса бхигкуно винаяод̇и яам̣ со ж̇аанаад̇и, со д̇асса винаяо наама ход̇и; со на бужчид̇аб̣б̣од̇и ад̇т̇о. ануяог̇о на д̣̇аад̇аб̣б̣од̇и ‘‘ид̣̇ам̣ габбад̇ий’’д̇и бужчанд̇асса бужчааяа огаасо на д̣̇аад̇аб̣б̣о, ‘‘ан̃н̃ам̣ бужчаа’’д̇и вад̇д̇аб̣б̣о. ид̇и со нзва бужчид̇аб̣б̣о наасса бужчаа сод̇аб̣б̣аад̇и ад̇т̇о. винаяо на саагажчаад̇аб̣б̣од̇и винаяабан̃хо на саагажчид̇аб̣б̣о, габбияаагаббияагат̇аа на сам̣санд̣̇зд̇аб̣б̣аа.
Tīhaṅgehi samannāgatassa bhikkhuno vinayoti yaṃ so jānāti, so tassa vinayo nāma hoti; so na pucchitabboti attho. Anuyogo na dātabboti ‘‘idaṃ kappatī’’ti pucchantassa pucchāya okāso na dātabbo, ‘‘aññaṃ pucchā’’ti vattabbo. Iti so neva pucchitabbo nāssa pucchā sotabbāti attho. Vinayo na sākacchātabboti vinayapañho na sākacchitabbo, kappiyākappiyakathā na saṃsandetabbā.
ид̣̇амаббахааяаад̇и зд̇ам̣ б̣рахмажаарибадин̃н̃аад̇аад̣̇игам̣ лад̣̇д̇хим̣ авиж̇ахид̇ваа. суд̣̇д̇хам̣ б̣рахмажааринд̇и кийн̣аасавам̣ бхигкум̣. ‘‘баад̇аб̣яад̇ам̣ аабаж̇ж̇ад̇ий’’д̇и баад̇аб̣яабхаавам̣ бадисзванам̣ аабаж̇ж̇ад̇и. ‘‘ид̣̇амаббахааяаа’’д̇и важанад̇о бана д̇ам̣ б̣рахмажаарибадин̃н̃аад̇ам̣ бахааяа кийн̣аасавам̣ ‘‘мусаа маяаа бхан̣ид̇ам̣, камат̇а мз’’д̇и камаабзд̇ваа ‘‘над̇т̇и гаамзсу д̣̇осо’’д̇и лад̣̇д̇хим̣ виж̇ахид̇ваа г̇ад̇ивисод̇ханам̣ гарзяяа. агусаламуулаанийд̇и агусалаани жзва муулаани жа, агусалаанам̣ ваа муулаани агусаламуулаани. гусаламуулзсуби зсзва наяо. д̣̇удту жарид̇аани вируубаани ваа жарид̇аани д̣̇ужжарид̇аани. судту жарид̇аани сунд̣̇араани ваа жарид̇аани сужарид̇аани. гааязна гаран̣абхууд̇зна гад̇ам̣ д̣̇ужжарид̇ам̣ гааяад̣̇ужжарид̇ам̣. зса наяо саб̣б̣ад̇т̇а. сзсам̣ д̇ад̇т̇а д̇ад̇т̇а вуд̇д̇анаяад̇д̇аа уд̇д̇аанамзваад̇и.
Idamappahāyāti etaṃ brahmacāripaṭiññātādikaṃ laddhiṃ avijahitvā. Suddhaṃ brahmacārinti khīṇāsavaṃ bhikkhuṃ. ‘‘Pātabyataṃ āpajjatī’’ti pātabyabhāvaṃ paṭisevanaṃ āpajjati. ‘‘Idamappahāyā’’ti vacanato pana taṃ brahmacāripaṭiññātaṃ pahāya khīṇāsavaṃ ‘‘musā mayā bhaṇitaṃ, khamatha me’’ti khamāpetvā ‘‘natthi kāmesu doso’’ti laddhiṃ vijahitvā gativisodhanaṃ kareyya. Akusalamūlānīti akusalāni ceva mūlāni ca, akusalānaṃ vā mūlāni akusalamūlāni. Kusalamūlesupi eseva nayo. Duṭṭhu caritāni virūpāni vā caritāni duccaritāni. Suṭṭhu caritāni sundarāni vā caritāni sucaritāni. Kāyena karaṇabhūtena kataṃ duccaritaṃ kāyaduccaritaṃ. Esa nayo sabbattha. Sesaṃ tattha tattha vuttanayattā uttānamevāti.
д̇игаваараван̣н̣анаа нидтид̇аа.
Tikavāravaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / бариваарабаал̣и • Parivārapāḷi / 3. д̇игавааро • 3. Tikavāro
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / д̇игаваараван̣н̣анаа • Tikavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / д̇игаваараван̣н̣анаа • Tikavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / д̇игаваараван̣н̣анаа • Tikavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / згуд̇д̇ариганаяо д̇игаваараван̣н̣анаа • Ekuttarikanayo tikavāravaṇṇanā
