| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
9. තිකිච්‌ඡකත්‌ථෙරඅපදානවණ්‌ණනා
9. Tikicchakattheraapadānavaṇṇanā
නගරෙ බන්‌ධුමතියාතිආදිකං ආයස්‌මතො තිකිච්‌ඡකත්‌ථෙරස්‌ස අපදානං. අයම්‌පායස්‌මා පුරිමජිනවරෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ බන්‌ධුමතීනගරෙ වෙජ්‌ජකුලෙ නිබ්‌බත්‌තො බහුස්‌සුතො සුසික්‌ඛිතො වෙජ්‌ජකම්‌මෙ ඡෙකො බහූ රොගිනො තිකිච්‌ඡන්‌තො විපස්‌සිස්‌ස භගවතො උපට්‌ඨාකස්‌ස අසොකනාමත්‌ථෙරස්‌ස රොගං තිකිච්‌ඡි. සො තෙන පුඤ්‌ඤෙන දෙවමනුස්‌සෙසු අපරාපරං සුඛං අනුභවන්‌තො නිබ්‌බත්‌තනිබ්‌බත්‌තභවෙ අරොගො දීඝායුකො සුවණ්‌ණවණ්‌ණසරීරො අහොසි.
Nagarebandhumatiyātiādikaṃ āyasmato tikicchakattherassa apadānaṃ. Ayampāyasmā purimajinavaresu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle bandhumatīnagare vejjakule nibbatto bahussuto susikkhito vejjakamme cheko bahū rogino tikicchanto vipassissa bhagavato upaṭṭhākassa asokanāmattherassa rogaṃ tikicchi. So tena puññena devamanussesu aparāparaṃ sukhaṃ anubhavanto nibbattanibbattabhave arogo dīghāyuko suvaṇṇavaṇṇasarīro ahosi.
39. සො ඉමස්‌මිං බුද්‌ධුප්‌පාදෙ සාවත්‌ථියං ගහපතිකුලෙ නිබ්‌බත්‌තො වුද්‌ධිමන්‌වාය සබ්‌බසිප්‌පෙසු නිප්‌ඵත්‌තිං පත්‌තො අරොගො සුඛිතො විභවසම්‌පන්‌නො රතනත්‌තයෙ පසන්‌නො සත්‌ථු ධම්‌මදෙසනං සුත්‌වා පටිලද්‌ධසද්‌ධො ඝරාවාසං පහාය පබ්‌බජිත්‌වා නචිරස්‌සෙව අරහා හුත්‌වා පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො නගරෙ බන්‌ධුමතියාතිආදිමාහ. තං සබ්‌බං හෙට්‌ඨා වුත්‌තනයත්‌තා උත්‌තානත්‌ථමෙවාති.
39. So imasmiṃ buddhuppāde sāvatthiyaṃ gahapatikule nibbatto vuddhimanvāya sabbasippesu nipphattiṃ patto arogo sukhito vibhavasampanno ratanattaye pasanno satthu dhammadesanaṃ sutvā paṭiladdhasaddho gharāvāsaṃ pahāya pabbajitvā nacirasseva arahā hutvā pubbakammaṃ saritvā somanassajāto pubbacaritāpadānaṃ pakāsento nagare bandhumatiyātiādimāha. Taṃ sabbaṃ heṭṭhā vuttanayattā uttānatthamevāti.
තිකිච්‌ඡකත්‌ථෙරඅපදානවණ්‌ණනා සමත්‌තා.
Tikicchakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 9. තිකිච්‌ඡකත්‌ථෙරඅපදානං • 9. Tikicchakattheraapadānaṃ
