| Library / Tipiṭaka / තිපිටක • Tipiṭaka / අපදානපාළි • Apadānapāḷi |
50. කිඞ්‌කණිපුප්‌ඵවග්‌ගො
50. Kiṅkaṇipupphavaggo
1. තිකිඞ්‌කණිපුප්‌ඵියත්‌ථෙරඅපදානං
1. Tikiṅkaṇipupphiyattheraapadānaṃ
1.
1.
‘‘කණිකාරංව ජොතන්‌තං, නිසින්‌නං පබ්‌බතන්‌තරෙ;
‘‘Kaṇikāraṃva jotantaṃ, nisinnaṃ pabbatantare;
අද්‌දසං විරජං බුද්‌ධං, විපස්‌සිං ලොකනායකං.
Addasaṃ virajaṃ buddhaṃ, vipassiṃ lokanāyakaṃ.
2.
2.
‘‘තීණි කිඞ්‌කණිපුප්‌ඵානි, පග්‌ගය්‌හ අභිරොපයිං;
‘‘Tīṇi kiṅkaṇipupphāni, paggayha abhiropayiṃ;
සම්‌බුද්‌ධමභිපූජෙත්‌වා, ගච්‌ඡාමි දක්‌ඛිණාමුඛො.
Sambuddhamabhipūjetvā, gacchāmi dakkhiṇāmukho.
3.
3.
‘‘තෙන කම්‌මෙන සුකතෙන, චෙතනාපණිධීහි ච;
‘‘Tena kammena sukatena, cetanāpaṇidhīhi ca;
ජහිත්‌වා මානුසං දෙහං, තාවතිංසමගච්‌ඡහං.
Jahitvā mānusaṃ dehaṃ, tāvatiṃsamagacchahaṃ.
4.
4.
‘‘එකනවුතිතො කප්‌පෙ, යං බුද්‌ධමභිපූජයිං;
‘‘Ekanavutito kappe, yaṃ buddhamabhipūjayiṃ;
දුග්‌ගතිං නාභිජානාමි, බුද්‌ධපූජායිදං ඵලං.
Duggatiṃ nābhijānāmi, buddhapūjāyidaṃ phalaṃ.
5.
5.
‘‘කිලෙසා ඣාපිතා මය්‌හං, භවා සබ්‌බෙ සමූහතා;
‘‘Kilesā jhāpitā mayhaṃ, bhavā sabbe samūhatā;
නාගොව බන්‌ධනං ඡෙත්‌වා, විහරාමි අනාසවො.
Nāgova bandhanaṃ chetvā, viharāmi anāsavo.
6.
6.
‘‘ස්‌වාගතං වත මෙ ආසි, මම බුද්‌ධස්‌ස සන්‌තිකෙ;
‘‘Svāgataṃ vata me āsi, mama buddhassa santike;
තිස්‌සො විජ්‌ජා අනුප්‌පත්‌තා, කතං බුද්‌ධස්‌ස සාසනං.
Tisso vijjā anuppattā, kataṃ buddhassa sāsanaṃ.
7.
7.
‘‘පටිසම්‌භිදා චතස්‌සො, විමොක්‌ඛාපි ච අට්‌ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්‌ඤා සච්‌ඡිකතා, කතං බුද්‌ධස්‌ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්‌ථං සුදං ආයස්‌මා තිකිඞ්‌කණිපුප්‌ඵියො ථෙරො ඉමා
Itthaṃ sudaṃ āyasmā tikiṅkaṇipupphiyo thero imā
ගාථායො අභාසිත්‌ථාති.
Gāthāyo abhāsitthāti.
තිකිඞ්‌කණිපුප්‌ඵියත්‌ථෙරස්‌සාපදානං පඨමං.
Tikiṅkaṇipupphiyattherassāpadānaṃ paṭhamaṃ.
