| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. திம்ப³ருகஸுத்தங்
8. Timbarukasuttaṃ
18. ஸாவத்தி²யங் விஹரதி. அத² கோ² திம்ப³ருகோ பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² திம்ப³ருகோ பரிப்³பா³ஜகோ ப⁴க³வந்தங் ஏதத³வோச –
18. Sāvatthiyaṃ viharati. Atha kho timbaruko paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho timbaruko paribbājako bhagavantaṃ etadavoca –
‘‘‘கிங் நு கோ², போ⁴ கோ³தம, ஸயங்கதங் ஸுக²து³க்க²’ந்தி? ‘மா ஹேவங், திம்ப³ருகா’தி ப⁴க³வா அவோச. ‘கிங் பன, போ⁴ கோ³தம, பரங்கதங் ஸுக²து³க்க²’ந்தி? ‘மா ஹேவங், திம்ப³ருகா’தி ப⁴க³வா அவோச. ‘கிங் நு கோ², போ⁴ கோ³தம, ஸயங்கதஞ்ச பரங்கதஞ்ச ஸுக²து³க்க²’ந்தி? ‘மா ஹேவங், திம்ப³ருகா’தி ப⁴க³வா அவோச. ‘கிங் பன, போ⁴ கோ³தம, அஸயங்காரங் அபரங்காரங் அதி⁴ச்சஸமுப்பன்னங் ஸுக²து³க்க²’ந்தி? ‘மா ஹேவங், திம்ப³ருகா’தி ப⁴க³வா அவோச . ‘கிங் நு கோ², போ⁴ கோ³தம, நத்தி² ஸுக²து³க்க²’ந்தி? ‘ந கோ², திம்ப³ருக, நத்தி² ஸுக²து³க்க²ங்; அத்தி² கோ², திம்ப³ருக, ஸுக²து³க்க²’ந்தி. ‘தேன ஹி ப⁴வங் கோ³தமோ ஸுக²து³க்க²ங் ந ஜானாதி, ந பஸ்ஸதீ’தி? ‘ந க்²வாஹங், திம்ப³ருக, ஸுக²து³க்க²ங் ந ஜானாமி, ந பஸ்ஸாமி. ஜானாமி க்²வாஹங், திம்ப³ருக, ஸுக²து³க்க²ங்; பஸ்ஸாமி க்²வாஹங், திம்ப³ருக, ஸுக²து³க்க²’’’ந்தி.
‘‘‘Kiṃ nu kho, bho gotama, sayaṃkataṃ sukhadukkha’nti? ‘Mā hevaṃ, timbarukā’ti bhagavā avoca. ‘Kiṃ pana, bho gotama, paraṃkataṃ sukhadukkha’nti? ‘Mā hevaṃ, timbarukā’ti bhagavā avoca. ‘Kiṃ nu kho, bho gotama, sayaṃkatañca paraṃkatañca sukhadukkha’nti? ‘Mā hevaṃ, timbarukā’ti bhagavā avoca. ‘Kiṃ pana, bho gotama, asayaṃkāraṃ aparaṃkāraṃ adhiccasamuppannaṃ sukhadukkha’nti? ‘Mā hevaṃ, timbarukā’ti bhagavā avoca . ‘Kiṃ nu kho, bho gotama, natthi sukhadukkha’nti? ‘Na kho, timbaruka, natthi sukhadukkhaṃ; atthi kho, timbaruka, sukhadukkha’nti. ‘Tena hi bhavaṃ gotamo sukhadukkhaṃ na jānāti, na passatī’ti? ‘Na khvāhaṃ, timbaruka, sukhadukkhaṃ na jānāmi, na passāmi. Jānāmi khvāhaṃ, timbaruka, sukhadukkhaṃ; passāmi khvāhaṃ, timbaruka, sukhadukkha’’’nti.
‘‘‘கிங் நு கோ², போ⁴ கோ³தம, ஸயங்கதங் ஸுக²து³க்க²’ந்தி இதி புட்டோ² ஸமானோ ‘மா ஹேவங், திம்ப³ருகா’தி வதே³ஸி. ‘கிங் பன, போ⁴ கோ³தம, பரங்கதங் ஸுக²து³க்க²’ந்தி இதி புட்டோ² ஸமானோ ‘மா ஹேவங், திம்ப³ருகா’தி வதே³ஸி. ‘கிங் நு கோ², போ⁴ கோ³தம, ஸயங்கதஞ்ச பரங்கதஞ்ச ஸுக²து³க்க²’ந்தி இதி புட்டோ² ஸமானோ ‘மா ஹேவங், திம்ப³ருகா’தி வதே³ஸி. ‘கிங் பன, போ⁴ கோ³தம, அஸயங்காரங் அபரங்காரங் அதி⁴ச்சஸமுப்பன்னங் ஸுக²து³க்க²’ந்தி இதி புட்டோ² ஸமானோ ‘மா ஹேவங், திம்ப³ருகா’தி வதே³ஸி. ‘கிங் நு கோ², போ⁴ கோ³தம, நத்தி² ஸுக²து³க்க²’ந்தி இதி புட்டோ² ஸமானோ ‘ந கோ², திம்ப³ருக, நத்தி² ஸுக²து³க்க²ங்; அத்தி² கோ², திம்ப³ருக, ஸுக²து³க்க²’ந்தி வதே³ஸி. ‘தேன ஹி ப⁴வங் கோ³தமோ ஸுக²து³க்க²ங் ந ஜானாதி, ந பஸ்ஸதீ’தி இதி புட்டோ² ஸமானோ ‘ந க்²வாஹங், திம்ப³ருக, ஸுக²து³க்க²ங் ந ஜானாமி, ந பஸ்ஸாமி. ஜானாமி க்²வாஹங், திம்ப³ருக, ஸுக²து³க்க²ங்; பஸ்ஸாமி க்²வாஹங், திம்ப³ருக, ஸுக²து³க்க²’ந்தி வதே³ஸி. ஆசிக்க²து ச மே ப⁴வங் கோ³தமோ ஸுக²து³க்க²ங். தே³ஸேது ச மே ப⁴வங் கோ³தமோ ஸுக²து³க்க²’’ந்தி.
‘‘‘Kiṃ nu kho, bho gotama, sayaṃkataṃ sukhadukkha’nti iti puṭṭho samāno ‘mā hevaṃ, timbarukā’ti vadesi. ‘Kiṃ pana, bho gotama, paraṃkataṃ sukhadukkha’nti iti puṭṭho samāno ‘mā hevaṃ, timbarukā’ti vadesi. ‘Kiṃ nu kho, bho gotama, sayaṃkatañca paraṃkatañca sukhadukkha’nti iti puṭṭho samāno ‘mā hevaṃ, timbarukā’ti vadesi. ‘Kiṃ pana, bho gotama, asayaṃkāraṃ aparaṃkāraṃ adhiccasamuppannaṃ sukhadukkha’nti iti puṭṭho samāno ‘mā hevaṃ, timbarukā’ti vadesi. ‘Kiṃ nu kho, bho gotama, natthi sukhadukkha’nti iti puṭṭho samāno ‘na kho, timbaruka, natthi sukhadukkhaṃ; atthi kho, timbaruka, sukhadukkha’nti vadesi. ‘Tena hi bhavaṃ gotamo sukhadukkhaṃ na jānāti, na passatī’ti iti puṭṭho samāno ‘na khvāhaṃ, timbaruka, sukhadukkhaṃ na jānāmi, na passāmi. Jānāmi khvāhaṃ, timbaruka, sukhadukkhaṃ; passāmi khvāhaṃ, timbaruka, sukhadukkha’nti vadesi. Ācikkhatu ca me bhavaṃ gotamo sukhadukkhaṃ. Desetu ca me bhavaṃ gotamo sukhadukkha’’nti.
‘‘‘ஸா வேத³னா, ஸோ வேத³யதீ’தி கோ², திம்ப³ருக, ஆதி³தோ ஸதோ ‘ஸயங்கதங் ஸுக²து³க்க²’ந்தி ஏவம்பாஹங் ந வதா³மி. ‘அஞ்ஞா வேத³னா, அஞ்ஞோ வேத³யதீ’தி கோ², திம்ப³ருக, வேத³னாபி⁴துன்னஸ்ஸ ஸதோ ‘பரங்கதங் ஸுக²து³க்க²’ந்தி ஏவம்பாஹங் ந வதா³மி. ஏதே தே, திம்ப³ருக, உபோ⁴ அந்தே அனுபக³ம்ம மஜ்ஜே²ன ததா²க³தோ த⁴ம்மங் தே³ஸேதி – ‘அவிஜ்ஜாபச்சயா ஸங்கா²ரா; ஸங்கா²ரபச்சயா விஞ்ஞாணங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. அவிஜ்ஜாய த்வேவ அஸேஸவிராக³னிரோதா⁴ ஸங்கா²ரனிரோதோ⁴; ஸங்கா²ரனிரோதா⁴ விஞ்ஞாணனிரோதோ⁴…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதீ’’’தி.
‘‘‘Sā vedanā, so vedayatī’ti kho, timbaruka, ādito sato ‘sayaṃkataṃ sukhadukkha’nti evampāhaṃ na vadāmi. ‘Aññā vedanā, añño vedayatī’ti kho, timbaruka, vedanābhitunnassa sato ‘paraṃkataṃ sukhadukkha’nti evampāhaṃ na vadāmi. Ete te, timbaruka, ubho ante anupagamma majjhena tathāgato dhammaṃ deseti – ‘avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho; saṅkhāranirodhā viññāṇanirodho…pe… evametassa kevalassa dukkhakkhandhassa nirodho hotī’’’ti.
ஏவங் வுத்தே, திம்ப³ருகோ பரிப்³பா³ஜகோ ப⁴க³வந்தங் ஏதத³வோச – ‘‘அபி⁴க்கந்தங், போ⁴ கோ³தம…பே॰… ஏஸாஹங் ப⁴வந்தங் கோ³தமங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³ பாணுபேதங் ஸரணங் க³த’’ந்தி. அட்ட²மங்.
Evaṃ vutte, timbaruko paribbājako bhagavantaṃ etadavoca – ‘‘abhikkantaṃ, bho gotama…pe… esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca. Upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. திம்ப³ருகஸுத்தவண்ணனா • 8. Timbarukasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. திம்ப³ருகஸுத்தவண்ணனா • 8. Timbarukasuttavaṇṇanā
