| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. තිම්‌බරුකසුත්‌තං
8. Timbarukasuttaṃ
18. සාවත්‌ථියං විහරති. අථ ඛො තිම්‌බරුකො පරිබ්‌බාජකො යෙන භගවා තෙනුපසඞ්‌කමි; උපසඞ්‌කමිත්‌වා භගවතා සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො තිම්‌බරුකො පරිබ්‌බාජකො භගවන්‌තං එතදවොච –
18. Sāvatthiyaṃ viharati. Atha kho timbaruko paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho timbaruko paribbājako bhagavantaṃ etadavoca –
‘‘‘කිං නු ඛො, භො ගොතම, සයංකතං සුඛදුක්‌ඛ’න්‌ති? ‘මා හෙවං, තිම්‌බරුකා’ති භගවා අවොච. ‘කිං පන, භො ගොතම, පරංකතං සුඛදුක්‌ඛ’න්‌ති? ‘මා හෙවං, තිම්‌බරුකා’ති භගවා අවොච. ‘කිං නු ඛො, භො ගොතම, සයංකතඤ්‌ච පරංකතඤ්‌ච සුඛදුක්‌ඛ’න්‌ති? ‘මා හෙවං, තිම්‌බරුකා’ති භගවා අවොච. ‘කිං පන, භො ගොතම, අසයංකාරං අපරංකාරං අධිච්‌චසමුප්‌පන්‌නං සුඛදුක්‌ඛ’න්‌ති? ‘මා හෙවං, තිම්‌බරුකා’ති භගවා අවොච . ‘කිං නු ඛො, භො ගොතම, නත්‌ථි සුඛදුක්‌ඛ’න්‌ති? ‘න ඛො, තිම්‌බරුක, නත්‌ථි සුඛදුක්‌ඛං; අත්‌ථි ඛො, තිම්‌බරුක, සුඛදුක්‌ඛ’න්‌ති. ‘තෙන හි භවං ගොතමො සුඛදුක්‌ඛං න ජානාති, න පස්‌සතී’ති? ‘න ඛ්‌වාහං, තිම්‌බරුක, සුඛදුක්‌ඛං න ජානාමි, න පස්‌සාමි. ජානාමි ඛ්‌වාහං, තිම්‌බරුක, සුඛදුක්‌ඛං; පස්‌සාමි ඛ්‌වාහං, තිම්‌බරුක, සුඛදුක්‌ඛ’’’න්‌ති.
‘‘‘Kiṃ nu kho, bho gotama, sayaṃkataṃ sukhadukkha’nti? ‘Mā hevaṃ, timbarukā’ti bhagavā avoca. ‘Kiṃ pana, bho gotama, paraṃkataṃ sukhadukkha’nti? ‘Mā hevaṃ, timbarukā’ti bhagavā avoca. ‘Kiṃ nu kho, bho gotama, sayaṃkatañca paraṃkatañca sukhadukkha’nti? ‘Mā hevaṃ, timbarukā’ti bhagavā avoca. ‘Kiṃ pana, bho gotama, asayaṃkāraṃ aparaṃkāraṃ adhiccasamuppannaṃ sukhadukkha’nti? ‘Mā hevaṃ, timbarukā’ti bhagavā avoca . ‘Kiṃ nu kho, bho gotama, natthi sukhadukkha’nti? ‘Na kho, timbaruka, natthi sukhadukkhaṃ; atthi kho, timbaruka, sukhadukkha’nti. ‘Tena hi bhavaṃ gotamo sukhadukkhaṃ na jānāti, na passatī’ti? ‘Na khvāhaṃ, timbaruka, sukhadukkhaṃ na jānāmi, na passāmi. Jānāmi khvāhaṃ, timbaruka, sukhadukkhaṃ; passāmi khvāhaṃ, timbaruka, sukhadukkha’’’nti.
‘‘‘කිං නු ඛො, භො ගොතම, සයංකතං සුඛදුක්‌ඛ’න්‌ති ඉති පුට්‌ඨො සමානො ‘මා හෙවං, තිම්‌බරුකා’ති වදෙසි. ‘කිං පන, භො ගොතම, පරංකතං සුඛදුක්‌ඛ’න්‌ති ඉති පුට්‌ඨො සමානො ‘මා හෙවං, තිම්‌බරුකා’ති වදෙසි. ‘කිං නු ඛො, භො ගොතම, සයංකතඤ්‌ච පරංකතඤ්‌ච සුඛදුක්‌ඛ’න්‌ති ඉති පුට්‌ඨො සමානො ‘මා හෙවං, තිම්‌බරුකා’ති වදෙසි. ‘කිං පන, භො ගොතම, අසයංකාරං අපරංකාරං අධිච්‌චසමුප්‌පන්‌නං සුඛදුක්‌ඛ’න්‌ති ඉති පුට්‌ඨො සමානො ‘මා හෙවං, තිම්‌බරුකා’ති වදෙසි. ‘කිං නු ඛො, භො ගොතම, නත්‌ථි සුඛදුක්‌ඛ’න්‌ති ඉති පුට්‌ඨො සමානො ‘න ඛො, තිම්‌බරුක, නත්‌ථි සුඛදුක්‌ඛං; අත්‌ථි ඛො, තිම්‌බරුක, සුඛදුක්‌ඛ’න්‌ති වදෙසි. ‘තෙන හි භවං ගොතමො සුඛදුක්‌ඛං න ජානාති, න පස්‌සතී’ති ඉති පුට්‌ඨො සමානො ‘න ඛ්‌වාහං, තිම්‌බරුක, සුඛදුක්‌ඛං න ජානාමි, න පස්‌සාමි. ජානාමි ඛ්‌වාහං, තිම්‌බරුක, සුඛදුක්‌ඛං; පස්‌සාමි ඛ්‌වාහං, තිම්‌බරුක, සුඛදුක්‌ඛ’න්‌ති වදෙසි. ආචික්‌ඛතු ච මෙ භවං ගොතමො සුඛදුක්‌ඛං. දෙසෙතු ච මෙ භවං ගොතමො සුඛදුක්‌ඛ’’න්‌ති.
‘‘‘Kiṃ nu kho, bho gotama, sayaṃkataṃ sukhadukkha’nti iti puṭṭho samāno ‘mā hevaṃ, timbarukā’ti vadesi. ‘Kiṃ pana, bho gotama, paraṃkataṃ sukhadukkha’nti iti puṭṭho samāno ‘mā hevaṃ, timbarukā’ti vadesi. ‘Kiṃ nu kho, bho gotama, sayaṃkatañca paraṃkatañca sukhadukkha’nti iti puṭṭho samāno ‘mā hevaṃ, timbarukā’ti vadesi. ‘Kiṃ pana, bho gotama, asayaṃkāraṃ aparaṃkāraṃ adhiccasamuppannaṃ sukhadukkha’nti iti puṭṭho samāno ‘mā hevaṃ, timbarukā’ti vadesi. ‘Kiṃ nu kho, bho gotama, natthi sukhadukkha’nti iti puṭṭho samāno ‘na kho, timbaruka, natthi sukhadukkhaṃ; atthi kho, timbaruka, sukhadukkha’nti vadesi. ‘Tena hi bhavaṃ gotamo sukhadukkhaṃ na jānāti, na passatī’ti iti puṭṭho samāno ‘na khvāhaṃ, timbaruka, sukhadukkhaṃ na jānāmi, na passāmi. Jānāmi khvāhaṃ, timbaruka, sukhadukkhaṃ; passāmi khvāhaṃ, timbaruka, sukhadukkha’nti vadesi. Ācikkhatu ca me bhavaṃ gotamo sukhadukkhaṃ. Desetu ca me bhavaṃ gotamo sukhadukkha’’nti.
‘‘‘සා වෙදනා, සො වෙදයතී’ති ඛො, තිම්‌බරුක, ආදිතො සතො ‘සයංකතං සුඛදුක්‌ඛ’න්‌ති එවම්‌පාහං න වදාමි. ‘අඤ්‌ඤා වෙදනා, අඤ්‌ඤො වෙදයතී’ති ඛො, තිම්‌බරුක, වෙදනාභිතුන්‌නස්‌ස සතො ‘පරංකතං සුඛදුක්‌ඛ’න්‌ති එවම්‌පාහං න වදාමි. එතෙ තෙ, තිම්‌බරුක, උභො අන්‌තෙ අනුපගම්‌ම මජ්‌ඣෙන තථාගතො ධම්‌මං දෙසෙති – ‘අවිජ්‌ජාපච්‌චයා සඞ්‌ඛාරා; සඞ්‌ඛාරපච්‌චයා විඤ්‌ඤාණං…පෙ.… එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස සමුදයො හොති. අවිජ්‌ජාය ත්‌වෙව අසෙසවිරාගනිරොධා සඞ්‌ඛාරනිරොධො; සඞ්‌ඛාරනිරොධා විඤ්‌ඤාණනිරොධො…පෙ.… එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස නිරොධො හොතී’’’ති.
‘‘‘Sā vedanā, so vedayatī’ti kho, timbaruka, ādito sato ‘sayaṃkataṃ sukhadukkha’nti evampāhaṃ na vadāmi. ‘Aññā vedanā, añño vedayatī’ti kho, timbaruka, vedanābhitunnassa sato ‘paraṃkataṃ sukhadukkha’nti evampāhaṃ na vadāmi. Ete te, timbaruka, ubho ante anupagamma majjhena tathāgato dhammaṃ deseti – ‘avijjāpaccayā saṅkhārā; saṅkhārapaccayā viññāṇaṃ…pe… evametassa kevalassa dukkhakkhandhassa samudayo hoti. Avijjāya tveva asesavirāganirodhā saṅkhāranirodho; saṅkhāranirodhā viññāṇanirodho…pe… evametassa kevalassa dukkhakkhandhassa nirodho hotī’’’ti.
එවං වුත්‌තෙ, තිම්‌බරුකො පරිබ්‌බාජකො භගවන්‌තං එතදවොච – ‘‘අභික්‌කන්‌තං, භො ගොතම…පෙ.… එසාහං භවන්‌තං ගොතමං සරණං ගච්‌ඡාමි ධම්‌මඤ්‌ච භික්‌ඛුසඞ්‌ඝඤ්‌ච. උපාසකං මං භවං ගොතමො ධාරෙතු අජ්‌ජතග්‌ගෙ පාණුපෙතං සරණං ගත’’න්‌ති. අට්‌ඨමං.
Evaṃ vutte, timbaruko paribbājako bhagavantaṃ etadavoca – ‘‘abhikkantaṃ, bho gotama…pe… esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca. Upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. තිම්‌බරුකසුත්‌තවණ්‌ණනා • 8. Timbarukasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8. තිම්‌බරුකසුත්‌තවණ්‌ණනා • 8. Timbarukasuttavaṇṇanā
