| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. திம்ப³ருகஸுத்தவண்ணனா
8. Timbarukasuttavaṇṇanā
18. அட்ட²மே ஸா வேத³னாதிஆதி³ ‘‘ஸயங்கதங் ஸுக²து³க்க²’’ந்தி லத்³தி⁴யா நிஸேத⁴னத்த²ங் வுத்தங். எத்தா²பி ஸதோதி பு⁴ம்மத்தே²யேவ ஸாமிவசனங். தத்ராயங் அத்த²தீ³பனா – ‘‘ஸா வேத³னா, ஸோ வேதி³யதீ’’தி கோ², திம்ப³ருக, ஆதி³ம்ஹியேவ ஏவங் ஸதி ‘‘ஸயங்கதங் ஸுக²து³க்க²’’ந்தி அயங் லத்³தி⁴ ஹோதி. ஏவஞ்ஹி ஸதி வேத³னாய ஏவ வேத³னா கதா ஹோதி. ஏவஞ்ச வத³ந்தோ இமிஸ்ஸா வேத³னாய புப்³பே³பி அத்தி²தங் அனுஜானாதி, ஸஸ்ஸதங் தீ³பேதி ஸஸ்ஸதங் க³ண்ஹாதி. கஸ்மா? தஸ்ஸ ஹி தங் த³ஸ்ஸனங் ஏதங் பரேதி, ஏதங் ஸஸ்ஸதங் உபக³ச்ச²தீதி அத்தோ². புரிமஞ்ஹி அத்த²ங் ஸந்தா⁴யேவேதங் ப⁴க³வதா வுத்தங் ப⁴விஸ்ஸதி, தஸ்மா அட்ட²கதா²யங் தங் யோஜெத்வாவஸ்ஸ அத்தோ² தீ³பிதோ. ஏவம்பாஹங் ந வதா³மீதி அஹங் ‘‘ஸா வேத³னா, ஸோ வேதி³யதீ’’தி ஏவம்பி ந வதா³மி. ‘‘ஸயங்கதங் ஸுக²து³க்க²’’ந்தி ஏவம்பி ந வதா³மீதி அத்தோ².
18. Aṭṭhame sā vedanātiādi ‘‘sayaṃkataṃ sukhadukkha’’nti laddhiyā nisedhanatthaṃ vuttaṃ. Etthāpi satoti bhummattheyeva sāmivacanaṃ. Tatrāyaṃ atthadīpanā – ‘‘sā vedanā, so vediyatī’’ti kho, timbaruka, ādimhiyeva evaṃ sati ‘‘sayaṃkataṃ sukhadukkha’’nti ayaṃ laddhi hoti. Evañhi sati vedanāya eva vedanā katā hoti. Evañca vadanto imissā vedanāya pubbepi atthitaṃ anujānāti, sassataṃ dīpeti sassataṃ gaṇhāti. Kasmā? Tassa hi taṃ dassanaṃ etaṃ pareti, etaṃ sassataṃ upagacchatīti attho. Purimañhi atthaṃ sandhāyevetaṃ bhagavatā vuttaṃ bhavissati, tasmā aṭṭhakathāyaṃ taṃ yojetvāvassa attho dīpito. Evampāhaṃ na vadāmīti ahaṃ ‘‘sā vedanā, so vediyatī’’ti evampi na vadāmi. ‘‘Sayaṃkataṃ sukhadukkha’’nti evampi na vadāmīti attho.
அஞ்ஞா வேத³னாதிஆதி³ ‘‘பரங்கதங் ஸுக²து³க்க²’’ந்தி லத்³தி⁴யா படிஸேத⁴னத்த²ங் வுத்தங். இதா⁴பி அயங் அத்த²யோஜனா –‘‘அஞ்ஞா வேத³னா அஞ்ஞோ வேதி³யதீ’’தி கோ², திம்ப³ருக, ஆதி³ம்ஹியேவ ஏவங் ஸதி பச்சா² யா புரிமபக்கே² காரகவேத³னா, ஸா உச்சி²ன்னா. தாய பன கதங் அஞ்ஞோ வேதி³யதீதி ஏவங் உப்பன்னாய உச்சே²த³தி³ட்டி²யா ஸத்³தி⁴ங் ஸம்பயுத்தாய வேத³னாய அபி⁴துன்னஸ்ஸ ஸதோ ‘‘பரங்கதங் ஸுக²து³க்க²’’ந்தி அயங் லத்³தி⁴ ஹோதி. ஏவஞ்ச வத³ந்தோ காரகோ உச்சி²ன்னோ, அஞ்ஞேன படிஸந்தி⁴ க³ஹிதாதி உச்சே²த³ங் தீ³பேதி, உச்சே²த³ங் க³ண்ஹாதி. கஸ்மா? தஸ்ஸ ஹி தங் த³ஸ்ஸனங் ஏதங் பரேதி, ஏதங் உச்சே²த³ங் உபக³ச்ச²தீதி அத்தோ². இதா⁴பி ஹி இமானி பதா³னி அட்ட²கதா²யங் ஆஹரித்வா யோஜிதானேவ. இமஸ்மிங் ஸுத்தே வேத³னாஸுக²து³க்க²ங் கதி²தங். தஞ்ச கோ² விபாகஸுக²து³க்க²மேவ வட்டதீதி வுத்தங். அட்ட²மங்.
Aññā vedanātiādi ‘‘paraṃkataṃ sukhadukkha’’nti laddhiyā paṭisedhanatthaṃ vuttaṃ. Idhāpi ayaṃ atthayojanā –‘‘aññā vedanā añño vediyatī’’ti kho, timbaruka, ādimhiyeva evaṃ sati pacchā yā purimapakkhe kārakavedanā, sā ucchinnā. Tāya pana kataṃ añño vediyatīti evaṃ uppannāya ucchedadiṭṭhiyā saddhiṃ sampayuttāya vedanāya abhitunnassa sato ‘‘paraṃkataṃ sukhadukkha’’nti ayaṃ laddhi hoti. Evañca vadanto kārako ucchinno, aññena paṭisandhi gahitāti ucchedaṃ dīpeti, ucchedaṃ gaṇhāti. Kasmā? Tassa hi taṃ dassanaṃ etaṃ pareti, etaṃ ucchedaṃ upagacchatīti attho. Idhāpi hi imāni padāni aṭṭhakathāyaṃ āharitvā yojitāneva. Imasmiṃ sutte vedanāsukhadukkhaṃ kathitaṃ. Tañca kho vipākasukhadukkhameva vaṭṭatīti vuttaṃ. Aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. திம்ப³ருகஸுத்தங் • 8. Timbarukasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. திம்ப³ருகஸுத்தவண்ணனா • 8. Timbarukasuttavaṇṇanā
