| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. திமிரவக்³கோ³
9. Timiravaggo
1. திமிரபுப்பி²யத்தே²ரஅபதா³னவண்ணனா
1. Timirapupphiyattheraapadānavaṇṇanā
சந்த³பா⁴கா³னதீ³தீரேதிஆதி³கங் ஆயஸ்மதோ திமிரபுப்பி²யத்தே²ரஸ்ஸ அபதா³னங். கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ வுத்³தி⁴ப்பத்தோ க⁴ராவாஸங் ஸண்ட²பெத்வா வஸந்தோ காமேஸு ஆதீ³னவங் தி³ஸ்வா க⁴ராவாஸங் பஹாய தாபஸபப்³ப³ஜ்ஜங் பப்³ப³ஜித்வா சந்த³பா⁴கா³ய நதி³யா ஸமீபே வஸதி, விவேககாமதாய ஹிமவந்தங் க³ந்த்வா நிஸின்னங் ஸித்³த⁴த்த²ங் ப⁴க³வந்தங் தி³ஸ்வா வந்தி³த்வா தஸ்ஸ கு³ணங் பஸீதி³த்வா திமிரபுப்ப²ங் க³ஹெத்வா பூஜேஸி. ஸோ தேன புஞ்ஞேன தே³வேஸு ச மனுஸ்ஸேஸு ச ஸம்பத்திமனுப⁴வந்தோ ஸங்ஸரித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ வுத்³தி⁴மன்வாய ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி.
Candabhāgānadītīretiādikaṃ āyasmato timirapupphiyattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhippatto gharāvāsaṃ saṇṭhapetvā vasanto kāmesu ādīnavaṃ disvā gharāvāsaṃ pahāya tāpasapabbajjaṃ pabbajitvā candabhāgāya nadiyā samīpe vasati, vivekakāmatāya himavantaṃ gantvā nisinnaṃ siddhatthaṃ bhagavantaṃ disvā vanditvā tassa guṇaṃ pasīditvā timirapupphaṃ gahetvā pūjesi. So tena puññena devesu ca manussesu ca sampattimanubhavanto saṃsaritvā imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajito nacirasseva arahā ahosi.
1. ஸோ அபரபா⁴கே³ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ சந்த³பா⁴கா³னதீ³தீரேதிஆதி³மாஹ. தஸ்ஸத்தோ² ஹெட்டா² வுத்தோவ. அனுபோ⁴தங் வஜாமஹந்தி க³ங்கா³ய ஆஸன்னே வஸனபா⁴வேன ஸப்³ப³த்த² ரம்மபா⁴வேன க³ங்கா³தோ ஹெட்டா² ஸோதானுஸாரேன அஹங் வஜாமி க³ச்சா²மி தத்த² தத்த² வஸாமீதி அத்தோ². நிஸின்னங் ஸமணங் தி³ஸ்வாதி ஸமிதபாபத்தா ஸோஸிதபாபத்தா ஸமணஸங்கா²தங் ஸம்மாஸம்பு³த்³த⁴ங் தி³ஸ்வாதி அத்தோ².
1. So aparabhāge pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tassattho heṭṭhā vuttova. Anubhotaṃ vajāmahanti gaṅgāya āsanne vasanabhāvena sabbattha rammabhāvena gaṅgāto heṭṭhā sotānusārena ahaṃ vajāmi gacchāmi tattha tattha vasāmīti attho. Nisinnaṃ samaṇaṃ disvāti samitapāpattā sositapāpattā samaṇasaṅkhātaṃ sammāsambuddhaṃ disvāti attho.
2. ஏவங் சிந்தேஸஹங் ததா³தி அயங் ப⁴க³வா ஸயங் திண்ணோ ஸப்³ப³ஸத்தே தாரயிஸ்ஸதி ஸங்ஸாரதோ உத்தாரேதி ஸயங் காயத்³வாராதீ³ஹி த³மிதோ அயங் ப⁴க³வா பரே த³மேதி.
2.Evaṃ cintesahaṃ tadāti ayaṃ bhagavā sayaṃ tiṇṇo sabbasatte tārayissati saṃsārato uttāreti sayaṃ kāyadvārādīhi damito ayaṃ bhagavā pare dameti.
3. ஸயங் அஸ்ஸத்தோ² அஸ்ஸாஸம்பத்தோ, கிலேஸபரிளாஹதோ முத்தோ ஸப்³ப³ஸத்தே அஸ்ஸாஸேதி, ஸந்தபா⁴வங் ஆபாபேதி. ஸயங் ஸந்தோ ஸந்தகாயசித்தோ பரேஸங் ஸந்தகாயசித்தங் பாபேதி. ஸயங் முத்தோ ஸங்ஸாரதோ முச்சிதோ பரே ஸங்ஸாரதோ மோசயிஸ்ஸதி. ஸோ அயங் ப⁴க³வா ஸயங் நிப்³பு³தோ கிலேஸக்³கீ³ஹி நிப்³பு³தோ பரேஸம்பி கிலேஸக்³கீ³ஹி நிப்³பா³பெஸ்ஸதீதி அஹங் ததா³ ஏவங் சிந்தேஸிந்தி அத்தோ².
3. Sayaṃ assattho assāsampatto, kilesapariḷāhato mutto sabbasatte assāseti, santabhāvaṃ āpāpeti. Sayaṃ santo santakāyacitto paresaṃ santakāyacittaṃ pāpeti. Sayaṃ mutto saṃsārato muccito pare saṃsārato mocayissati. So ayaṃ bhagavā sayaṃ nibbuto kilesaggīhi nibbuto paresampi kilesaggīhi nibbāpessatīti ahaṃ tadā evaṃ cintesinti attho.
4. க³ஹெத்வா திமிரபுப்ப²ந்தி ஸகலங் வனந்தங் நீலகாளரங்ஸீஹி அந்த⁴காரங் விய குருமானங் கா²யதீதி திமிரங் புப்ப²ங் தங் க³ஹெத்வா கண்ணிகாவண்டங் க³ஹெத்வா மத்த²கே ஸீஸஸ்ஸ உபரி ஆகாஸே ஓகிரிங் பூஜேஸிந்தி அத்தோ². ஸேஸங் உத்தானத்த²மேவாதி.
4.Gahetvā timirapupphanti sakalaṃ vanantaṃ nīlakāḷaraṃsīhi andhakāraṃ viya kurumānaṃ khāyatīti timiraṃ pupphaṃ taṃ gahetvā kaṇṇikāvaṇṭaṃ gahetvā matthake sīsassa upari ākāse okiriṃ pūjesinti attho. Sesaṃ uttānatthamevāti.
திமிரபுப்பி²யத்தே²ரஅபதா³னவண்ணனா ஸமத்தா.
Timirapupphiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. திமிரபுப்பி²யத்தே²ரஅபதா³னங் • 1. Timirapupphiyattheraapadānaṃ
