| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৯. তিমিরৰগ্গো
9. Timiravaggo
১. তিমিরপুপ্ফিযত্থেরঅপদানৰণ্ণনা
1. Timirapupphiyattheraapadānavaṇṇanā
চন্দভাগানদীতীরেতিআদিকং আযস্মতো তিমিরপুপ্ফিযত্থেরস্স অপদানং। কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে একস্মিং কুলগেহে নিব্বত্তো ৰুদ্ধিপ্পত্তো ঘরাৰাসং সণ্ঠপেত্ৰা ৰসন্তো কামেসু আদীনৰং দিস্ৰা ঘরাৰাসং পহায তাপসপব্বজ্জং পব্বজিত্ৰা চন্দভাগায নদিযা সমীপে ৰসতি, ৰিৰেককামতায হিমৰন্তং গন্ত্ৰা নিসিন্নং সিদ্ধত্থং ভগৰন্তং দিস্ৰা ৰন্দিত্ৰা তস্স গুণং পসীদিত্ৰা তিমিরপুপ্ফং গহেত্ৰা পূজেসি। সো তেন পুঞ্ঞেন দেৰেসু চ মনুস্সেসু চ সম্পত্তিমনুভৰন্তো সংসরিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায সত্থরি পসীদিত্ৰা পব্বজিতো নচিরস্সেৰ অরহা অহোসি।
Candabhāgānadītīretiādikaṃ āyasmato timirapupphiyattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhippatto gharāvāsaṃ saṇṭhapetvā vasanto kāmesu ādīnavaṃ disvā gharāvāsaṃ pahāya tāpasapabbajjaṃ pabbajitvā candabhāgāya nadiyā samīpe vasati, vivekakāmatāya himavantaṃ gantvā nisinnaṃ siddhatthaṃ bhagavantaṃ disvā vanditvā tassa guṇaṃ pasīditvā timirapupphaṃ gahetvā pūjesi. So tena puññena devesu ca manussesu ca sampattimanubhavanto saṃsaritvā imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajito nacirasseva arahā ahosi.
১. সো অপরভাগে পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো চন্দভাগানদীতীরেতিআদিমাহ। তস্সত্থো হেট্ঠা ৰুত্তোৰ। অনুভোতং ৰজামহন্তি গঙ্গায আসন্নে ৰসনভাৰেন সব্বত্থ রম্মভাৰেন গঙ্গাতো হেট্ঠা সোতানুসারেন অহং ৰজামি গচ্ছামি তত্থ তত্থ ৰসামীতি অত্থো। নিসিন্নং সমণং দিস্ৰাতি সমিতপাপত্তা সোসিতপাপত্তা সমণসঙ্খাতং সম্মাসম্বুদ্ধং দিস্ৰাতি অত্থো।
1. So aparabhāge pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tassattho heṭṭhā vuttova. Anubhotaṃ vajāmahanti gaṅgāya āsanne vasanabhāvena sabbattha rammabhāvena gaṅgāto heṭṭhā sotānusārena ahaṃ vajāmi gacchāmi tattha tattha vasāmīti attho. Nisinnaṃ samaṇaṃ disvāti samitapāpattā sositapāpattā samaṇasaṅkhātaṃ sammāsambuddhaṃ disvāti attho.
২. এৰং চিন্তেসহং তদাতি অযং ভগৰা সযং তিণ্ণো সব্বসত্তে তারযিস্সতি সংসারতো উত্তারেতি সযং কাযদ্ৰারাদীহি দমিতো অযং ভগৰা পরে দমেতি।
2.Evaṃ cintesahaṃ tadāti ayaṃ bhagavā sayaṃ tiṇṇo sabbasatte tārayissati saṃsārato uttāreti sayaṃ kāyadvārādīhi damito ayaṃ bhagavā pare dameti.
৩. সযং অস্সত্থো অস্সাসম্পত্তো, কিলেসপরিল়াহতো মুত্তো সব্বসত্তে অস্সাসেতি, সন্তভাৰং আপাপেতি। সযং সন্তো সন্তকাযচিত্তো পরেসং সন্তকাযচিত্তং পাপেতি। সযং মুত্তো সংসারতো মুচ্চিতো পরে সংসারতো মোচযিস্সতি। সো অযং ভগৰা সযং নিব্বুতো কিলেসগ্গীহি নিব্বুতো পরেসম্পি কিলেসগ্গীহি নিব্বাপেস্সতীতি অহং তদা এৰং চিন্তেসিন্তি অত্থো।
3. Sayaṃ assattho assāsampatto, kilesapariḷāhato mutto sabbasatte assāseti, santabhāvaṃ āpāpeti. Sayaṃ santo santakāyacitto paresaṃ santakāyacittaṃ pāpeti. Sayaṃ mutto saṃsārato muccito pare saṃsārato mocayissati. So ayaṃ bhagavā sayaṃ nibbuto kilesaggīhi nibbuto paresampi kilesaggīhi nibbāpessatīti ahaṃ tadā evaṃ cintesinti attho.
৪. গহেত্ৰা তিমিরপুপ্ফন্তি সকলং ৰনন্তং নীলকাল়রংসীহি অন্ধকারং ৰিয কুরুমানং খাযতীতি তিমিরং পুপ্ফং তং গহেত্ৰা কণ্ণিকাৰণ্টং গহেত্ৰা মত্থকে সীসস্স উপরি আকাসে ওকিরিং পূজেসিন্তি অত্থো। সেসং উত্তানত্থমেৰাতি।
4.Gahetvā timirapupphanti sakalaṃ vanantaṃ nīlakāḷaraṃsīhi andhakāraṃ viya kurumānaṃ khāyatīti timiraṃ pupphaṃ taṃ gahetvā kaṇṇikāvaṇṭaṃ gahetvā matthake sīsassa upari ākāse okiriṃ pūjesinti attho. Sesaṃ uttānatthamevāti.
তিমিরপুপ্ফিযত্থেরঅপদানৰণ্ণনা সমত্তা।
Timirapupphiyattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১. তিমিরপুপ্ফিযত্থেরঅপদানং • 1. Timirapupphiyattheraapadānaṃ
