| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
9. තිමිරවග්‌ගො
9. Timiravaggo
1. තිමිරපුප්‌ඵියත්‌ථෙරඅපදානවණ්‌ණනා
1. Timirapupphiyattheraapadānavaṇṇanā
චන්‌දභාගානදීතීරෙතිආදිකං ආයස්‌මතො තිමිරපුප්‌ඵියත්‌ථෙරස්‌ස අපදානං. කා උප්‌පත්‌ති? අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො සිද්‌ධත්‌ථස්‌ස භගවතො කාලෙ එකස්‌මිං කුලගෙහෙ නිබ්‌බත්‌තො වුද්‌ධිප්‌පත්‌තො ඝරාවාසං සණ්‌ඨපෙත්‌වා වසන්‌තො කාමෙසු ආදීනවං දිස්‌වා ඝරාවාසං පහාය තාපසපබ්‌බජ්‌ජං පබ්‌බජිත්‌වා චන්‌දභාගාය නදියා සමීපෙ වසති, විවෙකකාමතාය හිමවන්‌තං ගන්‌ත්‌වා නිසින්‌නං සිද්‌ධත්‌ථං භගවන්‌තං දිස්‌වා වන්‌දිත්‌වා තස්‌ස ගුණං පසීදිත්‌වා තිමිරපුප්‌ඵං ගහෙත්‌වා පූජෙසි. සො තෙන පුඤ්‌ඤෙන දෙවෙසු ච මනුස්‌සෙසු ච සම්‌පත්‌තිමනුභවන්‌තො සංසරිත්‌වා ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො වුද්‌ධිමන්‌වාය සත්‌ථරි පසීදිත්‌වා පබ්‌බජිතො නචිරස්‌සෙව අරහා අහොසි.
Candabhāgānadītīretiādikaṃ āyasmato timirapupphiyattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhippatto gharāvāsaṃ saṇṭhapetvā vasanto kāmesu ādīnavaṃ disvā gharāvāsaṃ pahāya tāpasapabbajjaṃ pabbajitvā candabhāgāya nadiyā samīpe vasati, vivekakāmatāya himavantaṃ gantvā nisinnaṃ siddhatthaṃ bhagavantaṃ disvā vanditvā tassa guṇaṃ pasīditvā timirapupphaṃ gahetvā pūjesi. So tena puññena devesu ca manussesu ca sampattimanubhavanto saṃsaritvā imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajito nacirasseva arahā ahosi.
1. සො අපරභාගෙ පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො චන්‌දභාගානදීතීරෙතිආදිමාහ. තස්‌සත්‌ථො හෙට්‌ඨා වුත්‌තොව. අනුභොතං වජාමහන්‌ති ගඞ්‌ගාය ආසන්‌නෙ වසනභාවෙන සබ්‌බත්‌ථ රම්‌මභාවෙන ගඞ්‌ගාතො හෙට්‌ඨා සොතානුසාරෙන අහං වජාමි ගච්‌ඡාමි තත්‌ථ තත්‌ථ වසාමීති අත්‌ථො. නිසින්‌නං සමණං දිස්‌වාති සමිතපාපත්‌තා සොසිතපාපත්‌තා සමණසඞ්‌ඛාතං සම්‌මාසම්‌බුද්‌ධං දිස්‌වාති අත්‌ථො.
1. So aparabhāge pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tassattho heṭṭhā vuttova. Anubhotaṃ vajāmahanti gaṅgāya āsanne vasanabhāvena sabbattha rammabhāvena gaṅgāto heṭṭhā sotānusārena ahaṃ vajāmi gacchāmi tattha tattha vasāmīti attho. Nisinnaṃ samaṇaṃ disvāti samitapāpattā sositapāpattā samaṇasaṅkhātaṃ sammāsambuddhaṃ disvāti attho.
2. එවං චින්‌තෙසහං තදාති අයං භගවා සයං තිණ්‌ණො සබ්‌බසත්‌තෙ තාරයිස්‌සති සංසාරතො උත්‌තාරෙති සයං කායද්‌වාරාදීහි දමිතො අයං භගවා පරෙ දමෙති.
2.Evaṃ cintesahaṃ tadāti ayaṃ bhagavā sayaṃ tiṇṇo sabbasatte tārayissati saṃsārato uttāreti sayaṃ kāyadvārādīhi damito ayaṃ bhagavā pare dameti.
3. සයං අස්‌සත්‌ථො අස්‌සාසම්‌පත්‌තො, කිලෙසපරිළාහතො මුත්‌තො සබ්‌බසත්‌තෙ අස්‌සාසෙති, සන්‌තභාවං ආපාපෙති. සයං සන්‌තො සන්‌තකායචිත්‌තො පරෙසං සන්‌තකායචිත්‌තං පාපෙති. සයං මුත්‌තො සංසාරතො මුච්‌චිතො පරෙ සංසාරතො මොචයිස්‌සති. සො අයං භගවා සයං නිබ්‌බුතො කිලෙසග්‌ගීහි නිබ්‌බුතො පරෙසම්‌පි කිලෙසග්‌ගීහි නිබ්‌බාපෙස්‌සතීති අහං තදා එවං චින්‌තෙසින්‌ති අත්‌ථො.
3. Sayaṃ assattho assāsampatto, kilesapariḷāhato mutto sabbasatte assāseti, santabhāvaṃ āpāpeti. Sayaṃ santo santakāyacitto paresaṃ santakāyacittaṃ pāpeti. Sayaṃ mutto saṃsārato muccito pare saṃsārato mocayissati. So ayaṃ bhagavā sayaṃ nibbuto kilesaggīhi nibbuto paresampi kilesaggīhi nibbāpessatīti ahaṃ tadā evaṃ cintesinti attho.
4. ගහෙත්‌වා තිමිරපුප්‌ඵන්‌ති සකලං වනන්‌තං නීලකාළරංසීහි අන්‌ධකාරං විය කුරුමානං ඛායතීති තිමිරං පුප්‌ඵං තං ගහෙත්‌වා කණ්‌ණිකාවණ්‌ටං ගහෙත්‌වා මත්‌ථකෙ සීසස්‌ස උපරි ආකාසෙ ඔකිරිං පූජෙසින්‌ති අත්‌ථො. සෙසං උත්‌තානත්‌ථමෙවාති.
4.Gahetvā timirapupphanti sakalaṃ vanantaṃ nīlakāḷaraṃsīhi andhakāraṃ viya kurumānaṃ khāyatīti timiraṃ pupphaṃ taṃ gahetvā kaṇṇikāvaṇṭaṃ gahetvā matthake sīsassa upari ākāse okiriṃ pūjesinti attho. Sesaṃ uttānatthamevāti.
තිමිරපුප්‌ඵියත්‌ථෙරඅපදානවණ්‌ණනා සමත්‌තා.
Timirapupphiyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 1. තිමිරපුප්‌ඵියත්‌ථෙරඅපදානං • 1. Timirapupphiyattheraapadānaṃ
