| Library / Tipiṭaka / ਤਿਪਿਟਕ • Tipiṭaka / ਅਪਦਾਨ-ਅਟ੍ਠਕਥਾ • Apadāna-aṭṭhakathā |
੯. ਤਿਮਿਰવਗ੍ਗੋ
9. Timiravaggo
੧. ਤਿਮਿਰਪੁਪ੍ਫਿਯਤ੍ਥੇਰਅਪਦਾਨવਣ੍ਣਨਾ
1. Timirapupphiyattheraapadānavaṇṇanā
ਚਨ੍ਦਭਾਗਾਨਦੀਤੀਰੇਤਿਆਦਿਕਂ ਆਯਸ੍ਮਤੋ ਤਿਮਿਰਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ। ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭવੇ વਿવਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗવਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ વੁਦ੍ਧਿਪ੍ਪਤ੍ਤੋ ਘਰਾવਾਸਂ ਸਣ੍ਠਪੇਤ੍વਾ વਸਨ੍ਤੋ ਕਾਮੇਸੁ ਆਦੀਨવਂ ਦਿਸ੍વਾ ਘਰਾવਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍વਾ ਚਨ੍ਦਭਾਗਾਯ ਨਦਿਯਾ ਸਮੀਪੇ વਸਤਿ, વਿવੇਕਕਾਮਤਾਯ ਹਿਮવਨ੍ਤਂ ਗਨ੍ਤ੍વਾ ਨਿਸਿਨ੍ਨਂ ਸਿਦ੍ਧਤ੍ਥਂ ਭਗવਨ੍ਤਂ ਦਿਸ੍વਾ વਨ੍ਦਿਤ੍વਾ ਤਸ੍ਸ ਗੁਣਂ ਪਸੀਦਿਤ੍વਾ ਤਿਮਿਰਪੁਪ੍ਫਂ ਗਹੇਤ੍વਾ ਪੂਜੇਸਿ। ਸੋ ਤੇਨ ਪੁਞ੍ਞੇਨ ਦੇવੇਸੁ ਚ ਮਨੁਸ੍ਸੇਸੁ ਚ ਸਮ੍ਪਤ੍ਤਿਮਨੁਭવਨ੍ਤੋ ਸਂਸਰਿਤ੍વਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ વੁਦ੍ਧਿਮਨ੍વਾਯ ਸਤ੍ਥਰਿ ਪਸੀਦਿਤ੍વਾ ਪਬ੍ਬਜਿਤੋ ਨਚਿਰਸ੍ਸੇવ ਅਰਹਾ ਅਹੋਸਿ।
Candabhāgānadītīretiādikaṃ āyasmato timirapupphiyattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhippatto gharāvāsaṃ saṇṭhapetvā vasanto kāmesu ādīnavaṃ disvā gharāvāsaṃ pahāya tāpasapabbajjaṃ pabbajitvā candabhāgāya nadiyā samīpe vasati, vivekakāmatāya himavantaṃ gantvā nisinnaṃ siddhatthaṃ bhagavantaṃ disvā vanditvā tassa guṇaṃ pasīditvā timirapupphaṃ gahetvā pūjesi. So tena puññena devesu ca manussesu ca sampattimanubhavanto saṃsaritvā imasmiṃ buddhuppāde ekasmiṃ kulagehe nibbatto vuddhimanvāya satthari pasīditvā pabbajito nacirasseva arahā ahosi.
੧. ਸੋ ਅਪਰਭਾਗੇ ਪੁਬ੍ਬਕਮ੍ਮਂ ਸਰਿਤ੍વਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਚਨ੍ਦਭਾਗਾਨਦੀਤੀਰੇਤਿਆਦਿਮਾਹ। ਤਸ੍ਸਤ੍ਥੋ ਹੇਟ੍ਠਾ વੁਤ੍ਤੋવ। ਅਨੁਭੋਤਂ વਜਾਮਹਨ੍ਤਿ ਗਙ੍ਗਾਯ ਆਸਨ੍ਨੇ વਸਨਭਾવੇਨ ਸਬ੍ਬਤ੍ਥ ਰਮ੍ਮਭਾવੇਨ ਗਙ੍ਗਾਤੋ ਹੇਟ੍ਠਾ ਸੋਤਾਨੁਸਾਰੇਨ ਅਹਂ વਜਾਮਿ ਗਚ੍ਛਾਮਿ ਤਤ੍ਥ ਤਤ੍ਥ વਸਾਮੀਤਿ ਅਤ੍ਥੋ। ਨਿਸਿਨ੍ਨਂ ਸਮਣਂ ਦਿਸ੍વਾਤਿ ਸਮਿਤਪਾਪਤ੍ਤਾ ਸੋਸਿਤਪਾਪਤ੍ਤਾ ਸਮਣਸਙ੍ਖਾਤਂ ਸਮ੍ਮਾਸਮ੍ਬੁਦ੍ਧਂ ਦਿਸ੍વਾਤਿ ਅਤ੍ਥੋ।
1. So aparabhāge pubbakammaṃ saritvā somanassajāto pubbacaritāpadānaṃ pakāsento candabhāgānadītīretiādimāha. Tassattho heṭṭhā vuttova. Anubhotaṃ vajāmahanti gaṅgāya āsanne vasanabhāvena sabbattha rammabhāvena gaṅgāto heṭṭhā sotānusārena ahaṃ vajāmi gacchāmi tattha tattha vasāmīti attho. Nisinnaṃ samaṇaṃ disvāti samitapāpattā sositapāpattā samaṇasaṅkhātaṃ sammāsambuddhaṃ disvāti attho.
੨. ਏવਂ ਚਿਨ੍ਤੇਸਹਂ ਤਦਾਤਿ ਅਯਂ ਭਗવਾ ਸਯਂ ਤਿਣ੍ਣੋ ਸਬ੍ਬਸਤ੍ਤੇ ਤਾਰਯਿਸ੍ਸਤਿ ਸਂਸਾਰਤੋ ਉਤ੍ਤਾਰੇਤਿ ਸਯਂ ਕਾਯਦ੍વਾਰਾਦੀਹਿ ਦਮਿਤੋ ਅਯਂ ਭਗવਾ ਪਰੇ ਦਮੇਤਿ।
2.Evaṃ cintesahaṃ tadāti ayaṃ bhagavā sayaṃ tiṇṇo sabbasatte tārayissati saṃsārato uttāreti sayaṃ kāyadvārādīhi damito ayaṃ bhagavā pare dameti.
੩. ਸਯਂ ਅਸ੍ਸਤ੍ਥੋ ਅਸ੍ਸਾਸਮ੍ਪਤ੍ਤੋ, ਕਿਲੇਸਪਰਿਲ਼ਾਹਤੋ ਮੁਤ੍ਤੋ ਸਬ੍ਬਸਤ੍ਤੇ ਅਸ੍ਸਾਸੇਤਿ, ਸਨ੍ਤਭਾવਂ ਆਪਾਪੇਤਿ। ਸਯਂ ਸਨ੍ਤੋ ਸਨ੍ਤਕਾਯਚਿਤ੍ਤੋ ਪਰੇਸਂ ਸਨ੍ਤਕਾਯਚਿਤ੍ਤਂ ਪਾਪੇਤਿ। ਸਯਂ ਮੁਤ੍ਤੋ ਸਂਸਾਰਤੋ ਮੁਚ੍ਚਿਤੋ ਪਰੇ ਸਂਸਾਰਤੋ ਮੋਚਯਿਸ੍ਸਤਿ। ਸੋ ਅਯਂ ਭਗવਾ ਸਯਂ ਨਿਬ੍ਬੁਤੋ ਕਿਲੇਸਗ੍ਗੀਹਿ ਨਿਬ੍ਬੁਤੋ ਪਰੇਸਮ੍ਪਿ ਕਿਲੇਸਗ੍ਗੀਹਿ ਨਿਬ੍ਬਾਪੇਸ੍ਸਤੀਤਿ ਅਹਂ ਤਦਾ ਏવਂ ਚਿਨ੍ਤੇਸਿਨ੍ਤਿ ਅਤ੍ਥੋ।
3. Sayaṃ assattho assāsampatto, kilesapariḷāhato mutto sabbasatte assāseti, santabhāvaṃ āpāpeti. Sayaṃ santo santakāyacitto paresaṃ santakāyacittaṃ pāpeti. Sayaṃ mutto saṃsārato muccito pare saṃsārato mocayissati. So ayaṃ bhagavā sayaṃ nibbuto kilesaggīhi nibbuto paresampi kilesaggīhi nibbāpessatīti ahaṃ tadā evaṃ cintesinti attho.
੪. ਗਹੇਤ੍વਾ ਤਿਮਿਰਪੁਪ੍ਫਨ੍ਤਿ ਸਕਲਂ વਨਨ੍ਤਂ ਨੀਲਕਾਲ਼ਰਂਸੀਹਿ ਅਨ੍ਧਕਾਰਂ વਿਯ ਕੁਰੁਮਾਨਂ ਖਾਯਤੀਤਿ ਤਿਮਿਰਂ ਪੁਪ੍ਫਂ ਤਂ ਗਹੇਤ੍વਾ ਕਣ੍ਣਿਕਾવਣ੍ਟਂ ਗਹੇਤ੍વਾ ਮਤ੍ਥਕੇ ਸੀਸਸ੍ਸ ਉਪਰਿ ਆਕਾਸੇ ਓਕਿਰਿਂ ਪੂਜੇਸਿਨ੍ਤਿ ਅਤ੍ਥੋ। ਸੇਸਂ ਉਤ੍ਤਾਨਤ੍ਥਮੇવਾਤਿ।
4.Gahetvā timirapupphanti sakalaṃ vanantaṃ nīlakāḷaraṃsīhi andhakāraṃ viya kurumānaṃ khāyatīti timiraṃ pupphaṃ taṃ gahetvā kaṇṇikāvaṇṭaṃ gahetvā matthake sīsassa upari ākāse okiriṃ pūjesinti attho. Sesaṃ uttānatthamevāti.
ਤਿਮਿਰਪੁਪ੍ਫਿਯਤ੍ਥੇਰਅਪਦਾਨવਣ੍ਣਨਾ ਸਮਤ੍ਤਾ।
Timirapupphiyattheraapadānavaṇṇanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਅਪਦਾਨਪਾਲ਼ਿ • Apadānapāḷi / ੧. ਤਿਮਿਰਪੁਪ੍ਫਿਯਤ੍ਥੇਰਅਪਦਾਨਂ • 1. Timirapupphiyattheraapadānaṃ
