| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. திங்ஸமத்தஸுத்தங்
3. Tiṃsamattasuttaṃ
136. ராஜக³ஹே விஹரதி வேளுவனே. அத² கோ² திங்ஸமத்தா பாவெய்யகா 1 பி⁴க்கூ² ஸப்³பே³ ஆரஞ்ஞிகா ஸப்³பே³ பிண்ட³பாதிகா ஸப்³பே³ பங்ஸுகூலிகா ஸப்³பே³ தேசீவரிகா ஸப்³பே³ ஸஸங்யோஜனா யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. அத² கோ² ப⁴க³வதோ ஏதத³ஹோஸி – ‘‘இமே கோ² திங்ஸமத்தா பாவெய்யகா பி⁴க்கூ² ஸப்³பே³ ஆரஞ்ஞிகா ஸப்³பே³ பிண்ட³பாதிகா ஸப்³பே³ பங்ஸுகூலிகா ஸப்³பே³ தேசீவரிகா ஸப்³பே³ ஸஸங்யோஜனா. யங்னூனாஹங் இமேஸங் ததா² த⁴ம்மங் தே³ஸெய்யங் யதா² நேஸங் இமஸ்மிங்யேவ ஆஸனே அனுபாதா³ய ஆஸவேஹி சித்தானி விமுச்செய்யு’’ந்தி. அத² கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
136. Rājagahe viharati veḷuvane. Atha kho tiṃsamattā pāveyyakā 2 bhikkhū sabbe āraññikā sabbe piṇḍapātikā sabbe paṃsukūlikā sabbe tecīvarikā sabbe sasaṃyojanā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Atha kho bhagavato etadahosi – ‘‘ime kho tiṃsamattā pāveyyakā bhikkhū sabbe āraññikā sabbe piṇḍapātikā sabbe paṃsukūlikā sabbe tecīvarikā sabbe sasaṃyojanā. Yaṃnūnāhaṃ imesaṃ tathā dhammaṃ deseyyaṃ yathā nesaṃ imasmiṃyeva āsane anupādāya āsavehi cittāni vimucceyyu’’nti. Atha kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘அனமதக்³கோ³யங், பி⁴க்க²வே, ஸங்ஸாரோ. புப்³பா³ கோடி ந பஞ்ஞாயதி அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங். தங் கிங் மஞ்ஞத², பி⁴க்க²வே, கதமங் நு கோ² ப³ஹுதரங், யங் வா வோ இமினா தீ³கே⁴ன அத்³து⁴னா ஸந்தா⁴வதங் ஸங்ஸரதங் ஸீஸச்சி²ன்னானங் லோஹிதங் பஸ்ஸன்னங் பக்³க⁴ரிதங், யங் வா சதூஸு மஹாஸமுத்³தே³ஸு உத³க’’ந்தி? ‘‘யதா² கோ² மயங், ப⁴ந்தே, ப⁴க³வதா த⁴ம்மங் தே³ஸிதங் ஆஜானாம, ஏததே³வ, ப⁴ந்தே, ப³ஹுதரங், யங் நோ இமினா தீ³கே⁴ன அத்³து⁴னா ஸந்தா⁴வதங் ஸங்ஸரதங் ஸீஸச்சி²ன்னானங் லோஹிதங் பஸ்ஸன்னங் பக்³க⁴ரிதங், ந த்வேவ சதூஸு மஹாஸமுத்³தே³ஸு உத³க’’ந்தி.
‘‘Anamataggoyaṃ, bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Taṃ kiṃ maññatha, bhikkhave, katamaṃ nu kho bahutaraṃ, yaṃ vā vo iminā dīghena addhunā sandhāvataṃ saṃsarataṃ sīsacchinnānaṃ lohitaṃ passannaṃ paggharitaṃ, yaṃ vā catūsu mahāsamuddesu udaka’’nti? ‘‘Yathā kho mayaṃ, bhante, bhagavatā dhammaṃ desitaṃ ājānāma, etadeva, bhante, bahutaraṃ, yaṃ no iminā dīghena addhunā sandhāvataṃ saṃsarataṃ sīsacchinnānaṃ lohitaṃ passannaṃ paggharitaṃ, na tveva catūsu mahāsamuddesu udaka’’nti.
‘‘ஸாது⁴ ஸாது⁴, பி⁴க்க²வே, ஸாது⁴ கோ² மே தும்ஹே, பி⁴க்க²வே, ஏவங் த⁴ம்மங் தே³ஸிதங் ஆஜானாத². ஏததே³வ, பி⁴க்க²வே, ப³ஹுதரங், யங் வோ இமினா தீ³கே⁴ன அத்³து⁴னா ஸந்தா⁴வதங் ஸங்ஸரதங் ஸீஸச்சி²ன்னானங் லோஹிதங் பஸ்ஸன்னங் பக்³க⁴ரிதங், ந த்வேவ சதூஸு மஹாஸமுத்³தே³ஸு உத³கங். தீ³க⁴ரத்தங் வோ, பி⁴க்க²வே, கு³ன்னங் ஸதங் கோ³பூ⁴தானங் ஸீஸச்சி²ன்னானங் லோஹிதங் பஸ்ஸன்னங் பக்³க⁴ரிதங், ந த்வேவ சதூஸு மஹாஸமுத்³தே³ஸு உத³கங். தீ³க⁴ரத்தங் வோ, பி⁴க்க²வே, மஹிங்ஸானங் 3 ஸதங் மஹிங்ஸபூ⁴தானங் ஸீஸச்சி²ன்னானங் லோஹிதங் பஸ்ஸன்னங் பக்³க⁴ரிதங் …பே॰… தீ³க⁴ரத்தங் வோ, பி⁴க்க²வே, உரப்³பா⁴னங் ஸதங் உரப்³ப⁴பூ⁴தானங்…பே॰… அஜானங் ஸதங் அஜபூ⁴தானங்… மிகா³னங் ஸதங் மிக³பூ⁴தானங்… குக்குடானங் ஸதங் குக்குடபூ⁴தானங்… ஸூகரானங் ஸதங் ஸூகரபூ⁴தானங்… தீ³க⁴ரத்தங் வோ, பி⁴க்க²வே, சோரா கா³மகா⁴தாதி க³ஹெத்வா ஸீஸச்சி²ன்னானங் லோஹிதங் பஸ்ஸன்னங் பக்³க⁴ரிதங். தீ³க⁴ரத்தங் வோ, பி⁴க்க²வே, சோரா பாரிபந்தி²காதி க³ஹெத்வா ஸீஸச்சி²ன்னானங் லோஹிதங் பஸ்ஸன்னங் பக்³க⁴ரிதங். தீ³க⁴ரத்தங் வோ, பி⁴க்க²வே, சோரா பாரதா³ரிகாதி க³ஹெத்வா ஸீஸச்சி²ன்னானங் லோஹிதங் பஸ்ஸன்னங் பக்³க⁴ரிதங், ந த்வேவ சதூஸு மஹாஸமுத்³தே³ஸு உத³கங். தங் கிஸ்ஸ ஹேது? அனமதக்³கோ³யங், பி⁴க்க²வே, ஸங்ஸாரோ…பே॰… அலங் விமுச்சிது’’ந்தி.
‘‘Sādhu sādhu, bhikkhave, sādhu kho me tumhe, bhikkhave, evaṃ dhammaṃ desitaṃ ājānātha. Etadeva, bhikkhave, bahutaraṃ, yaṃ vo iminā dīghena addhunā sandhāvataṃ saṃsarataṃ sīsacchinnānaṃ lohitaṃ passannaṃ paggharitaṃ, na tveva catūsu mahāsamuddesu udakaṃ. Dīgharattaṃ vo, bhikkhave, gunnaṃ sataṃ gobhūtānaṃ sīsacchinnānaṃ lohitaṃ passannaṃ paggharitaṃ, na tveva catūsu mahāsamuddesu udakaṃ. Dīgharattaṃ vo, bhikkhave, mahiṃsānaṃ 4 sataṃ mahiṃsabhūtānaṃ sīsacchinnānaṃ lohitaṃ passannaṃ paggharitaṃ …pe… dīgharattaṃ vo, bhikkhave, urabbhānaṃ sataṃ urabbhabhūtānaṃ…pe… ajānaṃ sataṃ ajabhūtānaṃ… migānaṃ sataṃ migabhūtānaṃ… kukkuṭānaṃ sataṃ kukkuṭabhūtānaṃ… sūkarānaṃ sataṃ sūkarabhūtānaṃ… dīgharattaṃ vo, bhikkhave, corā gāmaghātāti gahetvā sīsacchinnānaṃ lohitaṃ passannaṃ paggharitaṃ. Dīgharattaṃ vo, bhikkhave, corā pāripanthikāti gahetvā sīsacchinnānaṃ lohitaṃ passannaṃ paggharitaṃ. Dīgharattaṃ vo, bhikkhave, corā pāradārikāti gahetvā sīsacchinnānaṃ lohitaṃ passannaṃ paggharitaṃ, na tveva catūsu mahāsamuddesu udakaṃ. Taṃ kissa hetu? Anamataggoyaṃ, bhikkhave, saṃsāro…pe… alaṃ vimuccitu’’nti.
‘‘இத³மவோச ப⁴க³வா. அத்தமனா தே பி⁴க்கூ² ப⁴க³வதோ பா⁴ஸிதங் அபி⁴னந்து³ந்தி. இமஸ்மிஞ்ச பன வெய்யாகரணஸ்மிங் ப⁴ஞ்ஞமானே திங்ஸமத்தானங் பாவெய்யகானங் பி⁴க்கூ²னங் அனுபாதா³ய ஆஸவேஹி சித்தானி விமுச்சிங்ஸூ’’தி. ததியங்.
‘‘Idamavoca bhagavā. Attamanā te bhikkhū bhagavato bhāsitaṃ abhinandunti. Imasmiñca pana veyyākaraṇasmiṃ bhaññamāne tiṃsamattānaṃ pāveyyakānaṃ bhikkhūnaṃ anupādāya āsavehi cittāni vimucciṃsū’’ti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. திங்ஸமத்தஸுத்தவண்ணனா • 3. Tiṃsamattasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. திங்ஸமத்தஸுத்தவண்ணனா • 3. Tiṃsamattasuttavaṇṇanā
