| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༣. ཏིཾསམཏྟསུཏྟཾ
3. Tiṃsamattasuttaṃ
༡༣༦. རཱཛགཧེ ཝིཧརཏི ཝེལུ༹ཝནེ། ཨཐ ཁོ ཏིཾསམཏྟཱ པཱཝེཡྻཀཱ 1 བྷིཀྑཱུ སབྦེ ཨཱརཉྙིཀཱ སབྦེ པིཎྜཔཱཏིཀཱ སབྦེ པཾསུཀཱུལིཀཱ སབྦེ ཏེཙཱིཝརིཀཱ སབྦེ སསཾཡོཛནཱ ཡེན བྷགཝཱ ཏེནུཔསངྐམིཾསུ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨཐ ཁོ བྷགཝཏོ ཨེཏདཧོསི – ‘‘ཨིམེ ཁོ ཏིཾསམཏྟཱ པཱཝེཡྻཀཱ བྷིཀྑཱུ སབྦེ ཨཱརཉྙིཀཱ སབྦེ པིཎྜཔཱཏིཀཱ སབྦེ པཾསུཀཱུལིཀཱ སབྦེ ཏེཙཱིཝརིཀཱ སབྦེ སསཾཡོཛནཱ། ཡཾནཱུནཱཧཾ ཨིམེསཾ ཏཐཱ དྷམྨཾ དེསེཡྻཾ ཡཐཱ ནེསཾ ཨིམསྨིཾཡེཝ ཨཱསནེ ཨནུཔཱདཱཡ ཨཱསཝེཧི ཙིཏྟཱནི ཝིམུཙྩེཡྻུ’’ནྟི། ཨཐ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –
136. Rājagahe viharati veḷuvane. Atha kho tiṃsamattā pāveyyakā 2 bhikkhū sabbe āraññikā sabbe piṇḍapātikā sabbe paṃsukūlikā sabbe tecīvarikā sabbe sasaṃyojanā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Atha kho bhagavato etadahosi – ‘‘ime kho tiṃsamattā pāveyyakā bhikkhū sabbe āraññikā sabbe piṇḍapātikā sabbe paṃsukūlikā sabbe tecīvarikā sabbe sasaṃyojanā. Yaṃnūnāhaṃ imesaṃ tathā dhammaṃ deseyyaṃ yathā nesaṃ imasmiṃyeva āsane anupādāya āsavehi cittāni vimucceyyu’’nti. Atha kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ཨནམཏགྒོཡཾ, བྷིཀྑཝེ, སཾསཱརོ། པུབྦཱ ཀོཊི ན པཉྙཱཡཏི ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ སནྡྷཱཝཏཾ སཾསརཏཾ། ཏཾ ཀིཾ མཉྙཐ, བྷིཀྑཝེ, ཀཏམཾ ནུ ཁོ བཧུཏརཾ, ཡཾ ཝཱ ཝོ ཨིམིནཱ དཱིགྷེན ཨདྡྷུནཱ སནྡྷཱཝཏཾ སཾསརཏཾ སཱིསཙྪིནྣཱནཾ ལོཧིཏཾ པསྶནྣཾ པགྒྷརིཏཾ, ཡཾ ཝཱ ཙཏཱུསུ མཧཱསམུདྡེསུ ཨུདཀ’’ནྟི? ‘‘ཡཐཱ ཁོ མཡཾ, བྷནྟེ, བྷགཝཏཱ དྷམྨཾ དེསིཏཾ ཨཱཛཱནཱམ, ཨེཏདེཝ, བྷནྟེ, བཧུཏརཾ, ཡཾ ནོ ཨིམིནཱ དཱིགྷེན ཨདྡྷུནཱ སནྡྷཱཝཏཾ སཾསརཏཾ སཱིསཙྪིནྣཱནཾ ལོཧིཏཾ པསྶནྣཾ པགྒྷརིཏཾ, ན ཏྭེཝ ཙཏཱུསུ མཧཱསམུདྡེསུ ཨུདཀ’’ནྟི།
‘‘Anamataggoyaṃ, bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Taṃ kiṃ maññatha, bhikkhave, katamaṃ nu kho bahutaraṃ, yaṃ vā vo iminā dīghena addhunā sandhāvataṃ saṃsarataṃ sīsacchinnānaṃ lohitaṃ passannaṃ paggharitaṃ, yaṃ vā catūsu mahāsamuddesu udaka’’nti? ‘‘Yathā kho mayaṃ, bhante, bhagavatā dhammaṃ desitaṃ ājānāma, etadeva, bhante, bahutaraṃ, yaṃ no iminā dīghena addhunā sandhāvataṃ saṃsarataṃ sīsacchinnānaṃ lohitaṃ passannaṃ paggharitaṃ, na tveva catūsu mahāsamuddesu udaka’’nti.
‘‘སཱདྷུ སཱདྷུ, བྷིཀྑཝེ, སཱདྷུ ཁོ མེ ཏུམྷེ, བྷིཀྑཝེ, ཨེཝཾ དྷམྨཾ དེསིཏཾ ཨཱཛཱནཱཐ། ཨེཏདེཝ, བྷིཀྑཝེ, བཧུཏརཾ, ཡཾ ཝོ ཨིམིནཱ དཱིགྷེན ཨདྡྷུནཱ སནྡྷཱཝཏཾ སཾསརཏཾ སཱིསཙྪིནྣཱནཾ ལོཧིཏཾ པསྶནྣཾ པགྒྷརིཏཾ, ན ཏྭེཝ ཙཏཱུསུ མཧཱསམུདྡེསུ ཨུདཀཾ། དཱིགྷརཏྟཾ ཝོ, བྷིཀྑཝེ, གུནྣཾ སཏཾ གོབྷཱུཏཱནཾ སཱིསཙྪིནྣཱནཾ ལོཧིཏཾ པསྶནྣཾ པགྒྷརིཏཾ, ན ཏྭེཝ ཙཏཱུསུ མཧཱསམུདྡེསུ ཨུདཀཾ། དཱིགྷརཏྟཾ ཝོ, བྷིཀྑཝེ, མཧིཾསཱནཾ 3 སཏཾ མཧིཾསབྷཱུཏཱནཾ སཱིསཙྪིནྣཱནཾ ལོཧིཏཾ པསྶནྣཾ པགྒྷརིཏཾ …པེ॰… དཱིགྷརཏྟཾ ཝོ, བྷིཀྑཝེ, ཨུརབྦྷཱནཾ སཏཾ ཨུརབྦྷབྷཱུཏཱནཾ…པེ॰… ཨཛཱནཾ སཏཾ ཨཛབྷཱུཏཱནཾ… མིགཱནཾ སཏཾ མིགབྷཱུཏཱནཾ… ཀུཀྐུཊཱནཾ སཏཾ ཀུཀྐུཊབྷཱུཏཱནཾ… སཱུཀརཱནཾ སཏཾ སཱུཀརབྷཱུཏཱནཾ… དཱིགྷརཏྟཾ ཝོ, བྷིཀྑཝེ, ཙོརཱ གཱམགྷཱཏཱཏི གཧེཏྭཱ སཱིསཙྪིནྣཱནཾ ལོཧིཏཾ པསྶནྣཾ པགྒྷརིཏཾ། དཱིགྷརཏྟཾ ཝོ, བྷིཀྑཝེ, ཙོརཱ པཱརིཔནྠིཀཱཏི གཧེཏྭཱ སཱིསཙྪིནྣཱནཾ ལོཧིཏཾ པསྶནྣཾ པགྒྷརིཏཾ། དཱིགྷརཏྟཾ ཝོ, བྷིཀྑཝེ, ཙོརཱ པཱརདཱརིཀཱཏི གཧེཏྭཱ སཱིསཙྪིནྣཱནཾ ལོཧིཏཾ པསྶནྣཾ པགྒྷརིཏཾ, ན ཏྭེཝ ཙཏཱུསུ མཧཱསམུདྡེསུ ཨུདཀཾ། ཏཾ ཀིསྶ ཧེཏུ? ཨནམཏགྒོཡཾ, བྷིཀྑཝེ, སཾསཱརོ…པེ॰… ཨལཾ ཝིམུཙྩིཏུ’’ནྟི།
‘‘Sādhu sādhu, bhikkhave, sādhu kho me tumhe, bhikkhave, evaṃ dhammaṃ desitaṃ ājānātha. Etadeva, bhikkhave, bahutaraṃ, yaṃ vo iminā dīghena addhunā sandhāvataṃ saṃsarataṃ sīsacchinnānaṃ lohitaṃ passannaṃ paggharitaṃ, na tveva catūsu mahāsamuddesu udakaṃ. Dīgharattaṃ vo, bhikkhave, gunnaṃ sataṃ gobhūtānaṃ sīsacchinnānaṃ lohitaṃ passannaṃ paggharitaṃ, na tveva catūsu mahāsamuddesu udakaṃ. Dīgharattaṃ vo, bhikkhave, mahiṃsānaṃ 4 sataṃ mahiṃsabhūtānaṃ sīsacchinnānaṃ lohitaṃ passannaṃ paggharitaṃ …pe… dīgharattaṃ vo, bhikkhave, urabbhānaṃ sataṃ urabbhabhūtānaṃ…pe… ajānaṃ sataṃ ajabhūtānaṃ… migānaṃ sataṃ migabhūtānaṃ… kukkuṭānaṃ sataṃ kukkuṭabhūtānaṃ… sūkarānaṃ sataṃ sūkarabhūtānaṃ… dīgharattaṃ vo, bhikkhave, corā gāmaghātāti gahetvā sīsacchinnānaṃ lohitaṃ passannaṃ paggharitaṃ. Dīgharattaṃ vo, bhikkhave, corā pāripanthikāti gahetvā sīsacchinnānaṃ lohitaṃ passannaṃ paggharitaṃ. Dīgharattaṃ vo, bhikkhave, corā pāradārikāti gahetvā sīsacchinnānaṃ lohitaṃ passannaṃ paggharitaṃ, na tveva catūsu mahāsamuddesu udakaṃ. Taṃ kissa hetu? Anamataggoyaṃ, bhikkhave, saṃsāro…pe… alaṃ vimuccitu’’nti.
‘‘ཨིདམཝོཙ བྷགཝཱ། ཨཏྟམནཱ ཏེ བྷིཀྑཱུ བྷགཝཏོ བྷཱསིཏཾ ཨབྷིནནྡུནྟི། ཨིམསྨིཉྩ པན ཝེཡྻཱཀརཎསྨིཾ བྷཉྙམཱནེ ཏིཾསམཏྟཱནཾ པཱཝེཡྻཀཱནཾ བྷིཀྑཱུནཾ ཨནུཔཱདཱཡ ཨཱསཝེཧི ཙིཏྟཱནི ཝིམུཙྩིཾསཱུ’’ཏི། ཏཏིཡཾ།
‘‘Idamavoca bhagavā. Attamanā te bhikkhū bhagavato bhāsitaṃ abhinandunti. Imasmiñca pana veyyākaraṇasmiṃ bhaññamāne tiṃsamattānaṃ pāveyyakānaṃ bhikkhūnaṃ anupādāya āsavehi cittāni vimucciṃsū’’ti. Tatiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༣. ཏིཾསམཏྟསུཏྟཝཎྞནཱ • 3. Tiṃsamattasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༣. ཏིཾསམཏྟསུཏྟཝཎྞནཱ • 3. Tiṃsamattasuttavaṇṇanā
