| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. அனமதக்³க³ஸங்யுத்தங்
4. Anamataggasaṃyuttaṃ
1. பட²மவக்³கோ³
1. Paṭhamavaggo
1. திணகட்ட²ஸுத்தங்
1. Tiṇakaṭṭhasuttaṃ
124. ஏவங் மே ஸுதங் – ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தத்ர கோ² ப⁴க³வா பி⁴க்கூ² ஆமந்தேஸி – ‘‘பி⁴க்க²வோ’’தி. ‘‘ப⁴த³ந்தே’’தி தே பி⁴க்கூ² ப⁴க³வதோ பச்சஸ்ஸோஸுங். ப⁴க³வா ஏதத³வோச –
124. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘அனமதக்³கோ³யங் 1 பி⁴க்க²வே, ஸங்ஸாரோ. புப்³பா³ கோடி ந பஞ்ஞாயதி அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங். ஸெய்யதா²பி, பி⁴க்க²வே, புரிஸோ யங் இமஸ்மிங் ஜம்பு³தீ³பே திணகட்ட²ஸாகா²பலாஸங் தங் செ²த்வா 2 ஏகஜ்ஜ²ங் ஸங்ஹரித்வா சதுரங்கு³லங் சதுரங்கு³லங் க⁴டிகங் கத்வா நிக்கி²பெய்ய – ‘அயங் மே மாதா, தஸ்ஸா மே மாது அயங் மாதா’தி, அபரியாதி³ன்னாவ 3 பி⁴க்க²வே, தஸ்ஸ புரிஸஸ்ஸ மாதுமாதரோ அஸ்ஸு, அத² இமஸ்மிங் ஜம்பு³தீ³பே திணகட்ட²ஸாகா²பலாஸங் பரிக்க²யங் பரியாதா³னங் க³ச்செ²ய்ய. தங் கிஸ்ஸ ஹேது? அனமதக்³கோ³யங், பி⁴க்க²வே, ஸங்ஸாரோ. புப்³பா³ கோடி ந பஞ்ஞாயதி அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங். ஏவங் தீ³க⁴ரத்தங் வோ, பி⁴க்க²வே, து³க்க²ங் பச்சனுபூ⁴தங் திப்³ப³ங் பச்சனுபூ⁴தங் ப்³யஸனங் பச்சனுபூ⁴தங், கடஸீ 4 வட்³டி⁴தா. யாவஞ்சித³ங், பி⁴க்க²வே, அலமேவ ஸப்³ப³ஸங்கா²ரேஸு நிப்³பி³ந்தி³துங் அலங் விரஜ்ஜிதுங் அலங் விமுச்சிது’’ந்தி. பட²மங்.
‘‘Anamataggoyaṃ 5 bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Seyyathāpi, bhikkhave, puriso yaṃ imasmiṃ jambudīpe tiṇakaṭṭhasākhāpalāsaṃ taṃ chetvā 6 ekajjhaṃ saṃharitvā caturaṅgulaṃ caturaṅgulaṃ ghaṭikaṃ katvā nikkhipeyya – ‘ayaṃ me mātā, tassā me mātu ayaṃ mātā’ti, apariyādinnāva 7 bhikkhave, tassa purisassa mātumātaro assu, atha imasmiṃ jambudīpe tiṇakaṭṭhasākhāpalāsaṃ parikkhayaṃ pariyādānaṃ gaccheyya. Taṃ kissa hetu? Anamataggoyaṃ, bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Evaṃ dīgharattaṃ vo, bhikkhave, dukkhaṃ paccanubhūtaṃ tibbaṃ paccanubhūtaṃ byasanaṃ paccanubhūtaṃ, kaṭasī 8 vaḍḍhitā. Yāvañcidaṃ, bhikkhave, alameva sabbasaṅkhāresu nibbindituṃ alaṃ virajjituṃ alaṃ vimuccitu’’nti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. திணகட்ட²ஸுத்தவண்ணனா • 1. Tiṇakaṭṭhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. திணகட்ட²ஸுத்தவண்ணனா • 1. Tiṇakaṭṭhasuttavaṇṇanā
