| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. අනමතග්‌ගසංයුත්‌තං
4. Anamataggasaṃyuttaṃ
1. පඨමවග්‌ගො
1. Paṭhamavaggo
1. තිණකට්‌ඨසුත්‌තං
1. Tiṇakaṭṭhasuttaṃ
124. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච –
124. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘අනමතග්‌ගොයං 1 භික්‌ඛවෙ, සංසාරො. පුබ්‌බා කොටි න පඤ්‌ඤායති අවිජ්‌ජානීවරණානං සත්‌තානං තණ්‌හාසංයොජනානං සන්‌ධාවතං සංසරතං. සෙය්‍යථාපි, භික්‌ඛවෙ, පුරිසො යං ඉමස්‌මිං ජම්‌බුදීපෙ තිණකට්‌ඨසාඛාපලාසං තං ඡෙත්‌වා 2 එකජ්‌ඣං සංහරිත්‌වා චතුරඞ්‌ගුලං චතුරඞ්‌ගුලං ඝටිකං කත්‌වා නික්‌ඛිපෙය්‍ය – ‘අයං මෙ මාතා, තස්‌සා මෙ මාතු අයං මාතා’ති, අපරියාදින්‌නාව 3 භික්‌ඛවෙ, තස්‌ස පුරිසස්‌ස මාතුමාතරො අස්‌සු, අථ ඉමස්‌මිං ජම්‌බුදීපෙ තිණකට්‌ඨසාඛාපලාසං පරික්‌ඛයං පරියාදානං ගච්‌ඡෙය්‍ය. තං කිස්‌ස හෙතු? අනමතග්‌ගොයං, භික්‌ඛවෙ, සංසාරො. පුබ්‌බා කොටි න පඤ්‌ඤායති අවිජ්‌ජානීවරණානං සත්‌තානං තණ්‌හාසංයොජනානං සන්‌ධාවතං සංසරතං. එවං දීඝරත්‌තං වො, භික්‌ඛවෙ, දුක්‌ඛං පච්‌චනුභූතං තිබ්‌බං පච්‌චනුභූතං බ්‍යසනං පච්‌චනුභූතං, කටසී 4 වඩ්‌ඪිතා. යාවඤ්‌චිදං, භික්‌ඛවෙ, අලමෙව සබ්‌බසඞ්‌ඛාරෙසු නිබ්‌බින්‌දිතුං අලං විරජ්‌ජිතුං අලං විමුච්‌චිතු’’න්‌ති. පඨමං.
‘‘Anamataggoyaṃ 5 bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Seyyathāpi, bhikkhave, puriso yaṃ imasmiṃ jambudīpe tiṇakaṭṭhasākhāpalāsaṃ taṃ chetvā 6 ekajjhaṃ saṃharitvā caturaṅgulaṃ caturaṅgulaṃ ghaṭikaṃ katvā nikkhipeyya – ‘ayaṃ me mātā, tassā me mātu ayaṃ mātā’ti, apariyādinnāva 7 bhikkhave, tassa purisassa mātumātaro assu, atha imasmiṃ jambudīpe tiṇakaṭṭhasākhāpalāsaṃ parikkhayaṃ pariyādānaṃ gaccheyya. Taṃ kissa hetu? Anamataggoyaṃ, bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Evaṃ dīgharattaṃ vo, bhikkhave, dukkhaṃ paccanubhūtaṃ tibbaṃ paccanubhūtaṃ byasanaṃ paccanubhūtaṃ, kaṭasī 8 vaḍḍhitā. Yāvañcidaṃ, bhikkhave, alameva sabbasaṅkhāresu nibbindituṃ alaṃ virajjituṃ alaṃ vimuccitu’’nti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. තිණකට්‌ඨසුත්‌තවණ්‌ණනා • 1. Tiṇakaṭṭhasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. තිණකට්‌ඨසුත්‌තවණ්‌ණනා • 1. Tiṇakaṭṭhasuttavaṇṇanā
