| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༤. ཨནམཏགྒསཾཡུཏྟཾ
4. Anamataggasaṃyuttaṃ
༡. པཋམཝགྒོ
1. Paṭhamavaggo
༡. ཏིཎཀཊྛསུཏྟཾ
1. Tiṇakaṭṭhasuttaṃ
༡༢༤. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘བྷིཀྑཝོ’’ཏི། ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ –
124. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ཨནམཏགྒོཡཾ 1 བྷིཀྑཝེ, སཾསཱརོ། པུབྦཱ ཀོཊི ན པཉྙཱཡཏི ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ སནྡྷཱཝཏཾ སཾསརཏཾ། སེཡྻཐཱཔི, བྷིཀྑཝེ, པུརིསོ ཡཾ ཨིམསྨིཾ ཛམྦུདཱིཔེ ཏིཎཀཊྛསཱཁཱཔལཱསཾ ཏཾ ཚེཏྭཱ 2 ཨེཀཛ྄ཛྷཾ སཾཧརིཏྭཱ ཙཏུརངྒུལཾ ཙཏུརངྒུལཾ གྷཊིཀཾ ཀཏྭཱ ནིཀྑིཔེཡྻ – ‘ཨཡཾ མེ མཱཏཱ, ཏསྶཱ མེ མཱཏུ ཨཡཾ མཱཏཱ’ཏི, ཨཔརིཡཱདིནྣཱཝ 3 བྷིཀྑཝེ, ཏསྶ པུརིསསྶ མཱཏུམཱཏརོ ཨསྶུ, ཨཐ ཨིམསྨིཾ ཛམྦུདཱིཔེ ཏིཎཀཊྛསཱཁཱཔལཱསཾ པརིཀྑཡཾ པརིཡཱདཱནཾ གཙྪེཡྻ། ཏཾ ཀིསྶ ཧེཏུ? ཨནམཏགྒོཡཾ, བྷིཀྑཝེ, སཾསཱརོ། པུབྦཱ ཀོཊི ན པཉྙཱཡཏི ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ སནྡྷཱཝཏཾ སཾསརཏཾ། ཨེཝཾ དཱིགྷརཏྟཾ ཝོ, བྷིཀྑཝེ, དུཀྑཾ པཙྩནུབྷཱུཏཾ ཏིབྦཾ པཙྩནུབྷཱུཏཾ བྱསནཾ པཙྩནུབྷཱུཏཾ, ཀཊསཱི 4 ཝཌྜྷིཏཱ། ཡཱཝཉྩིདཾ, བྷིཀྑཝེ, ཨལམེཝ སབྦསངྑཱརེསུ ནིབྦིནྡིཏུཾ ཨལཾ ཝིརཛྫིཏུཾ ཨལཾ ཝིམུཙྩིཏུ’’ནྟི། པཋམཾ།
‘‘Anamataggoyaṃ 5 bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Seyyathāpi, bhikkhave, puriso yaṃ imasmiṃ jambudīpe tiṇakaṭṭhasākhāpalāsaṃ taṃ chetvā 6 ekajjhaṃ saṃharitvā caturaṅgulaṃ caturaṅgulaṃ ghaṭikaṃ katvā nikkhipeyya – ‘ayaṃ me mātā, tassā me mātu ayaṃ mātā’ti, apariyādinnāva 7 bhikkhave, tassa purisassa mātumātaro assu, atha imasmiṃ jambudīpe tiṇakaṭṭhasākhāpalāsaṃ parikkhayaṃ pariyādānaṃ gaccheyya. Taṃ kissa hetu? Anamataggoyaṃ, bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Evaṃ dīgharattaṃ vo, bhikkhave, dukkhaṃ paccanubhūtaṃ tibbaṃ paccanubhūtaṃ byasanaṃ paccanubhūtaṃ, kaṭasī 8 vaḍḍhitā. Yāvañcidaṃ, bhikkhave, alameva sabbasaṅkhāresu nibbindituṃ alaṃ virajjituṃ alaṃ vimuccitu’’nti. Paṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. ཏིཎཀཊྛསུཏྟཝཎྞནཱ • 1. Tiṇakaṭṭhasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. ཏིཎཀཊྛསུཏྟཝཎྞནཱ • 1. Tiṇakaṭṭhasuttavaṇṇanā
