| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. அனமதக்³க³ஸங்யுத்தங்
4. Anamataggasaṃyuttaṃ
1. பட²மவக்³கோ³
1. Paṭhamavaggo
1. திணகட்ட²ஸுத்தவண்ணனா
1. Tiṇakaṭṭhasuttavaṇṇanā
124. அனமதக்³க³ஸங்யுத்தஸ்ஸ பட²மே அனமதக்³கோ³தி அனு அமதக்³கோ³, வஸ்ஸஸதங் வஸ்ஸஸஹஸ்ஸங் ஞாணேன அனுக³ந்த்வாபி அமதக்³கோ³ அவிதி³தக்³கோ³, நாஸ்ஸ ஸக்கா இதோ வா எத்தோ வா அக்³க³ங் ஜானிதுங், அபரிச்சி²ன்னபுப்³பா³பரகோடிகோதி அத்தோ². ஸங்ஸாரோதி க²ந்தா⁴தீ³னங் அவிச்சி²ன்னப்பவத்தா படிபாடி. புப்³பா³ கோடி ந பஞ்ஞாயதீதி புரிமமரியாதா³ ந தி³ஸ்ஸதி. யத³க்³கே³ன சஸ்ஸ புரிமா கோடி ந பஞ்ஞாயதி, பச்சி²மாபி தத³க்³கே³னேவ ந பஞ்ஞாயதி, வேமஜ்ஜே²யேவ பன ஸத்தா ஸங்ஸரந்தி. பரியாதா³னங் க³ச்செ²ய்யாதி இத³ங் உபமாய கு²த்³த³கத்தா வுத்தங். பா³ஹிரஸமயஸ்மிஞ்ஹி அத்தோ² பரித்தோ ஹோதி, உபமா மஹதீ. ‘‘ஹத்தீ² விய அயங் கோ³ணோ, கோ³ணோ விய ஸூகரோ, ஸமுத்³தோ³ விய தளாக’’ந்தி ஹி வுத்தே ந தேஸங் தாதி³ஸங் பமாணங் ஹோதி. பு³த்³த⁴ஸமயே பன உபமா பரித்தா, அத்தோ² மஹா. பாளியஞ்ஹி ஏகோ ஜம்பு³தீ³போ க³ஹிதோ, ஏவரூபானங் பன ஜம்பு³தீ³பானங் ஸதேபி ஸஹஸ்ஸேபி ஸதஸஹஸ்ஸேபி திணாதீ³னி தேன உபக்கமேன பரியாதா³னங் க³ச்செ²ய்யுங், ந த்வேவ புரிஸஸ்ஸ மாது மாதரோதி. து³க்க²ங் பச்சனுபூ⁴தந்தி தும்ஹேஹி து³க்க²ங் அனுபூ⁴தங். திப்³ப³ந்தி தஸ்ஸேவ வேவசனங். ப்³யஸனந்தி ஞாதிப்³யஸனாதி³அனேகவித⁴ங். கடஸீதி ஸுஸானங், பத²வீயேவ வா. ஸா ஹி புனப்புனங் மரந்தேஹி ஸரீரனிக்கே²பேன வட்³டி⁴தா. அலமேவாதி யுத்தமேவ. பட²மங்.
124. Anamataggasaṃyuttassa paṭhame anamataggoti anu amataggo, vassasataṃ vassasahassaṃ ñāṇena anugantvāpi amataggo aviditaggo, nāssa sakkā ito vā etto vā aggaṃ jānituṃ, aparicchinnapubbāparakoṭikoti attho. Saṃsāroti khandhādīnaṃ avicchinnappavattā paṭipāṭi. Pubbā koṭi na paññāyatīti purimamariyādā na dissati. Yadaggena cassa purimā koṭi na paññāyati, pacchimāpi tadaggeneva na paññāyati, vemajjheyeva pana sattā saṃsaranti. Pariyādānaṃ gaccheyyāti idaṃ upamāya khuddakattā vuttaṃ. Bāhirasamayasmiñhi attho paritto hoti, upamā mahatī. ‘‘Hatthī viya ayaṃ goṇo, goṇo viya sūkaro, samuddo viya taḷāka’’nti hi vutte na tesaṃ tādisaṃ pamāṇaṃ hoti. Buddhasamaye pana upamā parittā, attho mahā. Pāḷiyañhi eko jambudīpo gahito, evarūpānaṃ pana jambudīpānaṃ satepi sahassepi satasahassepi tiṇādīni tena upakkamena pariyādānaṃ gaccheyyuṃ, na tveva purisassa mātu mātaroti. Dukkhaṃ paccanubhūtanti tumhehi dukkhaṃ anubhūtaṃ. Tibbanti tasseva vevacanaṃ. Byasananti ñātibyasanādianekavidhaṃ. Kaṭasīti susānaṃ, pathavīyeva vā. Sā hi punappunaṃ marantehi sarīranikkhepena vaḍḍhitā. Alamevāti yuttameva. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. திணகட்ட²ஸுத்தங் • 1. Tiṇakaṭṭhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. திணகட்ட²ஸுத்தவண்ணனா • 1. Tiṇakaṭṭhasuttavaṇṇanā
