१. तिणकट्ठसुत्तवण्णना

1. Tiṇakaṭṭhasuttavaṇṇanā

१२४. अनमतग्गसंयुत्तस्स पठमे अनमतग्गोति अनु अमतग्गो, वस्ससतं वस्ससहस्सं ञाणेन अनुगन्त्वापि अमतग्गो अविदितग्गो, नास्स सक्‍का इतो वा एत्तो वा अग्गं जानितुं, अपरिच्छिन्‍नपुब्बापरकोटिकोति अत्थो। संसारोति खन्धादीनं अविच्छिन्‍नप्पवत्ता पटिपाटि। पुब्बा कोटि न पञ्‍ञायतीति पुरिममरियादा न दिस्सति। यदग्गेन चस्स पुरिमा कोटि न पञ्‍ञायति, पच्छिमापि तदग्गेनेव न पञ्‍ञायति, वेमज्झेयेव पन सत्ता संसरन्ति। परियादानं गच्छेय्याति इदं उपमाय खुद्दकत्ता वुत्तं। बाहिरसमयस्मिञ्हि अत्थो परित्तो होति, उपमा महती। ‘‘हत्थी विय अयं गोणो, गोणो विय सूकरो, समुद्दो विय तळाक’’न्ति हि वुत्ते न तेसं तादिसं पमाणं होति। बुद्धसमये पन उपमा परित्ता, अत्थो महा। पाळियञ्हि एको जम्बुदीपो गहितो, एवरूपानं पन जम्बुदीपानं सतेपि सहस्सेपि सतसहस्सेपि तिणादीनि तेन उपक्‍कमेन परियादानं गच्छेय्युं, न त्वेव पुरिसस्स मातु मातरोति। दुक्खं पच्‍चनुभूतन्ति तुम्हेहि दुक्खं अनुभूतं। तिब्बन्ति तस्सेव वेवचनं। ब्यसनन्ति ञातिब्यसनादिअनेकविधं। कटसीति सुसानं, पथवीयेव वा। सा हि पुनप्पुनं मरन्तेहि सरीरनिक्खेपेन वड्ढिता। अलमेवाति युत्तमेव। पठमं।

124. Anamataggasaṃyuttassa paṭhame anamataggoti anu amataggo, vassasataṃ vassasahassaṃ ñāṇena anugantvāpi amataggo aviditaggo, nāssa sakkā ito vā etto vā aggaṃ jānituṃ, aparicchinnapubbāparakoṭikoti attho. Saṃsāroti khandhādīnaṃ avicchinnappavattā paṭipāṭi. Pubbā koṭi na paññāyatīti purimamariyādā na dissati. Yadaggena cassa purimā koṭi na paññāyati, pacchimāpi tadaggeneva na paññāyati, vemajjheyeva pana sattā saṃsaranti. Pariyādānaṃ gaccheyyāti idaṃ upamāya khuddakattā vuttaṃ. Bāhirasamayasmiñhi attho paritto hoti, upamā mahatī. ‘‘Hatthī viya ayaṃ goṇo, goṇo viya sūkaro, samuddo viya taḷāka’’nti hi vutte na tesaṃ tādisaṃ pamāṇaṃ hoti. Buddhasamaye pana upamā parittā, attho mahā. Pāḷiyañhi eko jambudīpo gahito, evarūpānaṃ pana jambudīpānaṃ satepi sahassepi satasahassepi tiṇādīni tena upakkamena pariyādānaṃ gaccheyyuṃ, na tveva purisassa mātu mātaroti. Dukkhaṃ paccanubhūtanti tumhehi dukkhaṃ anubhūtaṃ. Tibbanti tasseva vevacanaṃ. Byasananti ñātibyasanādianekavidhaṃ. Kaṭasīti susānaṃ, pathavīyeva vā. Sā hi punappunaṃ marantehi sarīranikkhepena vaḍḍhitā. Alamevāti yuttameva. Paṭhamaṃ.

Next: २. पथवीसुत्तवण्णना • 2. Pathavīsuttavaṇṇanā

Related texts:

तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / १. तिणकट्ठसुत्तं • 1. Tiṇakaṭṭhasuttaṃ

टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १. तिणकट्ठसुत्तवण्णना • 1. Tiṇakaṭṭhasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact