| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೪. ಅನಮತಗ್ಗಸಂಯುತ್ತಂ
4. Anamataggasaṃyuttaṃ
೧. ಪಠಮವಗ್ಗೋ
1. Paṭhamavaggo
೧. ತಿಣಕಟ್ಠಸುತ್ತವಣ್ಣನಾ
1. Tiṇakaṭṭhasuttavaṇṇanā
೧೨೪. ಅನಮತಗ್ಗಸಂಯುತ್ತಸ್ಸ ಪಠಮೇ ಅನಮತಗ್ಗೋತಿ ಅನು ಅಮತಗ್ಗೋ, ವಸ್ಸಸತಂ ವಸ್ಸಸಹಸ್ಸಂ ಞಾಣೇನ ಅನುಗನ್ತ್ವಾಪಿ ಅಮತಗ್ಗೋ ಅವಿದಿತಗ್ಗೋ, ನಾಸ್ಸ ಸಕ್ಕಾ ಇತೋ ವಾ ಏತ್ತೋ ವಾ ಅಗ್ಗಂ ಜಾನಿತುಂ, ಅಪರಿಚ್ಛಿನ್ನಪುಬ್ಬಾಪರಕೋಟಿಕೋತಿ ಅತ್ಥೋ। ಸಂಸಾರೋತಿ ಖನ್ಧಾದೀನಂ ಅವಿಚ್ಛಿನ್ನಪ್ಪವತ್ತಾ ಪಟಿಪಾಟಿ। ಪುಬ್ಬಾ ಕೋಟಿ ನ ಪಞ್ಞಾಯತೀತಿ ಪುರಿಮಮರಿಯಾದಾ ನ ದಿಸ್ಸತಿ। ಯದಗ್ಗೇನ ಚಸ್ಸ ಪುರಿಮಾ ಕೋಟಿ ನ ಪಞ್ಞಾಯತಿ, ಪಚ್ಛಿಮಾಪಿ ತದಗ್ಗೇನೇವ ನ ಪಞ್ಞಾಯತಿ, ವೇಮಜ್ಝೇಯೇವ ಪನ ಸತ್ತಾ ಸಂಸರನ್ತಿ। ಪರಿಯಾದಾನಂ ಗಚ್ಛೇಯ್ಯಾತಿ ಇದಂ ಉಪಮಾಯ ಖುದ್ದಕತ್ತಾ ವುತ್ತಂ। ಬಾಹಿರಸಮಯಸ್ಮಿಞ್ಹಿ ಅತ್ಥೋ ಪರಿತ್ತೋ ಹೋತಿ, ಉಪಮಾ ಮಹತೀ। ‘‘ಹತ್ಥೀ ವಿಯ ಅಯಂ ಗೋಣೋ, ಗೋಣೋ ವಿಯ ಸೂಕರೋ, ಸಮುದ್ದೋ ವಿಯ ತಳಾಕ’’ನ್ತಿ ಹಿ ವುತ್ತೇ ನ ತೇಸಂ ತಾದಿಸಂ ಪಮಾಣಂ ಹೋತಿ। ಬುದ್ಧಸಮಯೇ ಪನ ಉಪಮಾ ಪರಿತ್ತಾ, ಅತ್ಥೋ ಮಹಾ। ಪಾಳಿಯಞ್ಹಿ ಏಕೋ ಜಮ್ಬುದೀಪೋ ಗಹಿತೋ, ಏವರೂಪಾನಂ ಪನ ಜಮ್ಬುದೀಪಾನಂ ಸತೇಪಿ ಸಹಸ್ಸೇಪಿ ಸತಸಹಸ್ಸೇಪಿ ತಿಣಾದೀನಿ ತೇನ ಉಪಕ್ಕಮೇನ ಪರಿಯಾದಾನಂ ಗಚ್ಛೇಯ್ಯುಂ, ನ ತ್ವೇವ ಪುರಿಸಸ್ಸ ಮಾತು ಮಾತರೋತಿ। ದುಕ್ಖಂ ಪಚ್ಚನುಭೂತನ್ತಿ ತುಮ್ಹೇಹಿ ದುಕ್ಖಂ ಅನುಭೂತಂ। ತಿಬ್ಬನ್ತಿ ತಸ್ಸೇವ ವೇವಚನಂ। ಬ್ಯಸನನ್ತಿ ಞಾತಿಬ್ಯಸನಾದಿಅನೇಕವಿಧಂ। ಕಟಸೀತಿ ಸುಸಾನಂ, ಪಥವೀಯೇವ ವಾ। ಸಾ ಹಿ ಪುನಪ್ಪುನಂ ಮರನ್ತೇಹಿ ಸರೀರನಿಕ್ಖೇಪೇನ ವಡ್ಢಿತಾ। ಅಲಮೇವಾತಿ ಯುತ್ತಮೇವ। ಪಠಮಂ।
124. Anamataggasaṃyuttassa paṭhame anamataggoti anu amataggo, vassasataṃ vassasahassaṃ ñāṇena anugantvāpi amataggo aviditaggo, nāssa sakkā ito vā etto vā aggaṃ jānituṃ, aparicchinnapubbāparakoṭikoti attho. Saṃsāroti khandhādīnaṃ avicchinnappavattā paṭipāṭi. Pubbā koṭi na paññāyatīti purimamariyādā na dissati. Yadaggena cassa purimā koṭi na paññāyati, pacchimāpi tadaggeneva na paññāyati, vemajjheyeva pana sattā saṃsaranti. Pariyādānaṃ gaccheyyāti idaṃ upamāya khuddakattā vuttaṃ. Bāhirasamayasmiñhi attho paritto hoti, upamā mahatī. ‘‘Hatthī viya ayaṃ goṇo, goṇo viya sūkaro, samuddo viya taḷāka’’nti hi vutte na tesaṃ tādisaṃ pamāṇaṃ hoti. Buddhasamaye pana upamā parittā, attho mahā. Pāḷiyañhi eko jambudīpo gahito, evarūpānaṃ pana jambudīpānaṃ satepi sahassepi satasahassepi tiṇādīni tena upakkamena pariyādānaṃ gaccheyyuṃ, na tveva purisassa mātu mātaroti. Dukkhaṃ paccanubhūtanti tumhehi dukkhaṃ anubhūtaṃ. Tibbanti tasseva vevacanaṃ. Byasananti ñātibyasanādianekavidhaṃ. Kaṭasīti susānaṃ, pathavīyeva vā. Sā hi punappunaṃ marantehi sarīranikkhepena vaḍḍhitā. Alamevāti yuttameva. Paṭhamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧. ತಿಣಕಟ್ಠಸುತ್ತಂ • 1. Tiṇakaṭṭhasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೧. ತಿಣಕಟ್ಠಸುತ್ತವಣ್ಣನಾ • 1. Tiṇakaṭṭhasuttavaṇṇanā
