| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੪. ਅਨਮਤਗ੍ਗਸਂਯੁਤ੍ਤਂ
4. Anamataggasaṃyuttaṃ
੧. ਪਠਮવਗ੍ਗੋ
1. Paṭhamavaggo
੧. ਤਿਣਕਟ੍ਠਸੁਤ੍ਤવਣ੍ਣਨਾ
1. Tiṇakaṭṭhasuttavaṇṇanā
੧੨੪. ਅਨਮਤਗ੍ਗਸਂਯੁਤ੍ਤਸ੍ਸ ਪਠਮੇ ਅਨਮਤਗ੍ਗੋਤਿ ਅਨੁ ਅਮਤਗ੍ਗੋ, વਸ੍ਸਸਤਂ વਸ੍ਸਸਹਸ੍ਸਂ ਞਾਣੇਨ ਅਨੁਗਨ੍ਤ੍વਾਪਿ ਅਮਤਗ੍ਗੋ ਅવਿਦਿਤਗ੍ਗੋ, ਨਾਸ੍ਸ ਸਕ੍ਕਾ ਇਤੋ વਾ ਏਤ੍ਤੋ વਾ ਅਗ੍ਗਂ ਜਾਨਿਤੁਂ, ਅਪਰਿਚ੍ਛਿਨ੍ਨਪੁਬ੍ਬਾਪਰਕੋਟਿਕੋਤਿ ਅਤ੍ਥੋ। ਸਂਸਾਰੋਤਿ ਖਨ੍ਧਾਦੀਨਂ ਅવਿਚ੍ਛਿਨ੍ਨਪ੍ਪવਤ੍ਤਾ ਪਟਿਪਾਟਿ। ਪੁਬ੍ਬਾ ਕੋਟਿ ਨ ਪਞ੍ਞਾਯਤੀਤਿ ਪੁਰਿਮਮਰਿਯਾਦਾ ਨ ਦਿਸ੍ਸਤਿ। ਯਦਗ੍ਗੇਨ ਚਸ੍ਸ ਪੁਰਿਮਾ ਕੋਟਿ ਨ ਪਞ੍ਞਾਯਤਿ, ਪਚ੍ਛਿਮਾਪਿ ਤਦਗ੍ਗੇਨੇવ ਨ ਪਞ੍ਞਾਯਤਿ, વੇਮਜ੍ਝੇਯੇવ ਪਨ ਸਤ੍ਤਾ ਸਂਸਰਨ੍ਤਿ। ਪਰਿਯਾਦਾਨਂ ਗਚ੍ਛੇਯ੍ਯਾਤਿ ਇਦਂ ਉਪਮਾਯ ਖੁਦ੍ਦਕਤ੍ਤਾ વੁਤ੍ਤਂ। ਬਾਹਿਰਸਮਯਸ੍ਮਿਞ੍ਹਿ ਅਤ੍ਥੋ ਪਰਿਤ੍ਤੋ ਹੋਤਿ, ਉਪਮਾ ਮਹਤੀ। ‘‘ਹਤ੍ਥੀ વਿਯ ਅਯਂ ਗੋਣੋ, ਗੋਣੋ વਿਯ ਸੂਕਰੋ, ਸਮੁਦ੍ਦੋ વਿਯ ਤਲ਼ਾਕ’’ਨ੍ਤਿ ਹਿ વੁਤ੍ਤੇ ਨ ਤੇਸਂ ਤਾਦਿਸਂ ਪਮਾਣਂ ਹੋਤਿ। ਬੁਦ੍ਧਸਮਯੇ ਪਨ ਉਪਮਾ ਪਰਿਤ੍ਤਾ, ਅਤ੍ਥੋ ਮਹਾ। ਪਾਲ਼ਿਯਞ੍ਹਿ ਏਕੋ ਜਮ੍ਬੁਦੀਪੋ ਗਹਿਤੋ, ਏવਰੂਪਾਨਂ ਪਨ ਜਮ੍ਬੁਦੀਪਾਨਂ ਸਤੇਪਿ ਸਹਸ੍ਸੇਪਿ ਸਤਸਹਸ੍ਸੇਪਿ ਤਿਣਾਦੀਨਿ ਤੇਨ ਉਪਕ੍ਕਮੇਨ ਪਰਿਯਾਦਾਨਂ ਗਚ੍ਛੇਯ੍ਯੁਂ, ਨ ਤ੍વੇવ ਪੁਰਿਸਸ੍ਸ ਮਾਤੁ ਮਾਤਰੋਤਿ। ਦੁਕ੍ਖਂ ਪਚ੍ਚਨੁਭੂਤਨ੍ਤਿ ਤੁਮ੍ਹੇਹਿ ਦੁਕ੍ਖਂ ਅਨੁਭੂਤਂ। ਤਿਬ੍ਬਨ੍ਤਿ ਤਸ੍ਸੇવ વੇવਚਨਂ। ਬ੍ਯਸਨਨ੍ਤਿ ਞਾਤਿਬ੍ਯਸਨਾਦਿਅਨੇਕવਿਧਂ। ਕਟਸੀਤਿ ਸੁਸਾਨਂ, ਪਥવੀਯੇવ વਾ। ਸਾ ਹਿ ਪੁਨਪ੍ਪੁਨਂ ਮਰਨ੍ਤੇਹਿ ਸਰੀਰਨਿਕ੍ਖੇਪੇਨ વਡ੍ਢਿਤਾ। ਅਲਮੇવਾਤਿ ਯੁਤ੍ਤਮੇવ। ਪਠਮਂ।
124. Anamataggasaṃyuttassa paṭhame anamataggoti anu amataggo, vassasataṃ vassasahassaṃ ñāṇena anugantvāpi amataggo aviditaggo, nāssa sakkā ito vā etto vā aggaṃ jānituṃ, aparicchinnapubbāparakoṭikoti attho. Saṃsāroti khandhādīnaṃ avicchinnappavattā paṭipāṭi. Pubbā koṭi na paññāyatīti purimamariyādā na dissati. Yadaggena cassa purimā koṭi na paññāyati, pacchimāpi tadaggeneva na paññāyati, vemajjheyeva pana sattā saṃsaranti. Pariyādānaṃ gaccheyyāti idaṃ upamāya khuddakattā vuttaṃ. Bāhirasamayasmiñhi attho paritto hoti, upamā mahatī. ‘‘Hatthī viya ayaṃ goṇo, goṇo viya sūkaro, samuddo viya taḷāka’’nti hi vutte na tesaṃ tādisaṃ pamāṇaṃ hoti. Buddhasamaye pana upamā parittā, attho mahā. Pāḷiyañhi eko jambudīpo gahito, evarūpānaṃ pana jambudīpānaṃ satepi sahassepi satasahassepi tiṇādīni tena upakkamena pariyādānaṃ gaccheyyuṃ, na tveva purisassa mātu mātaroti. Dukkhaṃ paccanubhūtanti tumhehi dukkhaṃ anubhūtaṃ. Tibbanti tasseva vevacanaṃ. Byasananti ñātibyasanādianekavidhaṃ. Kaṭasīti susānaṃ, pathavīyeva vā. Sā hi punappunaṃ marantehi sarīranikkhepena vaḍḍhitā. Alamevāti yuttameva. Paṭhamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧. ਤਿਣਕਟ੍ਠਸੁਤ੍ਤਂ • 1. Tiṇakaṭṭhasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੧. ਤਿਣਕਟ੍ਠਸੁਤ੍ਤવਣ੍ਣਨਾ • 1. Tiṇakaṭṭhasuttavaṇṇanā
