| Library / Tipiṭaka / तिपिटक • Tipiṭaka / अपदानपाळि • Apadānapāḷi |
८. तिणमुट्ठिदायकत्थेरअपदानं
8. Tiṇamuṭṭhidāyakattheraapadānaṃ
४८.
48.
‘‘हिमवन्तस्साविदूरे, लम्बको नाम पब्बतो।
‘‘Himavantassāvidūre, lambako nāma pabbato;
उपतिस्सो नाम सम्बुद्धो, अब्भोकासम्हि चङ्कमि॥
Upatisso nāma sambuddho, abbhokāsamhi caṅkami.
४९.
49.
‘‘मिगलुद्दो तदा आसिं, अरञ्ञे कानने अहं।
‘‘Migaluddo tadā āsiṃ, araññe kānane ahaṃ;
दिस्वान तं देवदेवं, सयम्भुं अपराजितं॥
Disvāna taṃ devadevaṃ, sayambhuṃ aparājitaṃ.
५०.
50.
‘‘विप्पसन्नेन चित्तेन, तदा तस्स महेसिनो।
‘‘Vippasannena cittena, tadā tassa mahesino;
निसीदनत्थं बुद्धस्स, तिणमुट्ठिमदासहं॥
Nisīdanatthaṃ buddhassa, tiṇamuṭṭhimadāsahaṃ.
५१.
51.
‘‘दत्वान देवदेवस्स, भिय्यो चित्तं पसादयिं।
‘‘Datvāna devadevassa, bhiyyo cittaṃ pasādayiṃ;
सम्बुद्धं अभिवादेत्वा, पक्कामिं उत्तरामुखो॥
Sambuddhaṃ abhivādetvā, pakkāmiṃ uttarāmukho.
५२.
52.
५३.
53.
‘‘आसन्ने मे कतं कम्मं, बुद्धसेट्ठे अनासवे।
‘‘Āsanne me kataṃ kammaṃ, buddhaseṭṭhe anāsave;
सुमुत्तो सरवेगोव, देवलोकं अगञ्छहं॥
Sumutto saravegova, devalokaṃ agañchahaṃ.
५४.
54.
‘‘यूपो तत्थ सुभो आसि, पुञ्ञकम्माभिनिम्मितो।
‘‘Yūpo tattha subho āsi, puññakammābhinimmito;
सहस्सकण्डो सतभेण्डु, धजालु हरितामयो॥
Sahassakaṇḍo satabheṇḍu, dhajālu haritāmayo.
५५.
55.
‘‘पभा निद्धावते तस्स, सतरंसीव उग्गतो।
‘‘Pabhā niddhāvate tassa, sataraṃsīva uggato;
आकिण्णो देवकञ्ञाहि, आमोदिं कामकामहं॥
Ākiṇṇo devakaññāhi, āmodiṃ kāmakāmahaṃ.
५६.
56.
‘‘देवलोका चवित्वान, सुक्कमूलेन चोदितो।
‘‘Devalokā cavitvāna, sukkamūlena codito;
आगन्त्वान मनुस्सत्तं, पत्तोम्हि आसवक्खयं॥
Āgantvāna manussattaṃ, pattomhi āsavakkhayaṃ.
५७.
57.
‘‘चतुन्नवुतितो कप्पे, निसीदनमदासहं।
‘‘Catunnavutito kappe, nisīdanamadāsahaṃ;
दुग्गतिं नाभिजानामि, तिणमुट्ठियिदं फलं॥
Duggatiṃ nābhijānāmi, tiṇamuṭṭhiyidaṃ phalaṃ.
५८.
58.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा तिणमुट्ठिदायको थेरो इमा गाथायो अभासित्थाति।
Itthaṃ sudaṃ āyasmā tiṇamuṭṭhidāyako thero imā gāthāyo abhāsitthāti.
तिणमुट्ठिदायकत्थेरस्सापदानं अट्ठमं।
Tiṇamuṭṭhidāyakattherassāpadānaṃ aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ३. सीवलित्थेरअपदानवण्णना • 3. Sīvalittheraapadānavaṇṇanā
