| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
6. திணஸந்த²ரதா³யகத்தே²ரஅபதா³னவண்ணனா
6. Tiṇasantharadāyakattheraapadānavaṇṇanā
ஹிமவந்தஸ்ஸாவிதூ³ரேதிஆதி³கங் ஆயஸ்மதோ திணஸந்த²ரதா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ திஸ்ஸஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ பு³த்³து⁴ப்பாத³தோ பகே³வ உப்பன்னத்தா க⁴ராவாஸங் பஹாய தாபஸபப்³ப³ஜ்ஜங் பப்³ப³ஜித்வா ஹிமவந்தஸ்ஸ அவிதூ³ரே ஏகங் ஸரங் நிஸ்ஸாய படிவஸதி. தஸ்மிங் ஸமயே திஸ்ஸோ ப⁴க³வா தஸ்ஸானுகம்பாய ஆகாஸேன அக³மாஸி. அத² கோ² ஸோ தாபஸோ ஆகாஸதோ ஓருய்ஹ டி²தங் தங் ப⁴க³வந்தங் தி³ஸ்வா பஸன்னமானஸோ திணங் லாயித்வா திணஸந்த²ரங் கத்வா நிஸீதா³பெத்வா ப³ஹுமானாத³ரேன பஞ்சபதிட்டி²தேன வந்தி³த்வா படிகுடிகோ ஹுத்வா பக்காமி. ஸோ யாவதாயுகங் ட²த்வா ததோ சவித்வா தே³வமனுஸ்ஸேஸு ஸங்ஸரந்தோ அனேகவித⁴ஸம்பத்திங் அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ வுத்³தி⁴ப்பத்தோ ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி.
Himavantassāvidūretiādikaṃ āyasmato tiṇasantharadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kulagehe nibbatto buddhuppādato pageva uppannattā gharāvāsaṃ pahāya tāpasapabbajjaṃ pabbajitvā himavantassa avidūre ekaṃ saraṃ nissāya paṭivasati. Tasmiṃ samaye tisso bhagavā tassānukampāya ākāsena agamāsi. Atha kho so tāpaso ākāsato oruyha ṭhitaṃ taṃ bhagavantaṃ disvā pasannamānaso tiṇaṃ lāyitvā tiṇasantharaṃ katvā nisīdāpetvā bahumānādarena pañcapatiṭṭhitena vanditvā paṭikuṭiko hutvā pakkāmi. So yāvatāyukaṃ ṭhatvā tato cavitvā devamanussesu saṃsaranto anekavidhasampattiṃ anubhavitvā imasmiṃ buddhuppāde ekasmiṃ kulagehe nibbatto vuddhippatto satthari pasīditvā pabbajito nacirasseva arahā ahosi.
22. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஹிமவந்தஸ்ஸாவிதூ³ரேதிஆதி³மாஹ. தங் ஹெட்டா² வுத்தத்த²மேவ. மஹாஜாதஸ்ஸரோதி எத்த² பன ஸரந்தி எத்த² பானீயத்தி²கா த்³விபத³சதுப்பதா³த³யோ ஸத்தாதி ஸரங், அத² வா ஸரந்தி எத்த² நதீ³கந்த³ராத³யோதி ஸரங், மஹந்தோ ச ஸோ ஸயமேவ ஜாதத்தா ஸரோ சேதி மஹாஜாதஸ்ஸரோ. அனோதத்தச²த்³த³ந்தத³ஹாத³யோ விய அபாகடனாமத்தா ‘‘மஹாஜாதஸ்ஸரோ’’தி வுத்தோதி த³ட்ட²ப்³போ³. ஸதபத்தேஹி ஸஞ்ச²ன்னோதி ஏகேகஸ்மிங் புப்பே² ஸதஸதபத்தானங் வஸேன ஸதபத்தோ, ஸதபத்தஸேதபது³மேஹி ஸஞ்ச²ன்னோ க³ஹனீபூ⁴தோதி அத்தோ². நானாஸகுணமாலயோதி அனேகே ஹங்ஸகுக்குடகுக்குஹதெ³ண்டி³பா⁴த³யோ ஏகதோ குணந்தி ஸத்³த³ங் கரொந்தீதி ஸகுணாதி லத்³த⁴னாமானங் பக்கீ²னங் ஆலயோ ஆதா⁴ரபூ⁴தோதி அத்தோ². ஸேஸங் ஸப்³ப³த்த² உத்தானத்த²மேவாதி.
22. So aparabhāge attano pubbakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Taṃ heṭṭhā vuttatthameva. Mahājātassaroti ettha pana saranti ettha pānīyatthikā dvipadacatuppadādayo sattāti saraṃ, atha vā saranti ettha nadīkandarādayoti saraṃ, mahanto ca so sayameva jātattā saro ceti mahājātassaro. Anotattachaddantadahādayo viya apākaṭanāmattā ‘‘mahājātassaro’’ti vuttoti daṭṭhabbo. Satapattehisañchannoti ekekasmiṃ pupphe satasatapattānaṃ vasena satapatto, satapattasetapadumehi sañchanno gahanībhūtoti attho. Nānāsakuṇamālayoti aneke haṃsakukkuṭakukkuhadeṇḍibhādayo ekato kuṇanti saddaṃ karontīti sakuṇāti laddhanāmānaṃ pakkhīnaṃ ālayo ādhārabhūtoti attho. Sesaṃ sabbattha uttānatthamevāti.
திணஸந்த²ரதா³யகத்தே²ரஅபதா³னவண்ணனா ஸமத்தா.
Tiṇasantharadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 6. திணஸந்த²ரதா³யகத்தே²ரஅபதா³னங் • 6. Tiṇasantharadāyakattheraapadānaṃ
