| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৬. তিণসন্থরদাযকত্থেরঅপদানৰণ্ণনা
6. Tiṇasantharadāyakattheraapadānavaṇṇanā
হিমৰন্তস্সাৰিদূরেতিআদিকং আযস্মতো তিণসন্থরদাযকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো তিস্সস্স ভগৰতো কালে একস্মিং কুলগেহে নিব্বত্তো বুদ্ধুপ্পাদতো পগেৰ উপ্পন্নত্তা ঘরাৰাসং পহায তাপসপব্বজ্জং পব্বজিত্ৰা হিমৰন্তস্স অৰিদূরে একং সরং নিস্সায পটিৰসতি। তস্মিং সমযে তিস্সো ভগৰা তস্সানুকম্পায আকাসেন অগমাসি। অথ খো সো তাপসো আকাসতো ওরুয্হ ঠিতং তং ভগৰন্তং দিস্ৰা পসন্নমানসো তিণং লাযিত্ৰা তিণসন্থরং কত্ৰা নিসীদাপেত্ৰা বহুমানাদরেন পঞ্চপতিট্ঠিতেন ৰন্দিত্ৰা পটিকুটিকো হুত্ৰা পক্কামি। সো যাৰতাযুকং ঠত্ৰা ততো চৰিত্ৰা দেৰমনুস্সেসু সংসরন্তো অনেকৰিধসম্পত্তিং অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিপ্পত্তো সত্থরি পসীদিত্ৰা পব্বজিতো নচিরস্সেৰ অরহা অহোসি।
Himavantassāvidūretiādikaṃ āyasmato tiṇasantharadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kulagehe nibbatto buddhuppādato pageva uppannattā gharāvāsaṃ pahāya tāpasapabbajjaṃ pabbajitvā himavantassa avidūre ekaṃ saraṃ nissāya paṭivasati. Tasmiṃ samaye tisso bhagavā tassānukampāya ākāsena agamāsi. Atha kho so tāpaso ākāsato oruyha ṭhitaṃ taṃ bhagavantaṃ disvā pasannamānaso tiṇaṃ lāyitvā tiṇasantharaṃ katvā nisīdāpetvā bahumānādarena pañcapatiṭṭhitena vanditvā paṭikuṭiko hutvā pakkāmi. So yāvatāyukaṃ ṭhatvā tato cavitvā devamanussesu saṃsaranto anekavidhasampattiṃ anubhavitvā imasmiṃ buddhuppāde ekasmiṃ kulagehe nibbatto vuddhippatto satthari pasīditvā pabbajito nacirasseva arahā ahosi.
২২. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো হিমৰন্তস্সাৰিদূরেতিআদিমাহ। তং হেট্ঠা ৰুত্তত্থমেৰ। মহাজাতস্সরোতি এত্থ পন সরন্তি এত্থ পানীযত্থিকা দ্ৰিপদচতুপ্পদাদযো সত্তাতি সরং, অথ ৰা সরন্তি এত্থ নদীকন্দরাদযোতি সরং, মহন্তো চ সো সযমেৰ জাতত্তা সরো চেতি মহাজাতস্সরো। অনোতত্তছদ্দন্তদহাদযো ৰিয অপাকটনামত্তা ‘‘মহাজাতস্সরো’’তি ৰুত্তোতি দট্ঠব্বো। সতপত্তেহি সঞ্ছন্নোতি একেকস্মিং পুপ্ফে সতসতপত্তানং ৰসেন সতপত্তো, সতপত্তসেতপদুমেহি সঞ্ছন্নো গহনীভূতোতি অত্থো। নানাসকুণমালযোতি অনেকে হংসকুক্কুটকুক্কুহদেণ্ডিভাদযো একতো কুণন্তি সদ্দং করোন্তীতি সকুণাতি লদ্ধনামানং পক্খীনং আলযো আধারভূতোতি অত্থো। সেসং সব্বত্থ উত্তানত্থমেৰাতি।
22. So aparabhāge attano pubbakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Taṃ heṭṭhā vuttatthameva. Mahājātassaroti ettha pana saranti ettha pānīyatthikā dvipadacatuppadādayo sattāti saraṃ, atha vā saranti ettha nadīkandarādayoti saraṃ, mahanto ca so sayameva jātattā saro ceti mahājātassaro. Anotattachaddantadahādayo viya apākaṭanāmattā ‘‘mahājātassaro’’ti vuttoti daṭṭhabbo. Satapattehisañchannoti ekekasmiṃ pupphe satasatapattānaṃ vasena satapatto, satapattasetapadumehi sañchanno gahanībhūtoti attho. Nānāsakuṇamālayoti aneke haṃsakukkuṭakukkuhadeṇḍibhādayo ekato kuṇanti saddaṃ karontīti sakuṇāti laddhanāmānaṃ pakkhīnaṃ ālayo ādhārabhūtoti attho. Sesaṃ sabbattha uttānatthamevāti.
তিণসন্থরদাযকত্থেরঅপদানৰণ্ণনা সমত্তা।
Tiṇasantharadāyakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৬. তিণসন্থরদাযকত্থেরঅপদানং • 6. Tiṇasantharadāyakattheraapadānaṃ
