| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. திணஸூலகத்தே²ரஅபதா³னவண்ணனா
7. Tiṇasūlakattheraapadānavaṇṇanā
ஹிமவந்தஸ்ஸாவிதூ³ரேதிஆதி³கங் ஆயஸ்மதோ திணஸூலகத்தே²ரஸ்ஸ அபதா³னங். அயம்பி தே²ரோ புரிமஜினவரேஸு கதபுஞ்ஞஸம்பா⁴ரோ உப்பன்னுப்பன்னப⁴வே குஸலானி உபசினந்தோ ஸிகி²ஸ்ஸ ப⁴க³வதோ காலே குலகே³ஹே நிப்³ப³த்தோ க⁴ராவாஸங் ஸண்ட²பெத்வா தத்த² தோ³ஸங் தி³ஸ்வா தங் பஹாய தாபஸபப்³ப³ஜ்ஜங் பப்³ப³ஜித்வா வஸந்தோ ஹிமவந்தஸமீபே பூ⁴தக³ணே நாம பப்³ப³தே வஸந்தங் ஏகதங் விவேகமனுப்³ரூஹந்தங் ஸிகி²ங் ஸம்பு³த்³த⁴ங் தி³ஸ்வா பஸன்னமானஸோ திணஸூலபுப்ப²ங் க³ஹெத்வா பாத³மூலே பூஜேஸி. பு³த்³தோ⁴பி தஸ்ஸ அனுமோத³னங் அகாஸி.
Himavantassāvidūretiādikaṃ āyasmato tiṇasūlakattherassa apadānaṃ. Ayampi thero purimajinavaresu katapuññasambhāro uppannuppannabhave kusalāni upacinanto sikhissa bhagavato kāle kulagehe nibbatto gharāvāsaṃ saṇṭhapetvā tattha dosaṃ disvā taṃ pahāya tāpasapabbajjaṃ pabbajitvā vasanto himavantasamīpe bhūtagaṇe nāma pabbate vasantaṃ ekataṃ vivekamanubrūhantaṃ sikhiṃ sambuddhaṃ disvā pasannamānaso tiṇasūlapupphaṃ gahetvā pādamūle pūjesi. Buddhopi tassa anumodanaṃ akāsi.
35. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் விப⁴வஸம்பன்னே ஏகஸ்மிங் குலே நிப்³ப³த்தோ வுத்³தி⁴மன்வாய ஸாஸனே பஸன்னோ பப்³ப³ஜித்வா உபனிஸ்ஸயஸம்பன்னத்தா நசிரஸ்ஸேவ அரஹத்தங் பாபுணித்வா புப்³ப³கம்மங் ஸரித்வா ஸோமனஸ்ஸப்பத்தோ புப்³ப³சரிதாபதா³னங் பகாஸெந்தோ ஹிமவந்தஸ்ஸாவிதூ³ரேதிஆதி³மாஹ. பூ⁴தக³ணோ நாம பப்³ப³தோதி பூ⁴தக³ணானங் தே³வயக்க²ஸமூஹானங் ஆவாஸபூ⁴தத்தா ப⁴வனஸதி³ஸத்தா அவிரூள்ஹபா⁴வேன பவத்தத்தா ச பூ⁴தக³ணோ நாம பப்³ப³தோ, தஸ்மிங் ஏகோ அது³தியோ ஜினோ ஜிதமாரோ பு³த்³தோ⁴ வஸதே தி³ப்³ப³ப்³ரஹ்மஅரியஇரியாபத²விஹாரேஹி விஹரதீதி அத்தோ².
35. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde sāvatthiyaṃ vibhavasampanne ekasmiṃ kule nibbatto vuddhimanvāya sāsane pasanno pabbajitvā upanissayasampannattā nacirasseva arahattaṃ pāpuṇitvā pubbakammaṃ saritvā somanassappatto pubbacaritāpadānaṃ pakāsento himavantassāvidūretiādimāha. Bhūtagaṇo nāma pabbatoti bhūtagaṇānaṃ devayakkhasamūhānaṃ āvāsabhūtattā bhavanasadisattā avirūḷhabhāvena pavattattā ca bhūtagaṇo nāma pabbato, tasmiṃ eko adutiyo jino jitamāro buddho vasate dibbabrahmaariyairiyāpathavihārehi viharatīti attho.
36. ஏகூனஸதஸஹஸ்ஸங் , கப்பங் ந வினிபாதிகோதி தேன திணஸூலபுப்ப²பூஜாகரணப²லேன நிரந்தரங் ஏகூனஸதஸஹஸ்ஸகப்பானங் அவினிபாதகோ சதுராபாயவினிமுத்தோ ஸக்³க³ஸம்பத்திப⁴வமேவ உபபன்னோதி அத்தோ². ஸேஸங் ஸுவிஞ்ஞெய்யமேவாதி.
36.Ekūnasatasahassaṃ , kappaṃ na vinipātikoti tena tiṇasūlapupphapūjākaraṇaphalena nirantaraṃ ekūnasatasahassakappānaṃ avinipātako caturāpāyavinimutto saggasampattibhavameva upapannoti attho. Sesaṃ suviññeyyamevāti.
திணஸூலகத்தே²ரஅபதா³னவண்ணனா ஸமத்தா.
Tiṇasūlakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. திணஸூலகத்தே²ரஅபதா³னங் • 7. Tiṇasūlakattheraapadānaṃ
