| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
7. තිණසූලකත්‌ථෙරඅපදානවණ්‌ණනා
7. Tiṇasūlakattheraapadānavaṇṇanā
හිමවන්‌තස්‌සාවිදූරෙතිආදිකං ආයස්‌මතො තිණසූලකත්‌ථෙරස්‌ස අපදානං. අයම්‌පි ථෙරො පුරිමජිනවරෙසු කතපුඤ්‌ඤසම්‌භාරො උප්‌පන්‌නුප්‌පන්‌නභවෙ කුසලානි උපචිනන්‌තො සිඛිස්‌ස භගවතො කාලෙ කුලගෙහෙ නිබ්‌බත්‌තො ඝරාවාසං සණ්‌ඨපෙත්‌වා තත්‌ථ දොසං දිස්‌වා තං පහාය තාපසපබ්‌බජ්‌ජං පබ්‌බජිත්‌වා වසන්‌තො හිමවන්‌තසමීපෙ භූතගණෙ නාම පබ්‌බතෙ වසන්‌තං එකතං විවෙකමනුබ්‍රූහන්‌තං සිඛිං සම්‌බුද්‌ධං දිස්‌වා පසන්‌නමානසො තිණසූලපුප්‌ඵං ගහෙත්‌වා පාදමූලෙ පූජෙසි. බුද්‌ධොපි තස්‌ස අනුමොදනං අකාසි.
Himavantassāvidūretiādikaṃ āyasmato tiṇasūlakattherassa apadānaṃ. Ayampi thero purimajinavaresu katapuññasambhāro uppannuppannabhave kusalāni upacinanto sikhissa bhagavato kāle kulagehe nibbatto gharāvāsaṃ saṇṭhapetvā tattha dosaṃ disvā taṃ pahāya tāpasapabbajjaṃ pabbajitvā vasanto himavantasamīpe bhūtagaṇe nāma pabbate vasantaṃ ekataṃ vivekamanubrūhantaṃ sikhiṃ sambuddhaṃ disvā pasannamānaso tiṇasūlapupphaṃ gahetvā pādamūle pūjesi. Buddhopi tassa anumodanaṃ akāsi.
35. සො තෙන පුඤ්‌ඤෙන දෙවමනුස්‌සෙසු සංසරන්‌තො උභයසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ සාවත්‌ථියං විභවසම්‌පන්‌නෙ එකස්‌මිං කුලෙ නිබ්‌බත්‌තො වුද්‌ධිමන්‌වාය සාසනෙ පසන්‌නො පබ්‌බජිත්‌වා උපනිස්‌සයසම්‌පන්‌නත්‌තා නචිරස්‌සෙව අරහත්‌තං පාපුණිත්‌වා පුබ්‌බකම්‌මං සරිත්‌වා සොමනස්‌සප්‌පත්‌තො පුබ්‌බචරිතාපදානං පකාසෙන්‌තො හිමවන්‌තස්‌සාවිදූරෙතිආදිමාහ. භූතගණො නාම පබ්‌බතොති භූතගණානං දෙවයක්‌ඛසමූහානං ආවාසභූතත්‌තා භවනසදිසත්‌තා අවිරූළ්‌හභාවෙන පවත්‌තත්‌තා ච භූතගණො නාම පබ්‌බතො, තස්‌මිං එකො අදුතියො ජිනො ජිතමාරො බුද්‌ධො වසතෙ දිබ්‌බබ්‍රහ්‌මඅරියඉරියාපථවිහාරෙහි විහරතීති අත්‌ථො.
35. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde sāvatthiyaṃ vibhavasampanne ekasmiṃ kule nibbatto vuddhimanvāya sāsane pasanno pabbajitvā upanissayasampannattā nacirasseva arahattaṃ pāpuṇitvā pubbakammaṃ saritvā somanassappatto pubbacaritāpadānaṃ pakāsento himavantassāvidūretiādimāha. Bhūtagaṇo nāma pabbatoti bhūtagaṇānaṃ devayakkhasamūhānaṃ āvāsabhūtattā bhavanasadisattā avirūḷhabhāvena pavattattā ca bhūtagaṇo nāma pabbato, tasmiṃ eko adutiyo jino jitamāro buddho vasate dibbabrahmaariyairiyāpathavihārehi viharatīti attho.
36. එකූනසතසහස්‌සං , කප්‌පං න විනිපාතිකොති තෙන තිණසූලපුප්‌ඵපූජාකරණඵලෙන නිරන්‌තරං එකූනසතසහස්‌සකප්‌පානං අවිනිපාතකො චතුරාපායවිනිමුත්‌තො සග්‌ගසම්‌පත්‌තිභවමෙව උපපන්‌නොති අත්‌ථො. සෙසං සුවිඤ්‌ඤෙය්‍යමෙවාති.
36.Ekūnasatasahassaṃ , kappaṃ na vinipātikoti tena tiṇasūlapupphapūjākaraṇaphalena nirantaraṃ ekūnasatasahassakappānaṃ avinipātako caturāpāyavinimutto saggasampattibhavameva upapannoti attho. Sesaṃ suviññeyyamevāti.
තිණසූලකත්‌ථෙරඅපදානවණ්‌ණනා සමත්‌තා.
Tiṇasūlakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 7. තිණසූලකත්‌ථෙරඅපදානං • 7. Tiṇasūlakattheraapadānaṃ
