| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
7. திணவத்தா²ரகாதி³கதா²
7. Tiṇavatthārakādikathā
212. கக்க²ளதாய வாளதாயாதி எத்த² கக்க²ளஸ்ஸ பா⁴வோ கக்க²ளதா, வாளஸ்ஸ பா⁴வோ வாளதாதி வசனத்த²ங் த³ஸ்ஸெந்தோ ஆஹ ‘‘கக்க²ளபா⁴வாய சேவ வாளபா⁴வாய சா’’தி. இமினா தாபச்சயஸ்ஸ ஸமூஹத்த²ஞ்ச ஸ்வத்த²ஞ்ச படிக்கி²பதி. ‘‘கக்க²ளதாய வாளதாயா’’தி ப்³யஞ்ஜனதோயேவ நானங், ந அத்த²தோ. பே⁴தா³யாதி எத்த² அஞ்ஞஸ்ஸ பே⁴த³ங் படிக்கி²பந்தோ ஆஹ ‘‘ஸங்க⁴பே⁴தா³யா’’தி. கி³லானேபீதி பிஸத்³தோ³ அஞ்ஞே பன கா கதா²தி த³ஸ்ஸேதி. தத்தே²வாதி அதி⁴கரணவூபஸமட்டா²னேயேவ. ‘‘ஏகதோ’’தி இமினா ஏகஜ்ஜ²ந்தி பத³ஸ்ஸ ‘‘ஏகதோ’’தி பதே³ன ஸமானதங் த³ஸ்ஸேதி, ஏகஸத்³த³தோ ஜ்ஜ²பச்சயோ ச தோபச்சயோ ச விஸேஸோ, ‘‘திணவத்தா²ரகஸதி³ஸத்தா’’தி இமினா ஸதி³ஸூபசாரங் த³ஸ்ஸேதி. திணேஹி அவத்த²ரிதப்³ப³ந்தி திணவத்தா²ரங், கூ³த²முத்தங், திணவத்தா²ரமிவ திணவத்தா²ரகங். எத்த² அதி⁴கரணமேவ முக்²யதோ லப்³ப⁴தி, ஸமதோ² பன ப²லூபசாரதோ, ஸதி³ஸத்தே² கபச்சயோ. தமேவத்த²ங் பாகடங் கரொந்தோ ஆஹ ‘‘யதா² ஹீ’’திஆதி³. க⁴ட்டியமானங் கூ³த²ங் வா முத்தங் வாதி யோஜனா. ‘‘க⁴ட்டியமான’’ந்தி பத³ங் ஹேதுஅந்தோக³த⁴விஸேஸனங், ‘‘பா³த⁴தீ’’தி இமினா ஸம்ப³ந்தி⁴தப்³ப³ங். ஸுப்படிச்சா²தி³தஸ்ஸ பன அஸ்ஸ கூ³த²முத்தஸ்ஸாதி யோஜனா. ‘‘ஸுப்படிச்சா²தி³தஸ்ஸா’’தி பத³ம்பி ஹேதுஅந்தோக³த⁴விஸேஸனமேவ, ‘‘ந பா³த⁴தீ’’தி இமினா ஸம்ப³ந்தி⁴தப்³ப³ங். யங் அதி⁴கரணங் ஸங்வத்ததீதி ஸம்ப³ந்தோ⁴. மூலானுமூலந்தி மூலஞ்ச அனுமூலஞ்ச மூலானுமூலங். தந்தி அதி⁴கரணங். இமினா கம்மேனாதி திணவத்தா²ரககம்மேன. கூ³த²ங் திணேஹி படிச்ச²ன்னங் ஸுவூபஸந்தங் ஹோதி விய திணவத்தா²ரகேன படிச்ச²ன்னங் ஸுவூபஸந்தங் ஹோதீதி யோஜனா. இதீதி தஸ்மா.
212.Kakkhaḷatāya vāḷatāyāti ettha kakkhaḷassa bhāvo kakkhaḷatā, vāḷassa bhāvo vāḷatāti vacanatthaṃ dassento āha ‘‘kakkhaḷabhāvāya ceva vāḷabhāvāya cā’’ti. Iminā tāpaccayassa samūhatthañca svatthañca paṭikkhipati. ‘‘Kakkhaḷatāya vāḷatāyā’’ti byañjanatoyeva nānaṃ, na atthato. Bhedāyāti ettha aññassa bhedaṃ paṭikkhipanto āha ‘‘saṅghabhedāyā’’ti. Gilānepīti pisaddo aññe pana kā kathāti dasseti. Tatthevāti adhikaraṇavūpasamaṭṭhāneyeva. ‘‘Ekato’’ti iminā ekajjhanti padassa ‘‘ekato’’ti padena samānataṃ dasseti, ekasaddato jjhapaccayo ca topaccayo ca viseso, ‘‘tiṇavatthārakasadisattā’’ti iminā sadisūpacāraṃ dasseti. Tiṇehi avattharitabbanti tiṇavatthāraṃ, gūthamuttaṃ, tiṇavatthāramiva tiṇavatthārakaṃ. Ettha adhikaraṇameva mukhyato labbhati, samatho pana phalūpacārato, sadisatthe kapaccayo. Tamevatthaṃ pākaṭaṃ karonto āha ‘‘yathā hī’’tiādi. Ghaṭṭiyamānaṃ gūthaṃ vā muttaṃ vāti yojanā. ‘‘Ghaṭṭiyamāna’’nti padaṃ hetuantogadhavisesanaṃ, ‘‘bādhatī’’ti iminā sambandhitabbaṃ. Suppaṭicchāditassa pana assa gūthamuttassāti yojanā. ‘‘Suppaṭicchāditassā’’ti padampi hetuantogadhavisesanameva, ‘‘na bādhatī’’ti iminā sambandhitabbaṃ. Yaṃ adhikaraṇaṃ saṃvattatīti sambandho. Mūlānumūlanti mūlañca anumūlañca mūlānumūlaṃ. Tanti adhikaraṇaṃ. Iminā kammenāti tiṇavatthārakakammena. Gūthaṃ tiṇehi paṭicchannaṃ suvūpasantaṃ hoti viya tiṇavatthārakena paṭicchannaṃ suvūpasantaṃ hotīti yojanā. Itīti tasmā.
213. து²ல்லவஜ்ஜந்தி எத்த² து²ல்லச்சயஸ்ஸாபி து²ல்லவஜ்ஜத்தா இத⁴ பாராஜிகஸங்கா⁴தி³ஸேஸமேவாதி⁴ப்பேதந்தி ஆஹ ‘‘பாராஜிகஞ்சேவ ஸங்கா⁴தி³ஸேஸஞ்சா’’தி. கி³ஹிபடிஸங்யுத்தந்தி எத்த² கி³ஹீனங் படிஸங்யுத்தங் கி³ஹிபடிஸங்யுத்தந்தி வசனத்த²ங் த³ஸ்ஸெந்தோ ஆஹ ‘‘கி³ஹீன’’ந்திஆதி³. ‘‘ஹீனேனா’’தி பத³ங் ‘‘கு²ங்ஸனவம்ப⁴ன’’ இதி பதே³னேவ ஸம்ப³ந்தி⁴தப்³ப³ங். த⁴ம்மிகபடிஸ்ஸவேஸூதி நிமித்தத்தே² பு⁴ம்மவசனங்.
213.Thullavajjanti ettha thullaccayassāpi thullavajjattā idha pārājikasaṅghādisesamevādhippetanti āha ‘‘pārājikañceva saṅghādisesañcā’’ti. Gihipaṭisaṃyuttanti ettha gihīnaṃ paṭisaṃyuttaṃ gihipaṭisaṃyuttanti vacanatthaṃ dassento āha ‘‘gihīna’’ntiādi. ‘‘Hīnenā’’ti padaṃ ‘‘khuṃsanavambhana’’ iti padeneva sambandhitabbaṃ. Dhammikapaṭissavesūti nimittatthe bhummavacanaṃ.
214. கம்மவாசாபரியோஸானே வுட்டி²தா ஹொந்தீதி ஸம்ப³ந்தோ⁴. தத்தா²தி அதி⁴கரணவூபஸமட்டா²னே. அஞ்ஞாவிஹிதாபீதி அதி⁴கரணவினிச்ச²யதோ அஞ்ஞஸ்மிங் டா²னே சித்தங் ஆவிஹிதாபி ட²பிதாபி. உபஸம்பத³மண்ட³லதோதி உபஸம்பத³ஸீமபி³ம்ப³தோ, யே பனாதி பி⁴க்கூ² பன, தி³ட்டா²விகம்மங் கரொந்தீதி வா அனாக³தாதி வா நிஸின்னாதி வா ஸம்ப³ந்தோ⁴. தேஹி வாதி அதி⁴கரணங் வினிச்சி²னந்தேஹி பி⁴க்கூ²ஹி வா. தத்தா²தி அதி⁴கரணவினிச்சி²தட்டா²னங். ச²ந்த³ங் த³த்வாதி ச²ந்த³ங் ஸங்க⁴ஸ்ஸ த³த்வா. பரிவேணாதீ³ஸூதிஆதி³ஸத்³தே³ன ஆவாஸாத³யோ ஸங்க³ண்ஹாதி. தேதி பி⁴க்கூ².
214. Kammavācāpariyosāne vuṭṭhitā hontīti sambandho. Tatthāti adhikaraṇavūpasamaṭṭhāne. Aññāvihitāpīti adhikaraṇavinicchayato aññasmiṃ ṭhāne cittaṃ āvihitāpi ṭhapitāpi. Upasampadamaṇḍalatoti upasampadasīmabimbato, ye panāti bhikkhū pana, diṭṭhāvikammaṃ karontīti vā anāgatāti vā nisinnāti vā sambandho. Tehi vāti adhikaraṇaṃ vinicchinantehi bhikkhūhi vā. Tatthāti adhikaraṇavinicchitaṭṭhānaṃ. Chandaṃ datvāti chandaṃ saṅghassa datvā. Pariveṇādīsūtiādisaddena āvāsādayo saṅgaṇhāti. Teti bhikkhū.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 7. திணவத்தா²ரகங் • 7. Tiṇavatthārakaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / திணவத்தா²ரகாதி³கதா² • Tiṇavatthārakādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸதிவினயாதி³கதா²வண்ணனா • Sativinayādikathāvaṇṇanā
