| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā |
ཏིཎཝཏྠཱརཀཱདིཀཐཱ
Tiṇavatthārakādikathā
༢༡༢. ཀཀྑལ༹ཏྟཱཡ ཝཱལ༹ཏྟཱཡཱཏི ཀཀྑལ༹བྷཱཝཱཡ ཙེཝ ཝཱལ༹བྷཱཝཱཡ ཙ། བྷེདཱཡཱཏི སངྒྷབྷེདཱཡ། སབྦེཧེཝ ཨེཀཛ྄ཛྷནྟི ཀསྶཙི ཚནྡཾ ཨནཱཧརིཏྭཱ གིལཱནེཔི ཏཏྠེཝ ཨཱནེཏྭཱ ཨེཀཏོ སནྣིཔཏིཏབྦཾ། ཏིཎཝཏྠཱརཀེན ཝཱུཔསམེཡྻཱཏི ཨེཏྠ ཨིདཾ ཀམྨཾ ཏིཎཝཏྠཱརཀསདིསཏྟཱ ‘‘ཏིཎཝཏྠཱརཀོ’’ཏི ཝུཏྟཾ། ཡཐཱ ཧི གཱུཐཾ ཝཱ མུཏྟཾ ཝཱ གྷཊྚིཡམཱནཾ དུགྒནྡྷཏཱཡ བཱདྷཏི, ཏིཎེཧི ཨཝཏྠརིཏྭཱ སུཔྤཊིཙྪཱདིཏསྶ པནསྶ སོ གནྡྷོ ན བཱདྷཏི; ཨེཝམེཝ ཡཾ ཨདྷིཀརཎཾ མཱུལཱནུམཱུལཾ གནྟྭཱ ཝཱུཔསམིཡམཱནཾ ཀཀྑལ༹ཏྟཱཡ ཝཱལ༹ཏྟཱཡ བྷེདཱཡ སཾཝཏྟཏི, ཏཾ ཨིམིནཱ ཀམྨེན ཝཱུཔསནྟཾ གཱུཐཾ ཝིཡ ཏིཎཝཏྠཱརཀེན པཊིཙྪནྣཾ སུཝཱུཔསནྟཾ ཧོཏཱིཏི ཨིདཾ ཀམྨཾ ཏིཎཝཏྠཱརཀསདིསཏྟཱ ‘‘ཏིཎཝཏྠཱརཀོ’’ཏི ཝུཏྟཾ།
212.Kakkhaḷattāya vāḷattāyāti kakkhaḷabhāvāya ceva vāḷabhāvāya ca. Bhedāyāti saṅghabhedāya. Sabbeheva ekajjhanti kassaci chandaṃ anāharitvā gilānepi tattheva ānetvā ekato sannipatitabbaṃ. Tiṇavatthārakena vūpasameyyāti ettha idaṃ kammaṃ tiṇavatthārakasadisattā ‘‘tiṇavatthārako’’ti vuttaṃ. Yathā hi gūthaṃ vā muttaṃ vā ghaṭṭiyamānaṃ duggandhatāya bādhati, tiṇehi avattharitvā suppaṭicchāditassa panassa so gandho na bādhati; evameva yaṃ adhikaraṇaṃ mūlānumūlaṃ gantvā vūpasamiyamānaṃ kakkhaḷattāya vāḷattāya bhedāya saṃvattati, taṃ iminā kammena vūpasantaṃ gūthaṃ viya tiṇavatthārakena paṭicchannaṃ suvūpasantaṃ hotīti idaṃ kammaṃ tiṇavatthārakasadisattā ‘‘tiṇavatthārako’’ti vuttaṃ.
༢༡༣. ཐུལླཝཛྫནྟི པཱརཱཛིཀཉྩེཝ སངྒྷཱདིསེསཉྩ། གིཧིཔཊིསཾཡུཏྟནྟི གིཧཱིནཾ ཧཱིནེན ཁུཾསནཝམྦྷནདྷམྨིཀཔཊིསྶཝེསུ ཨཱཔནྣཾ ཨཱཔཏྟིཾ།
213.Thullavajjanti pārājikañceva saṅghādisesañca. Gihipaṭisaṃyuttanti gihīnaṃ hīnena khuṃsanavambhanadhammikapaṭissavesu āpannaṃ āpattiṃ.
༢༡༤. ཨེཝཉྩ པན བྷིཀྑཝེ ཏེ བྷིཀྑཱུ ཏཱཧི ཨཱཔཏྟཱིཧི ཝུཊྛིཏཱ ཧོནྟཱིཏི ཨེཝཾ ཏིཎཝཏྠཱརཀཀམྨཝཱཙཱཡ ཀཏཱཡ ཀམྨཝཱཙཱཔརིཡོསཱནེ ཡཏྟཀཱ ཏཏྠ སནྣིཔཏིཏཱ ཨནྟམསོ སུཏྟཱཔི སམཱཔནྣཱཔི ཨཉྙཝིཧིཏཱཔི སབྦེ ཏེ བྷིཀྑཱུ ཡཱཝ ཨུཔསམྤདམཎྜལཏོ པཊྛཱཡ ཐུལླཝཛྫཉྩ གིཧིཔཊིསཾཡུཏྟཉྩ ཋཔེཏྭཱ ཨཝསེསཱ ཨཱཔཏྟིཡོ ཨཱཔནྣཱ, སབྦཱཧི ཏཱཧི ཨཱཔཏྟཱིཧི ཝུཊྛིཏཱ ཧོནྟི། ཡེ པན ‘‘ན མེཏཾ ཁམཏཱི’’ཏི ཨཉྙམཉྙཾ དིཊྛཱཝིཀམྨཾ ཀརོནྟི, ཏེཧི ཝཱ སདྡྷིཾ ཨཱཔཏྟིཾ ཨཱཔཛྫིཏྭཱཔི ཏཏྠ ཨནཱགཏཱ, ཨཱགནྟྭཱ ཝཱ ཚནྡཾ དཏྭཱ པརིཝེཎཱདཱིསུ ནིསིནྣཱ, ཏེ ཨཱཔཏྟཱིཧི ན ཝུཊྛཧནྟི། ཏེན ཝུཏྟཾ – ‘‘ཋཔེཏྭཱ དིཊྛཱཝིཀམྨཾ ཋཔེཏྭཱ ཡེ ན ཏཏྠ ཧོནྟཱི’’ཏི།
214.Evañca pana bhikkhave te bhikkhū tāhi āpattīhi vuṭṭhitā hontīti evaṃ tiṇavatthārakakammavācāya katāya kammavācāpariyosāne yattakā tattha sannipatitā antamaso suttāpi samāpannāpi aññavihitāpi sabbe te bhikkhū yāva upasampadamaṇḍalato paṭṭhāya thullavajjañca gihipaṭisaṃyuttañca ṭhapetvā avasesā āpattiyo āpannā, sabbāhi tāhi āpattīhi vuṭṭhitā honti. Ye pana ‘‘na metaṃ khamatī’’ti aññamaññaṃ diṭṭhāvikammaṃ karonti, tehi vā saddhiṃ āpattiṃ āpajjitvāpi tattha anāgatā, āgantvā vā chandaṃ datvā pariveṇādīsu nisinnā, te āpattīhi na vuṭṭhahanti. Tena vuttaṃ – ‘‘ṭhapetvā diṭṭhāvikammaṃ ṭhapetvā ye na tattha hontī’’ti.
ཏིཎཝཏྠཱརཀཱདིཀཐཱ ནིཊྛིཏཱ།
Tiṇavatthārakādikathā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / ཙཱུལ༹ཝགྒཔཱལི༹ • Cūḷavaggapāḷi / ༧. ཏིཎཝཏྠཱརཀཾ • 7. Tiṇavatthārakaṃ
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / སཏིཝིནཡཱདིཀཐཱཝཎྞནཱ • Sativinayādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཏིཎཝཏྠཱརཀཱདིཀཐཱཝཎྞནཱ • Tiṇavatthārakādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༧. ཏིཎཝཏྠཱརཀཱདིཀཐཱ • 7. Tiṇavatthārakādikathā
