| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
༧. ཏིཎཝཏྠཱརཀཱདིཀཐཱ
7. Tiṇavatthārakādikathā
༢༡༢. ཀཀྑལ༹ཏཱཡ ཝཱལ༹ཏཱཡཱཏི ཨེཏྠ ཀཀྑལ༹སྶ བྷཱཝོ ཀཀྑལ༹ཏཱ, ཝཱལ༹སྶ བྷཱཝོ ཝཱལ༹ཏཱཏི ཝཙནཏྠཾ དསྶེནྟོ ཨཱཧ ‘‘ཀཀྑལ༹བྷཱཝཱཡ ཙེཝ ཝཱལ༹བྷཱཝཱཡ ཙཱ’’ཏི། ཨིམིནཱ ཏཱཔཙྩཡསྶ སམཱུཧཏྠཉྩ སྭཏྠཉྩ པཊིཀྑིཔཏི། ‘‘ཀཀྑལ༹ཏཱཡ ཝཱལ༹ཏཱཡཱ’’ཏི བྱཉྫནཏོཡེཝ ནཱནཾ, ན ཨཏྠཏོ། བྷེདཱཡཱཏི ཨེཏྠ ཨཉྙསྶ བྷེདཾ པཊིཀྑིཔནྟོ ཨཱཧ ‘‘སངྒྷབྷེདཱཡཱ’’ཏི། གིལཱནེཔཱིཏི པིསདྡོ ཨཉྙེ པན ཀཱ ཀཐཱཏི དསྶེཏི། ཏཏྠེཝཱཏི ཨདྷིཀརཎཝཱུཔསམཊྛཱནེཡེཝ། ‘‘ཨེཀཏོ’’ཏི ཨིམིནཱ ཨེཀཛ྄ཛྷནྟི པདསྶ ‘‘ཨེཀཏོ’’ཏི པདེན སམཱནཏཾ དསྶེཏི, ཨེཀསདྡཏོ ཛ྄ཛྷཔཙྩཡོ ཙ ཏོཔཙྩཡོ ཙ ཝིསེསོ, ‘‘ཏིཎཝཏྠཱརཀསདིསཏྟཱ’’ཏི ཨིམིནཱ སདིསཱུཔཙཱརཾ དསྶེཏི། ཏིཎེཧི ཨཝཏྠརིཏབྦནྟི ཏིཎཝཏྠཱརཾ, གཱུཐམུཏྟཾ, ཏིཎཝཏྠཱརམིཝ ཏིཎཝཏྠཱརཀཾ། ཨེཏྠ ཨདྷིཀརཎམེཝ མུཁྱཏོ ལབྦྷཏི, སམཐོ པན ཕལཱུཔཙཱརཏོ, སདིསཏྠེ ཀཔཙྩཡོ། ཏམེཝཏྠཾ པཱཀཊཾ ཀརོནྟོ ཨཱཧ ‘‘ཡཐཱ ཧཱི’’ཏིཨཱདི། གྷཊྚིཡམཱནཾ གཱུཐཾ ཝཱ མུཏྟཾ ཝཱཏི ཡོཛནཱ། ‘‘གྷཊྚིཡམཱན’’ནྟི པདཾ ཧེཏུཨནྟོགདྷཝིསེསནཾ, ‘‘བཱདྷཏཱི’’ཏི ཨིམིནཱ སམྦནྡྷིཏབྦཾ། སུཔྤཊིཙྪཱདིཏསྶ པན ཨསྶ གཱུཐམུཏྟསྶཱཏི ཡོཛནཱ། ‘‘སུཔྤཊིཙྪཱདིཏསྶཱ’’ཏི པདམྤི ཧེཏུཨནྟོགདྷཝིསེསནམེཝ, ‘‘ན བཱདྷཏཱི’’ཏི ཨིམིནཱ སམྦནྡྷིཏབྦཾ། ཡཾ ཨདྷིཀརཎཾ སཾཝཏྟཏཱིཏི སམྦནྡྷོ། མཱུལཱནུམཱུལནྟི མཱུལཉྩ ཨནུམཱུལཉྩ མཱུལཱནུམཱུལཾ། ཏནྟི ཨདྷིཀརཎཾ། ཨིམིནཱ ཀམྨེནཱཏི ཏིཎཝཏྠཱརཀཀམྨེན། གཱུཐཾ ཏིཎེཧི པཊིཙྪནྣཾ སུཝཱུཔསནྟཾ ཧོཏི ཝིཡ ཏིཎཝཏྠཱརཀེན པཊིཙྪནྣཾ སུཝཱུཔསནྟཾ ཧོཏཱིཏི ཡོཛནཱ། ཨིཏཱིཏི ཏསྨཱ།
212.Kakkhaḷatāya vāḷatāyāti ettha kakkhaḷassa bhāvo kakkhaḷatā, vāḷassa bhāvo vāḷatāti vacanatthaṃ dassento āha ‘‘kakkhaḷabhāvāya ceva vāḷabhāvāya cā’’ti. Iminā tāpaccayassa samūhatthañca svatthañca paṭikkhipati. ‘‘Kakkhaḷatāya vāḷatāyā’’ti byañjanatoyeva nānaṃ, na atthato. Bhedāyāti ettha aññassa bhedaṃ paṭikkhipanto āha ‘‘saṅghabhedāyā’’ti. Gilānepīti pisaddo aññe pana kā kathāti dasseti. Tatthevāti adhikaraṇavūpasamaṭṭhāneyeva. ‘‘Ekato’’ti iminā ekajjhanti padassa ‘‘ekato’’ti padena samānataṃ dasseti, ekasaddato jjhapaccayo ca topaccayo ca viseso, ‘‘tiṇavatthārakasadisattā’’ti iminā sadisūpacāraṃ dasseti. Tiṇehi avattharitabbanti tiṇavatthāraṃ, gūthamuttaṃ, tiṇavatthāramiva tiṇavatthārakaṃ. Ettha adhikaraṇameva mukhyato labbhati, samatho pana phalūpacārato, sadisatthe kapaccayo. Tamevatthaṃ pākaṭaṃ karonto āha ‘‘yathā hī’’tiādi. Ghaṭṭiyamānaṃ gūthaṃ vā muttaṃ vāti yojanā. ‘‘Ghaṭṭiyamāna’’nti padaṃ hetuantogadhavisesanaṃ, ‘‘bādhatī’’ti iminā sambandhitabbaṃ. Suppaṭicchāditassa pana assa gūthamuttassāti yojanā. ‘‘Suppaṭicchāditassā’’ti padampi hetuantogadhavisesanameva, ‘‘na bādhatī’’ti iminā sambandhitabbaṃ. Yaṃ adhikaraṇaṃ saṃvattatīti sambandho. Mūlānumūlanti mūlañca anumūlañca mūlānumūlaṃ. Tanti adhikaraṇaṃ. Iminā kammenāti tiṇavatthārakakammena. Gūthaṃ tiṇehi paṭicchannaṃ suvūpasantaṃ hoti viya tiṇavatthārakena paṭicchannaṃ suvūpasantaṃ hotīti yojanā. Itīti tasmā.
༢༡༣. ཐུལླཝཛྫནྟི ཨེཏྠ ཐུལླཙྩཡསྶཱཔི ཐུལླཝཛྫཏྟཱ ཨིདྷ པཱརཱཛིཀསངྒྷཱདིསེསམེཝཱདྷིཔྤེཏནྟི ཨཱཧ ‘‘པཱརཱཛིཀཉྩེཝ སངྒྷཱདིསེསཉྩཱ’’ཏི། གིཧིཔཊིསཾཡུཏྟནྟི ཨེཏྠ གིཧཱིནཾ པཊིསཾཡུཏྟཾ གིཧིཔཊིསཾཡུཏྟནྟི ཝཙནཏྠཾ དསྶེནྟོ ཨཱཧ ‘‘གིཧཱིན’’ནྟིཨཱདི། ‘‘ཧཱིནེནཱ’’ཏི པདཾ ‘‘ཁུཾསནཝམྦྷན’’ ཨིཏི པདེནེཝ སམྦནྡྷིཏབྦཾ། དྷམྨིཀཔཊིསྶཝེསཱུཏི ནིམིཏྟཏྠེ བྷུམྨཝཙནཾ།
213.Thullavajjanti ettha thullaccayassāpi thullavajjattā idha pārājikasaṅghādisesamevādhippetanti āha ‘‘pārājikañceva saṅghādisesañcā’’ti. Gihipaṭisaṃyuttanti ettha gihīnaṃ paṭisaṃyuttaṃ gihipaṭisaṃyuttanti vacanatthaṃ dassento āha ‘‘gihīna’’ntiādi. ‘‘Hīnenā’’ti padaṃ ‘‘khuṃsanavambhana’’ iti padeneva sambandhitabbaṃ. Dhammikapaṭissavesūti nimittatthe bhummavacanaṃ.
༢༡༤. ཀམྨཝཱཙཱཔརིཡོསཱནེ ཝུཊྛིཏཱ ཧོནྟཱིཏི སམྦནྡྷོ། ཏཏྠཱཏི ཨདྷིཀརཎཝཱུཔསམཊྛཱནེ། ཨཉྙཱཝིཧིཏཱཔཱིཏི ཨདྷིཀརཎཝིནིཙྪཡཏོ ཨཉྙསྨིཾ ཋཱནེ ཙིཏྟཾ ཨཱཝིཧིཏཱཔི ཋཔིཏཱཔི། ཨུཔསམྤདམཎྜལཏོཏི ཨུཔསམྤདསཱིམབིམྦཏོ, ཡེ པནཱཏི བྷིཀྑཱུ པན, དིཊྛཱཝིཀམྨཾ ཀརོནྟཱིཏི ཝཱ ཨནཱགཏཱཏི ཝཱ ནིསིནྣཱཏི ཝཱ སམྦནྡྷོ། ཏེཧི ཝཱཏི ཨདྷིཀརཎཾ ཝིནིཙྪིནནྟེཧི བྷིཀྑཱུཧི ཝཱ། ཏཏྠཱཏི ཨདྷིཀརཎཝིནིཙྪིཏཊྛཱནཾ། ཚནྡཾ དཏྭཱཏི ཚནྡཾ སངྒྷསྶ དཏྭཱ། པརིཝེཎཱདཱིསཱུཏིཨཱདིསདྡེན ཨཱཝཱསཱདཡོ སངྒཎྷཱཏི། ཏེཏི བྷིཀྑཱུ།
214. Kammavācāpariyosāne vuṭṭhitā hontīti sambandho. Tatthāti adhikaraṇavūpasamaṭṭhāne. Aññāvihitāpīti adhikaraṇavinicchayato aññasmiṃ ṭhāne cittaṃ āvihitāpi ṭhapitāpi. Upasampadamaṇḍalatoti upasampadasīmabimbato, ye panāti bhikkhū pana, diṭṭhāvikammaṃ karontīti vā anāgatāti vā nisinnāti vā sambandho. Tehi vāti adhikaraṇaṃ vinicchinantehi bhikkhūhi vā. Tatthāti adhikaraṇavinicchitaṭṭhānaṃ. Chandaṃ datvāti chandaṃ saṅghassa datvā. Pariveṇādīsūtiādisaddena āvāsādayo saṅgaṇhāti. Teti bhikkhū.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / ཙཱུལ༹ཝགྒཔཱལི༹ • Cūḷavaggapāḷi / ༧. ཏིཎཝཏྠཱརཀཾ • 7. Tiṇavatthārakaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཏིཎཝཏྠཱརཀཱདིཀཐཱ • Tiṇavatthārakādikathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / སཏིཝིནཡཱདིཀཐཱཝཎྞནཱ • Sativinayādikathāvaṇṇanā
